𑌬𑍍𑌰𑌹𑍍𑌮𑌵𑌿𑌷𑍍𑌣𑍁𑌮𑌹𑍇𑌶𑌾 𑌊𑌚𑍁𑌃 ।
𑌅𑌜𑌂 𑌨𑌿𑌰𑍍𑌵𑌿𑌕𑌲𑍍𑌪𑌂 𑌨𑌿𑌰𑌾𑌕𑌾𑌰𑌮𑍇𑌕𑌂
𑌨𑌿𑌰𑌾𑌨𑌂𑌦𑌮𑌦𑍍𑌵𑍈𑌤𑌮𑌾𑌨𑌂𑌦𑌪𑍂𑌰𑍍𑌣𑌮𑍍 ।
𑌪𑌰𑌂 𑌨𑌿𑌰𑍍𑌗𑍁𑌣𑌂 𑌨𑌿𑌰𑍍𑌵𑌿𑌶𑍇𑌷𑌂 𑌨𑌿𑌰𑍀𑌹𑌂
𑌪𑌰𑌬𑍍𑌰𑌹𑍍𑌮𑌰𑍂𑌪𑌂 𑌗𑌣𑍇𑌶𑌂 𑌭𑌜𑍇𑌮 ॥ 1 ॥

𑌗𑍁𑌣𑌾𑌤𑍀𑌤𑌮𑌾𑌦𑍍𑌯𑌂 𑌚𑌿𑌦𑌾𑌨𑌂𑌦𑌰𑍂𑌪𑌂
𑌚𑌿𑌦𑌾𑌭𑌾𑌸𑌕𑌂 𑌸𑌰𑍍𑌵𑌗𑌂 𑌜𑍍𑌞𑌾𑌨𑌗𑌮𑍍𑌯𑌮𑍍 ।
𑌮𑍁𑌨𑌿𑌧𑍍𑌯𑍇𑌯𑌮𑌾𑌕𑌾𑌶𑌰𑍂𑌪𑌂 𑌪𑌰𑍇𑌶𑌂
𑌪𑌰𑌬𑍍𑌰𑌹𑍍𑌮𑌰𑍂𑌪𑌂 𑌗𑌣𑍇𑌶𑌂 𑌭𑌜𑍇𑌮 ॥ 2 ॥

𑌜𑌗𑌤𑍍𑌕𑌾𑌰𑌣𑌂 𑌕𑌾𑌰𑌣𑌜𑍍𑌞𑌾𑌨𑌰𑍂𑌪𑌂
𑌸𑍁𑌰𑌾𑌦𑌿𑌂 𑌸𑍁𑌖𑌾𑌦𑌿𑌂 𑌯𑍁𑌗𑌾𑌦𑌿𑌂 𑌗𑌣𑍇𑌶𑌮𑍍 ।
𑌜𑌗𑌦𑍍𑌵𑍍𑌯𑌾𑌪𑌿𑌨𑌂 𑌵𑌿𑌶𑍍𑌵𑌵𑌂𑌦𑍍𑌯𑌂 𑌸𑍁𑌰𑍇𑌶𑌂
𑌪𑌰𑌬𑍍𑌰𑌹𑍍𑌮𑌰𑍂𑌪𑌂 𑌗𑌣𑍇𑌶𑌂 𑌭𑌜𑍇𑌮 ॥ 3 ॥

𑌰𑌜𑍋𑌯𑍋𑌗𑌤𑍋 𑌬𑍍𑌰𑌹𑍍𑌮𑌰𑍂𑌪𑌂 𑌶𑍍𑌰𑍁𑌤𑌿𑌜𑍍𑌞𑌂
𑌸𑌦𑌾 𑌕𑌾𑌰𑍍𑌯𑌸𑌕𑍍𑌤𑌂 𑌹𑍃𑌦𑌾𑌚𑌿𑌂𑌤𑍍𑌯𑌰𑍂𑌪𑌮𑍍 ।
𑌜𑌗𑌤𑍍𑌕𑌾𑌰𑌕𑌂 𑌸𑌰𑍍𑌵𑌵𑌿𑌦𑍍𑌯𑌾𑌨𑌿𑌧𑌾𑌨𑌂
𑌪𑌰𑌬𑍍𑌰𑌹𑍍𑌮𑌰𑍂𑌪𑌂 𑌗𑌣𑍇𑌶𑌂 𑌨𑌤𑌾𑌸𑍍𑌮𑌃 ॥ 4 ॥

𑌸𑌦𑌾 𑌸𑌤𑍍𑌤𑍍𑌵𑌯𑍋𑌗𑌂 𑌮𑍁𑌦𑌾 𑌕𑍍𑌰𑍀𑌡𑌮𑌾𑌨𑌂
𑌸𑍁𑌰𑌾𑌰𑍀𑌨𑍍𑌹𑌰𑌂𑌤𑌂 𑌜𑌗𑌤𑍍𑌪𑌾𑌲𑌯𑌂𑌤𑌮𑍍 ।
𑌅𑌨𑍇𑌕𑌾𑌵𑌤𑌾𑌰𑌂 𑌨𑌿𑌜𑌜𑍍𑌞𑌾𑌨𑌹𑌾𑌰𑌂
𑌸𑌦𑌾 𑌵𑌿𑌷𑍍𑌣𑍁𑌰𑍂𑌪𑌂 𑌗𑌣𑍇𑌶𑌂 𑌨𑌮𑌾𑌮𑌃 ॥ 5 ॥

𑌤𑌮𑍋𑌯𑍋𑌗𑌿𑌨𑌂 𑌰𑍁𑌦𑍍𑌰𑌰𑍂𑌪𑌂 𑌤𑍍𑌰𑌿𑌨𑍇𑌤𑍍𑌰𑌂
𑌜𑌗𑌦𑍍𑌧𑌾𑌰𑌕𑌂 𑌤𑌾𑌰𑌕𑌂 𑌜𑍍𑌞𑌾𑌨𑌹𑍇𑌤𑍁𑌮𑍍 ।
𑌅𑌨𑍇𑌕𑌾𑌗𑌮𑍈𑌃 𑌸𑍍𑌵𑌂 𑌜𑌨𑌂 𑌬𑍋𑌧𑌯𑌂𑌤𑌂
𑌸𑌦𑌾 𑌶𑌰𑍍𑌵𑌰𑍂𑌪𑌂 𑌗𑌣𑍇𑌶𑌂 𑌨𑌮𑌾𑌮𑌃 ॥ 6 ॥

𑌤𑌮𑌸𑍍𑌤𑍋𑌮𑌹𑌾𑌰𑌂 𑌜𑌨𑌾𑌜𑍍𑌞𑌾𑌨𑌹𑌾𑌰𑌂
𑌤𑍍𑌰𑌯𑍀𑌵𑍇𑌦𑌸𑌾𑌰𑌂 𑌪𑌰𑌬𑍍𑌰𑌹𑍍𑌮𑌪𑌾𑌰𑌮𑍍 ।
𑌮𑍁𑌨𑌿𑌜𑍍𑌞𑌾𑌨𑌕𑌾𑌰𑌂 𑌵𑌿𑌦𑍂𑌰𑍇𑌵𑌿𑌕𑌾𑌰𑌂
𑌸𑌦𑌾 𑌬𑍍𑌰𑌹𑍍𑌮𑌰𑍂𑌪𑌂 𑌗𑌣𑍇𑌶𑌂 𑌨𑌮𑌾𑌮𑌃 ॥ 𑍭 ॥

𑌨𑌿𑌜𑍈𑌰𑍋𑌷𑌧𑍀𑌸𑍍𑌤𑌰𑍍𑌪𑌯𑌂𑌤𑌂 𑌕𑌰𑍋𑌦𑍍𑌯𑍈𑌃
𑌸𑌰𑍌𑌘𑌾𑌨𑍍𑌕𑌲𑌾𑌭𑌿𑌃 𑌸𑍁𑌧𑌾𑌸𑍍𑌰𑌾𑌵𑌿𑌣𑍀𑌭𑌿𑌃 ।
𑌦𑌿𑌨𑍇𑌶𑌾𑌂𑌶𑍁 𑌸𑌂𑌤𑌾𑌪𑌹𑌾𑌰𑌂 𑌦𑍍𑌵𑌿𑌜𑍇𑌶𑌂
𑌶𑌶𑌾𑌂𑌕𑌸𑍍𑌵𑌰𑍂𑌪𑌂 𑌗𑌣𑍇𑌶𑌂 𑌨𑌮𑌾𑌮𑌃 ॥ 𑍮 ॥

𑌪𑍍𑌰𑌕𑌾𑌶𑌸𑍍𑌵𑌰𑍂𑌪𑌂 𑌨𑌭𑍋𑌵𑌾𑌯𑍁𑌰𑍂𑌪𑌂
𑌵𑌿𑌕𑌾𑌰𑌾𑌦𑌿𑌹𑍇𑌤𑍁𑌂 𑌕𑌲𑌾𑌕𑌾𑌲𑌭𑍂𑌤𑌮𑍍 ।
𑌅𑌨𑍇𑌕𑌕𑍍𑌰𑌿𑌯𑌾𑌨𑍇𑌕𑌶𑌕𑍍𑌤𑌿𑌸𑍍𑌵𑌰𑍂𑌪𑌂
𑌸𑌦𑌾 𑌶𑌕𑍍𑌤𑌿𑌰𑍂𑌪𑌂 𑌗𑌣𑍇𑌶𑌂 𑌨𑌮𑌾𑌮𑌃 ॥ 𑍯 ॥

𑌪𑍍𑌰𑌧𑌾𑌨𑌸𑍍𑌵𑌰𑍂𑌪𑌂 𑌮𑌹𑌤𑍍𑌤𑌤𑍍𑌤𑍍𑌵𑌰𑍂𑌪𑌂
𑌧𑌰𑌾𑌵𑌾𑌰𑌿𑌰𑍂𑌪𑌂 𑌦𑌿𑌗𑍀𑌶𑌾𑌦𑌿𑌰𑍂𑌪𑌮𑍍 ।
𑌅𑌸𑌤𑍍𑌸𑌤𑍍𑌸𑍍𑌵𑌰𑍂𑌪𑌂 𑌜𑌗𑌦𑍍𑌧𑍇𑌤𑍁𑌭𑍂𑌤𑌂
𑌸𑌦𑌾 𑌵𑌿𑌶𑍍𑌵𑌰𑍂𑌪𑌂 𑌗𑌣𑍇𑌶𑌂 𑌨𑌤𑌾𑌸𑍍𑌮𑌃 ॥ 10 ॥

𑌤𑍍𑌵𑌦𑍀𑌯𑍇 𑌮𑌨𑌃 𑌸𑍍𑌥𑌾𑌪𑌯𑍇𑌦𑌂𑌘𑍍𑌰𑌿𑌯𑍁𑌗𑍍𑌮𑍇
𑌜𑌨𑍋 𑌵𑌿𑌘𑍍𑌨𑌸𑌂𑌘𑌾𑌨𑍍𑌨 𑌪𑍀𑌡𑌾𑌂 𑌲𑌭𑍇𑌤 ।
𑌲𑌸𑌤𑍍𑌸𑍂𑌰𑍍𑌯𑌬𑌿𑌂𑌬𑍇 𑌵𑌿𑌶𑌾𑌲𑍇 𑌸𑍍𑌥𑌿𑌤𑍋𑌽𑌯𑌂
𑌜𑌨𑍋𑌧𑍍𑌵𑌾𑌂𑌤 𑌪𑍀𑌡𑌾𑌂 𑌕𑌥𑌂 𑌵𑌾 𑌲𑌭𑍇𑌤 ॥ 11 ॥

𑌵𑌯𑌂 𑌭𑍍𑌰𑌾𑌮𑌿𑌤𑌾𑌃 𑌸𑌰𑍍𑌵𑌥𑌾𑌽𑌜𑍍𑌞𑌾𑌨𑌯𑍋𑌗𑌾-
-𑌦𑌲𑌬𑍍𑌧𑌾 𑌤𑌵𑌾𑌂𑌘𑍍𑌰𑌿𑌂 𑌬𑌹𑍂𑌨𑍍𑌵𑌰𑍍𑌷𑌪𑍂𑌗𑌾𑌨𑍍 ।
𑌇𑌦𑌾𑌨𑍀𑌮𑌵𑌾𑌪𑍍𑌤𑌾𑌸𑍍𑌤𑌵𑍈𑌵 𑌪𑍍𑌰𑌸𑌾𑌦𑌾-
-𑌤𑍍𑌪𑍍𑌰𑌪𑌨𑍍𑌨𑌾𑌨𑍍𑌸𑌦𑌾 𑌪𑌾𑌹𑌿 𑌵𑌿𑌶𑍍𑌵𑌂𑌭𑌰𑌾𑌦𑍍𑌯 ॥ 12 ॥

𑌗𑌣𑍇𑌶 𑌉𑌵𑌾𑌚 ।
𑌇𑌦𑌂 𑌯𑌃 𑌪𑌠𑍇𑌤𑍍𑌪𑍍𑌰𑌾𑌤𑌰𑍁𑌤𑍍𑌥𑌾𑌯 𑌧𑍀𑌮𑌾𑌨𑍍
𑌤𑍍𑌰𑌿𑌸𑌂𑌧𑍍𑌯𑌂 𑌸𑌦𑌾 𑌭𑌕𑍍𑌤𑌿𑌯𑍁𑌕𑍍𑌤𑍋 𑌵𑌿𑌶𑍁𑌦𑍍𑌧𑌃 ।
𑌸𑌪𑍁𑌤𑍍𑌰𑌾𑌨𑍍 𑌶𑍍𑌰𑌿𑌯𑌂 𑌸𑌰𑍍𑌵𑌕𑌾𑌮𑌾𑌨𑍍 𑌲𑌭𑍇𑌤
𑌪𑌰𑌬𑍍𑌰𑌹𑍍𑌮𑌰𑍂𑌪𑍋 𑌭𑌵𑍇𑌦𑌂𑌤𑌕𑌾𑌲𑍇 ॥ 13 ॥

𑌇𑌤𑌿 𑌗𑌣𑍇𑌶𑌪𑍁𑌰𑌾𑌣𑍇 𑌉𑌪𑌾𑌸𑌨𑌾𑌖𑌂𑌡𑍇 𑌤𑍍𑌰𑌯𑍋𑌦𑌶𑍋𑌽𑌧𑍍𑌯𑌾𑌯𑍇 𑌶𑍍𑌰𑍀𑌗𑌣𑌪𑌤𑌿𑌸𑍍𑌤𑌵𑌃 ।