ಅಥ ಚರಣಶೃಙ್ಗರಹಿತ ಶ್ರೀ ನಟರಾಜ ಸ್ತೋತ್ರಂ
ಸದಞ್ಚಿತ-ಮುದಞ್ಚಿತ ನಿಕುಞ್ಚಿತ ಪದಂ ಝಲಝಲಂ-ಚಲಿತ ಮಞ್ಜು ಕಟಕಮ್ ।
ಪತಞ್ಜಲಿ ದೃಗಞ್ಜನ-ಮನಞ್ಜನ-ಮಚಞ್ಚಲಪದಂ ಜನನ ಭಞ್ಜನ ಕರಮ್ ।
ಕದಮ್ಬರುಚಿಮಮ್ಬರವಸಂ ಪರಮಮಮ್ಬುದ ಕದಮ್ಬ ಕವಿಡಮ್ಬಕ ಗಲಮ್
ಚಿದಮ್ಬುಧಿ ಮಣಿಂ ಬುಧ ಹೃದಮ್ಬುಜ ರವಿಂ ಪರ ಚಿದಮ್ಬರ ನಟಂ ಹೃದಿ ಭಜ ॥ 1 ॥
ಹರಂ ತ್ರಿಪುರ ಭಞ್ಜನ-ಮನನ್ತಕೃತಕಙ್ಕಣ-ಮಖಣ್ಡದಯ-ಮನ್ತರಹಿತಂ
ವಿರಿಞ್ಚಿಸುರಸಂಹತಿಪುರನ್ಧರ ವಿಚಿನ್ತಿತಪದಂ ತರುಣಚನ್ದ್ರಮಕುಟಮ್ ।
ಪರಂ ಪದ ವಿಖಣ್ಡಿತಯಮಂ ಭಸಿತ ಮಣ್ಡಿತತನುಂ ಮದನವಞ್ಚನ ಪರಂ
ಚಿರನ್ತನಮಮುಂ ಪ್ರಣವಸಞ್ಚಿತನಿಧಿಂ ಪರ ಚಿದಮ್ಬರ ನಟಂ ಹೃದಿ ಭಜ ॥ 2 ॥
ಅವನ್ತಮಖಿಲಂ ಜಗದಭಙ್ಗ ಗುಣತುಙ್ಗಮಮತಂ ಧೃತವಿಧುಂ ಸುರಸರಿತ್-
ತರಙ್ಗ ನಿಕುರುಮ್ಬ ಧೃತಿ ಲಮ್ಪಟ ಜಟಂ ಶಮನದಮ್ಭಸುಹರಂ ಭವಹರಮ್ ।
ಶಿವಂ ದಶದಿಗನ್ತರ ವಿಜೃಮ್ಭಿತಕರಂ ಕರಲಸನ್ಮೃಗಶಿಶುಂ ಪಶುಪತಿಂ
ಹರಂ ಶಶಿಧನಞ್ಜಯಪತಙ್ಗನಯನಂ ಪರ ಚಿದಮ್ಬರ ನಟಂ ಹೃದಿ ಭಜ ॥ 3 ॥
ಅನನ್ತನವರತ್ನವಿಲಸತ್ಕಟಕಕಿಙ್ಕಿಣಿಝಲಂ ಝಲಝಲಂ ಝಲರವಂ
ಮುಕುನ್ದವಿಧಿ ಹಸ್ತಗತಮದ್ದಲ ಲಯಧ್ವನಿಧಿಮಿದ್ಧಿಮಿತ ನರ್ತನ ಪದಮ್ ।
ಶಕುನ್ತರಥ ಬರ್ಹಿರಥ ನನ್ದಿಮುಖ ಭೃಙ್ಗಿರಿಟಿಸಙ್ಘನಿಕಟಂ ಭಯಹರಮ್
ಸನನ್ದ ಸನಕ ಪ್ರಮುಖ ವನ್ದಿತ ಪದಂ ಪರ ಚಿದಮ್ಬರ ನಟಂ ಹೃದಿ ಭಜ ॥ 4 ॥
ಅನನ್ತಮಹಸಂ ತ್ರಿದಶವನ್ದ್ಯ ಚರಣಂ ಮುನಿ ಹೃದನ್ತರ ವಸನ್ತಮಮಲಮ್
ಕಬನ್ಧ ವಿಯದಿನ್ದ್ವವನಿ ಗನ್ಧವಹ ವಹ್ನಿಮಖ ಬನ್ಧುರವಿಮಞ್ಜು ವಪುಷಮ್ ।
ಅನನ್ತವಿಭವಂ ತ್ರಿಜಗದನ್ತರ ಮಣಿಂ ತ್ರಿನಯನಂ ತ್ರಿಪುರ ಖಣ್ಡನ ಪರಮ್
ಸನನ್ದ ಮುನಿ ವನ್ದಿತ ಪದಂ ಸಕರುಣಂ ಪರ ಚಿದಮ್ಬರ ನಟಂ ಹೃದಿ ಭಜ ॥ 5 ॥
ಅಚಿನ್ತ್ಯಮಲಿವೃನ್ದ ರುಚಿ ಬನ್ಧುರಗಲಂ ಕುರಿತ ಕುನ್ದ ನಿಕುರುಮ್ಬ ಧವಲಮ್
ಮುಕುನ್ದ ಸುರ ವೃನ್ದ ಬಲ ಹನ್ತೃ ಕೃತ ವನ್ದನ ಲಸನ್ತಮಹಿಕುಣ್ಡಲ ಧರಮ್ ।
ಅಕಮ್ಪಮನುಕಮ್ಪಿತ ರತಿಂ ಸುಜನ ಮಙ್ಗಲನಿಧಿಂ ಗಜಹರಂ ಪಶುಪತಿಮ್
ಧನಞ್ಜಯ ನುತಂ ಪ್ರಣತ ರಞ್ಜನಪರಂ ಪರ ಚಿದಮ್ಬರ ನಟಂ ಹೃದಿ ಭಜ ॥ 6 ॥
ಪರಂ ಸುರವರಂ ಪುರಹರಂ ಪಶುಪತಿಂ ಜನಿತ ದನ್ತಿಮುಖ ಷಣ್ಮುಖಮಮುಂ
ಮೃಡಂ ಕನಕ ಪಿಙ್ಗಲ ಜಟಂ ಸನಕ ಪಙ್ಕಜ ರವಿಂ ಸುಮನಸಂ ಹಿಮರುಚಿಮ್ ।
ಅಸಙ್ಘಮನಸಂ ಜಲಧಿ ಜನ್ಮಗರಲಂ ಕವಲಯನ್ತ ಮತುಲಂ ಗುಣನಿಧಿಮ್
ಸನನ್ದ ವರದಂ ಶಮಿತಮಿನ್ದು ವದನಂ ಪರ ಚಿದಮ್ಬರ ನಟಂ ಹೃದಿ ಭಜ ॥ 7 ॥
ಅಜಂ ಕ್ಷಿತಿರಥಂ ಭುಜಗಪುಙ್ಗವಗುಣಂ ಕನಕ ಶೃಙ್ಗಿ ಧನುಷಂ ಕರಲಸತ್
ಕುರಙ್ಗ ಪೃಥು ಟಙ್ಕ ಪರಶುಂ ರುಚಿರ ಕುಙ್ಕುಮ ರುಚಿಂ ಡಮರುಕಂ ಚ ದಧತಮ್ ।
ಮುಕುನ್ದ ವಿಶಿಖಂ ನಮದವನ್ಧ್ಯ ಫಲದಂ ನಿಗಮ ವೃನ್ದ ತುರಗಂ ನಿರುಪಮಂ
ಸ ಚಣ್ಡಿಕಮಮುಂ ಝಟಿತಿ ಸಂಹೃತಪುರಂ ಪರ ಚಿದಮ್ಬರ ನಟಂ ಹೃದಿ ಭಜ ॥ 8 ॥
ಅನಙ್ಗಪರಿಪನ್ಥಿನಮಜಂ ಕ್ಷಿತಿ ಧುರನ್ಧರಮಲಂ ಕರುಣಯನ್ತಮಖಿಲಂ
ಜ್ವಲನ್ತಮನಲಂ ದಧತಮನ್ತಕರಿಪುಂ ಸತತಮಿನ್ದ್ರ ಸುರವನ್ದಿತಪದಮ್ ।
ಉದಞ್ಚದರವಿನ್ದಕುಲ ಬನ್ಧುಶತ ಬಿಮ್ಬರುಚಿ ಸಂಹತಿ ಸುಗನ್ಧಿ ವಪುಷಂ
ಪತಞ್ಜಲಿ ನುತಂ ಪ್ರಣವ ಪಞ್ಜರ ಶುಕಂ ಪರ ಚಿದಮ್ಬರ ನಟಂ ಹೃದಿ ಭಜ ॥ 9 ॥
ಇತಿ ಸ್ತವಮಮುಂ ಭುಜಗಪುಙ್ಗವ ಕೃತಂ ಪ್ರತಿದಿನಂ ಪಠತಿ ಯಃ ಕೃತಮುಖಃ
ಸದಃ ಪ್ರಭುಪದ ದ್ವಿತಯದರ್ಶನಪದಂ ಸುಲಲಿತಂ ಚರಣ ಶೃಙ್ಗ ರಹಿತಮ್ ।
ಸರಃ ಪ್ರಭವ ಸಮ್ಭವ ಹರಿತ್ಪತಿ ಹರಿಪ್ರಮುಖ ದಿವ್ಯನುತ ಶಙ್ಕರಪದಂ
ಸ ಗಚ್ಛತಿ ಪರಂ ನ ತು ಜನುರ್ಜಲನಿಧಿಂ ಪರಮದುಃಖಜನಕಂ ದುರಿತದಮ್ ॥ 10 ॥
ಇತಿ ಶ್ರೀ ಪತಞ್ಜಲಿಮುನಿ ಪ್ರಣೀತಂ ಚರಣಶೃಙ್ಗರಹಿತ ನಟರಾಜ ಸ್ತೋತ್ರಂ ಸಮ್ಪೂರ್ಣಮ್ ॥
