viṣṇōrvīryāṇi kō vā kathayatu dharaṇēḥ kaścha rēṇūnmimītē
yasyaivāṅghritrayēṇa trijagadabhimitaṃ mōdatē pūrṇasampat
yōsau viśvāni dhattē priyamiha paramaṃ dhāma tasyābhiyāyāṃ
tvadbhaktā yatra mādyantyamṛtarasamarandasya yatra pravāhaḥ ॥1॥
ādyāyāśēṣakartrē pratinimiṣanavīnāya bhartrē vibhūtē-
rbhaktātmā viṣṇavē yaḥ pradiśati havirādīni yajñārchanādau ।
kṛṣṇādyaṃ janma yō vā mahadiha mahatō varṇayētsō'yamēva
prītaḥ pūrṇō yaśōbhistvaritamabhisarēt prāpyamantē padaṃ tē ॥2॥
hē stōtāraḥ kavīndrāstamiha khalu yathā chētayadhvē tathaiva
vyaktaṃ vēdasya sāraṃ praṇuvata jananōpāttalīlākathābhiḥ ।
jānantaśchāsya nāmānyakhilasukhakarāṇīti saṅkīrtayadhvaṃ
hē viṣṇō kīrtanādyaistava khalu mahatastattvabōdhaṃ bhajēyam ॥3॥
viṣṇōḥ karmāṇi sampaśyata manasi sadā yaiḥ sa dharmānabadhnād
yānīndrasyaiṣa bhṛtyaḥ priyasakha iva cha vyātanōt kṣēmakārī ।
vīkṣantē yōgasiddhāḥ parapadamaniśaṃ yasya samyakprakāśaṃ
viprēndrā jāgarūkāḥ kṛtabahunutayō yachcha nirbhāsayantē ॥4॥
nō jātō jāyamānō'pi cha samadhigatastvanmahimnō'vasānaṃ
dēva śrēyāṃsi vidvān pratimuhurapi tē nāma śaṃsāmi viṣṇō ।
taṃ tvāṃ saṃstaumi nānāvidhanutivachanairasya lōkatrayasyā-
pyūrdhvaṃ vibhrājamānē virachitavasatiṃ tatra vaikuṇṭhalōkē ॥5॥
āpaḥ sṛṣṭyādijanyāḥ prathamamayi vibhō garbhadēśē dadhustvāṃ
yatra tvayyēva jīvā jalaśayana harē saṅgatā aikyamāpan ।
tasyājasya prabhō tē vinihitamabhavat padmamēkaṃ hi nābhau
dikpatraṃ yat kilāhuḥ kanakadharaṇibhṛt karṇikaṃ lōkarūpam ॥6॥
hē lōkā viṣṇurētadbhuvanamajanayattanna jānītha yūyaṃ
yuṣmākaṃ hyantarasthaṃ kimapi tadaparaṃ vidyatē viṣṇurūpam ।
nīhāraprakhyamāyāparivṛtamanasō mōhitā nāmarūpaiḥ
prāṇaprītyēkatṛptāścharatha makhaparā hanta nēchChā mukundē ॥7॥
mūrdhnāmakṣṇāṃ padānāṃ vahasi khalu sahasrāṇi sampūrya viśvaṃ
tatprōtkramyāpi tiṣṭhan parimitavivarē bhāsi chittāntarē'pi ।
bhūtaṃ bhavyaṃ cha sarvaṃ parapuruṣa bhavān kiñcha dēhēndriyādi-
ṣvāviṣṭō'pyudgatatvādamṛtasukharasaṃ chānubhuṅkṣē tvamēva ॥8॥
yattu trailōkyarūpaṃ dadhadapi cha tatō nirgatō'nantaśuddha-
jñānātmā vartasē tvaṃ tava khalu mahimā sō'pi tāvān kimanyat ।
stōkastē bhāga ēvākhilabhuvanatayā dṛśyatē tryaṃśakalpaṃ
bhūyiṣṭhaṃ sāndramōdātmakamupari tatō bhāti tasmai namastē ॥9॥
avyaktaṃ tē svarūpaṃ duradhigamatamaṃ tattu śuddhaikasattvaṃ
vyaktaṃ chāpyētadēva sphuṭamamṛtarasāmbhōdhikallōlatulyam ।
sarvōtkṛṣṭāmabhīṣṭāṃ tadiha guṇarasēnaiva chittaṃ harantīṃ
mūrtiṃ tē saṃśrayē'haṃ pavanapurapatē pāhi māṃ kṛṣṇa rōgāt ॥10॥
