বিদিতাখিল শাস্ত্র সুধা জলধে
মহিতোপনিষত্-কথিতার্থ নিধে ।
হৃদয়ে কলয়ে বিমলং চরণং
ভব শংকর দেশিক মে শরণম্ ॥ 1 ॥
করুণা বরুণালয় পালয় মাং
ভবসাগর দুঃখ বিদূন হৃদম্ ।
রচয়াখিল দর্শন তত্ত্ববিদং
ভব শংকর দেশিক মে শরণম্ ॥ 2 ॥
ভবতা জনতা সুহিতা ভবিতা
নিজবোধ বিচারণ চারুমতে ।
কলয়েশ্বর জীব বিবেক বিদং
ভব শংকর দেশিক মে শরণম্ ॥ 3 ॥
ভব এব ভবানিতি মে নিতরাং
সমজাযত চেতসি কৌতুকিতা ।
মম বারয় মোহ মহাজলধিং
ভব শংকর দেশিক মে শরণম্ ॥ 4 ॥
সুকৃতেঽধিকৃতে বহুধা ভবতো
ভবিতা সমদর্শন লালসতা ।
অতি দীনমিমং পরিপালয় মাং
ভব শংকর দেশিক মে শরণম্ ॥ 5 ॥
জগতীমবিতুং কলিতাকৃতয়ো
বিচরংতি মহামাহ সচ্ছলতঃ ।
অহিমাংশুরিবাত্র বিভাসি গুরো
ভব শংকর দেশিক মে শরণম্ ॥ 6 ॥
গুরুপুংগব পুংগবকেতন তে
সমতামযতাং ন হি কোঽপি সুধীঃ ।
শরণাগত বত্সল তত্ত্বনিধে
ভব শংকর দেশিক মে শরণম্ ॥ 7 ॥
বিদিতা ন ময়া বিশদৈক কলা
ন চ কিংচন কাংচনমস্তি গুরো ।
দৃতমেব বিধেহি কৃপাং সহজাং
ভব শংকর দেশিক মে শরণম্ ॥ 8 ॥
