ପ୍ରାତଃ ସ୍ମରାମି ଲଲିତା ଵଦନାରଵିଂଦଂ
ବିଂବାଧରଂ ପୃଥୁଲ ମୌକ୍ତିକ ଶୋଭିନାସମ୍ ।
ଆକର୍ଣଦୀର୍ଘନୟନଂ ମଣିକୁଂଡଲାଢ୍ୟଂ
ମଂଦସ୍ମିତଂ ମୃଗମଦୋଜ୍ଜ୍ଵଲ ଫାଲଦେଶମ୍ ॥ 1 ॥
ପ୍ରାତର୍ଭଜାମି ଲଲିତା ଭୁଜକଲ୍ପଵଲ୍ଲୀଂ
ରକ୍ତାଂଗୁଳୀୟ ଲସଦଂଗୁଳି ପଲ୍ଲଵାଢ୍ୟାମ୍ ।
ମାଣିକ୍ୟ ହେମଵଲୟାଂଗଦ ଶୋଭମାନାଂ
ପୁଂଡ୍ରେକ୍ଷୁଚାପ କୁସୁମେଷୁ ସୃଣୀର୍ଦଧାନାମ୍ ॥ 2 ॥
ପ୍ରାତର୍ନମାମି ଲଲିତା ଚରଣାରଵିଂଦଂ
ଭକ୍ତେଷ୍ଟ ଦାନନିରତଂ ଭଵସିଂଧୁପୋତମ୍ ।
ପଦ୍ମାସନାଦି ସୁରନାୟକ ପୂଜନୀୟଂ
ପଦ୍ମାଂକୁଶଧ୍ଵଜ ସୁଦର୍ଶନ ଲାଂଛନାଢ୍ୟମ୍ ॥ 3 ॥
ପ୍ରାତଃ ସ୍ତୁଵେ ପରଶିଵାଂ ଲଲିତାଂ ଭଵାନୀଂ
ତ୍ରୟ୍ୟଂତଵେଦ୍ୟ ଵିଭଵାଂ କରୁଣାନଵଦ୍ୟାମ୍ ।
ଵିଶ୍ଵସ୍ୟ ସୃଷ୍ଟଵିଲୟ ସ୍ଥିତିହେତୁଭୂତାଂ
ଵିଦ୍ୟେଶ୍ଵରୀଂ ନିଗମଵାଙ୍ମମନସାତିଦୂରାମ୍ ॥ 4 ॥
ପ୍ରାତର୍ଵଦାମି ଲଲିତେ ତଵ ପୁଣ୍ୟନାମ
କାମେଶ୍ଵରୀତି କମଲେତି ମହେଶ୍ଵରୀତି ।
ଶ୍ରୀଶାଂଭଵୀତି ଜଗତାଂ ଜନନୀ ପରେତି
ଵାଗ୍ଦେଵତେତି ଵଚସା ତ୍ରିପୁରେଶ୍ଵରୀତି ॥ 5 ॥
ୟଃ ଶ୍ଲୋକପଂଚକମିଦଂ ଲଲିତାଂବିକାୟାଃ
ସୌଭାଗ୍ୟଦଂ ସୁଲଲିତଂ ପଠତି ପ୍ରଭାତେ ।
ତସ୍ମୈ ଦଦାତି ଲଲିତା ଝଟିତି ପ୍ରସନ୍ନା
ଵିଦ୍ୟାଂ ଶ୍ରିୟଂ ଵିମଲସୌଖ୍ୟମନଂତକୀର୍ତିମ୍ ॥
