మహీసుతో మహాభాగో మఙ్గళో మఙ్గళప్రదః ।
మహావీరో మహాశూరో మహాబలపరాక్రమః ॥ 1 ॥

మహారౌద్రో మహాభద్రో మాననీయో దయాకరః ।
మానదోఽమర్షణః క్రూరస్తాపపాపవివర్జితః ॥ 2 ॥

సుప్రతీపః సుతామ్రాక్షః సుబ్రహ్మణ్యః సుఖప్రదః ।
వక్రస్తమ్భాదిగమనో వరేణ్యో వరదః సుఖీ ॥ 3 ॥

వీరభద్రో విరూపాక్షో విదూరస్థో విభావసుః ।
నక్షత్రచక్రసఞ్చారీ క్షత్రపః క్షాత్రవర్జితః ॥ 4 ॥

క్షయవృద్ధివినిర్ముక్తః క్షమాయుక్తో విచక్షణః ।
అక్షీణఫలదః చక్షుర్గోచరః శుభలక్షణః ॥ 5 ॥

వీతరాగో వీతభయో విజ్వరో విశ్వకారణః ।
నక్షత్రరాశిసఞ్చారో నానాభయనికృన్తనః ॥ 6 ॥

కమనీయో దయాసారః కనత్కనకభూషణః ।
భయఘ్నో భవ్యఫలదో భక్తాభయవరప్రదః ॥ 7 ॥

శత్రుహన్తా శమోపేతః శరణాగతపోషకః ।
సాహసః సద్గుణాఽధ్యక్షః సాధుః సమరదుర్జయః ॥ 8 ॥

దుష్టదూరః శిష్టపూజ్యః సర్వకష్టనివారకః ।
దుశ్చేష్టవారకో దుఃఖభఞ్జనో దుర్ధరో హరిః ॥ 9 ॥

దుఃస్వప్నహన్తా దుర్ధర్షో దుష్టగర్వవిమోచకః ।
భరద్వాజకులోద్భూతో భూసుతో భవ్యభూషణః ॥ 10 ॥

రక్తామ్బరో రక్తవపుర్భక్తపాలనతత్పరః ।
చతుర్భుజో గదాధారీ మేషవాహోఽమితాశనః ॥ 11 ॥

శక్తిశూలధరః శక్తః శస్త్రవిద్యావిశారదః ।
తార్కికస్తామసాధారస్తపస్వీ తామ్రలోచనః ॥ 12 ॥

తప్తకాఞ్చనసఙ్కాశో రక్తకిఞ్జల్కసన్నిభః ।
గోత్రాధిదేవో గోమధ్యచరో గుణవిభూషణః ॥ 13 ॥

అసృగఙ్గారకోఽవన్తీదేశాధీశో జనార్దనః ।
సూర్యయామ్యప్రదేశస్థో యౌవనో యామ్యదిఙ్ముఖః ॥ 14 ॥

త్రికోణమణ్డలగతస్త్రిదశాధిపసన్నుతః ।
శుచిః శుచికరః శూరో శుచివశ్యః శుభావహః ॥ 15 ॥

మేషవృశ్చికరాశీశో మేధావీ మితభాషణః ।
సుఖప్రదః సురూపాక్షః సర్వాభీష్టఫలప్రదః ॥ 16 ॥

ఇతి శ్రీ అఙ్గారకాష్టోత్తరశతనామ స్తోత్రమ్ ।