భాస్వాన్ కాశ్యపగోత్రజోఽరుణరుచిర్యః సింహపోఽర్కః సమి-
-త్షట్త్రిస్థోఽదశశోభనో గురుశశీ భౌమాః సుమిత్రాః సదా ।
శుక్రో మన్దరిపుః కళిఙ్గజనపశ్చాగ్నీశ్వరౌ దేవతే
మధ్యేవర్తులపూర్వదిగ్దినకరః కుర్యాత్సదా మఙ్గళమ్ ॥ 1 ॥

చన్ద్రః కర్కటకప్రభుః సితనిభశ్చాత్రేయగోత్రోద్భవ-
-శ్చాత్రేయశ్చతురశ్రవారుణముఖశ్చాపే ఉమాధీశ్వరః ।
షట్సప్తాగ్ని దశైకశోభనఫలో నోరిర్బుధార్కౌప్రియౌ
స్వామీ యామునజశ్చ పర్ణసమిధః కుర్యాత్సదా మఙ్గళమ్ ॥ 2 ॥

భౌమో దక్షిణదిక్త్రికోణయమదిగ్విన్ధ్యేశ్వరః ఖాదిరః
స్వామీ వృశ్చికమేషయోస్తు సుగురుశ్చార్కః శశీ సౌహృదః ।
జ్ఞోఽరిః షట్త్రిఫలప్రదశ్చ వసుధాస్కన్దౌ క్రమాద్దేవతే
భారద్వాజకులోద్వహోఽరుణరుచిః కుర్యాత్సదా మఙ్గళమ్ ॥ 3 ॥

సౌమ్యః పీత ఉదఙ్ముఖః సమిదపామార్గోఽత్రిగోత్రోద్భవో
బాణేశానదిశః సుహృద్రవిసుతః శాన్తః సుతః శీతగోః ।
కన్యాయుగ్మపతిర్దశాష్టచతురః షణ్ణేత్రగః శోభనో
విష్ణుర్దేవ్యధిదేవతే మగధపః కుర్యాత్సదా మఙ్గళమ్ ॥ 4 ॥

జీవశ్చాఙ్గిరగోత్రజోత్తరముఖో దీర్ఘోత్తరాశాస్థితః
పీతోఽశ్వత్థసమిచ్చ సిన్ధుజనితశ్చాపోఽథ మీనాధిపః ।
సూర్యేన్దుక్షితిజాః ప్రియా బుధసితౌ శత్రూ సమాశ్చాపరే
సప్తద్వే నవపఞ్చమే శుభకరః కుర్యాత్సదా మఙ్గళమ్ ॥ 5 ॥

శుక్రో భార్గవగోత్రజః సితరుచిః పూర్వాముఖః పూర్వదిక్
పాఞ్చాలస్థ వృషస్తులాధిపమహారాష్ట్రాధిపౌదుమ్బరః ।
ఇన్ద్రాణీమఘవా బుధశ్చ రవిజో మిత్రోర్క చన్ద్రావరీ
షష్ఠత్రిర్దశవర్జితే భృగుసుతః కుర్యాత్సదా మఙ్గళమ్ ॥ 6 ॥

మన్దః కృష్ణనిభః సపశ్చిమముఖః సౌరాష్ట్రపః కాశ్యపః
స్వామీ నక్రసుకుమ్భయోర్బుధసితౌ మిత్రౌ కుజేన్దూ ద్విషౌ ।
స్థానం పశ్చిమదిక్ ప్రజాపతియమౌ దేవౌ ధనుర్ధారకః
షట్త్రిస్థః శుభకృచ్ఛనీ రవిసుతః కుర్యాత్సదా మఙ్గళమ్ ॥ 7 ॥

రాహుః సింహళదేశపోఽపి సతమః కృష్ణాఙ్గశూర్పాసనో
యః పైఠీనసగోత్రసమ్భవసమిద్దూర్వాముఖో దక్షిణః ।
యః సర్పః పశుదైవతోఽఖిలగతః సూర్యగ్రహే ఛాదకః
షట్త్రిస్థః శుభకృచ్చ సింహకసుతః కుర్యాత్సదా మఙ్గళమ్ ॥ 8 ॥

కేతుర్జైమినిగోత్రజః కుశసమిద్వాయవ్యకోణేస్థిత-
-శ్చిత్రాఙ్కధ్వజలాఞ్ఛనో హి భగవాన్ యో దక్షిణాశాముఖః ।
బ్రహ్మా చైవ తు చిత్రగుప్తపతిమాన్ ప్రీత్యాధిదేవః సదా
షట్త్రిస్థః శుభకృచ్చ బర్బరపతిః కుర్యాత్సదా మఙ్గళమ్ ॥ 9 ॥

ఇతి నవగ్రహ మఙ్గళ స్తోత్రమ్ ।