ಸಿದ್ಧಿ ಬುದ್ಧಿ ಮಹಾಯೋಗ ವರಣೀಯೋ ಗಣಾಧಿಪಃ
ಯಸ್ಸ್ವಯಂ ಸಚ್ಚಿದಾನನ್ದಂ ಸದ್ಗುರುಂ ತಂ ನಮಾಮ್ಯಹಮ್ ॥ 1 ॥

ಯಸ್ಯ ದತ್ತಾತ್ರೇಯ ಭಾವೋ ಭಕ್ತಾನಾ ಮಾತ್ಮ ದಾನತಃ
ಸೂಚ್ಯತೇ ಸಚ್ಚಿದಾನನ್ದಂ ಸದ್ಗುರುಂ ತಂ ನಮಾಮ್ಯಹಮ್ ॥ 2 ॥

ಯೋಗಾ ಜ್ಜ್ಯೋತಿ ಸ್ಸಮುದ್ದೀಪ್ತಂ ಜಯಲಕ್ಷ್ಮೀ ನೃಸಿಂಹಯೋಃ
ಅದ್ವಯಂ ಸಚ್ಚಿದಾನನ್ದಂ ಸದ್ಗುರುಂ ತಂ ನಮಾಮ್ಯಹಮ್ ॥ 3 ॥

ಯೋಗವಿದ್ಯಾ ಚಿತ್ರಭಾನುಂ ಚಿತ್ರಭಾನು ಶರದ್ಭವಮ್
ಜ್ಞಾನದಂ ಸಚ್ಚಿದಾನನ್ದಂ ಸದ್ಗುರುಂ ತಂ ನಮಾಮ್ಯಹಮ್ ॥ 4 ॥

ಗಣೇಶ ಹೋಮೇರ್ಕದಿನೇ ನಿತ್ಯಂ ಶ್ರೀಚಕ್ರ ಪೂಜನೇ
ದೀಕ್ಷಿತಂ ಸಚ್ಚಿದಾನನ್ದಂ ಸದ್ಗುರುಂ ತಂ ನಮಾಮ್ಯಹಮ್ ॥ 5 ॥

ಅಗಸ್ತ್ಯಮುನಿ ಸಙ್ಕ್ರಾನ್ತ ನಾನಾ ವೈದ್ಯ ದುರನ್ಧರಮ್
ಭವಘ್ನಂ ಸಚ್ಚಿದಾನನ್ದಂ ಸದ್ಗುರುಂ ತಂ ನಮಾಮ್ಯಹಮ್ ॥ 6 ॥

ವಾದ್ಯೋದಞ್ಚ ದ್ದಿವ್ಯನಾಮ ಸಙ್ಕೀರ್ತನ ಕಳಾನಿಧಿಮ್
ನಾದಾಬ್ಧಿಂ ಸಚ್ಚಿದಾನನ್ದಂ ಸದ್ಗುರುಂ ತಂ ನಮಾಮ್ಯಹಮ್ ॥ 7 ॥

ದತ್ತ ಪೀಠಾಧಿಪಂ ಧರ್ಮ ರಕ್ಷಣೋಪಾಯ ಬನ್ಧುರಮ್
ಸತ್ಕವಿಂ ಸಚ್ಚಿದಾನನ್ದಂ ಸದ್ಗುರುಂ ತಂ ನಮಾಮ್ಯಹಮ್ ॥ 8 ॥

ವಿಧೂತ ಭಕ್ತ ಸಮ್ಮೋಹ ಮವಧೂತಂ ಜಗದ್ಗುರುಮ್
ಸ್ವಾಶ್ರಯಂ ಸಚ್ಚಿದಾನನ್ದಂ ಸದ್ಗುರುಂ ತಂ ನಮಾಮ್ಯಹಮ್ ॥ 9 ॥

ಸಾಧುತ್ವಂ ಭಕ್ತಿ ಮೈಶ್ವರ್ಯಂ ದಾನಂ ಯೋಗ ಮರೋಗತಾಮ್
ಸನ್ಮತಿಂ ಜ್ಞಾನ ಮಾನನ್ದಂ ಸದ್ಗುರು ಸ್ತವತೋ ಲಭೇತ್ ॥ 10 ॥