బుధో బుధార్చితః సౌమ్యః సౌమ్యచిత్తః శుభప్రదః ।
దృఢవ్రతో దృఢఫలః శ్రుతిజాలప్రబోధకః ॥ 1 ॥

సత్యవాసః సత్యవచాః శ్రేయసాం పతిరవ్యయః ।
సోమజః సుఖదః శ్రీమాన్ సోమవంశప్రదీపకః ॥ 2 ॥

వేదవిద్వేదతత్త్వజ్ఞో వేదాన్తజ్ఞానభాస్వరః ।
విద్యావిచక్షణ విభుర్విద్వత్ప్రీతికరో ఋజః ॥ 3 ॥

విశ్వానుకూలసఞ్చారో విశేషవినయాన్వితః ।
వివిధాగమసారజ్ఞో వీర్యవాన్ విగతజ్వరః ॥ 4 ॥

త్రివర్గఫలదోఽనన్తః త్రిదశాధిపపూజితః ।
బుద్ధిమాన్ బహుశాస్త్రజ్ఞో బలీ బన్ధవిమోచకః ॥ 5 ॥

వక్రాతివక్రగమనో వాసవో వసుధాధిపః ।
ప్రసన్నవదనో వన్ద్యో వరేణ్యో వాగ్విలక్షణః ॥ 6 ॥

సత్యవాన్ సత్యసఙ్కల్పః సత్యబన్ధుః సదాదరః ।
సర్వరోగప్రశమనః సర్వమృత్యునివారకః ॥ 7 ॥

వాణిజ్యనిపుణో వశ్యో వాతాఙ్గో వాతరోగహృత్ ।
స్థూలః స్థైర్యగుణాధ్యక్షః స్థూలసూక్ష్మాదికారణః ॥ 8 ॥

అప్రకాశః ప్రకాశాత్మా ఘనో గగనభూషణః ।
విధిస్తుత్యో విశాలాక్షో విద్వజ్జనమనోహరః ॥ 9 ॥

చారుశీలః స్వప్రకాశః చపలశ్చ జితేన్ద్రియః ।
ఉదఙ్ముఖో మఖాసక్తో మగధాధిపతిర్హరః ॥ 10 ॥

సౌమ్యవత్సరసఞ్జాతః సోమప్రియకరః సుఖీ ।
సింహాధిరూఢః సర్వజ్ఞః శిఖివర్ణః శివఙ్కరః ॥ 11 ॥

పీతామ్బరో పీతవపుః పీతచ్ఛత్రధ్వజాఙ్కితః ।
ఖడ్గచర్మధరః కార్యకర్తా కలుషహారకః ॥ 12 ॥

ఆత్రేయగోత్రజోఽత్యన్తవినయో విశ్వపావనః ।
చామ్పేయపుష్పసఙ్కాశః చారణః చారుభూషణః ॥ 13 ॥

వీతరాగో వీతభయో విశుద్ధకనకప్రభః ।
బన్ధుప్రియో బన్ధముక్తో బాణమణ్డలసంశ్రితః ॥ 14 ॥

అర్కేశానప్రదేశస్థః తర్కశాస్త్రవిశారదః ।
ప్రశాన్తః ప్రీతిసంయుక్తః ప్రియకృత్ ప్రియభాషణః ॥ 15 ॥

మేధావీ మాధవాసక్తో మిథునాధిపతిః సుధీః ।
కన్యారాశిప్రియః కామప్రదో ఘనఫలాశ్రయః ॥ 16 ॥

బుధస్యైవం ప్రకారేణ నామ్నామష్టోత్తరం శతమ్ ।
సమ్పూజ్య విధివత్కర్తా సర్వాన్కామానవాప్నుయాత్ ॥ 17 ॥

ఇతి శ్రీ బుధ అష్టోత్తరశతనామ స్తోత్రమ్ ।