ಷಡಾಧಾರಪಙ್ಕೇರುಹಾನ್ತರ್ವಿರಾಜ-
-ತ್ಸುಷುಮ್ನಾನ್ತರಾಲೇಽತಿತೇಜೋಲ್ಲಸನ್ತೀಮ್ ।
ಸುಧಾಮಣ್ಡಲಂ ದ್ರಾವಯನ್ತೀಂ ಪಿಬನ್ತೀಂ
ಸುಧಾಮೂರ್ತಿಮೀಡೇ ಚಿದಾನನ್ದರೂಪಾಮ್ ॥ 1 ॥
ಜ್ವಲತ್ಕೋಟಿಬಾಲಾರ್ಕಭಾಸಾರುಣಾಙ್ಗೀಂ
ಸುಲಾವಣ್ಯಶೃಙ್ಗಾರಶೋಭಾಭಿರಾಮಾಮ್ ।
ಮಹಾಪದ್ಮಕಿಞ್ಜಲ್ಕಮಧ್ಯೇ ವಿರಾಜ-
-ತ್ತ್ರಿಕೋಣೇ ನಿಷಣ್ಣಾಂ ಭಜೇ ಶ್ರೀಭವಾನೀಮ್ ॥ 2 ॥
ಕ್ವಣತ್ಕಿಙ್ಕಿಣೀನೂಪುರೋದ್ಭಾಸಿರತ್ನ-
-ಪ್ರಭಾಲೀಢಲಾಕ್ಷಾರ್ದ್ರಪಾದಾಬ್ಜಯುಗ್ಮಮ್ ।
ಅಜೇಶಾಚ್ಯುತಾದ್ಯೈಃ ಸುರೈಃ ಸೇವ್ಯಮಾನಂ
ಮಹಾದೇವಿ ಮನ್ಮೂರ್ಧ್ನಿ ತೇ ಭಾವಯಾಮಿ ॥ 3 ॥
ಸುಶೋಣಾಮ್ಬರಾಬದ್ಧನೀವೀವಿರಾಜ-
-ನ್ಮಹಾರತ್ನಕಾಞ್ಚೀಕಲಾಪಂ ನಿತಮ್ಬಮ್ ।
ಸ್ಫುರದ್ದಕ್ಷಿಣಾವರ್ತನಾಭಿಂ ಚ ತಿಸ್ರೋ
ವಲೀರಮ್ಬ ತೇ ರೋಮರಾಜಿಂ ಭಜೇಽಹಮ್ ॥ 4 ॥
ಲಸದ್ವೃತ್ತಮುತ್ತುಙ್ಗಮಾಣಿಕ್ಯಕುಮ್ಭೋ-
-ಪಮಶ್ರಿ ಸ್ತನದ್ವನ್ದ್ವಮಮ್ಬಾಮ್ಬುಜಾಕ್ಷಿ ।
ಭಜೇ ದುಗ್ಧಪೂರ್ಣಾಭಿರಾಮಂ ತವೇದಂ
ಮಹಾಹಾರದೀಪ್ತಂ ಸದಾ ಪ್ರಸ್ನುತಾಸ್ಯಮ್ ॥ 5 ॥
ಶಿರೀಷಪ್ರಸೂನೋಲ್ಲಸದ್ಬಾಹುದಣ್ಡೈ-
-ರ್ಜ್ವಲದ್ಬಾಣಕೋದಣ್ಡಪಾಶಾಙ್ಕುಶೈಶ್ಚ ।
ಚಲತ್ಕಙ್ಕಣೋದಾರಕೇಯೂರಭೂಷೋ-
-ಜ್ಜ್ವಲದ್ಭಿರ್ಲಸನ್ತೀಂ ಭಜೇ ಶ್ರೀಭವಾನೀಮ್ ॥ 6 ॥
ಶರತ್ಪೂರ್ಣಚನ್ದ್ರಪ್ರಭಾಪೂರ್ಣಬಿಮ್ಬಾ-
-ಧರಸ್ಮೇರವಕ್ತ್ರಾರವಿನ್ದಾಂ ಸುಶಾನ್ತಾಮ್ ।
ಸುರತ್ನಾವಳೀಹಾರತಾಟಙ್ಕಶೋಭಾಂ
ಮಹಾಸುಪ್ರಸನ್ನಾಂ ಭಜೇ ಶ್ರೀಭವಾನೀಮ್ ॥ 7 ॥
ಸುನಾಸಾಪುಟಂ ಸುನ್ದರಭ್ರೂಲಲಾಟಂ
ತವೌಷ್ಠಶ್ರಿಯಂ ದಾನದಕ್ಷಂ ಕಟಾಕ್ಷಮ್ ।
ಲಲಾಟೇ ಲಸದ್ಗನ್ಧಕಸ್ತೂರಿಭೂಷಂ
ಸ್ಫುರಚ್ಛ್ರೀಮುಖಾಮ್ಭೋಜಮೀಡೇಽಹಮಮ್ಬ ॥ 8 ॥
ಚಲತ್ಕುನ್ತಲಾನ್ತರ್ಭ್ರಮದ್ಭೃಙ್ಗಬೃನ್ದಂ
ಘನಸ್ನಿಗ್ಧಧಮ್ಮಿಲ್ಲಭೂಷೋಜ್ಜ್ವಲಂ ತೇ ।
ಸ್ಫುರನ್ಮೌಳಿಮಾಣಿಕ್ಯಬದ್ಧೇನ್ದುರೇಖಾ-
-ವಿಲಾಸೋಲ್ಲಸದ್ದಿವ್ಯಮೂರ್ಧಾನಮೀಡೇ ॥ 9 ॥
ಇತಿ ಶ್ರೀಭವಾನಿ ಸ್ವರೂಪಂ ತವೇದಂ
ಪ್ರಪಞ್ಚಾತ್ಪರಂ ಚಾತಿಸೂಕ್ಷ್ಮಂ ಪ್ರಸನ್ನಮ್ ।
ಸ್ಫುರತ್ವಮ್ಬ ಡಿಮ್ಭಸ್ಯ ಮೇ ಹೃತ್ಸರೋಜೇ
ಸದಾ ವಾಙ್ಮಯಂ ಸರ್ವತೇಜೋಮಯಂ ಚ ॥ 10 ॥
ಗಣೇಶಾಭಿಮುಖ್ಯಾಖಿಲೈಃ ಶಕ್ತಿಬೃನ್ದೈ-
-ರ್ವೃತಾಂ ವೈ ಸ್ಫುರಚ್ಚಕ್ರರಾಜೋಲ್ಲಸನ್ತೀಮ್ ।
ಪರಾಂ ರಾಜರಾಜೇಶ್ವರಿ ತ್ರೈಪುರಿ ತ್ವಾಂ
ಶಿವಾಙ್ಕೋಪರಿಸ್ಥಾಂ ಶಿವಾಂ ಭಾವಯಾಮಿ ॥ 11 ॥
ತ್ವಮರ್ಕಸ್ತ್ವಮಿನ್ದುಸ್ತ್ವಮಗ್ನಿಸ್ತ್ವಮಾಪ-
-ಸ್ತ್ವಮಾಕಾಶಭೂವಾಯವಸ್ತ್ವಂ ಮಹತ್ತ್ವಮ್ ।
ತ್ವದನ್ಯೋ ನ ಕಶ್ಚಿತ್ ಪ್ರಪಞ್ಚೋಽಸ್ತಿ ಸರ್ವಂ
ಸದಾನನ್ದಸಂವಿತ್ಸ್ವರೂಪಂ ಭಜೇಽಹಮ್ ॥ 12 ॥
ಶ್ರುತೀನಾಮಗಮ್ಯೇ ಸುವೇದಾಗಮಜ್ಞಾ
ಮಹಿಮ್ನೋ ನ ಜಾನನ್ತಿ ಪಾರಂ ತವಾಮ್ಬ ।
ಸ್ತುತಿಂ ಕರ್ತುಮಿಚ್ಛಾಮಿ ತೇ ತ್ವಂ ಭವಾನಿ
ಕ್ಷಮಸ್ವೇದಮತ್ರ ಪ್ರಮುಗ್ಧಃ ಕಿಲಾಹಮ್ ॥ 13 ॥
ಗುರುಸ್ತ್ವಂ ಶಿವಸ್ತ್ವಂ ಚ ಶಕ್ತಿಸ್ತ್ವಮೇವ
ತ್ವಮೇವಾಸಿ ಮಾತಾ ಪಿತಾ ಚ ತ್ವಮೇವ ।
ತ್ವಮೇವಾಸಿ ವಿದ್ಯಾ ತ್ವಮೇವಾಸಿ ಬನ್ಧು-
-ರ್ಗತಿರ್ಮೇ ಮತಿರ್ದೇವಿ ಸರ್ವಂ ತ್ವಮೇವ ॥ 14 ॥
ಶರಣ್ಯೇ ವರೇಣ್ಯೇ ಸುಕಾರುಣ್ಯಮೂರ್ತೇ
ಹಿರಣ್ಯೋದರಾದ್ಯೈರಗಣ್ಯೇ ಸುಪುಣ್ಯೇ ।
ಭವಾರಣ್ಯಭೀತೇಶ್ಚ ಮಾಂ ಪಾಹಿ ಭದ್ರೇ
ನಮಸ್ತೇ ನಮಸ್ತೇ ನಮಸ್ತೇ ಭವಾನಿ ॥ 15 ॥
ಇತೀಮಾಂ ಮಹಚ್ಛ್ರೀಭವಾನೀಭುಜಙ್ಗಂ
ಸ್ತುತಿಂ ಯಃ ಪಠೇದ್ಭಕ್ತಿಯುಕ್ತಶ್ಚ ತಸ್ಮೈ ।
ಸ್ವಕೀಯಂ ಪದಂ ಶಾಶ್ವತಂ ವೇದಸಾರಂ
ಶ್ರಿಯಂ ಚಾಷ್ಟಸಿದ್ಧಿಂ ಭವಾನೀ ದದಾತಿ ॥ 16 ॥
ಭವಾನೀ ಭವಾನೀ ಭವಾನೀ ತ್ರಿವಾರಂ
ಉದಾರಂ ಮುದಾ ಸರ್ವದಾ ಯೇ ಜಪನ್ತಿ ।
ನ ಶೋಕಂ ನ ಮೋಹಂ ನ ಪಾಪಂ ನ ಭೀತಿಃ
ಕದಾಚಿತ್ಕಥಞ್ಚಿತ್ಕುತಶ್ಚಿಜ್ಜನಾನಾಮ್ ॥ 17 ॥
॥ ಇತಿ ಶ್ರೀಮಚ್ಛಙ್ಕರಾಚಾರ್ಯವಿರಚಿತಾ ಭವಾನೀ ಭುಜಙ್ಗಂ ಸಮ್ಪೂರ್ಣಮ್ ॥
