𑌸𑌦𑌾 𑌬𑌾𑌲𑌰𑍂𑌪𑌾𑌽𑌪𑌿 𑌵𑌿𑌘𑍍𑌨𑌾𑌦𑍍𑌰𑌿𑌹𑌂𑌤𑍍𑌰𑍀
𑌮𑌹𑌾𑌦𑌂𑌤𑌿𑌵𑌕𑍍𑌤𑍍𑌰𑌾𑌽𑌪𑌿 𑌪𑌂𑌚𑌾𑌸𑍍𑌯𑌮𑌾𑌨𑍍𑌯𑌾 ।
𑌵𑌿𑌧𑍀𑌂𑌦𑍍𑌰𑌾𑌦𑌿𑌮𑍃𑌗𑍍𑌯𑌾 𑌗𑌣𑍇𑌶𑌾𑌭𑌿𑌧𑌾 𑌮𑍇
𑌵𑌿𑌧𑌤𑍍𑌤𑌾𑌂 𑌶𑍍𑌰𑌿𑌯𑌂 𑌕𑌾𑌽𑌪𑌿 𑌕𑌳𑍍𑌯𑌾𑌣𑌮𑍂𑌰𑍍𑌤𑌿𑌃 ॥ 1 ॥

𑌨 𑌜𑌾𑌨𑌾𑌮𑌿 𑌶𑌬𑍍𑌦𑌂 𑌨 𑌜𑌾𑌨𑌾𑌮𑌿 𑌚𑌾𑌰𑍍𑌥𑌂
𑌨 𑌜𑌾𑌨𑌾𑌮𑌿 𑌪𑌦𑍍𑌯𑌂 𑌨 𑌜𑌾𑌨𑌾𑌮𑌿 𑌗𑌦𑍍𑌯𑌮𑍍 ।
𑌚𑌿𑌦𑍇𑌕𑌾 𑌷𑌡𑌾𑌸𑍍𑌯𑌾 𑌹𑍃𑌦𑌿 𑌦𑍍𑌯𑍋𑌤𑌤𑍇 𑌮𑍇
𑌮𑍁𑌖𑌾𑌨𑍍𑌨𑌿𑌃𑌸𑌰𑌂𑌤𑍇 𑌗𑌿𑌰𑌶𑍍𑌚𑌾𑌪𑌿 𑌚𑌿𑌤𑍍𑌰𑌮𑍍 ॥ 2 ॥

𑌮𑌯𑍂𑌰𑌾𑌧𑌿𑌰𑍂𑌢𑌂 𑌮𑌹𑌾𑌵𑌾𑌕𑍍𑌯𑌗𑍂𑌢𑌂
𑌮𑌨𑍋𑌹𑌾𑌰𑌿𑌦𑍇𑌹𑌂 𑌮𑌹𑌚𑍍𑌚𑌿𑌤𑍍𑌤𑌗𑍇𑌹𑌮𑍍 ।
𑌮𑌹𑍀𑌦𑍇𑌵𑌦𑍇𑌵𑌂 𑌮𑌹𑌾𑌵𑍇𑌦𑌭𑌾𑌵𑌂
𑌮𑌹𑌾𑌦𑍇𑌵𑌬𑌾𑌲𑌂 𑌭𑌜𑍇 𑌲𑍋𑌕𑌪𑌾𑌲𑌮𑍍 ॥ 3 ॥

𑌯𑌦𑌾 𑌸𑌂𑌨𑌿𑌧𑌾𑌨𑌂 𑌗𑌤𑌾 𑌮𑌾𑌨𑌵𑌾 𑌮𑍇
𑌭𑌵𑌾𑌂𑌭𑍋𑌧𑌿𑌪𑌾𑌰𑌂 𑌗𑌤𑌾𑌸𑍍𑌤𑍇 𑌤𑌦𑍈𑌵 ।
𑌇𑌤𑌿 𑌵𑍍𑌯𑌂𑌜𑌯𑌨𑍍𑌸𑌿𑌂𑌧𑍁𑌤𑍀𑌰𑍇 𑌯 𑌆𑌸𑍍𑌤𑍇
𑌤𑌮𑍀𑌡𑍇 𑌪𑌵𑌿𑌤𑍍𑌰𑌂 𑌪𑌰𑌾𑌶𑌕𑍍𑌤𑌿𑌪𑍁𑌤𑍍𑌰𑌮𑍍 ॥ 4 ॥

𑌯𑌥𑌾𑌬𑍍𑌧𑍇𑌸𑍍𑌤𑌰𑌂𑌗𑌾 𑌲𑌯𑌂 𑌯𑌾𑌂𑌤𑌿 𑌤𑍁𑌂𑌗𑌾-
𑌸𑍍𑌤𑌥𑍈𑌵𑌾𑌪𑌦𑌃 𑌸𑌂𑌨𑌿𑌧𑍌 𑌸𑍇𑌵𑌤𑌾𑌂 𑌮𑍇 ।
𑌇𑌤𑍀𑌵𑍋𑌰𑍍𑌮𑌿𑌪𑌂𑌕𑍍𑌤𑍀𑌰𑍍𑌨𑍃𑌣𑌾𑌂 𑌦𑌰𑍍𑌶𑌯𑌂𑌤𑌂
𑌸𑌦𑌾 𑌭𑌾𑌵𑌯𑍇 𑌹𑍃𑌤𑍍𑌸𑌰𑍋𑌜𑍇 𑌗𑍁𑌹𑌂 𑌤𑌮𑍍 ॥ 5 ॥

𑌗𑌿𑌰𑍌 𑌮𑌨𑍍𑌨𑌿𑌵𑌾𑌸𑍇 𑌨𑌰𑌾 𑌯𑍇𑌽𑌧𑌿𑌰𑍂𑌢𑌾-
𑌸𑍍𑌤𑌦𑌾 𑌪𑌰𑍍𑌵𑌤𑍇 𑌰𑌾𑌜𑌤𑍇 𑌤𑍇𑌽𑌧𑌿𑌰𑍂𑌢𑌾𑌃 ।
𑌇𑌤𑍀𑌵 𑌬𑍍𑌰𑍁𑌵𑌨𑍍𑌗𑌂𑌧𑌶𑍈𑌲𑌾𑌧𑌿𑌰𑍂𑌢𑌃
𑌸 𑌦𑍇𑌵𑍋 𑌮𑍁𑌦𑍇 𑌮𑍇 𑌸𑌦𑌾 𑌷𑌣𑍍𑌮𑍁𑌖𑍋𑌽𑌸𑍍𑌤𑍁 ॥ 6 ॥

𑌮𑌹𑌾𑌂𑌭𑍋𑌧𑌿𑌤𑍀𑌰𑍇 𑌮𑌹𑌾𑌪𑌾𑌪𑌚𑍋𑌰𑍇
𑌮𑍁𑌨𑍀𑌂𑌦𑍍𑌰𑌾𑌨𑍁𑌕𑍂𑌲𑍇 𑌸𑍁𑌗𑌂𑌧𑌾𑌖𑍍𑌯𑌶𑍈𑌲𑍇 ।
𑌗𑍁𑌹𑌾𑌯𑌾𑌂 𑌵𑌸𑌂𑌤𑌂 𑌸𑍍𑌵𑌭𑌾𑌸𑌾 𑌲𑌸𑌂𑌤𑌂
𑌜𑌨𑌾𑌰𑍍𑌤𑌿𑌂 𑌹𑌰𑌂𑌤𑌂 𑌶𑍍𑌰𑌯𑌾𑌮𑍋 𑌗𑍁𑌹𑌂 𑌤𑌮𑍍 ॥ 𑍭 ॥

𑌲𑌸𑌤𑍍𑌸𑍍𑌵𑌰𑍍𑌣𑌗𑍇𑌹𑍇 𑌨𑍃𑌣𑌾𑌂 𑌕𑌾𑌮𑌦𑍋𑌹𑍇
𑌸𑍁𑌮𑌸𑍍𑌤𑍋𑌮𑌸𑌂𑌛𑌨𑍍𑌨𑌮𑌾𑌣𑌿𑌕𑍍𑌯𑌮𑌂𑌚𑍇 ।
𑌸𑌮𑍁𑌦𑍍𑌯𑌤𑍍𑌸𑌹𑌸𑍍𑌰𑌾𑌰𑍍𑌕𑌤𑍁𑌲𑍍𑌯𑌪𑍍𑌰𑌕𑌾𑌶𑌂
𑌸𑌦𑌾 𑌭𑌾𑌵𑌯𑍇 𑌕𑌾𑌰𑍍𑌤𑌿𑌕𑍇𑌯𑌂 𑌸𑍁𑌰𑍇𑌶𑌮𑍍 ॥ 𑍮 ॥

𑌰𑌣𑌦𑍍𑌧𑌂𑌸𑌕𑍇 𑌮𑌂𑌜𑍁𑌲𑍇𑌽𑌤𑍍𑌯𑌂𑌤𑌶𑍋𑌣𑍇
𑌮𑌨𑍋𑌹𑌾𑌰𑌿𑌲𑌾𑌵𑌣𑍍𑌯𑌪𑍀𑌯𑍂𑌷𑌪𑍂𑌰𑍍𑌣𑍇 ।
𑌮𑌨𑌃𑌷𑌟𑍍𑌪𑌦𑍋 𑌮𑍇 𑌭𑌵𑌕𑍍𑌲𑍇𑌶𑌤𑌪𑍍𑌤𑌃
𑌸𑌦𑌾 𑌮𑍋𑌦𑌤𑌾𑌂 𑌸𑍍𑌕𑌂𑌦 𑌤𑍇 𑌪𑌾𑌦𑌪𑌦𑍍𑌮𑍇 ॥ 𑍯 ॥

𑌸𑍁𑌵𑌰𑍍𑌣𑌾𑌭𑌦𑌿𑌵𑍍𑌯𑌾𑌂𑌬𑌰𑍈𑌰𑍍𑌭𑌾𑌸𑌮𑌾𑌨𑌾𑌂
𑌕𑍍𑌵𑌣𑌤𑍍𑌕𑌿𑌂𑌕𑌿𑌣𑍀𑌮𑍇𑌖𑌲𑌾𑌶𑍋𑌭𑌮𑌾𑌨𑌾𑌮𑍍 ।
𑌲𑌸𑌦𑍍𑌧𑍇𑌮𑌪𑌟𑍍𑌟𑍇𑌨 𑌵𑌿𑌦𑍍𑌯𑍋𑌤𑌮𑌾𑌨𑌾𑌂
𑌕𑌟𑌿𑌂 𑌭𑌾𑌵𑌯𑍇 𑌸𑍍𑌕𑌂𑌦 𑌤𑍇 𑌦𑍀𑌪𑍍𑌯𑌮𑌾𑌨𑌾𑌮𑍍 ॥ 10 ॥

𑌪𑍁𑌲𑌿𑌂𑌦𑍇𑌶𑌕𑌨𑍍𑌯𑌾𑌘𑌨𑌾𑌭𑍋𑌗𑌤𑍁𑌂𑌗-
𑌸𑍍𑌤𑌨𑌾𑌲𑌿𑌂𑌗𑌨𑌾𑌸𑌕𑍍𑌤𑌕𑌾𑌶𑍍𑌮𑍀𑌰𑌰𑌾𑌗𑌮𑍍 ।
𑌨𑌮𑌸𑍍𑌯𑌾𑌮𑍍𑌯𑌹𑌂 𑌤𑌾𑌰𑌕𑌾𑌰𑍇 𑌤𑌵𑍋𑌰𑌃
𑌸𑍍𑌵𑌭𑌕𑍍𑌤𑌾𑌵𑌨𑍇 𑌸𑌰𑍍𑌵𑌦𑌾 𑌸𑌾𑌨𑍁𑌰𑌾𑌗𑌮𑍍 ॥ 11 ॥

𑌵𑌿𑌧𑍌 𑌕𑍍𑌲𑍃𑌪𑍍𑌤𑌦𑌂𑌡𑌾𑌨𑍍𑌸𑍍𑌵𑌲𑍀𑌲𑌾𑌧𑍃𑌤𑌾𑌂𑌡𑌾-
𑌨𑍍𑌨𑌿𑌰𑌸𑍍𑌤𑍇𑌭𑌶𑍁𑌂𑌡𑌾𑌂𑌦𑍍𑌵𑌿𑌷𑌤𑍍𑌕𑌾𑌲𑌦𑌂𑌡𑌾𑌨𑍍 ।
𑌹𑌤𑍇𑌂𑌦𑍍𑌰𑌾𑌰𑌿𑌷𑌂𑌡𑌾𑌨𑍍𑌜𑌗𑌤𑍍𑌰𑌾𑌣𑌶𑍌𑌂𑌡𑌾-
𑌨𑍍𑌸𑌦𑌾 𑌤𑍇 𑌪𑍍𑌰𑌚𑌂𑌡𑌾𑌨𑍍𑌶𑍍𑌰𑌯𑍇 𑌬𑌾𑌹𑍁𑌦𑌂𑌡𑌾𑌨𑍍 ॥ 12 ॥

𑌸𑌦𑌾 𑌶𑌾𑌰𑌦𑌾𑌃 𑌷𑌣𑍍𑌮𑍃𑌗𑌾𑌂𑌕𑌾 𑌯𑌦𑌿 𑌸𑍍𑌯𑍁𑌃
𑌸𑌮𑍁𑌦𑍍𑌯𑌂𑌤 𑌏𑌵 𑌸𑍍𑌥𑌿𑌤𑌾𑌶𑍍𑌚𑍇𑌤𑍍𑌸𑌮𑌂𑌤𑌾𑌤𑍍 ।
𑌸𑌦𑌾 𑌪𑍂𑌰𑍍𑌣𑌬𑌿𑌂𑌬𑌾𑌃 𑌕𑌳𑌂𑌕𑍈𑌶𑍍𑌚 𑌹𑍀𑌨𑌾-
𑌸𑍍𑌤𑌦𑌾 𑌤𑍍𑌵𑌨𑍍𑌮𑍁𑌖𑌾𑌨𑌾𑌂 𑌬𑍍𑌰𑍁𑌵𑍇 𑌸𑍍𑌕𑌂𑌦 𑌸𑌾𑌮𑍍𑌯𑌮𑍍 ॥ 13 ॥

𑌸𑍍𑌫𑍁𑌰𑌨𑍍𑌮𑌂𑌦𑌹𑌾𑌸𑍈𑌃 𑌸𑌹𑌂𑌸𑌾𑌨𑌿 𑌚𑌂𑌚-
𑌤𑍍𑌕𑌟𑌾𑌕𑍍𑌷𑌾𑌵𑌲𑍀𑌭𑍃𑌂𑌗𑌸𑌂𑌘𑍋𑌜𑍍𑌜𑍍𑌵𑌲𑌾𑌨𑌿 ।
𑌸𑍁𑌧𑌾𑌸𑍍𑌯𑌂𑌦𑌿𑌬𑌿𑌂𑌬𑌾𑌧𑌰𑌾𑌣𑍀𑌶𑌸𑍂𑌨𑍋
𑌤𑌵𑌾𑌲𑍋𑌕𑌯𑍇 𑌷𑌣𑍍𑌮𑍁𑌖𑌾𑌂𑌭𑍋𑌰𑍁𑌹𑌾𑌣𑌿 ॥ 14 ॥

𑌵𑌿𑌶𑌾𑌲𑍇𑌷𑍁 𑌕𑌰𑍍𑌣𑌾𑌂𑌤𑌦𑍀𑌰𑍍𑌘𑍇𑌷𑍍𑌵𑌜𑌸𑍍𑌰𑌂
𑌦𑌯𑌾𑌸𑍍𑌯𑌂𑌦𑌿𑌷𑍁 𑌦𑍍𑌵𑌾𑌦𑌶𑌸𑍍𑌵𑍀𑌕𑍍𑌷𑌣𑍇𑌷𑍁 ।
𑌮𑌯𑍀𑌷𑌤𑍍𑌕𑌟𑌾𑌕𑍍𑌷𑌃 𑌸𑌕𑍃𑌤𑍍𑌪𑌾𑌤𑌿𑌤𑌶𑍍𑌚𑍇-
𑌦𑍍𑌭𑌵𑍇𑌤𑍍𑌤𑍇 𑌦𑌯𑌾𑌶𑍀𑌲 𑌕𑌾 𑌨𑌾𑌮 𑌹𑌾𑌨𑌿𑌃 ॥ 15 ॥

𑌸𑍁𑌤𑌾𑌂𑌗𑍋𑌦𑍍𑌭𑌵𑍋 𑌮𑍇𑌽𑌸𑌿 𑌜𑍀𑌵𑍇𑌤𑌿 𑌷𑌡𑍍𑌧𑌾
𑌜𑌪𑌨𑍍𑌮𑌂𑌤𑍍𑌰𑌮𑍀𑌶𑍋 𑌮𑍁𑌦𑌾 𑌜𑌿𑌘𑍍𑌰𑌤𑍇 𑌯𑌾𑌨𑍍 ।
𑌜𑌗𑌦𑍍𑌭𑌾𑌰𑌭𑍃𑌦𑍍𑌭𑍍𑌯𑍋 𑌜𑌗𑌨𑍍𑌨𑌾𑌥 𑌤𑍇𑌭𑍍𑌯𑌃
𑌕𑌿𑌰𑍀𑌟𑍋𑌜𑍍𑌜𑍍𑌵𑌲𑍇𑌭𑍍𑌯𑍋 𑌨𑌮𑍋 𑌮𑌸𑍍𑌤𑌕𑍇𑌭𑍍𑌯𑌃 ॥ 16 ॥

𑌸𑍍𑌫𑍁𑌰𑌦𑍍𑌰𑌤𑍍𑌨𑌕𑍇𑌯𑍂𑌰𑌹𑌾𑌰𑌾𑌭𑌿𑌰𑌾𑌮-
𑌶𑍍𑌚𑌲𑌤𑍍𑌕𑍁𑌂𑌡𑌲𑌶𑍍𑌰𑍀𑌲𑌸𑌦𑍍𑌗𑌂𑌡𑌭𑌾𑌗𑌃 ।
𑌕𑌟𑍌 𑌪𑍀𑌤𑌵𑌾𑌸𑌾𑌃 𑌕𑌰𑍇 𑌚𑌾𑌰𑍁𑌶𑌕𑍍𑌤𑌿𑌃
𑌪𑍁𑌰𑌸𑍍𑌤𑌾𑌨𑍍𑌮𑌮𑌾𑌸𑍍𑌤𑌾𑌂 𑌪𑍁𑌰𑌾𑌰𑍇𑌸𑍍𑌤𑌨𑍂𑌜𑌃 ॥ 1𑍭 ॥

𑌇𑌹𑌾𑌯𑌾𑌹𑌿 𑌵𑌤𑍍𑌸𑍇𑌤𑌿 𑌹𑌸𑍍𑌤𑌾𑌨𑍍𑌪𑍍𑌰𑌸𑌾𑌰𑍍𑌯𑌾-
𑌹𑍍𑌵𑌯𑌤𑍍𑌯𑌾𑌦𑌰𑌾𑌚𑍍𑌛𑌂𑌕𑌰𑍇 𑌮𑌾𑌤𑍁𑌰𑌂𑌕𑌾𑌤𑍍 ।
𑌸𑌮𑍁𑌤𑍍𑌪𑌤𑍍𑌯 𑌤𑌾𑌤𑌂 𑌶𑍍𑌰𑌯𑌂𑌤𑌂 𑌕𑍁𑌮𑌾𑌰𑌂
𑌹𑌰𑌾𑌶𑍍𑌲𑌿𑌷𑍍𑌟𑌗𑌾𑌤𑍍𑌰𑌂 𑌭𑌜𑍇 𑌬𑌾𑌲𑌮𑍂𑌰𑍍𑌤𑌿𑌮𑍍 ॥ 1𑍮 ॥

𑌕𑍁𑌮𑌾𑌰𑍇𑌶𑌸𑍂𑌨𑍋 𑌗𑍁𑌹 𑌸𑍍𑌕𑌂𑌦 𑌸𑍇𑌨𑌾-
𑌪𑌤𑍇 𑌶𑌕𑍍𑌤𑌿𑌪𑌾𑌣𑍇 𑌮𑌯𑍂𑌰𑌾𑌧𑌿𑌰𑍂𑌢 ।
𑌪𑍁𑌲𑌿𑌂𑌦𑌾𑌤𑍍𑌮𑌜𑌾𑌕𑌾𑌂𑌤 𑌭𑌕𑍍𑌤𑌾𑌰𑍍𑌤𑌿𑌹𑌾𑌰𑌿𑌨𑍍
𑌪𑍍𑌰𑌭𑍋 𑌤𑌾𑌰𑌕𑌾𑌰𑍇 𑌸𑌦𑌾 𑌰𑌕𑍍𑌷 𑌮𑌾𑌂 𑌤𑍍𑌵𑌮𑍍 ॥ 1𑍯 ॥

𑌪𑍍𑌰𑌶𑌾𑌂𑌤𑍇𑌂𑌦𑍍𑌰𑌿𑌯𑍇 𑌨𑌷𑍍𑌟𑌸𑌂𑌜𑍍𑌞𑍇 𑌵𑌿𑌚𑍇𑌷𑍍𑌟𑍇
𑌕𑌫𑍋𑌦𑍍𑌗𑌾𑌰𑌿𑌵𑌕𑍍𑌤𑍍𑌰𑍇 𑌭𑌯𑍋𑌤𑍍𑌕𑌂𑌪𑌿𑌗𑌾𑌤𑍍𑌰𑍇 ।
𑌪𑍍𑌰𑌯𑌾𑌣𑍋𑌨𑍍𑌮𑍁𑌖𑍇 𑌮𑌯𑍍𑌯𑌨𑌾𑌥𑍇 𑌤𑌦𑌾𑌨𑍀𑌂
𑌦𑍍𑌰𑍁𑌤𑌂 𑌮𑍇 𑌦𑌯𑌾𑌲𑍋 𑌭𑌵𑌾𑌗𑍍𑌰𑍇 𑌗𑍁𑌹 𑌤𑍍𑌵𑌮𑍍 ॥ 20 ॥

𑌕𑍃𑌤𑌾𑌂𑌤𑌸𑍍𑌯 𑌦𑍂𑌤𑍇𑌷𑍁 𑌚𑌂𑌡𑍇𑌷𑍁 𑌕𑍋𑌪𑌾-
𑌦𑍍𑌦𑌹𑌚𑍍𑌛𑌿𑌂𑌦𑍍𑌧𑌿 𑌭𑌿𑌂𑌦𑍍𑌧𑍀𑌤𑌿 𑌮𑌾𑌂 𑌤𑌰𑍍𑌜𑌯𑌤𑍍𑌸𑍁 ।
𑌮𑌯𑍂𑌰𑌂 𑌸𑌮𑌾𑌰𑍁𑌹𑍍𑌯 𑌮𑌾 𑌭𑍈𑌰𑌿𑌤𑌿 𑌤𑍍𑌵𑌂
𑌪𑍁𑌰𑌃 𑌶𑌕𑍍𑌤𑌿𑌪𑌾𑌣𑌿𑌰𑍍𑌮𑌮𑌾𑌯𑌾𑌹𑌿 𑌶𑍀𑌘𑍍𑌰𑌮𑍍 ॥ 21 ॥

𑌪𑍍𑌰𑌣𑌮𑍍𑌯𑌾𑌸𑌕𑍃𑌤𑍍𑌪𑌾𑌦𑌯𑍋𑌸𑍍𑌤𑍇 𑌪𑌤𑌿𑌤𑍍𑌵𑌾
𑌪𑍍𑌰𑌸𑌾𑌦𑍍𑌯 𑌪𑍍𑌰𑌭𑍋 𑌪𑍍𑌰𑌾𑌰𑍍𑌥𑌯𑍇𑌽𑌨𑍇𑌕𑌵𑌾𑌰𑌮𑍍 ।
𑌨 𑌵𑌕𑍍𑌤𑍁𑌂 𑌕𑍍𑌷𑌮𑍋𑌽𑌹𑌂 𑌤𑌦𑌾𑌨𑍀𑌂 𑌕𑍃𑌪𑌾𑌬𑍍𑌧𑍇
𑌨 𑌕𑌾𑌰𑍍𑌯𑌾𑌂𑌤𑌕𑌾𑌲𑍇 𑌮𑌨𑌾𑌗𑌪𑍍𑌯𑍁𑌪𑍇𑌕𑍍𑌷𑌾 ॥ 22 ॥

𑌸𑌹𑌸𑍍𑌰𑌾𑌂𑌡𑌭𑍋𑌕𑍍𑌤𑌾 𑌤𑍍𑌵𑌯𑌾 𑌶𑍂𑌰𑌨𑌾𑌮𑌾
𑌹𑌤𑌸𑍍𑌤𑌾𑌰𑌕𑌃 𑌸𑌿𑌂𑌹𑌵𑌕𑍍𑌤𑍍𑌰𑌶𑍍𑌚 𑌦𑍈𑌤𑍍𑌯𑌃 ।
𑌮𑌮𑌾𑌂𑌤𑌰𑍍𑌹𑍃𑌦𑌿𑌸𑍍𑌥𑌂 𑌮𑌨𑌃𑌕𑍍𑌲𑍇𑌶𑌮𑍇𑌕𑌂
𑌨 𑌹𑌂𑌸𑌿 𑌪𑍍𑌰𑌭𑍋 𑌕𑌿𑌂 𑌕𑌰𑍋𑌮𑌿 𑌕𑍍𑌵 𑌯𑌾𑌮𑌿 ॥ 23 ॥

𑌅𑌹𑌂 𑌸𑌰𑍍𑌵𑌦𑌾 𑌦𑍁𑌃𑌖𑌭𑌾𑌰𑌾𑌵𑌸𑌨𑍍𑌨𑍋
𑌭𑌵𑌾𑌂𑌦𑍀𑌨𑌬𑌂𑌧𑍁𑌸𑍍𑌤𑍍𑌵𑌦𑌨𑍍𑌯𑌂 𑌨 𑌯𑌾𑌚𑍇 ।
𑌭𑌵𑌦𑍍𑌭𑌕𑍍𑌤𑌿𑌰𑍋𑌧𑌂 𑌸𑌦𑌾 𑌕𑍍𑌲𑍃𑌪𑍍𑌤𑌬𑌾𑌧𑌂
𑌮𑌮𑌾𑌧𑌿𑌂 𑌦𑍍𑌰𑍁𑌤𑌂 𑌨𑌾𑌶𑌯𑍋𑌮𑌾𑌸𑍁𑌤 𑌤𑍍𑌵𑌮𑍍 ॥ 24 ॥

𑌅𑌪𑌸𑍍𑌮𑌾𑌰𑌕𑍁𑌷𑍍𑌟𑌕𑍍𑌷𑌯𑌾𑌰𑍍𑌶𑌃 𑌪𑍍𑌰𑌮𑍇𑌹-
𑌜𑍍𑌵𑌰𑍋𑌨𑍍𑌮𑌾𑌦𑌗𑍁𑌲𑍍𑌮𑌾𑌦𑌿𑌰𑍋𑌗𑌾 𑌮𑌹𑌾𑌂𑌤𑌃 ।
𑌪𑌿𑌶𑌾𑌚𑌾𑌶𑍍𑌚 𑌸𑌰𑍍𑌵𑍇 𑌭𑌵𑌤𑍍𑌪𑌤𑍍𑌰𑌭𑍂𑌤𑌿𑌂
𑌵𑌿𑌲𑍋𑌕𑍍𑌯 𑌕𑍍𑌷𑌣𑌾𑌤𑍍𑌤𑌾𑌰𑌕𑌾𑌰𑍇 𑌦𑍍𑌰𑌵𑌂𑌤𑍇 ॥ 25 ॥

𑌦𑍃𑌶𑌿 𑌸𑍍𑌕𑌂𑌦𑌮𑍂𑌰𑍍𑌤𑌿𑌃 𑌶𑍍𑌰𑍁𑌤𑍌 𑌸𑍍𑌕𑌂𑌦𑌕𑍀𑌰𑍍𑌤𑌿-
𑌰𑍍𑌮𑍁𑌖𑍇 𑌮𑍇 𑌪𑌵𑌿𑌤𑍍𑌰𑌂 𑌸𑌦𑌾 𑌤𑌚𑍍𑌚𑌰𑌿𑌤𑍍𑌰𑌮𑍍 ।
𑌕𑌰𑍇 𑌤𑌸𑍍𑌯 𑌕𑍃𑌤𑍍𑌯𑌂 𑌵𑌪𑍁𑌸𑍍𑌤𑌸𑍍𑌯 𑌭𑍃𑌤𑍍𑌯𑌂
𑌗𑍁𑌹𑍇 𑌸𑌂𑌤𑍁 𑌲𑍀𑌨𑌾 𑌮𑌮𑌾𑌶𑍇𑌷𑌭𑌾𑌵𑌾𑌃 ॥ 26 ॥

𑌮𑍁𑌨𑍀𑌨𑌾𑌮𑍁𑌤𑌾𑌹𑍋 𑌨𑍃𑌣𑌾𑌂 𑌭𑌕𑍍𑌤𑌿𑌭𑌾𑌜𑌾-
𑌮𑌭𑍀𑌷𑍍𑌟𑌪𑍍𑌰𑌦𑌾𑌃 𑌸𑌂𑌤𑌿 𑌸𑌰𑍍𑌵𑌤𑍍𑌰 𑌦𑍇𑌵𑌾𑌃 ।
𑌨𑍃𑌣𑌾𑌮𑌂𑌤𑍍𑌯𑌜𑌾𑌨𑌾𑌮𑌪𑌿 𑌸𑍍𑌵𑌾𑌰𑍍𑌥𑌦𑌾𑌨𑍇
𑌗𑍁𑌹𑌾𑌦𑍍𑌦𑍇𑌵𑌮𑌨𑍍𑌯𑌂 𑌨 𑌜𑌾𑌨𑍇 𑌨 𑌜𑌾𑌨𑍇 ॥ 2𑍭 ॥

𑌕𑌲𑌤𑍍𑌰𑌂 𑌸𑍁𑌤𑌾 𑌬𑌂𑌧𑍁𑌵𑌰𑍍𑌗𑌃 𑌪𑌶𑍁𑌰𑍍𑌵𑌾
𑌨𑌰𑍋 𑌵𑌾𑌥 𑌨𑌾𑌰𑍀 𑌗𑍃𑌹𑍇 𑌯𑍇 𑌮𑌦𑍀𑌯𑌾𑌃 ।
𑌯𑌜𑌂𑌤𑍋 𑌨𑌮𑌂𑌤𑌃 𑌸𑍍𑌤𑍁𑌵𑌂𑌤𑍋 𑌭𑌵𑌂𑌤𑌂
𑌸𑍍𑌮𑌰𑌂𑌤𑌶𑍍𑌚 𑌤𑍇 𑌸𑌂𑌤𑍁 𑌸𑌰𑍍𑌵𑍇 𑌕𑍁𑌮𑌾𑌰 ॥ 2𑍮 ॥

𑌮𑍃𑌗𑌾𑌃 𑌪𑌕𑍍𑌷𑌿𑌣𑍋 𑌦𑌂𑌶𑌕𑌾 𑌯𑍇 𑌚 𑌦𑍁𑌷𑍍𑌟𑌾-
𑌸𑍍𑌤𑌥𑌾 𑌵𑍍𑌯𑌾𑌧𑌯𑍋 𑌬𑌾𑌧𑌕𑌾 𑌯𑍇 𑌮𑌦𑌂𑌗𑍇 ।
𑌭𑌵𑌚𑍍𑌛𑌕𑍍𑌤𑌿𑌤𑍀𑌕𑍍𑌷𑍍𑌣𑌾𑌗𑍍𑌰𑌭𑌿𑌨𑍍𑌨𑌾𑌃 𑌸𑍁𑌦𑍂𑌰𑍇
𑌵𑌿𑌨𑌶𑍍𑌯𑌂𑌤𑍁 𑌤𑍇 𑌚𑍂𑌰𑍍𑌣𑌿𑌤𑌕𑍍𑌰𑍌𑌂𑌚𑌶𑍈𑌲 ॥ 2𑍯 ॥

𑌜𑌨𑌿𑌤𑍍𑌰𑍀 𑌪𑌿𑌤𑌾 𑌚 𑌸𑍍𑌵𑌪𑍁𑌤𑍍𑌰𑌾𑌪𑌰𑌾𑌧𑌂
𑌸𑌹𑍇𑌤𑍇 𑌨 𑌕𑌿𑌂 𑌦𑍇𑌵𑌸𑍇𑌨𑌾𑌧𑌿𑌨𑌾𑌥 ।
𑌅𑌹𑌂 𑌚𑌾𑌤𑌿𑌬𑌾𑌲𑍋 𑌭𑌵𑌾𑌨𑍍 𑌲𑍋𑌕𑌤𑌾𑌤𑌃
𑌕𑍍𑌷𑌮𑌸𑍍𑌵𑌾𑌪𑌰𑌾𑌧𑌂 𑌸𑌮𑌸𑍍𑌤𑌂 𑌮𑌹𑍇𑌶 ॥ 30 ॥

𑌨𑌮𑌃 𑌕𑍇𑌕𑌿𑌨𑍇 𑌶𑌕𑍍𑌤𑌯𑍇 𑌚𑌾𑌪𑌿 𑌤𑍁𑌭𑍍𑌯𑌂
𑌨𑌮𑌶𑍍𑌛𑌾𑌗 𑌤𑍁𑌭𑍍𑌯𑌂 𑌨𑌮𑌃 𑌕𑍁𑌕𑍍𑌕𑍁𑌟𑌾𑌯 ।
𑌨𑌮𑌃 𑌸𑌿𑌂𑌧𑌵𑍇 𑌸𑌿𑌂𑌧𑍁𑌦𑍇𑌶𑌾𑌯 𑌤𑍁𑌭𑍍𑌯𑌂
𑌪𑍁𑌨𑌃 𑌸𑍍𑌕𑌂𑌦𑌮𑍂𑌰𑍍𑌤𑍇 𑌨𑌮𑌸𑍍𑌤𑍇 𑌨𑌮𑍋𑌽𑌸𑍍𑌤𑍁 ॥ 31 ॥

𑌜𑌯𑌾𑌨𑌂𑌦𑌭𑍂𑌮𑌂 𑌜𑌯𑌾𑌪𑌾𑌰𑌧𑌾𑌮𑌂
𑌜𑌯𑌾𑌮𑍋𑌘𑌕𑍀𑌰𑍍𑌤𑍇 𑌜𑌯𑌾𑌨𑌂𑌦𑌮𑍂𑌰𑍍𑌤𑍇 ।
𑌜𑌯𑌾𑌨𑌂𑌦𑌸𑌿𑌂𑌧𑍋 𑌜𑌯𑌾𑌶𑍇𑌷𑌬𑌂𑌧𑍋
𑌜𑌯 𑌤𑍍𑌵𑌂 𑌸𑌦𑌾 𑌮𑍁𑌕𑍍𑌤𑌿𑌦𑌾𑌨𑍇𑌶𑌸𑍂𑌨𑍋 ॥ 32 ॥

𑌭𑍁𑌜𑌂𑌗𑌾𑌖𑍍𑌯𑌵𑍃𑌤𑍍𑌤𑍇𑌨 𑌕𑍍𑌲𑍃𑌪𑍍𑌤𑌂 𑌸𑍍𑌤𑌵𑌂 𑌯𑌃
𑌪𑌠𑍇𑌦𑍍𑌭𑌕𑍍𑌤𑌿𑌯𑍁𑌕𑍍𑌤𑍋 𑌗𑍁𑌹𑌂 𑌸𑌂𑌪𑍍𑌰𑌣𑌮𑍍𑌯 ।
𑌸 𑌪𑍁𑌤𑍍𑌰𑌾𑌨𑍍𑌕𑌲𑌤𑍍𑌰𑌂 𑌧𑌨𑌂 𑌦𑍀𑌰𑍍𑌘𑌮𑌾𑌯𑍁-
𑌰𑍍𑌲𑌭𑍇𑌤𑍍𑌸𑍍𑌕𑌂𑌦𑌸𑌾𑌯𑍁𑌜𑍍𑌯𑌮𑌂𑌤𑍇 𑌨𑌰𑌃 𑌸𑌃 ॥ 33 ॥