ଅରୁଣାୟ ଶରଣ୍ୟାୟ କରୁଣାରସସିଂଧଵେ ।
ଅସମାନବଲାୟାଽଽର୍ତରକ୍ଷକାୟ ନମୋ ନମଃ ॥ 1 ॥

ଆଦିତ୍ୟାୟାଽଽଦିଭୂତାୟ ଅଖିଲାଗମଵେଦିନେ ।
ଅଚ୍ୟୁତାୟାଽଖିଲଜ୍ଞାୟ ଅନଂତାୟ ନମୋ ନମଃ ॥ 2 ॥

ଇନାୟ ଵିଶ୍ଵରୂପାୟ ଇଜ୍ୟାୟୈଂଦ୍ରାୟ ଭାନଵେ ।
ଇଂଦିରାମଂଦିରାପ୍ତାୟ ଵଂଦନୀୟାୟ ତେ ନମଃ ॥ 3 ॥

ଈଶାୟ ସୁପ୍ରସନ୍ନାୟ ସୁଶୀଲାୟ ସୁଵର୍ଚସେ ।
ଵସୁପ୍ରଦାୟ ଵସଵେ ଵାସୁଦେଵାୟ ତେ ନମଃ ॥ 4 ॥

ଉଜ୍ଜ୍ଵଲାୟୋଗ୍ରରୂପାୟ ଊର୍ଧ୍ଵଗାୟ ଵିଵସ୍ଵତେ ।
ଉଦ୍ୟତ୍କିରଣଜାଲାୟ ହୃଷୀକେଶାୟ ତେ ନମଃ ॥ 5 ॥

ଊର୍ଜସ୍ଵଲାୟ ଵୀରାୟ ନିର୍ଜରାୟ ଜୟାୟ ଚ ।
ଊରୁଦ୍ଵୟାଭାଵରୂପୟୁକ୍ତସାରଥୟେ ନମଃ ॥ 6 ॥

ଋଷିଵଂଦ୍ୟାୟ ରୁଗ୍ଘଂତ୍ରେ ଋକ୍ଷଚକ୍ରଚରାୟ ଚ ।
ଋଜୁସ୍ଵଭାଵଚିତ୍ତାୟ ନିତ୍ୟସ୍ତୁତ୍ୟାୟ ତେ ନମଃ ॥ 7 ॥

ୠକାରମାତୃକାଵର୍ଣରୂପାୟୋଜ୍ଜ୍ଵଲତେଜସେ ।
ୠକ୍ଷାଧିନାଥମିତ୍ରାୟ ପୁଷ୍କରାକ୍ଷାୟ ତେ ନମଃ ॥ 8 ॥

ଲୁପ୍ତଦଂତାୟ ଶାଂତାୟ କାଂତିଦାୟ ଘନାୟ ଚ ।
କନତ୍କନକଭୂଷାୟ ଖଦ୍ୟୋତାୟ ନମୋ ନମଃ ॥ 9 ॥

ଲୂନିତାଖିଲଦୈତ୍ୟାୟ ସତ୍ୟାନଂଦସ୍ଵରୂପିଣେ ।
ଅପଵର୍ଗପ୍ରଦାୟାଽଽର୍ତଶରଣ୍ୟାୟ ନମୋ ନମଃ ॥ 10 ॥

ଏକାକିନେ ଭଗଵତେ ସୃଷ୍ଟିସ୍ଥିତ୍ୟଂତକାରିଣେ ।
ଗୁଣାତ୍ମନେ ଘୃଣିଭୃତେ ବୃହତେ ବ୍ରହ୍ମଣେ ନମଃ ॥ 11 ॥

ଐଶ୍ଵର୍ୟଦାୟ ଶର୍ଵାୟ ହରିଦଶ୍ଵାୟ ଶୌରୟେ ।
ଦଶଦିକ୍ସଂପ୍ରକାଶାୟ ଭକ୍ତଵଶ୍ୟାୟ ତେ ନମଃ ॥ 12 ॥

ଓଜସ୍କରାୟ ଜୟିନେ ଜଗଦାନଂଦହେତଵେ ।
ଜନ୍ମମୃତ୍ୟୁଜରାଵ୍ୟାଧିଵର୍ଜିତାୟ ନମୋ ନମଃ ॥ 13 ॥

ଔନ୍ନତ୍ୟପଦସଂଚାରରଥସ୍ଥାୟାତ୍ମରୂପିଣେ ।
କମନୀୟକରାୟାଽବ୍ଜଵଲ୍ଲଭାୟ ନମୋ ନମଃ ॥ 14 ॥

ଅଂତର୍ବହିଃପ୍ରକାଶାୟ ଅଚିଂତ୍ୟାୟାଽଽତ୍ମରୂପିଣେ ।
ଅଚ୍ୟୁତାୟ ସୁରେଶାୟ ପରସ୍ମୈ ଜ୍ୟୋତିଷେ ନମଃ ॥ 15 ॥

ଅହସ୍କରାୟ ରଵୟେ ହରୟେ ପରମାତ୍ମନେ ।
ତରୁଣାୟ ଵରେଣ୍ୟାୟ ଗ୍ରହାଣାଂ ପତୟେ ନମଃ ॥ 16 ॥

ଓଂ ନମୋ ଭାସ୍କରାୟାଽଽଦିମଧ୍ୟାଂତରହିତାୟ ଚ ।
ସୌଖ୍ୟପ୍ରଦାୟ ସକଲଜଗତାଂ ପତୟେ ନମଃ ॥ 17 ॥

ନମଃ ସୂର୍ୟାୟ କଵୟେ ନମୋ ନାରାୟଣାୟ ଚ ।
ନମୋ ନମଃ ପରେଶାୟ ତେଜୋରୂପାୟ ତେ ନମଃ ॥ 18 ॥

ଓଂ ଶ୍ରୀଂ ହିରଣ୍ୟଗର୍ଭାୟ ଓଂ ହ୍ରୀଂ ସଂପତ୍କରାୟ ଚ ।
ଓଂ ଐଂ ଇଷ୍ଟାର୍ଥଦାୟାଽନୁପ୍ରସନ୍ନାୟ ନମୋ ନମଃ ॥ 19 ॥

ଶ୍ରୀମତେ ଶ୍ରେୟସେ ଭକ୍ତକୋଟିସୌଖ୍ୟପ୍ରଦାୟିନେ ।
ନିଖିଲାଗମଵେଦ୍ୟାୟ ନିତ୍ୟାନଂଦାୟ ତେ ନମଃ ॥ 20 ॥

ଇତି ଶ୍ରୀ ସୂର୍ୟ ଅଷ୍ଟୋତ୍ତରଶତନାମ ସ୍ତୋତ୍ରମ୍ ।