స్కన్ద ఉవాచ ।
ఋణగ్రస్తనరాణాం తు ఋణముక్తిః కథం భవేత్ ।

బ్రహ్మోవాచ ।
వక్ష్యేఽహం సర్వలోకానాం హితార్థం హితకామదమ్ ॥

అస్య శ్రీ అఙ్గారక స్తోత్ర మహామన్త్రస్య గౌతమ ఋషిః, అనుష్టుప్ ఛన్దః, అఙ్గారకో దేవతా మమ ఋణ విమోచనార్థే జపే వినియోగః ।

ధ్యానమ్ –
ధరణీ గర్భ సమ్భూతం విద్యుత్కాన్తి సమప్రభమ్ ।
కుమారం శక్తిహస్తం తం కుజం ప్రణమామ్యహమ్ ॥ 1 ॥

రక్తమాల్యామ్బరధరః శూలశక్తిగదాధరః ।
చతుర్భుజో మేషగతో వరదశ్చ ధరాసుతః ॥ 2 ॥

అథ స్తోత్రమ్ –
మఙ్గళో భూమిపుత్రశ్చ ఋణహర్తా ధనప్రదః ।
స్థిరాసనో మహాకాయః సర్వకర్మావబోధకః ॥ 3 ॥

లోహితో లోహితాఙ్గశ్చ సామగాయీ కృపాకరః ।
ధర్మరాజః కుజో భౌమో భూమిజో భూమినన్దనః ॥ 4 ॥

అఙ్గారకో యమశ్చైవ సర్వరోగాపహారకః ।
సృష్టికర్తాఽపహర్తా చ సర్వకామఫలప్రదః ॥ 5 ॥

భూతిదో గ్రహపూజ్యశ్చ వక్త్రో రక్తవపుః ప్రభుః ।
ఏతాని కుజనామాని యో నిత్యం ప్రయతః పఠేత్ ।
ఋణం న జాయతే తస్య ధనం ప్రాప్నోత్యసంశయమ్ ॥ 6 ॥

రక్తపుష్పైశ్చ గన్ధైశ్చ దీపధూపాదిభిస్తథా ।
మఙ్గళం పూజయిత్వా తు మఙ్గళేఽహని సర్వదా ॥ 7 ॥

ఋణరేఖాః ప్రకర్తవ్యాః దగ్ధాఙ్గారైస్తదగ్రతః ।
సప్తవింశతినామాని పఠిత్వా తు తదన్తికే ॥ 8 ॥

తాశ్చ ప్రమార్జయేత్పశ్చాద్వామపాదేన సంస్పృశన్ ।
ఏవం కృత్వా న సన్దేహో ఋణహీనో ధనీ భవేత్ ॥ 9 ॥

భూమిజస్య ప్రసాదేన గ్రహపీడా వినశ్యతి ।
యేనార్జితా జగత్కీర్తిర్భూమిపుత్రేణ శాశ్వతీ ॥ 10 ॥

శత్రవశ్చ హతా యేన భౌమేన మహితాత్మనా ।
స ప్రీయతాం తు భౌమోఽద్య తుష్టో భూయాత్ సదా మమ ॥ 11 ॥

మూలమన్త్రః –
అఙ్గారక మహీపుత్ర భగవన్ భక్తవత్సల ।
నమోఽస్తు తే మమాశేష ఋణమాశు విమోచయ ॥ 12 ॥

అర్ఘ్యమ్ –
భూమిపుత్ర మహాతేజః స్వేదోద్భవ పినాకినః ।
ఋణార్తస్త్వాం ప్రపన్నోఽస్మి గృహాణార్ఘ్యం నమోఽస్తు తే ॥ 13 ॥

ఇతి ఋణ విమోచన అఙ్గారక స్తోత్రమ్ ॥