সদা বালরূপাঽপি বিঘ্নাদ্রিহংত্রী
মহাদংতিবক্ত্রাঽপি পংচাস্যমান্য়া ।
বিধীংদ্রাদিমৃগ্য়া গণেশাভিধা মে
বিধত্তাং শ্রিয়ং কাঽপি কল্য়াণমূর্তিঃ ॥ 1 ॥

ন জানামি শব্দং ন জানামি চার্থং
ন জানামি পদ্য়ং ন জানামি গদ্যম্ ।
চিদেকা ষডাস্য়া হৃদি দ্য়োততে মে
মুখান্নিঃসরংতে গিরশ্চাপি চিত্রম্ ॥ 2 ॥

ময়ূরাধিরূঢং মহাবাক্যগূঢং
মনোহারিদেহং মহচ্চিত্তগেহম্ ।
মহীদেবদেবং মহাবেদভাবং
মহাদেববালং ভজে লোকপালম্ ॥ 3 ॥

যদা সংনিধানং গতা মানবা মে
ভবাংভোধিপারং গতাস্তে তদৈব ।
ইতি ব্য়ংজযন্সিংধুতীরে য আস্তে
তমীডে পবিত্রং পরাশক্তিপুত্রম্ ॥ 4 ॥

যথাব্ধেস্তরংগা লয়ং যাংতি তুংগা-
স্তথৈবাপদঃ সংনিধৌ সেবতাং মে ।
ইতীবোর্মিপংক্তীর্নৃণাং দর্শয়ংতং
সদা ভাবয়ে হৃত্সরোজে গুহং তম্ ॥ 5 ॥

গিরৌ মন্নিবাসে নরা যেঽধিরূঢা-
স্তদা পর্বতে রাজতে তেঽধিরূঢাঃ ।
ইতীব ব্রুবন্গংধশৈলাধিরূঢঃ
স দেবো মুদে মে সদা ষণ্মুখোঽস্তু ॥ 6 ॥

মহাংভোধিতীরে মহাপাপচোরে
মুনীংদ্রানুকূলে সুগংধাখ্যশৈলে ।
গুহায়াং বসংতং স্বভাসা লসংতং
জনার্তিং হরংতং শ্রয়ামো গুহং তম্ ॥ 7 ॥

লসত্স্বর্ণগেহে নৃণাং কামদোহে
সুমস্তোমসংছন্নমাণিক্যমংচে ।
সমুদ্যত্সহস্রার্কতুল্যপ্রকাশং
সদা ভাবয়ে কার্তিকেয়ং সুরেশম্ ॥ 8 ॥

রণদ্ধংসকে মংজুলেঽত্য়ংতশোণে
মনোহারিলাবণ্যপীয়ূষপূর্ণে ।
মনঃষট্পদো মে ভবক্লেশতপ্তঃ
সদা মোদতাং স্কংদ তে পাদপদ্মে ॥ 9 ॥

সুবর্ণাভদিব্য়াংবরৈর্ভাসমানাং
ক্বণত্কিংকিণীমেখলাশোভমানাম্ ।
লসদ্ধেমপট্টেন বিদ্য়োতমানাং
কটিং ভাবয়ে স্কংদ তে দীপ্যমানাম্ ॥ 10 ॥

পুলিংদেশকন্য়াঘনাভোগতুংগ-
স্তনালিংগনাসক্তকাশ্মীররাগম্ ।
নমস্য়াম্যহং তারকারে তবোরঃ
স্বভক্তাবনে সর্বদা সানুরাগম্ ॥ 11 ॥

বিধৌ ক্লৃপ্তদংডান্স্বলীলাধৃতাংডা-
ন্নিরস্তেভশুংডাংদ্বিষত্কালদংডান্ ।
হতেংদ্রারিষংডান্জগত্রাণশৌংডা-
ন্সদা তে প্রচংডান্শ্রয়ে বাহুদংডান্ ॥ 12 ॥

সদা শারদাঃ ষণ্মৃগাংকা যদি স্য়ুঃ
সমুদ্য়ংত এব স্থিতাশ্চেত্সমংতাত্ ।
সদা পূর্ণবিংবাঃ কলংকৈশ্চ হীনা-
স্তদা ত্বন্মুখানাং ব্রুবে স্কংদ সাম্যম্ ॥ 13 ॥

স্ফুরন্মংদহাসৈঃ সহংসানি চংচ-
ত্কটাক্ষাবলীভৃংগসংঘোজ্জ্বলানি ।
সুধাস্য়ংদিবিংবাধরাণীশসূনো
তবালোকয়ে ষণ্মুখাংভোরুহাণি ॥ 14 ॥

বিশালেষু কর্ণাংতদীর্ঘেষ্বজস্রং
দয়াস্য়ংদিষু দ্বাদশস্বীক্ষণেষু ।
ময়ীষত্কটাক্ষঃ সকৃত্পাতিতশ্চে-
দ্ভবেত্তে দয়াশীল কা নাম হানিঃ ॥ 15 ॥

সুতাংগোদ্ভবো মেঽসি জীবেতি ষড্ধা
জপন্মংত্রমীশো মুদা জিঘ্রতে যান্ ।
জগদ্ভারভৃদ্ভ্য়ো জগন্নাথ তেভ্য়ঃ
কিরীটোজ্জ্বলেভ্য়ো নমো মস্তকেভ্য়ঃ ॥ 16 ॥

স্ফুরদ্রত্নকেয়ূরহারাভিরাম-
শ্চলত্কুংডলশ্রীলসদ্গংডভাগঃ ।
কটৌ পীতবাসাঃ করে চারুশক্তিঃ
পুরস্তান্মমাস্তাং পুরারেস্তনূজঃ ॥ 17 ॥

ইহায়াহি বত্সেতি হস্তান্প্রসার্য়া-
হ্বযত্য়াদরাচ্ছংকরে মাতুরংকাত্ ।
সমুত্পত্য় তাতং শ্রয়ংতং কুমারং
হরাশ্লিষ্টগাত্রং ভজে বালমূর্তিম্ ॥ 18 ॥

কুমারেশসূনো গুহ স্কংদ সেনা-
পতে শক্তিপাণে ময়ূরাধিরূঢ ।
পুলিংদাত্মজাকাংত ভক্তার্তিহারিন্
প্রভো তারকারে সদা রক্ষ মাং ত্বম্ ॥ 19 ॥

প্রশাংতেংদ্রিয়ে নষ্টসংজ্ঞে বিচেষ্টে
কফোদ্গারিবক্ত্রে ভয়োত্কংপিগাত্রে ।
প্রয়াণোন্মুখে ময়্যনাথে তদানীং
দ্রুতং মে দয়ালো ভবাগ্রে গুহ ত্বম্ ॥ 20 ॥

কৃতাংতস্য় দূতেষু চংডেষু কোপা-
দ্দহচ্ছিংদ্ধি ভিংদ্ধীতি মাং তর্জযত্সু ।
ময়ূরং সমারুহ্য় মা ভৈরিতি ত্বং
পুরঃ শক্তিপাণির্মমায়াহি শীঘ্রম্ ॥ 21 ॥

প্রণম্য়াসকৃত্পাদয়োস্তে পতিত্বা
প্রসাদ্য় প্রভো প্রার্থয়েঽনেকবারম্ ।
ন বক্তুং ক্ষমোঽহং তদানীং কৃপাব্ধে
ন কার্য়াংতকালে মনাগপ্য়ুপেক্ষা ॥ 22 ॥

সহস্রাংডভোক্তা ত্বয়া শূরনামা
হতস্তারকঃ সিংহবক্ত্রশ্চ দৈত্য়ঃ ।
মমাংতর্হৃদিস্থং মনঃক্লেশমেকং
ন হংসি প্রভো কিং করোমি ক্ব যামি ॥ 23 ॥

অহং সর্বদা দুঃখভারাবসন্নো
ভবাংদীনবংধুস্ত্বদন্য়ং ন যাচে ।
ভবদ্ভক্তিরোধং সদা ক্লৃপ্তবাধং
মমাধিং দ্রুতং নাশয়োমাসুত ত্বম্ ॥ 24 ॥

অপস্মারকুষ্টক্ষয়ার্শঃ প্রমেহ-
জ্বরোন্মাদগুল্মাদিরোগা মহাংতঃ ।
পিশাচাশ্চ সর্বে ভবত্পত্রভূতিং
বিলোক্য় ক্ষণাত্তারকারে দ্রবংতে ॥ 25 ॥

দৃশি স্কংদমূর্তিঃ শ্রুতৌ স্কংদকীর্তি-
র্মুখে মে পবিত্রং সদা তচ্চরিত্রম্ ।
করে তস্য় কৃত্য়ং বপুস্তস্য় ভৃত্য়ং
গুহে সংতু লীনা মমাশেষভাবাঃ ॥ 26 ॥

মুনীনামুতাহো নৃণাং ভক্তিভাজা-
মভীষ্টপ্রদাঃ সংতি সর্বত্র দেবাঃ ।
নৃণামংত্যজানামপি স্বার্থদানে
গুহাদ্দেবমন্য়ং ন জানে ন জানে ॥ 27 ॥

কলত্রং সুতা বংধুবর্গঃ পশুর্বা
নরো বাথ নারী গৃহে যে মদীয়াঃ ।
যজংতো নমংতঃ স্তুবংতো ভবংতং
স্মরংতশ্চ তে সংতু সর্বে কুমার ॥ 28 ॥

মৃগাঃ পক্ষিণো দংশকা যে চ দুষ্টা-
স্তথা ব্য়াধয়ো বাধকা যে মদংগে ।
ভবচ্ছক্তিতীক্ষ্ণাগ্রভিন্নাঃ সুদূরে
বিনশ্য়ংতু তে চূর্ণিতক্রৌংচশৈল ॥ 29 ॥

জনিত্রী পিতা চ স্বপুত্রাপরাধং
সহেতে ন কিং দেবসেনাধিনাথ ।
অহং চাতিবালো ভবান্ লোকতাতঃ
ক্ষমস্বাপরাধং সমস্তং মহেশ ॥ 30 ॥

নমঃ কেকিনে শক্তয়ে চাপি তুভ্য়ং
নমশ্ছাগ তুভ্য়ং নমঃ কুক্কুটায় ।
নমঃ সিংধবে সিংধুদেশায় তুভ্য়ং
পুনঃ স্কংদমূর্তে নমস্তে নমোঽস্তু ॥ 31 ॥

জয়ানংদভূমং জয়াপারধামং
জয়ামোঘকীর্তে জয়ানংদমূর্তে ।
জয়ানংদসিংধো জয়াশেষবংধো
জয় ত্বং সদা মুক্তিদানেশসূনো ॥ 32 ॥

ভুজংগাখ্যবৃত্তেন ক্লৃপ্তং স্তবং যঃ
পঠেদ্ভক্তিয়ুক্তো গুহং সংপ্রণম্য় ।
স পুত্রান্কলত্রং ধনং দীর্ঘমায়ু-
র্লভেত্স্কংদসায়ুজ্যমংতে নরঃ সঃ ॥ 33 ॥