ଲୀଲାଲବ୍ଧସ୍ଥାପିତଲୁପ୍ତାଖିଲଲୋକାଂ
ଲୋକାତୀତୈର୍ୟୋଗିଭିରଂତଶ୍ଚିରମୃଗ୍ୟାମ୍ ।
ବାଲାଦିତ୍ୟଶ୍ରେଣିସମାନଦ୍ୟୁତିପୁଂଜାଂ
ଗୌରୀମଂବାମଂବୁରୁହାକ୍ଷୀମହମୀଡେ ॥ 1 ॥
ପ୍ରତ୍ୟାହାରଧ୍ୟାନସମାଧିସ୍ଥିତିଭାଜାଂ
ନିତ୍ୟଂ ଚିତ୍ତେ ନିର୍ଵୃତିକାଷ୍ଠାଂ କଲୟଂତୀମ୍ ।
ସତ୍ୟଜ୍ଞାନାନଂଦମୟୀଂ ତାଂ ତନୁରୂପାଂ
ଗୌରୀମଂବାମଂବୁରୁହାକ୍ଷୀମହମୀଡେ ॥ 2 ॥
ଚଂଦ୍ରାପୀଡାନଂଦିତମଂଦସ୍ମିତଵକ୍ତ୍ରାଂ
ଚଂଦ୍ରାପୀଡାଲଂକୃତନୀଲାଲକଭାରାମ୍ ।
ଇଂଦ୍ରୋପେଂଦ୍ରାଦ୍ୟର୍ଚିତପାଦାଂବୁଜୟୁଗ୍ମାଂ
ଗୌରୀମଂବାମଂବୁରୁହାକ୍ଷୀମହମୀଡେ ॥ 3 ॥
ଆଦିକ୍ଷାଂତାମକ୍ଷରମୂର୍ତ୍ୟା ଵିଲସଂତୀଂ
ଭୂତେ ଭୂତେ ଭୂତକଦଂବପ୍ରସଵିତ୍ରୀମ୍ ।
ଶବ୍ଦବ୍ରହ୍ମାନଂଦମୟୀଂ ତାଂ ତଟିଦାଭାଂ
ଗୌରୀମଂବାମଂବୁରୁହାକ୍ଷୀମହମୀଡେ ॥ 4 ॥
ମୂଲାଧାରାଦୁତ୍ଥିତଵୀଥ୍ୟା ଵିଧିରଂଧ୍ରଂ
ସୌରଂ ଚାଂଦ୍ରଂ ଵ୍ୟାପ୍ୟ ଵିହାରଜ୍ଵଲିତାଂଗୀମ୍ ।
ୟେୟଂ ସୂକ୍ଷ୍ମାତ୍ସୂକ୍ଷ୍ମତନୁସ୍ତାଂ ସୁଖରୂପାଂ
ଗୌରୀମଂବାମଂବୁରୁହାକ୍ଷୀମହମୀଡେ ॥ 5 ॥
ନିତ୍ୟଃ ଶୁଦ୍ଧୋ ନିଷ୍କଲ ଏକୋ ଜଗଦୀଶଃ
ସାକ୍ଷୀ ୟସ୍ୟାଃ ସର୍ଗଵିଧୌ ସଂହରଣେ ଚ ।
ଵିଶ୍ଵତ୍ରାଣକ୍ରୀଡନଲୋଲାଂ ଶିଵପତ୍ନୀଂ
ଗୌରୀମଂବାମଂବୁରୁହାକ୍ଷୀମହମୀଡେ ॥ 6 ॥
ୟସ୍ୟାଃ କୁକ୍ଷୌ ଲୀନମଖଂଡଂ ଜଗଦଂଡଂ
ଭୂୟୋ ଭୂୟଃ ପ୍ରାଦୁରଭୂଦୁତ୍ଥିତମେଵ ।
ପତ୍ୟା ସାର୍ଧଂ ତାଂ ରଜତାଦ୍ରୌ ଵିହରଂତୀଂ
ଗୌରୀମଂବାମଂବୁରୁହାକ୍ଷୀମହମୀଡେ ॥ 7 ॥
ୟସ୍ୟାମୋତଂ ପ୍ରୋତମଶେଷଂ ମଣିମାଲା-
-ସୂତ୍ରେ ୟଦ୍ଵତ୍କାପି ଚରଂ ଚାପ୍ୟଚରଂ ଚ ।
ତାମଧ୍ୟାତ୍ମଜ୍ଞାନପଦଵ୍ୟା ଗମନୀୟାଂ
ଗୌରୀମଂବାମଂବୁରୁହାକ୍ଷୀମହମୀଡେ ॥ 8 ॥
ନାନାକାରୈଃ ଶକ୍ତିକଦଂବୈର୍ଭୁଵନାନି
ଵ୍ୟାପ୍ୟ ସ୍ଵୈରଂ କ୍ରୀଡତି ୟେୟଂ ସ୍ଵୟମେକା ।
କଲ୍ୟାଣୀଂ ତାଂ କଲ୍ପଲତାମାନତିଭାଜାଂ
ଗୌରୀମଂବାମଂବୁରୁହାକ୍ଷୀମହମୀଡେ ॥ 9 ॥
ଆଶାପାଶକ୍ଲେଶଵିନାଶଂ ଵିଦଧାନାଂ
ପାଦାଂଭୋଜଧ୍ୟାନପରାଣାଂ ପୁରୁଷାଣାମ୍ ।
ଈଶାମୀଶାର୍ଧାଂଗହରାଂ ତାମଭିରାମାଂ
ଗୌରୀମଂବାମଂବୁରୁହାକ୍ଷୀମହମୀଡେ ॥ 10 ॥
ପ୍ରାତଃକାଲେ ଭାଵଵିଶୁଦ୍ଧଃ ପ୍ରଣିଧାନା-
-ଦ୍ଭକ୍ତ୍ୟା ନିତ୍ୟଂ ଜଲ୍ପତି ଗୌରୀଦଶକଂ ୟଃ ।
ଵାଚାଂ ସିଦ୍ଧିଂ ସଂପଦମଗ୍ର୍ୟାଂ ଶିଵଭକ୍ତିଂ
ତସ୍ୟାଵଶ୍ୟଂ ପର୍ଵତପୁତ୍ରୀ ଵିଦଧାତି ॥ 11 ॥
ଇତି ଶ୍ରୀମତ୍ପରମହଂସପରିଵ୍ରାଜକାଚାର୍ୟସ୍ୟ ଶ୍ରୀଗୋଵିଂଦଭଗଵତ୍ପୂଜ୍ୟପାଦଶିଷ୍ୟସ୍ୟ ଶ୍ରୀମଚ୍ଛଂକରଭଗଵତଃ କୃତୌ ଗୌରୀ ଦଶକମ୍ ।
