ଶ୍ରୀସଦାଶିଵ ଉଵାଚ
ଶୃଣୁ ଦେଵି ଜଗଦ୍ଵଂଦ୍ୟେ ସ୍ତୋତ୍ରମେତଦନୁତ୍ତମମ୍ ।
ପଠନାଚ୍ଛ୍ରଵଣାଦ୍ୟସ୍ୟ ସର୍ଵସିଦ୍ଧୀଶ୍ଵରୋ ଭଵେତ୍ ॥ 1 ॥
ଅସୌଭାଗ୍ୟପ୍ରଶମନଂ ସୁଖସଂପଦ୍ଵିଵର୍ଧନମ୍ ।
ଅକାଲମୃତ୍ୟୁହରଣଂ ସର୍ଵାପଦ୍ଵିନିଵାରଣମ୍ ॥ 2 ॥
ଶ୍ରୀମଦାଦ୍ୟାକାଳିକାୟାଃ ସୁଖସାନ୍ନିଧ୍ୟକାରଣମ୍ ।
ସ୍ତଵସ୍ୟାସ୍ୟ ପ୍ରସୀଦେନ ତ୍ରିପୁରାରିରହଂ ପ୍ରିୟେ ॥ 3 ॥
ସ୍ତୋତ୍ରସ୍ୟାସ୍ୟ ଋଷିର୍ଦେଵି ସଦାଶିଵ ଉଦାହୃତଃ ।
ଛଂଦୋଽନୁଷ୍ଟୁବ୍ଦେଵତାଦ୍ୟା କାଳିକା ପରିକୀର୍ତିତା ।
ଧର୍ମକାମାର୍ଥମୋକ୍ଷେଷୁ ଵିନିୟୋଗଃ ପ୍ରକୀର୍ତିତଃ ॥ 4 ॥
ଅଥ ସ୍ତୋତ୍ରମ୍
ହ୍ରୀଂ କାଳୀ ଶ୍ରୀଂ କରାଳୀ ଚ କ୍ରୀଂ କଳ୍ୟାଣୀ କଳାଵତୀ ।
କମଲା କଲିଦର୍ପଘ୍ନୀ କପର୍ଦୀଶକୃପାନ୍ଵିତା ॥ 5 ॥
କାଳିକା କାଲମାତା ଚ କାଲାନଲସମଦ୍ୟୁତିଃ ।
କପର୍ଦିନୀ କରାଳାସ୍ୟା କରୁଣାମୃତସାଗରା ॥ 6 ॥
କୃପାମୟୀ କୃପାଧାରା କୃପାପାରା କୃପାଗମା ।
କୃଶାନୁଃ କପିଲା କୃଷ୍ଣା କୃଷ୍ଣାନଂଦଵିଵର୍ଧିନୀ ॥ 7 ॥
କାଲରାତ୍ରିଃ କାମରୂପା କାମପାଶଵିମୋଚିନୀ ।
କାଦଂବିନୀ କଳାଧାରା କଲିକଲ୍ମଷନାଶିନୀ ॥ 8 ॥
କୁମାରୀପୂଜନପ୍ରୀତା କୁମାରୀପୂଜକାଲୟା ।
କୁମାରୀଭୋଜନାନଂଦା କୁମାରୀରୂପଧାରିଣୀ ॥ 9 ॥
କଦଂବଵନସଂଚାରା କଦଂବଵନଵାସିନୀ ।
କଦଂବପୁଷ୍ପସଂତୋଷା କଦଂବପୁଷ୍ପମାଲିନୀ ॥ 10 ॥
କିଶୋରୀ କଲକଂଠା ଚ କଲନାଦନିନାଦିନୀ ।
କାଦଂବରୀପାନରତା ତଥା କାଦଂବରୀପ୍ରିୟା ॥ 11 ॥
କପାଲପାତ୍ରନିରତା କଂକାଲମାଲ୍ୟଧାରିଣୀ ।
କମଲାସନସଂତୁଷ୍ଟା କମଲାସନଵାସିନୀ ॥ 12 ॥
କମଲାଲୟମଧ୍ୟସ୍ଥା କମଲାମୋଦମୋଦିନୀ ।
କଲହଂସଗତିଃ କ୍ଲୈବ୍ୟନାଶିନୀ କାମରୂପିଣୀ ॥ 13 ॥
କାମରୂପକୃତାଵାସା କାମପୀଠଵିଲାସିନୀ ।
କମନୀୟା କଲ୍ପଲତା କମନୀୟଵିଭୂଷଣା ॥ 14 ॥
କମନୀୟଗୁଣାରାଧ୍ୟା କୋମଲାଂଗୀ କୃଶୋଦରୀ ।
କାରଣାମୃତସଂତୋଷା କାରଣାନଂଦସିଦ୍ଧିଦା ॥ 15 ॥
କାରଣାନଂଦଜାପେଷ୍ଟା କାରଣାର୍ଚନହର୍ଷିତା ।
କାରଣାର୍ଣଵସମ୍ମଗ୍ନା କାରଣଵ୍ରତପାଲିନୀ ॥ 16 ॥
କସ୍ତୂରୀସୌରଭାମୋଦା କସ୍ତୂରୀତିଲକୋଜ୍ଜ୍ଵଲା ।
କସ୍ତୂରୀପୂଜନରତା କସ୍ତୂରୀପୂଜକପ୍ରିୟା ॥ 17 ॥
କସ୍ତୂରୀଦାହଜନନୀ କସ୍ତୂରୀମୃଗତୋଷିଣୀ ।
କସ୍ତୂରୀଭୋଜନପ୍ରୀତା କର୍ପୂରାମୋଦମୋଦିତା ॥ 18 ॥
କର୍ପୂରମାଲାଭରଣା କର୍ପୂରଚଂଦନୋକ୍ଷିତା ।
କର୍ପୂରକାରଣାହ୍ଲାଦା କର୍ପୂରାମୃତପାୟିନୀ ॥ 19 ॥
କର୍ପୂରସାଗରସ୍ନାତା କର୍ପୂରସାଗରାଲୟା ।
କୂର୍ଚବୀଜଜପପ୍ରୀତା କୂର୍ଚଜାପପରାୟଣା ॥ 20 ॥
କୁଲୀନା କୌଲିକାରାଧ୍ୟା କୌଲିକପ୍ରିୟକାରିଣୀ ।
କୁଲାଚାରା କୌତୁକିନୀ କୁଲମାର୍ଗପ୍ରଦର୍ଶିନୀ ॥ 21 ॥
କାଶୀଶ୍ଵରୀ କଷ୍ଟହର୍ତ୍ରୀ କାଶୀଶଵରଦାୟିନୀ ।
କାଶୀଶ୍ଵରକୃତାମୋଦା କାଶୀଶ୍ଵରମନୋରମା ॥ 22 ॥
କଲମଂଜୀରଚରଣା କ୍ଵଣତ୍କାଂଚୀଵିଭୂଷଣା ।
କାଂଚନାଦ୍ରିକୃତାଗାରା କାଂଚନାଚଲକୌମୁଦୀ ॥ 23 ॥
କାମବୀଜଜପାନଂଦା କାମବୀଜସ୍ଵରୂପିଣୀ ।
କୁମତିଘ୍ନୀ କୁଲୀନାର୍ତିନାଶିନୀ କୁଲକାମିନୀ ॥ 24 ॥
କ୍ରୀଂ ହ୍ରୀଂ ଶ୍ରୀଂ ମଂତ୍ରଵର୍ଣେନ କାଲକଂଟକଘାତିନୀ ।
ଇତ୍ୟାଦ୍ୟାକାଳିକାଦେଵ୍ୟାଃ ଶତନାମ ପ୍ରକୀର୍ତିତମ୍ ॥ 25 ॥
କକାରକୂଟଘଟିତଂ କାଳୀରୂପସ୍ଵରୂପକମ୍ ।
ପୂଜାକାଲେ ପଠେଦ୍ୟସ୍ତୁ କାଳିକାକୃତମାନସଃ ॥ 26 ॥
ମଂତ୍ରସିଦ୍ଧିର୍ଭଵେଦାଶୁ ତସ୍ୟ କାଳୀ ପ୍ରସୀଦତି ।
ବୁଦ୍ଧିଂ ଵିଦ୍ୟାଂ ଚ ଲଭତେ ଗୁରୋରାଦେଶମାତ୍ରତଃ ॥ 27 ॥
ଧନଵାନ୍ କୀର୍ତିମାନ୍ ଭୂୟାଦ୍ଦାନଶୀଲୋ ଦୟାନ୍ଵିତଃ ।
ପୁତ୍ରପୌତ୍ରସୁଖୈଶ୍ଵର୍ୟୈର୍ମୋଦତେ ସାଧକୋ ଭୁଵି ॥ 28 ॥
ଭୌମାଵାସ୍ୟାନିଶାଭାଗେ ମପଂଚକସମନ୍ଵିତଃ ।
ପୂଜୟିତ୍ଵା ମହାକାଳୀମାଦ୍ୟାଂ ତ୍ରିଭୁଵନେଶ୍ଵରୀମ୍ ॥ 29 ॥
ପଠିତ୍ଵା ଶତନାମାନି ସାକ୍ଷାତ୍କାଳୀମୟୋ ଭଵେତ୍ ।
ନାସାଧ୍ୟଂ ଵିଦ୍ୟତେ ତସ୍ୟ ତ୍ରିଷୁ ଲୋକେଷୁ କିଂଚନ ॥ 30 ॥
ଵିଦ୍ୟାୟାଂ ଵାକ୍ପତିଃ ସାକ୍ଷାତ୍ ଧନେ ଧନପତିର୍ଭଵେତ୍ ।
ସମୁଦ୍ର ଇଵ ଗାଂଭୀର୍ୟେ ବଲେ ଚ ପଵନୋପମଃ ॥ 31 ॥
ତିଗ୍ମାଂଶୁରିଵ ଦୁଷ୍ପ୍ରେକ୍ଷ୍ୟଃ ଶଶିଵଚ୍ଛୁଭଦର୍ଶନଃ ।
ରୂପେ ମୂର୍ତିଧରଃ କାମୋ ୟୋଷିତାଂ ହୃଦୟଂଗମଃ ॥ 32 ॥
ସର୍ଵତ୍ର ଜୟମାପ୍ନୋତି ସ୍ତଵସ୍ୟାସ୍ୟ ପ୍ରସାଦତଃ ।
ୟଂ ୟଂ କାମଂ ପୁରସ୍କୃତ୍ୟ ସ୍ତୋତ୍ରମେତଦୁଦୀରୟେତ୍ ॥ 33 ॥
ତଂ ତଂ କାମମଵାପ୍ନୋତି ଶ୍ରୀମଦାଦ୍ୟାପ୍ରସାଦତଃ ।
ରଣେ ରାଜକୁଲେ ଦ୍ୟୂତେ ଵିଵାଦେ ପ୍ରାଣସଂକଟେ ॥ 34 ॥
ଦସ୍ୟୁଗ୍ରସ୍ତେ ଗ୍ରାମଦାହେ ସିଂହଵ୍ୟାଘ୍ରାଵୃତେ ତଥା ।
ଅରଣ୍ୟେ ପ୍ରାଂତରେ ଦୁର୍ଗେ ଗ୍ରହରାଜଭୟେଽପି ଵା ॥ 35 ॥
ଜ୍ଵରଦାହେ ଚିରଵ୍ୟାଧୌ ମହାରୋଗାଦିସଂକୁଲେ ।
ବାଲଗ୍ରହାଦି ରୋଗେ ଚ ତଥା ଦୁଃସ୍ଵପ୍ନଦର୍ଶନେ ॥ 36 ॥
ଦୁସ୍ତରେ ସଲିଲେ ଵାପି ପୋତେ ଵାତଵିପଦ୍ଗତେ ।
ଵିଚିଂତ୍ୟ ପରମାଂ ମାୟାମାଦ୍ୟାଂ କାଳୀଂ ପରାତ୍ପରାମ୍ ॥ 37 ॥
ୟଃ ପଠେଚ୍ଛତନାମାନି ଦୃଢଭକ୍ତିସମନ୍ଵିତଃ ।
ସର୍ଵାପଦ୍ଭ୍ୟୋ ଵିମୁଚ୍ୟେତ ଦେଵି ସତ୍ୟଂ ନ ସଂଶୟଃ ॥ 38 ॥
ନ ପାପେଭ୍ୟୋ ଭୟଂ ତସ୍ୟ ନ ରୋଗୋଭ୍ୟୋ ଭୟଂ କ୍ଵଚିତ୍ ।
ସର୍ଵତ୍ର ଵିଜୟସ୍ତସ୍ୟ ନ କୁତ୍ରାପି ପରାଭଵଃ ॥ 39 ॥
ତସ୍ୟ ଦର୍ଶନମାତ୍ରେଣ ପଲାୟଂତେ ଵିପଦ୍ଗଣାଃ ।
ସ ଵକ୍ତା ସର୍ଵଶାସ୍ତ୍ରାଣାଂ ସ ଭୋକ୍ତା ସର୍ଵସଂପଦାମ୍ ॥ 40 ॥
ସ କର୍ତା ଜାତିଧର୍ମାଣାଂ ଜ୍ଞାତୀନାଂ ପ୍ରଭୁରେଵ ସଃ ।
ଵାଣୀ ତସ୍ୟ ଵସେଦ୍ଵକ୍ତ୍ରେ କମଲା ନିଶ୍ଚଲା ଗୃହେ ॥ 41 ॥
ତନ୍ନାମ୍ନା ମାନଵାଃ ସର୍ଵେ ପ୍ରଣମଂତି ସସଂଭ୍ରମାଃ ।
ଦୃଷ୍ଟ୍ୟା ତସ୍ୟ ତୃଣାୟଂତେ ହ୍ୟଣିମାଦ୍ୟଷ୍ଟସିଦ୍ଧୟଃ ॥ 42 ॥
ଆଦ୍ୟାକାଳୀସ୍ଵରୂପାଖ୍ୟଂ ଶତନାମ ପ୍ରକୀର୍ତିତମ୍ ।
ଅଷ୍ଟୋତ୍ତରଶତାଵୃତ୍ୟା ପୁରଶ୍ଚର୍ୟାଽସ୍ୟ ଗୀୟତେ ॥ 43 ॥
ପୁରସ୍କ୍ରିୟାନ୍ଵିତଂ ସ୍ତୋତ୍ରଂ ସର୍ଵାଭୀଷ୍ଟଫଲପ୍ରଦମ୍ ।
ଶତନାମସ୍ତୁତିମିମାମାଦ୍ୟାକାଳୀସ୍ଵରୂପିଣୀମ୍ ॥ 44 ॥
ପଠେଦ୍ଵା ପାଠୟେଦ୍ଵାପି ଶୃଣୁୟାଚ୍ଛ୍ରାଵୟେଦପି ।
ସର୍ଵପାପଵିନିର୍ମୁକ୍ତୋ ବ୍ରହ୍ମସାୟୁଜ୍ୟମାପ୍ନୁୟାତ୍ ॥ 45 ॥
ଇତି ମହାନିର୍ଵାଣତଂତ୍ରେ ସପ୍ତମୋଲ୍ଲାସାଂତର୍ଗତଂ ଶ୍ରୀ ଆଦ୍ୟା କାଳିକା ଶତନାମ ସ୍ତୋତ୍ରମ୍ ॥
