ઓં ભ॒દ્રં કર્ણે॑ભિઃ શૃણુ॒યામ॑ દેવાઃ । ભ॒દ્રં પ॑શ્યેમા॒ક્ષભિ॒ર્યજ॑ત્રાઃ । સ્થિ॒રૈરંગૈ᳚સ્તુષ્ટુ॒વાગ્મ્ સ॑સ્ત॒નૂભિઃ॑ । વ્યશે॑મ દે॒વહિ॑તં॒-યઁદાયુઃ॑ । સ્વ॒સ્તિ ન॒ ઇંદ્રો॑ વૃ॒દ્ધશ્ર॑વાઃ । સ્વ॒સ્તિ નઃ॑ પૂ॒ષા વિ॒શ્વવે॑દાઃ । સ્વ॒સ્તિ ન॒સ્તાર્ક્ષ્યો॒ અરિ॑ષ્ટનેમિઃ । સ્વ॒સ્તિ નો॒ બૃહ॒સ્પતિ॑ર્દધાતુ । ઓં શાંતિઃ॒ શાંતિઃ॒ શાંતિઃ॑ ॥
ઓં અથ સૂર્યાથર્વાંગિરસં-વ્યાઁ᳚ખ્યાસ્યા॒મઃ । બ્રહ્મા ઋ॒ષિઃ । ગાય॑ત્રી છં॒દઃ । આદિ॑ત્યો દે॒વતા । હંસઃ॑ સો॒ઽહમગ્નિનારાયણ યુ॑ક્તં બી॒જમ્ । હૃલ્લે॑ખા શ॒ક્તિઃ । વિયદાદિસર્ગસંયુઁ॑ક્તં કી॒લકમ્ । ચતુર્વિધપુરુષાર્થ સિદ્ધ્યર્થે વિ॑નિયો॒ગઃ ।
ષટ્સ્વરારૂઢે॑ન બીજે॒ન ષડં॑ગં ર॒ક્તાંબુ॑જસંસ્થિ॒તં સપ્તાશ્વ॑રથિ॒નં હિર॑ણ્યવ॒ર્ણં ચ॑તુર્ભુ॒જં પદ્મદ્વયાઽભયવર॑દહ॒સ્તં કાલચક્ર॑પ્રણેતા॒રં શ્રીસૂર્યનારાય॒ણં-યઁ એ॑વં-વેઁ॒દ સ વૈ બ્રા᳚હ્મ॒ણઃ ।
ઓં ભૂર્ભુવઃ॒ સુવઃ॑ । તત્સ॑વિ॒તુર્વરે᳚ણ્યં॒ ભર્ગો॑ દે॒વસ્ય॑ ધીમહિ । ધિયો॒ યો નઃ॑ પ્રચો॒દયા᳚ત્ । સૂર્ય॑ આ॒ત્મા જગ॑તસ્ત॒સ્થુષ॑શ્ચ । સૂર્યા॒દ્વૈ ખલ્વિ॒માનિ॒ ભૂતા॑નિ॒ જાયં॑તે । સૂર્યા᳚દ્ય॒જ્ઞઃ પર્જન્યો᳚ઽન્નમા॒ત્મા ।
નમ॑સ્તે આદિત્ય । ત્વમે॒વ પ્ર॒ત્યક્ષં॒ કર્મ॑ કર્તાસિ । ત્વમે॒વ પ્ર॒ત્યક્ષં॒ બ્રહ્મા॑ઽસિ । ત્વમે॒વ પ્ર॒ત્યક્ષં॒-વિઁષ્ણુ॑રસિ । ત્વમે॒વ પ્ર॒ત્યક્ષં॒ રુદ્રો॑ઽસિ । ત્વમે॒વ પ્ર॒ત્યક્ષ॒મૃગ॑સિ । ત્વમે॒વ પ્ર॒ત્યક્ષં॒-યઁજુ॑રસિ । ત્વમે॒વ પ્ર॒ત્યક્ષં॒ સામા॑સિ । ત્વમે॒વ પ્ર॒ત્યક્ષ॒મથ॑ર્વાસિ । ત્વમે॒વ સર્વં॑ છંદો॒ઽસિ । આ॒દિ॒ત્યાદ્વા॑યુર્જા॒યતે । આ॒દિ॒ત્યાદ્ભૂ॑મિર્જા॒યતે । આ॒દિ॒ત્યાદાપો॑ જાયં॒તે । આ॒દિ॒ત્યાજ્જ્યોતિ॑ર્જાય॒તે ।
આ॒દિ॒ત્યાદ્વ્યોમ દિશો॑ જાયં॒તે ।
આ॒દિ॒ત્યાદ્દે॑વા જાયં॒તે । આ॒દિ॒ત્યાદ્વે॑દા જાયં॒તે । આ॒દિ॒ત્યો વા એ॒ષ એ॒તન્મં॒ડલં॒ તપ॑તિ । અ॒સાવા॑દિ॒ત્યો બ્ર॒હ્મા । આ॒દિ॒ત્યોઽંતઃકરણ મનોબુદ્ધિ ચિત્તા॑હંકા॒રાઃ । આ॒દિ॒ત્યો વૈ વ્યાનઃ સમાનોદાનોઽપા॑નઃ પ્રા॒ણઃ ।
આ॒દિ॒ત્યો વૈ શ્રોત્ર ત્વક્ ચક્ષૂરસ॑નઘ્રા॒ણાઃ । આ॒દિ॒ત્યો વૈ વાક્પાણિપાદપા॑યૂપ॒સ્થાઃ । આ॒દિ॒ત્યો વૈ શબ્દસ્પર્શરૂપર॑સગં॒ધાઃ । આ॒દિ॒ત્યો વૈ વચનાદાનાગમન વિસ॑ર્ગાનં॒દાઃ । આનંદમયો વિજ્ઞાનમયો વિજ્ઞાનઘન॑ આદિ॒ત્યઃ । નમો મિત્રાય ભાનવે મૃત્યો᳚ર્મા પા॒હિ । ભ્રાજિષ્ણવે વિશ્વહેત॑વે ન॒મઃ ।
સૂર્યાદ્ભવંતિ॑ ભૂતા॒નિ સૂર્યેણ પાલિ॑તાનિ॒ તુ । સૂર્યે લયં પ્રા᳚પ્નુવં॒તિ યઃ સૂર્યઃ સોઽહ॑મેવ॒ ચ । ચક્ષુ॑ર્નો દે॒વઃ સ॑વિ॒તા ચક્ષુ॑ર્ન ઉ॒ત પ॒ર્વતઃ॑ । ચક્ષુ॑ર્ધા॒તા દ॑ધાતુ નઃ ।
આ॒દિ॒ત્યાય॑ વિ॒દ્મહે॑ સહસ્રકિર॒ણાય॑ ધીમહિ । તન્નઃ॑ સૂર્યઃ પ્રચો॒દયા᳚ત્ ।
સ॒વિ॒તા પ॒શ્ચાત્તા᳚ત્ સવિ॒તા પુ॒રસ્તા᳚ત્ સવિ॒તોત્ત॒રાત્તા᳚ત્ સવિ॒તાઽધ॒રાત્તા᳚ત્ સવિ॒તા નઃ॑ સુવતુ સ॒ર્વતા᳚તિગ્મ્ સવિ॒તા નો᳚ રાસતાં દીર્ઘ॒માયુઃ॑ ।
ઓમિત્યેકાક્ષ॑રં બ્ર॒હ્મ । ઘૃણિ॒રિતિ॒ દ્વે અ॒ક્ષરે᳚ । સૂર્ય॒ ઇત્યક્ષ॑રદ્વ॒યમ્ । આ॒દિ॒ત્ય ઇતિ॒ ત્રીણ્યક્ષ॑રાણિ । એતસ્યૈવ સૂર્યસ્યાષ્ટાક્ષ॑રો મ॒નુઃ ।
યઃ સદાહરહ॑ર્જપ॒તિ સ વૈ બ્રાહ્મ॑ણો ભ॒વતિ સ વૈ બ્રાહ્મ॑ણો ભ॒વતિ । સૂર્યાભિમુ॑ખો જ॒પ્ત્વા મહાવ્યાધિ ભયા᳚ત્ પ્રમુ॒ચ્યતે । અલ॑ક્ષ્મીર્ન॒શ્યતિ । અભક્ષ્ય ભક્ષણાત્ પૂ॑તો ભ॒વતિ । અગમ્યાગમનાત્ પૂ॑તો ભ॒વતિ । પતિત સંભાષણાત્ પૂ॑તો ભ॒વતિ । અસત્ સંભાષણાત્ પૂ॑તો ભ॒વતિ । અસત્ સંભાષણાત્પૂ॑તો ભ॒વતિ ।
મધ્યાહ્ને સૂર્યાભિ॑મુખઃ પ॒ઠેત્ । સદ્યોત્પન્નપંચમહાપાતકા᳚ત્ પ્રમુ॒ચ્યતે । સૈષા સાવિ॑ત્રીં-વિઁ॒દ્યાં ન કિંચિદપિ ન કસ્મૈચિ॑ત્ પ્રશં॒સયેત્ । ય એ॒તાં મહાભાગઃ પ્રા॑તઃ પ॒ઠતિ સ ભાગ્ય॑વાન્ જા॒યતે પ॑શૂન્વિં॒દતિ । વેદા᳚ર્થં-લઁ॒ભતે । ત્રિકાલમે॑તજ્જ॒પ્ત્વા ક્રતુશતફલમ॑વાપ્નો॒તિ । હસ્તાદિ॑ત્યે જ॒પતિ સ મહામૃ॑ત્યું ત॒રતિ સ મહામૃ॑ત્યું ત॒રતિ ય એ॑વં-વેઁ॒દ । ઇત્યુ॑પ॒નિષ॑ત્ ।
ઓં ભ॒દ્રં કર્ણે॑ભિઃ શૃણુ॒યામ॑ દેવાઃ । ભ॒દ્રં પ॑શ્યેમા॒ક્ષભિ॒ર્યજ॑ત્રાઃ । સ્થિ॒રૈરંગૈ᳚સ્તુષ્ટુ॒વાગ્મ્ સ॑સ્ત॒નૂભિઃ॑ । વ્યશે॑મ દે॒વહિ॑તં॒-યઁદાયુઃ॑ । સ્વ॒સ્તિ ન॒ ઇંદ્રો॑ વૃ॒દ્ધશ્ર॑વાઃ । સ્વ॒સ્તિ નઃ॑ પૂ॒ષા વિ॒શ્વવે॑દાઃ । સ્વ॒સ્તિ ન॒સ્તાર્ક્ષ્યો॒ અરિ॑ષ્ટનેમિઃ । સ્વ॒સ્તિ નો॒ બૃહ॒સ્પતિ॑ર્દધાતુ । ઓં શાંતિઃ॒ શાંતિઃ॒ શાંતિઃ॑ ॥
