శిరో మే పాతు మార్తాణ్డో కపాలం రోహిణీపతిః ।
ముఖమఙ్గారకః పాతు కణ్ఠశ్చ శశినన్దనః ॥ 1 ॥

బుద్ధిం జీవః సదా పాతు హృదయం భృగునన్దనః ।
జఠరం చ శనిః పాతు జిహ్వాం మే దితినన్దనః ॥ 2 ॥

పాదౌ కేతుః సదా పాతు వారాః సర్వాఙ్గమేవ చ ।
తిథయోఽష్టౌ దిశః పాన్తు నక్షత్రాణి వపుః సదా ॥ 3 ॥

అంసౌ రాశిః సదా పాతు యోగాశ్చ స్థైర్యమేవ చ ।
గుహ్యం లిఙ్గం సదా పాన్తు సర్వే గ్రహాః శుభప్రదాః ॥ 4 ॥

అణిమాదీని సర్వాణి లభతే యః పఠేద్ ధృవమ్ ।
ఏతాం రక్షాం పఠేద్ యస్తు భక్త్యా స ప్రయతః సుధీః ॥ 5 ॥

స చిరాయుః సుఖీ పుత్రీ రణే చ విజయీ భవేత్ ।
అపుత్రో లభతే పుత్రం ధనార్థీ ధనమాప్నుయాత్ ॥ 6 ॥

దారార్థీ లభతే భార్యాం సురూపాం సుమనోహరామ్ ।
రోగీ రోగాత్ప్రముచ్యేత బద్ధో ముచ్యేత బన్ధనాత్ ॥ 7 ॥

జలే స్థలే చాన్తరిక్షే కారాగారే విశేషతః ।
యః కరే ధారయేన్నిత్యం భయం తస్య న విద్యతే ॥ 8 ॥

బ్రహ్మహత్యా సురాపానం స్తేయం గుర్వఙ్గనాగమః ।
సర్వపాపైః ప్రముచ్యేత కవచస్య చ ధారణాత్ ॥ 9 ॥

నారీ వామభుజే ధృత్వా సుఖైశ్వర్యసమన్వితా ।
కాకవన్ధ్యా జన్మవన్ధ్యా మృతవత్సా చ యా భవేత్ ।
బహ్వపత్యా జీవవత్సా కవచస్య ప్రసాదతః ॥ 10 ॥

ఇతి గ్రహయామలే ఉత్తరఖణ్డే నవగ్రహ కవచం సమాప్తమ్ ।