ଵିରିଂଚ୍ୟାଦିଭିଃ ପଂଚଭିର୍ଲୋକପାଲୈଃ
ସମୂଢେ ମହାନଂଦପୀଠେ ନିଷଣ୍ଣମ୍ ।
ଧନୁର୍ବାଣପାଶାଂକୁଶପ୍ରୋତହସ୍ତଂ
ମହସ୍ତ୍ରୈପୁରଂ ଶଂକରାଦ୍ଵୈତମଵ୍ୟାତ୍ ॥ 1 ॥
ୟଦନ୍ନାଦିଭିଃ ପଂଚଭିଃ କୋଶଜାଲୈଃ
ଶିରଃପକ୍ଷପୁଚ୍ଛାତ୍ମକୈରଂତରଂତଃ ।
ନିଗୂଢେ ମହାୟୋଗପୀଠେ ନିଷଣ୍ଣଂ
ପୁରାରେରଥାଂତଃପୁରଂ ନୌମି ନିତ୍ୟମ୍ ॥ 2 ॥
ଵିରିଂଚାଦିରୂପୈଃ ପ୍ରପଂଚେ ଵିହୃତ୍ୟ
ସ୍ଵତଂତ୍ରା ୟଦା ସ୍ଵାତ୍ମଵିଶ୍ରାଂତିରେଷା ।
ତଦା ମାନମାତୃପ୍ରମେୟାତିରିକ୍ତଂ
ପରାନଂଦମୀଡେ ଭଵାନି ତ୍ଵଦୀୟମ୍ ॥ 3 ॥
ଵିନୋଦାୟ ଚୈତନ୍ୟମେକଂ ଵିଭଜ୍ୟ
ଦ୍ଵିଧା ଦେଵି ଜୀଵଃ ଶିଵଶ୍ଚେତି ନାମ୍ନା ।
ଶିଵସ୍ୟାପି ଜୀଵତ୍ଵମାପାଦୟଂତୀ
ପୁନର୍ଜୀଵମେନଂ ଶିଵଂ ଵା କରୋଷି ॥ 4 ॥
ସମାକୁଂଚ୍ୟ ମୂଲଂ ହୃଦି ନ୍ୟସ୍ୟ ଵାୟୁଂ
ମନୋ ଭ୍ରୂବିଲଂ ପ୍ରାପୟିତ୍ଵା ନିଵୃତ୍ତାଃ ।
ତତଃ ସଚ୍ଚିଦାନଂଦରୂପେ ପଦେ ତେ
ଭଵଂତ୍ୟଂବ ଜୀଵାଃ ଶିଵତ୍ଵେନ କେଚିତ୍ ॥ 5 ॥
ଶରୀରେଽତିକଷ୍ଟେ ରିପୌ ପୁତ୍ରଵର୍ଗେ
ସଦାଭୀତିମୂଲେ କଲତ୍ରେ ଧନେ ଵା ।
ନ କଶ୍ଚିଦ୍ଵିରଜ୍ୟତ୍ୟହୋ ଦେଵି ଚିତ୍ରଂ
କଥଂ ତ୍ଵତ୍କଟାକ୍ଷଂ ଵିନା ତତ୍ତ୍ଵବୋଧଃ ॥ 6 ॥
ଶରୀରେ ଧନେଽପତ୍ୟଵର୍ଗେ କଲତ୍ରେ
ଵିରକ୍ତସ୍ୟ ସଦ୍ଦେଶିକାଦିଷ୍ଟବୁଦ୍ଧେଃ ।
ୟଦାକସ୍ମିକଂ ଜ୍ୟୋତିରାନଂଦରୂପଂ
ସମାଧୌ ଭଵେତ୍ତତ୍ତ୍ଵମସ୍ୟଂବ ସତ୍ୟମ୍ ॥ 7 ॥
ମୃଷାନ୍ୟୋ ମୃଷାନ୍ୟଃ ପରୋ ମିଶ୍ରମେନଂ
ପରଃ ପ୍ରାକୃତଂ ଚାପରୋ ବୁଦ୍ଧିମାତ୍ରମ୍ ।
ପ୍ରପଂଚଂ ମିମୀତେ ମୁନୀନାଂ ଗଣୋଽୟଂ
ତଦେତତ୍ତ୍ଵମେଵେତି ନ ତ୍ଵାଂ ଜହୀମଃ ॥ 8 ॥
ନିଵୃତ୍ତିଃ ପ୍ରତିଷ୍ଠା ଚ ଵିଦ୍ୟା ଚ ଶାଂତି-
ସ୍ତଥା ଶାଂତ୍ୟତୀତେତି ପଂଚୀକୃତାଭିଃ ।
କଲାଭିଃ ପରେ ପଂଚଵିଂଶାତ୍ମିକାଭି-
ସ୍ତ୍ଵମେକୈଵ ସେଵ୍ୟା ଶିଵାଭିନ୍ନରୂପା ॥ 9 ॥
ଅଗାଧେଽତ୍ର ସଂସାରପଂକେ ନିମଗ୍ନଂ
କଲତ୍ରାଦିଭାରେଣ ଖିନ୍ନଂ ନିତାଂତମ୍ ।
ମହାମୋହପାଶୌଘବଦ୍ଧଂ ଚିରାନ୍ମାଂ
ସମୁଦ୍ଧର୍ତୁମଂବ ତ୍ଵମେକୈଵ ଶକ୍ତା ॥ 10 ॥
ସମାରଭ୍ୟ ମୂଲଂ ଗତୋ ବ୍ରହ୍ମଚକ୍ରଂ
ଭଵଦ୍ଦିଵ୍ୟଚକ୍ରେଶ୍ଵରୀଧାମଭାଜଃ ।
ମହାସିଦ୍ଧିସଂଘାତକଲ୍ପଦ୍ରୁମାଭା-
ନଵାପ୍ୟାଂବ ନାଦାନୁପାସ୍ତେ ଚ ୟୋଗୀ ॥ 11 ॥
ଗଣେଶୈର୍ଗ୍ରହୈରଂବ ନକ୍ଷତ୍ରପଂକ୍ତ୍ୟା
ତଥା ୟୋଗିନୀରାଶିପୀଠୈରଭିନ୍ନମ୍ ।
ମହାକାଲମାତ୍ମାନମାମୃଶ୍ୟ ଲୋକଂ
ଵିଧତ୍ସେ କୃତିଂ ଵା ସ୍ଥିତିଂ ଵା ମହେଶି ॥ 12 ॥
ଲସତ୍ତାରହାରାମତିସ୍ଵଚ୍ଛଚେଲାଂ
ଵହଂତୀଂ କରେ ପୁସ୍ତକଂ ଚାକ୍ଷମାଲାମ୍ ।
ଶରଚ୍ଚଂଦ୍ରକୋଟିପ୍ରଭାଭାସୁରାଂ ତ୍ଵାଂ
ସକୃଦ୍ଭାଵୟନ୍ଭାରତୀଵଲ୍ଲଭଃ ସ୍ୟାତ୍ ॥ 13 ॥
ସମୁଦ୍ୟତ୍ସହସ୍ରାର୍କବିଂବାଭଵକ୍ତ୍ରାଂ
ସ୍ଵଭାସୈଵ ସିଂଦୂରିତାଜାଂଡକୋଟିମ୍ ।
ଧନୁର୍ବାଣପାଶାଂକୁଶାଂଧାରୟଂତୀଂ
ସ୍ମରଂତଃ ସ୍ମରଂ ଵାପି ସଂମୋହୟେୟୁଃ ॥ 14 ॥
ମଣିସ୍ୟୂତତାଟଂକଶୋଣାସ୍ୟବିଂବାଂ
ହରିତ୍ପଟ୍ଟଵସ୍ତ୍ରାଂ ତ୍ଵଗୁଲ୍ଲାସିଭୂଷାମ୍ ।
ହୃଦା ଭାଵୟଂସ୍ତପ୍ତହେମପ୍ରଭାଂ ତ୍ଵାଂ
ଶ୍ରିୟୋ ନାଶୟତ୍ୟଂବ ଚାଂଚଲ୍ୟଭାଵମ୍ ॥ 15 ॥
ମହାମଂତ୍ରରାଜାଂତବୀଜଂ ପରାଖ୍ୟଂ
ସ୍ଵତୋ ନ୍ୟସ୍ତବିଂଦୁ ସ୍ଵୟଂ ନ୍ୟସ୍ତହାର୍ଦମ୍ ।
ଭଵଦ୍ଵକ୍ତ୍ରଵକ୍ଷୋଜଗୁହ୍ୟାଭିଧାନଂ
ସ୍ଵରୂପଂ ସକୃଦ୍ଭାଵୟେତ୍ସ ତ୍ଵମେଵ ॥ 16 ॥
ତଥାନ୍ୟେ ଵିକଲ୍ପେଷୁ ନିର୍ଵିଣ୍ଣଚିତ୍ତା-
ସ୍ତଦେକଂ ସମାଧାୟ ବିଂଦୁତ୍ରୟଂ ତେ ।
ପରାନଂଦସଂଧାନସିଂଧୌ ନିମଗ୍ନାଃ
ପୁନର୍ଗର୍ଭରଂଧ୍ରଂ ନ ପଶ୍ୟଂତି ଧୀରାଃ ॥ 17 ॥
ତ୍ଵଦୁନ୍ମେଷଲୀଲାନୁବଂଧାଧିକାରା-
ନ୍ଵିରିଂଚ୍ୟାଦିକାଂସ୍ତ୍ଵଦ୍ଗୁଣାଂଭୋଧିବିଂଦୂନ୍ ।
ଭଜଂତସ୍ତିତୀର୍ଷଂତି ସଂସାରସିଂଧୁଂ
ଶିଵେ ତାଵକୀନା ସୁସଂଭାଵନେୟମ୍ ॥ 18 ॥
କଦା ଵା ଭଵତ୍ପାଦପୋତେନ ତୂର୍ଣଂ
ଭଵାଂଭୋଧିମୁତ୍ତୀର୍ୟ ପୂର୍ଣାଂତରଂଗଃ ।
ନିମଜ୍ଜଂତମେନଂ ଦୁରାଶାଵିଷାବ୍ଧୌ
ସମାଲୋକ୍ୟ ଲୋକଂ କଥଂ ପର୍ୟୁଦାସ୍ସେ ॥ 19 ॥
କଦାଵା ହୃଷୀକାଣି ସାମ୍ୟଂ ଭଜେୟୁଃ
କଦା ଵା ନ ଶତ୍ରୁର୍ନ ମିତ୍ରଂ ଭଵାନି ।
କଦା ଵା ଦୁରାଶାଵିଷୂଚୀଵିଲୋପଃ
କଦା ଵା ମନୋ ମେ ସମୂଲଂ ଵିନଶ୍ୟେତ୍ ॥ 20 ॥
ନମୋଵାକମାଶାସ୍ମହେ ଦେଵି ୟୁଷ୍ମ-
ତ୍ପଦାଂଭୋଜୟୁଗ୍ମାୟ ତିଗ୍ମାୟ ଗୌରି ।
ଵିରିଂଚ୍ୟାଦିଭାସ୍ଵତ୍କିରୀଟପ୍ରତୋଲୀ-
ପ୍ରଦୀପାୟମାନପ୍ରଭାଭାସ୍ଵରାୟ ॥ 21 ॥
କଚେ ଚଂଦ୍ରରେଖଂ କୁଚେ ତାରହାରଂ
କରେ ସ୍ଵାଦୁଚାପଂ ଶରେ ଷଟ୍ପଦୌଘମ୍ ।
ସ୍ମରାମି ସ୍ମରାରେରଭିପ୍ରାୟମେକଂ
ମଦାଘୂର୍ଣନେତ୍ରଂ ମଦୀୟଂ ନିଧାନମ୍ ॥ 22 ॥
ଶରେଷ୍ଵେଵ ନାସା ଧନୁଷ୍ଵେଵ ଜିହ୍ଵା
ଜପାପାଟଲେ ଲୋଚନେ ତେ ସ୍ଵରୂପେ ।
ତ୍ଵଗେଷା ଭଵଚ୍ଚଂଦ୍ରଖଂଡେ ଶ୍ରଵୋ ମେ
ଗୁଣେ ତେ ମନୋଵୃତ୍ତିରଂବ ତ୍ଵୟି ସ୍ୟାତ୍ ॥ 23 ॥
ଜଗତ୍କର୍ମଧୀରାନ୍ଵଚୋଧୂତକୀରାନ୍
କୁଚନ୍ୟସ୍ତହାରାଂକୃପାସିଂଧୁପୂରାନ୍ ।
ଭଵାଂଭୋଧିପାରାନ୍ମହାପାପଦୂରାନ୍
ଭଜେ ଵେଦସାରାଂଶିଵପ୍ରେମଦାରାନ୍ ॥ 24 ॥
ସୁଧାସିଂଧୁସାରେ ଚିଦାନଂଦନୀରେ
ସମୁତ୍ଫୁଲ୍ଲନୀପେ ସୁରତ୍ରାଂତରୀପେ ।
ମଣିଵ୍ୟୂହସାଲେ ସ୍ଥିତେ ହୈମଶାଲେ
ମନୋଜାରିଵାମେ ନିଷଣ୍ଣଂ ମନୋ ମେ ॥ 25 ॥
ଦୃଗଂତେ ଵିଲୋଲା ସୁଗଂଧୀଷୁମାଲା
ପ୍ରପଂଚେଂଦ୍ରଜାଲା ଵିପତ୍ସିଂଧୁକୂଲା ।
ମୁନିସ୍ଵାଂତଶାଲା ନମଲ୍ଲୋକପାଲା
ହୃଦି ପ୍ରେମଲୋଲାମୃତସ୍ଵାଦୁଲୀଲା ॥ 26 ॥
ଜଗଜ୍ଜାଲମେତତ୍ତ୍ଵୟୈଵାଂବ ସୃଷ୍ଟଂ
ତ୍ଵମେଵାଦ୍ୟ ୟାସୀଂଦ୍ରିୟୈରର୍ଥଜାଲମ୍ ।
ତ୍ଵମେକୈଵ କର୍ତ୍ରୀ ତ୍ଵମେକୈଵ ଭୋକ୍ତ୍ରୀ
ନ ମେ ପୁଣ୍ୟପାପେ ନ ମେ ବଂଧମୋକ୍ଷୌ ॥ 27 ॥
ଇତି ପ୍ରେମଭାରେଣ କିଂଚିନ୍ମୟୋକ୍ତଂ
ନ ବୁଧ୍ଵୈଵ ତତ୍ତ୍ଵଂ ମଦୀୟଂ ତ୍ଵଦୀୟମ୍ ।
ଵିନୋଦାୟ ବାଲସ୍ୟ ମୌର୍ଖ୍ୟଂ ହି ମାତସ୍-
ତଦେତତ୍ପ୍ରଲାପସ୍ତୁତିଂ ମେ ଗୃହାଣ ॥ 28 ॥
॥ ଇତି ଶ୍ରୀମଚ୍ଛଂକରାଚାର୍ୟଵିରଚିତା ଦେଵୀଭୁଜଂଗଂ ସଂପୂର୍ଣମ୍ ॥
