ಮುರಾರಿಕಾಯಕಾಲಿಮಾಲಲಾಮವಾರಿಧಾರಿಣೀ
ತೃಣೀಕೃತತ್ರಿವಿಷ್ಟಪಾ ತ್ರಿಲೋಕಶೋಕಹಾರಿಣೀ ।
ಮನೋಽನುಕೂಲಕೂಲಕುಞ್ಜಪುಞ್ಜಧೂತದುರ್ಮದಾ
ಧುನೋತು ಮೇ ಮನೋಮಲಂ ಕಲಿನ್ದನನ್ದಿನೀ ಸದಾ ॥ 1 ॥

ಮಲಾಪಹಾರಿವಾರಿಪೂರಭೂರಿಮಣ್ಡಿತಾಮೃತಾ
ಭೃಶಂ ಪ್ರಪಾತಕಪ್ರವಞ್ಚನಾತಿಪಣ್ಡಿತಾನಿಶಮ್ ।
ಸುನನ್ದನನ್ದನಾಙ್ಗಸಙ್ಗರಾಗರಞ್ಜಿತಾ ಹಿತಾ
ಧುನೋತು ಮೇ ಮನೋಮಲಂ ಕಲಿನ್ದನನ್ದಿನೀ ಸದಾ ॥ 2 ॥

ಲಸತ್ತರಙ್ಗಸಙ್ಗಧೂತಭೂತಜಾತಪಾತಕಾ
ನವೀನಮಾಧುರೀಧುರೀಣಭಕ್ತಿಜಾತಚಾತಕಾ ।
ತಟಾನ್ತವಾಸದಾಸಹಂಸಸಂಸೃತಾ ಹಿ ಕಾಮದಾ
ಧುನೋತು ಮೇ ಮನೋಮಲಂ ಕಲಿನ್ದನನ್ದಿನೀ ಸದಾ ॥ 3 ॥

ವಿಹಾರರಾಸಖೇದಭೇದಧೀರತೀರಮಾರುತಾ
ಗತಾ ಗಿರಾಮಗೋಚರೇ ಯದೀಯನೀರಚಾರುತಾ ।
ಪ್ರವಾಹಸಾಹಚರ್ಯಪೂತಮೇದಿನೀನದೀನದಾ
ಧುನೋತು ಮೇ ಮನೋಮಲಂ ಕಲಿನ್ದನನ್ದಿನೀ ಸದಾ ॥ 4 ॥

ತರಙ್ಗಸಙ್ಗಸೈಕತಾಞ್ಚಿತಾನ್ತರಾ ಸದಾಸಿತಾ
ಶರನ್ನಿಶಾಕರಾಂಶುಮಞ್ಜುಮಞ್ಜರೀಸಭಾಜಿತಾ ।
ಭವಾರ್ಚನಾಯ ಚಾರುಣಾಮ್ಬುನಾಧುನಾ ವಿಶಾರದಾ
ಧುನೋತು ಮೇ ಮನೋಮಲಂ ಕಲಿನ್ದನನ್ದಿನೀ ಸದಾ ॥ 5 ॥

ಜಲಾನ್ತಕೇಲಿಕಾರಿಚಾರುರಾಧಿಕಾಙ್ಗರಾಗಿಣೀ
ಸ್ವಭರ್ತುರನ್ಯದುರ್ಲಭಾಙ್ಗಸಙ್ಗತಾಂಶಭಾಗಿನೀ ।
ಸ್ವದತ್ತಸುಪ್ತಸಪ್ತಸಿನ್ಧುಭೇದನಾತಿಕೋವಿದಾ
ಧುನೋತು ಮೇ ಮನೋಮಲಂ ಕಲಿನ್ದನನ್ದಿನೀ ಸದಾ ॥ 6 ॥

ಜಲಚ್ಯುತಾಚ್ಯುತಾಙ್ಗರಾಗಲಮ್ಪಟಾಲಿಶಾಲಿನೀ
ವಿಲೋಲರಾಧಿಕಾಕಚಾನ್ತಚಮ್ಪಕಾಲಿಮಾಲಿನೀ ।
ಸದಾವಗಾಹನಾವತೀರ್ಣಭರ್ತೃಭೃತ್ಯನಾರದಾ
ಧುನೋತು ಮೇ ಮನೋಮಲಂ ಕಲಿನ್ದನನ್ದಿನೀ ಸದಾ ॥ 7 ॥

ಸದೈವ ನನ್ದನನ್ದಕೇಲಿಶಾಲಿಕುಞ್ಜಮಞ್ಜುಲಾ
ತಟೋತ್ಥಫುಲ್ಲಮಲ್ಲಿಕಾಕದಮ್ಬರೇಣುಸೂಜ್ಜ್ವಲಾ ।
ಜಲಾವಗಾಹಿನಾಂ ನೃಣಾಂ ಭವಾಬ್ಧಿಸಿನ್ಧುಪಾರದಾ
ಧುನೋತು ಮೇ ಮನೋಮಲಂ ಕಲಿನ್ದನನ್ದಿನೀ ಸದಾ ॥ 8 ॥