ସ୍କଂଦ ଉଵାଚ ।
ଋଣଗ୍ରସ୍ତନରାଣାଂ ତୁ ଋଣମୁକ୍ତିଃ କଥଂ ଭଵେତ୍ ।

ବ୍ରହ୍ମୋଵାଚ ।
ଵକ୍ଷ୍ୟେଽହଂ ସର୍ଵଲୋକାନାଂ ହିତାର୍ଥଂ ହିତକାମଦମ୍ ॥

ଅସ୍ୟ ଶ୍ରୀ ଅଂଗାରକ ସ୍ତୋତ୍ର ମହାମଂତ୍ରସ୍ୟ ଗୌତମ ଋଷିଃ, ଅନୁଷ୍ଟୁପ୍ ଛଂଦଃ, ଅଂଗାରକୋ ଦେଵତା ମମ ଋଣ ଵିମୋଚନାର୍ଥେ ଜପେ ଵିନିୟୋଗଃ ।

ଧ୍ୟାନମ୍ –
ଧରଣୀ ଗର୍ଭ ସଂଭୂତଂ ଵିଦ୍ୟୁତ୍କାଂତି ସମପ୍ରଭମ୍ ।
କୁମାରଂ ଶକ୍ତିହସ୍ତଂ ତଂ କୁଜଂ ପ୍ରଣମାମ୍ୟହମ୍ ॥ 1 ॥

ରକ୍ତମାଲ୍ୟାଂବରଧରଃ ଶୂଲଶକ୍ତିଗଦାଧରଃ ।
ଚତୁର୍ଭୁଜୋ ମେଷଗତୋ ଵରଦଶ୍ଚ ଧରାସୁତଃ ॥ 2 ॥

ଅଥ ସ୍ତୋତ୍ରମ୍ –
ମଂଗଳୋ ଭୂମିପୁତ୍ରଶ୍ଚ ଋଣହର୍ତା ଧନପ୍ରଦଃ ।
ସ୍ଥିରାସନୋ ମହାକାୟଃ ସର୍ଵକର୍ମାଵବୋଧକଃ ॥ 3 ॥

ଲୋହିତୋ ଲୋହିତାଂଗଶ୍ଚ ସାମଗାୟୀ କୃପାକରଃ ।
ଧର୍ମରାଜଃ କୁଜୋ ଭୌମୋ ଭୂମିଜୋ ଭୂମିନଂଦନଃ ॥ 4 ॥

ଅଂଗାରକୋ ୟମଶ୍ଚୈଵ ସର୍ଵରୋଗାପହାରକଃ ।
ସୃଷ୍ଟିକର୍ତାଽପହର୍ତା ଚ ସର୍ଵକାମଫଲପ୍ରଦଃ ॥ 5 ॥

ଭୂତିଦୋ ଗ୍ରହପୂଜ୍ୟଶ୍ଚ ଵକ୍ତ୍ରୋ ରକ୍ତଵପୁଃ ପ୍ରଭୁଃ ।
ଏତାନି କୁଜନାମାନି ୟୋ ନିତ୍ୟଂ ପ୍ରୟତଃ ପଠେତ୍ ।
ଋଣଂ ନ ଜାୟତେ ତସ୍ୟ ଧନଂ ପ୍ରାପ୍ନୋତ୍ୟସଂଶୟମ୍ ॥ 6 ॥

ରକ୍ତପୁଷ୍ପୈଶ୍ଚ ଗଂଧୈଶ୍ଚ ଦୀପଧୂପାଦିଭିସ୍ତଥା ।
ମଂଗଳଂ ପୂଜୟିତ୍ଵା ତୁ ମଂଗଳେଽହନି ସର୍ଵଦା ॥ 7 ॥

ଋଣରେଖାଃ ପ୍ରକର୍ତଵ୍ୟାଃ ଦଗ୍ଧାଂଗାରୈସ୍ତଦଗ୍ରତଃ ।
ସପ୍ତଵିଂଶତିନାମାନି ପଠିତ୍ଵା ତୁ ତଦଂତିକେ ॥ 8 ॥

ତାଶ୍ଚ ପ୍ରମାର୍ଜୟେତ୍ପଶ୍ଚାଦ୍ଵାମପାଦେନ ସଂସ୍ପୃଶନ୍ ।
ଏଵଂ କୃତ୍ଵା ନ ସଂଦେହୋ ଋଣହୀନୋ ଧନୀ ଭଵେତ୍ ॥ 9 ॥

ଭୂମିଜସ୍ୟ ପ୍ରସାଦେନ ଗ୍ରହପୀଡା ଵିନଶ୍ୟତି ।
ୟେନାର୍ଜିତା ଜଗତ୍କୀର୍ତିର୍ଭୂମିପୁତ୍ରେଣ ଶାଶ୍ଵତୀ ॥ 10 ॥

ଶତ୍ରଵଶ୍ଚ ହତା ୟେନ ଭୌମେନ ମହିତାତ୍ମନା ।
ସ ପ୍ରୀୟତାଂ ତୁ ଭୌମୋଽଦ୍ୟ ତୁଷ୍ଟୋ ଭୂୟାତ୍ ସଦା ମମ ॥ 11 ॥

ମୂଲମଂତ୍ରଃ –
ଅଂଗାରକ ମହୀପୁତ୍ର ଭଗଵନ୍ ଭକ୍ତଵତ୍ସଲ ।
ନମୋଽସ୍ତୁ ତେ ମମାଶେଷ ଋଣମାଶୁ ଵିମୋଚୟ ॥ 12 ॥

ଅର୍ଘ୍ୟମ୍ –
ଭୂମିପୁତ୍ର ମହାତେଜଃ ସ୍ଵେଦୋଦ୍ଭଵ ପିନାକିନଃ ।
ଋଣାର୍ତସ୍ତ୍ଵାଂ ପ୍ରପନ୍ନୋଽସ୍ମି ଗୃହାଣାର୍ଘ୍ୟଂ ନମୋଽସ୍ତୁ ତେ ॥ 13 ॥

ଇତି ଋଣ ଵିମୋଚନ ଅଂଗାରକ ସ୍ତୋତ୍ରମ୍ ॥