ಶ್ರೀನನ್ದಿಕೇಶ್ವರ ಉವಾಚ
ಭದ್ರಕಾಳೀಮಹಂ ವನ್ದೇ ವೀರಭದ್ರಸತೀಂ ಶಿವಾಮ್ ।
ಸುತಾಮ್ರಾರ್ಚಿತಪಾದಾಬ್ಜಂ ಸುಖಸೌಭಾಗ್ಯದಾಯಿನೀಮ್ ॥ 1 ॥
ಅಥ ಸ್ತೋತ್ರಮ್
ಭದ್ರಕಾಳೀ ಕಾಮರೂಪಾ ಮಹಾವಿದ್ಯಾ ಯಶಸ್ವಿನೀ ।
ಮಹಾಶ್ರಯಾ ಮಹಾಭಾಗಾ ದಕ್ಷಯಾಗವಿಭೇದಿನೀ ॥ 2 ॥
ರುದ್ರಕೋಪಸಮುದ್ಭೂತಾ ಭದ್ರಾ ಮುದ್ರಾ ಶಿವಙ್ಕರೀ ।
ಚನ್ದ್ರಿಕಾ ಚನ್ದ್ರವದನಾ ರೋಷತಾಮ್ರಾಕ್ಷಶೋಭಿನೀ ॥ 3 ॥
ಇನ್ದ್ರಾದಿದಮನೀ ಶಾನ್ತಾ ಚನ್ದ್ರಲೇಖಾವಿಭೂಷಿತಾ ।
ಭಕ್ತಾರ್ತಿಹಾರಿಣೀ ಮುಕ್ತಾ ಚಣ್ಡಿಕಾನನ್ದದಾಯಿನೀ ॥ 4 ॥
ಸೌದಾಮಿನೀ ಸುಧಾಮೂರ್ತಿಃ ದಿವ್ಯಾಲಙ್ಕಾರಭೂಷಿತಾ ।
ಸುವಾಸಿನೀ ಸುನಾಸಾ ಚ ತ್ರಿಕಾಲಜ್ಞಾ ಧುರನ್ಧರಾ ॥ 5 ॥
ಸರ್ವಜ್ಞಾ ಸರ್ವಲೋಕೇಶೀ ದೇವಯೋನಿರಯೋನಿಜಾ ।
ನಿರ್ಗುಣಾ ನಿರಹಙ್ಕಾರಾ ಲೋಕಕಳ್ಯಾಣಕಾರಿಣೀ ॥ 6 ॥
ಸರ್ವಲೋಕಪ್ರಿಯಾ ಗೌರೀ ಸರ್ವಗರ್ವವಿಮರ್ದಿನೀ ।
ತೇಜೋವತೀ ಮಹಾಮಾತಾ ಕೋಟಿಸೂರ್ಯಸಮಪ್ರಭಾ ॥ 7 ॥
ವೀರಭದ್ರಕೃತಾನನ್ದಭೋಗಿನೀ ವೀರಸೇವಿತಾ ।
ನಾರದಾದಿಮುನಿಸ್ತುತ್ಯಾ ನಿತ್ಯಾ ಸತ್ಯಾ ತಪಸ್ವಿನೀ ॥ 8 ॥
ಜ್ಞಾನರೂಪಾ ಕಳಾತೀತಾ ಭಕ್ತಾಭೀಷ್ಟಫಲಪ್ರದಾ ।
ಕೈಲಾಸನಿಲಯಾ ಶುಭ್ರಾ ಕ್ಷಮಾ ಶ್ರೀಃ ಸರ್ವಮಙ್ಗಳಾ ॥ 9 ॥
ಸಿದ್ಧವಿದ್ಯಾ ಮಹಾಶಕ್ತಿಃ ಕಾಮಿನೀ ಪದ್ಮಲೋಚನಾ ।
ದೇವಪ್ರಿಯಾ ದೈತ್ಯಹನ್ತ್ರೀ ದಕ್ಷಗರ್ವಾಪಹಾರಿಣೀ ॥ 10 ॥
ಶಿವಶಾಸನಕರ್ತ್ರೀ ಚ ಶೈವಾನನ್ದವಿಧಾಯಿನೀ ।
ಭವಪಾಶನಿಹನ್ತ್ರೀ ಚ ಸವನಾಙ್ಗಸುಕಾರಿಣೀ ॥ 11 ॥
ಲಮ್ಬೋದರೀ ಮಹಾಕಾಳೀ ಭೀಷಣಾಸ್ಯಾ ಸುರೇಶ್ವರೀ ।
ಮಹಾನಿದ್ರಾ ಯೋಗನಿದ್ರಾ ಪ್ರಜ್ಞಾ ವಾರ್ತಾ ಕ್ರಿಯಾವತೀ ॥ 12 ॥
ಪುತ್ರಪೌತ್ರಪ್ರದಾ ಸಾಧ್ವೀ ಸೇನಾಯುದ್ಧಸುಕಾಙ್ಕ್ಷಿಣೀ ।
ಇಚ್ಛಾ ಶಮ್ಭೋಃ ಕೃಪಾಸಿನ್ಧುಃ ಚಣ್ಡೀ ಚಣ್ಡಪರಾಕ್ರಮಾ ॥ 13 ॥
ಶೋಭಾ ಭಗವತೀ ಮಾಯಾ ದುರ್ಗಾ ನೀಲಾ ಮನೋಗತಿಃ ।
ಖೇಚರೀ ಖಡ್ಗಿನೀ ಚಕ್ರಹಸ್ತಾ ಶೂಲವಿಧಾರಿಣೀ ॥ 14 ॥
ಸುಬಾಣಾ ಶಕ್ತಿಹಸ್ತಾ ಚ ಪಾದಸಞ್ಚಾರಿಣೀ ಪರಾ ।
ತಪಃಸಿದ್ಧಿಪ್ರದಾ ದೇವೀ ವೀರಭದ್ರಸಹಾಯಿನೀ ॥ 15 ॥
ಧನಧಾನ್ಯಕರೀ ವಿಶ್ವಾ ಮನೋಮಾಲಿನ್ಯಹಾರಿಣೀ ।
ಸುನಕ್ಷತ್ರೋದ್ಭವಕರೀ ವಂಶವೃದ್ಧಿಪ್ರದಾಯಿನೀ ॥ 16 ॥
ಬ್ರಹ್ಮಾದಿಸುರಸಂಸೇವ್ಯಾ ಶಾಙ್ಕರೀ ಪ್ರಿಯಭಾಷಿಣೀ ।
ಭೂತಪ್ರೇತಪಿಶಾಚಾದಿಹಾರಿಣೀ ಸುಮನಸ್ವಿನೀ ॥ 17 ॥
ಪುಣ್ಯಕ್ಷೇತ್ರಕೃತಾವಾಸಾ ಪ್ರತ್ಯಕ್ಷಪರಮೇಶ್ವರೀ ।
ಏವಂ ನಾಮ್ನಾಂ ಭದ್ರಕಾಳ್ಯಾಃ ಶತಮಷ್ಟೋತ್ತರಂ ವಿದುಃ ॥ 18 ॥
ಪುಣ್ಯಂ ಯಶೋ ದೀರ್ಘಮಾಯುಃ ಪುತ್ರಪೌತ್ರಂ ಧನಂ ಬಹು ।
ದದಾತಿ ದೇವೀ ತಸ್ಯಾಶು ಯಃ ಪಠೇತ್ ಸ್ತೋತ್ರಮುತ್ತಮಮ್ ॥ 19 ॥
ಭೌಮವಾರೇ ಭೃಗೌ ಚೈವ ಪೌರ್ಣಮಾಸ್ಯಾಂ ವಿಶೇಷತಃ ।
ಪ್ರಾತಃ ಸ್ನಾತ್ವಾ ನಿತ್ಯಕರ್ಮ ವಿಧಾಯ ಚ ಸುಭಕ್ತಿಮಾನ್ ॥ 20 ॥
ವೀರಭದ್ರಾಲಯೇ ಭದ್ರಾಂ ಸಮ್ಪೂಜ್ಯ ಸುರಸೇವಿತಾಮ್ ।
ಪಠೇತ್ ಸ್ತೋತ್ರಮಿದಂ ದಿವ್ಯಂ ನಾನಾ ಭೋಗಪ್ರದಂ ಶುಭಮ್ ॥ 21 ॥
ಅಭೀಷ್ಟಸಿದ್ಧಿಂ ಪ್ರಾಪ್ನೋತಿ ಶೀಘ್ರಂ ವಿದ್ವಾನ್ ಪರನ್ತಪ ।
ಅಥವಾ ಸ್ವಗೃಹೇ ವೀರಭದ್ರಪತ್ನೀಂ ಸಮರ್ಚಯೇತ್ ॥ 22 ॥
ಸ್ತೋತ್ರೇಣಾನೇನ ವಿಧಿವತ್ ಸರ್ವಾನ್ ಕಾಮಾನವಾಪ್ನುಯಾತ್ ।
ರೋಗಾ ನಶ್ಯನ್ತಿ ತಸ್ಯಾಶು ಯೋಗಸಿದ್ಧಿಂ ಚ ವಿನ್ದತಿ ॥ 23 ॥
ಸನತ್ಕುಮಾರಭಕ್ತಾನಾಮಿದಂ ಸ್ತೋತ್ರಂ ಪ್ರಬೋಧಯ ।
ರಹಸ್ಯಂ ಸಾರಭೂತಂ ಚ ಸರ್ವಜ್ಞಃ ಸಮ್ಭವಿಷ್ಯಸಿ ॥ 24 ॥
ಇತಿ ಶ್ರೀಭದ್ರಕಾಳ್ಯಷ್ಟೋತ್ತರಶತನಾಮ ಸ್ತೋತ್ರಮ್ ।
