ಶಿಷ್ಯ ಉವಾಚ
ಅಖಣ್ಡೇ ಸಚ್ಚಿದಾನನ್ದೇ ನಿರ್ವಿಕಲ್ಪೈಕರೂಪಿಣಿ ।
ಸ್ಥಿತೇಽದ್ವಿತೀಯಭಾವೇಽಪಿ ಕಥಂ ಪೂಜಾ ವಿಧೀಯತೇ ॥ 1 ॥

ಪೂರ್ಣಸ್ಯಾವಾಹನಂ ಕುತ್ರ ಸರ್ವಾಧಾರಸ್ಯ ಚಾಸನಮ್ ।
ಸ್ವಚ್ಛಸ್ಯ ಪಾದ್ಯಮರ್ಘ್ಯಂ ಚ ಶುದ್ಧಸ್ಯಾಚಮನಂ ಕುತಃ ॥ 2 ॥

ನಿರ್ಮಲಸ್ಯ ಕುತಃ ಸ್ನಾನಂ ವಾಸೋ ವಿಶ್ವೋದರಸ್ಯ ಚ ।
ಅಗೋತ್ರಸ್ಯ ತ್ವವರ್ಣಸ್ಯ ಕುತಸ್ತಸ್ಯೋಪವೀತಕಮ್ ॥ 3 ॥

ನಿರ್ಲೇಪಸ್ಯ ಕುತೋ ಗನ್ಧಃ ಪುಷ್ಪಂ ನಿರ್ವಾಸನಸ್ಯ ಚ ।
ನಿರ್ವಿಶೇಷಸ್ಯ ಕಾ ಭೂಷಾ ಕೋಽಲಙ್ಕಾರೋ ನಿರಾಕೃತೇಃ ॥ 4 ॥

ನಿರಞ್ಜನಸ್ಯ ಕಿಂ ಧೂಪೈರ್ದೀಪೈರ್ವಾ ಸರ್ವಸಾಕ್ಷಿಣಃ ।
ನಿಜಾನನ್ದೈಕತೃಪ್ತಸ್ಯ ನೈವೇದ್ಯಂ ಕಿಂ ಭವೇದಿಹ ॥ 5 ॥

ವಿಶ್ವಾನನ್ದಯಿತುಸ್ತಸ್ಯ ಕಿಂ ತಾಮ್ಬೂಲಂ ಪ್ರಕಲ್ಪತೇ ।
ಸ್ವಯಮ್ಪ್ರಕಾಶಚಿದ್ರೂಪೋ ಯೋಽಸಾವರ್ಕಾದಿಭಾಸಕಃ ॥ 6 ॥

ಗೀಯತೇ ಶ್ರುತಿಭಿಸ್ತಸ್ಯ ನೀರಾಜನವಿಧಿಃ ಕುತಃ ।
ಪ್ರದಕ್ಷಿಣಮನನ್ತಸ್ಯ ಪ್ರಣಾಮೋಽದ್ವಯವಸ್ತುನಃ ॥ 7 ॥

ವೇದವಾಚಾಮವೇದ್ಯಸ್ಯ ಕಿಂ ವಾ ಸ್ತೋತ್ರಂ ವಿಧೀಯತೇ ।
ಅನ್ತರ್ಬಹಿಃ ಸಂಸ್ಥಿತಸ್ಯ ಉದ್ವಾಸನವಿಧಿಃ ಕುತಃ ॥ 8 ॥

ಶ್ರೀ ಗುರುರುವಾಚ
ಆರಾಧಯಾಮಿ ಮಣಿಸನ್ನಿಭಮಾತ್ಮಲಿಙ್ಗಮ್
ಮಾಯಾಪುರೀಹೃದಯಪಙ್ಕಜಸನ್ನಿವಿಷ್ಟಮ್ ।
ಶ್ರದ್ಧಾನದೀವಿಮಲಚಿತ್ತಜಲಾಭಿಷೇಕೈ-
ರ್ನಿತ್ಯಂ ಸಮಾಧಿಕುಸುಮೈರ್ನಪುನರ್ಭವಾಯ ॥ 9 ॥

ಅಯಮೇಕೋಽವಶಿಷ್ಟೋಽಸ್ಮೀತ್ಯೇವಮಾವಾಹಯೇಚ್ಛಿವಮ್ ।
ಆಸನಂ ಕಲ್ಪಯೇತ್ಪಶ್ಚಾತ್ಸ್ವಪ್ರತಿಷ್ಠಾತ್ಮಚಿನ್ತನಮ್ ॥ 10 ॥

ಪುಣ್ಯಪಾಪರಜಃಸಙ್ಗೋ ಮಮ ನಾಸ್ತೀತಿ ವೇದನಮ್ ।
ಪಾದ್ಯಂ ಸಮರ್ಪಯೇದ್ವಿದ್ವನ್ಸರ್ವಕಲ್ಮಷನಾಶನಮ್ ॥ 11 ॥

ಅನಾದಿಕಲ್ಪವಿಧೃತಮೂಲಾಜ್ಞಾನಜಲಾಞ್ಜಲಿಮ್ ।
ವಿಸೃಜೇದಾತ್ಮಲಿಙ್ಗಸ್ಯ ತದೇವಾರ್ಘ್ಯಸಮರ್ಪಣಮ್ ॥ 12 ॥

ಬ್ರಹ್ಮಾನನ್ದಾಬ್ಧಿಕಲ್ಲೋಲಕಣಕೋಟ್ಯಂಶಲೇಶಕಮ್ ।
ಪಿಬನ್ತೀನ್ದ್ರಾದಯ ಇತಿ ಧ್ಯಾನಮಾಚಮನಂ ಮತಮ್ ॥ 13 ॥

ಬ್ರಹ್ಮಾನನ್ದಜಲೇನೈವ ಲೋಕಾಃ ಸರ್ವೇ ಪರಿಪ್ಲುತಾಃ ।
ಅಚ್ಛೇದ್ಯೋಽಯಮಿತಿ ಧ್ಯಾನಮಭಿಷೇಚನಮಾತ್ಮನಃ ॥ 14 ॥

ನಿರಾವರಣಚೈತನ್ಯಂ ಪ್ರಕಾಶೋಽಸ್ಮೀತಿ ಚಿನ್ತನಮ್ ।
ಆತ್ಮಲಿಙ್ಗಸ್ಯ ಸದ್ವಸ್ತ್ರಮಿತ್ಯೇವಂ ಚಿನ್ತಯೇನ್ಮುನಿಃ ॥ 15 ॥

ತ್ರಿಗುಣಾತ್ಮಾಶೇಷಲೋಕಮಾಲಿಕಾಸೂತ್ರಮಸ್ಮ್ಯಹಮ್ ।
ಇತಿ ನಿಶ್ಚಯಮೇವಾತ್ರ ಹ್ಯುಪವೀತಂ ಪರಂ ಮತಮ್ ॥ 16 ॥

ಅನೇಕವಾಸನಾಮಿಶ್ರಪ್ರಪಞ್ಚೋಽಯಂ ಧೃತೋ ಮಯಾ ।
ನಾನ್ಯೇನೇತ್ಯನುಸನ್ಧಾನಮಾತ್ಮನಶ್ಚನ್ದನಂ ಭವೇತ್ ॥ 17 ॥

ರಜಃಸತ್ತ್ವತಮೋವೃತ್ತಿತ್ಯಾಗರೂಪೈಸ್ತಿಲಾಕ್ಷತೈಃ ।
ಆತ್ಮಲಿಙ್ಗಂ ಯಜೇನ್ನಿತ್ಯಂ ಜೀವನ್ಮುಕ್ತಿಪ್ರಸಿದ್ಧಯೇ ॥ 18 ॥

ಈಶ್ವರೋ ಗುರುರಾತ್ಮೇತಿ ಭೇದತ್ರಯವಿವರ್ಜಿತೈಃ ।
ಬಿಲ್ವಪತ್ರೈರದ್ವಿತೀಯೈರಾತ್ಮಲಿಙ್ಗಂ ಯಜೇಚ್ಛಿವಮ್ ॥ 19 ॥

ಸಮಸ್ತವಾಸನಾತ್ಯಾಗಂ ಧೂಪಂ ತಸ್ಯ ವಿಚಿನ್ತಯೇತ್ ।
ಜ್ಯೋತಿರ್ಮಯಾತ್ಮವಿಜ್ಞಾನಂ ದೀಪಂ ಸನ್ದರ್ಶಯೇದ್ಬುಧಃ ॥ 20 ॥

ನೈವೇದ್ಯಮಾತ್ಮಲಿಙ್ಗಸ್ಯ ಬ್ರಹ್ಮಾಣ್ಡಾಖ್ಯಂ ಮಹೋದನಮ್ ।
ಪಿಬಾನನ್ದರಸಂ ಸ್ವಾದು ಮೃತ್ಯುರಸ್ಯೋಪಸೇಚನಮ್ ॥ 21 ॥

ಅಜ್ಞಾನೋಚ್ಛಿಷ್ಟಕರಸ್ಯ ಕ್ಷಾಲನಂ ಜ್ಞಾನವಾರಿಣಾ ।
ವಿಶುದ್ಧಸ್ಯಾತ್ಮಲಿಙ್ಗಸ್ಯ ಹಸ್ತಪ್ರಕ್ಷಾಲನಂ ಸ್ಮರೇತ್ ॥ 22 ॥

ರಾಗಾದಿಗುಣಶೂನ್ಯಸ್ಯ ಶಿವಸ್ಯ ಪರಮಾತ್ಮನಃ ।
ಸರಾಗವಿಷಯಾಭ್ಯಾಸತ್ಯಾಗಸ್ತಾಮ್ಬೂಲಚರ್ವಣಮ್ ॥ 23 ॥

ಅಜ್ಞಾನಧ್ವಾನ್ತವಿಧ್ವಂಸಪ್ರಚಣ್ಡಮತಿಭಾಸ್ಕರಮ್ ।
ಆತ್ಮನೋ ಬ್ರಹ್ಮತಾಜ್ಞಾನಂ ನೀರಾಜನಮಿಹಾತ್ಮನಃ ॥ 24 ॥

ವಿವಿಧಬ್ರಹ್ಮಸನ್ದೃಷ್ಟಿರ್ಮಾಲಿಕಾಭಿರಲಙ್ಕೃತಮ್ ।
ಪೂರ್ಣಾನನ್ದಾತ್ಮತಾದೃಷ್ಟಿಂ ಪುಷ್ಪಾಞ್ಜಲಿಮನುಸ್ಮರೇತ್ ॥ 25 ॥

ಪರಿಭ್ರಮನ್ತಿ ಬ್ರಹ್ಮಾಣ್ಡಸಹಸ್ರಾಣಿ ಮಯೀಶ್ವರೇ ।
ಕೂಟಸ್ಥಾಚಲರೂಪೋಽಹಮಿತಿ ಧ್ಯಾನಂ ಪ್ರದಕ್ಷಿಣಮ್ ॥ 26 ॥

ವಿಶ್ವವನ್ದ್ಯೋಽಹಮೇವಾಸ್ಮಿ ನಾಸ್ತಿ ವನ್ದ್ಯೋ ಮದನ್ಯತಃ ।
ಇತ್ಯಾಲೋಚನಮೇವಾತ್ರ ಸ್ವಾತ್ಮಲಿಙ್ಗಸ್ಯ ವನ್ದನಮ್ ॥ 27 ॥

ಆತ್ಮನಃ ಸತ್ಕ್ರಿಯಾ ಪ್ರೋಕ್ತಾ ಕರ್ತವ್ಯಾಭಾವಭಾವನಾ ।
ನಾಮರೂಪವ್ಯತೀತಾತ್ಮಚಿನ್ತನಂ ನಾಮಕೀರ್ತನಮ್ ॥ 28 ॥

ಶ್ರವಣಂ ತಸ್ಯ ದೇವಸ್ಯ ಶ್ರೋತವ್ಯಾಭಾವಚಿನ್ತನಮ್ ।
ಮನನಂ ತ್ವಾತ್ಮಲಿಙ್ಗಸ್ಯ ಮನ್ತವ್ಯಾಭಾವಚಿನ್ತನಮ್ ॥ 29 ॥

ಧ್ಯಾತವ್ಯಾಭಾವವಿಜ್ಞಾನಂ ನಿದಿಧ್ಯಾಸನಮಾತ್ಮನಃ ।
ಸಮಸ್ತಭ್ರಾನ್ತಿವಿಕ್ಷೇಪರಾಹಿತ್ಯೇನಾತ್ಮನಿಷ್ಠತಾ ॥ 30 ॥

ಸಮಾಧಿರಾತ್ಮನೋ ನಾಮ ನಾನ್ಯಚ್ಚಿತ್ತಸ್ಯ ವಿಭ್ರಮಃ ।
ತತ್ರೈವ ಬಹ್ಮಣಿ ಸದಾ ಚಿತ್ತವಿಶ್ರಾನ್ತಿರಿಷ್ಯತೇ ॥ 31 ॥

ಏವಂ ವೇದಾನ್ತಕಲ್ಪೋಕ್ತಸ್ವಾತ್ಮಲಿಙ್ಗಪ್ರಪೂಜನಮ್ ।
ಕುರ್ವನ್ನಾ ಮರಣಂ ವಾಪಿ ಕ್ಷಣಂ ವಾ ಸುಸಮಾಹಿತಃ ॥ 32 ॥

ಸರ್ವದುರ್ವಾಸನಾಜಾಲಂ ಪದಪಾಂಸುಮಿವ ತ್ಯಜೇತ್ ।
ವಿಧೂಯಾಜ್ಞಾನದುಃಖೌಘಂ ಮೋಕ್ಷಾನನ್ದಂ ಸಮಶ್ನುತೇ ॥ 33 ॥