কল্য়াণবৃষ্টিভিরিবামৃতপূরিতাভি-
-র্লক্ষ্মীস্বয়ংবরণমংগলদীপিকাভিঃ ।
সেবাভিরংব তব পাদসরোজমূলে
নাকারি কিং মনসি ভাগ্যবতাং জনানাম্ ॥ 1 ॥
এতাবদেব জননি স্পৃহণীযমাস্তে
ত্বদ্বংদনেষু সলিলস্থগিতে চ নেত্রে ।
সাংনিধ্যমুদ্যদরুণায়ুতসোদরস্য়
ত্বদ্বিগ্রহস্য় পরয়া সুধয়াপ্লুতস্য় ॥ 2 ॥
ঈশত্বনামকলুষাঃ কতি বা ন সংতি
ব্রহ্মাদয়ঃ প্রতিভবং প্রলয়াভিভূতাঃ ।
একঃ স এব জননি স্থিরসিদ্ধিরাস্তে
যঃ পাদয়োস্তব সকৃত্প্রণতিং করোতি ॥ 3 ॥
লব্ধ্বা সকৃত্ত্রিপুরসুংদরি তাবকীনং
কারুণ্যকংদলিতকাংতিভরং কটাক্ষম্ ।
কংদর্পকোটিসুভগাস্ত্বয়ি ভক্তিভাজঃ
সংমোহয়ংতি তরুণীর্ভুবনত্রয়েঽপি ॥ 4 ॥
হ্রীংকারমেব তব নাম গৃণংতি বেদা
মাতস্ত্রিকোণনিলয়ে ত্রিপুরে ত্রিনেত্রে ।
ত্বত্সংস্মৃতৌ যমভটাভিভবং বিহায়
দীব্য়ংতি নংদনবনে সহ লোকপালৈঃ ॥ 5 ॥
হংতুঃ পুরামধিগলং পরিপীযমানঃ
ক্রূরঃ কথং ন ভবিতা গরলস্য় বেগঃ ।
নাশ্বাসনায় যদি মাতরিদং তবার্থং
দেহস্য় শশ্বদমৃতাপ্লুতশীতলস্য় ॥ 6 ॥
সর্বজ্ঞতাং সদসি বাক্পটুতাং প্রসূতে
দেবি ত্বদংঘ্রিসরসীরুহয়োঃ প্রণামঃ ।
কিং চ স্ফুরন্মকুটমুজ্জ্বলমাতপত্রং
দ্বে চামরে চ মহতীং বসুধাং দদাতি ॥ 7 ॥
কল্পদ্রুমৈরভিমতপ্রতিপাদনেষু
কারুণ্যবারিধিভিরংব ভবাত্কটাক্ষৈঃ ।
আলোকয় ত্রিপুরসুংদরি মামনাথং
ত্বয়্য়েব ভক্তিভরিতং ত্বয়ি বদ্ধতৃষ্ণম্ ॥ 8 ॥
হংতেতরেষ্বপি মনাংসি নিধায় চান্য়ে
ভক্তিং বহংতি কিল পামরদৈবতেষু ।
ত্বামেব দেবি মনসা সমনুস্মরামি
ত্বামেব নৌমি শরণং জননি ত্বমেব ॥ 9 ॥
লক্ষ্য়েষু সত্স্বপি কটাক্ষনিরীক্ষণানা-
-মালোকয় ত্রিপুরসুংদরি মাং কদাচিত্ ।
নূনং ময়া তু সদৃশঃ করুণৈকপাত্রং
জাতো জনিষ্যতি জনো ন চ জাযতে বা ॥ 10 ॥
হ্রীং হ্রীমিতি প্রতিদিনং জপতাং তবাখ্য়াং
কিং নাম দুর্লভমিহ ত্রিপুরাধিবাসে ।
মালাকিরীটমদবারণমাননীয়া
তান্সেবতে বসুমতী স্বযমেব লক্ষ্মীঃ ॥ 11 ॥
সংপত্করাণি সকলেংদ্রিযনংদনানি
সাম্রাজ্যদাননিরতানি সরোরুহাক্ষি ।
ত্বদ্বংদনানি দুরিতাহরণোদ্যতানি
মামেব মাতরনিশং কলয়ংতু নান্যম্ ॥ 12 ॥
কল্পোপসংহৃতিষু কল্পিততাংডবস্য়
দেবস্য় খংডপরশোঃ পরভৈরবস্য় ।
পাশাংকুশৈক্ষবশরাসনপুষ্পবাণা
সা সাক্ষিণী বিজযতে তব মূর্তিরেকা ॥ 13 ॥
লগ্নং সদা ভবতু মাতরিদং তবার্ধং
তেজঃ পরং বহুলকুংকুমপংকশোণম্ ।
ভাস্বত্কিরীটমমৃতাংশুকলাবতংসং
মধ্য়ে ত্রিকোণনিলয়ং পরমামৃতার্দ্রম্ ॥ 14 ॥
হ্রীংকারমেব তব নাম তদেব রূপং
ত্বন্নাম দুর্লভমিহ ত্রিপুরে গৃণংতি ।
ত্বত্তেজসা পরিণতং বিযদাদিভূতং
সৌখ্য়ং তনোতি সরসীরুহসংভবাদেঃ ॥ 15 ॥
হ্রীংকারত্রযসংপুটেন মহতা মংত্রেণ সংদীপিতং
স্তোত্রং যঃ প্রতিবাসরং তব পুরো মাতর্জপেন্মংত্রবিত্ ।
তস্য় ক্ষোণিভুজো ভবংতি বশগা লক্ষ্মীশ্চিরস্থায়িনী
বাণী নির্মলসূক্তিভারভারিতা জাগর্তি দীর্ঘং বয়ঃ ॥ 16 ॥
ইতি শ্রীমত্পরমহংসপরিব্রাজকাচার্যস্য় শ্রীগোবিংদভগবত্পূজ্যপাদশিষ্যস্য় শ্রীমচ্ছংকরভগবতঃ কৃতৌ কল্য়াণবৃষ্টি স্তবঃ ।
