ಭಗವತಿ ತವ ತೀರೇ ನೀರಮಾತ್ರಾಶನೋಽಹಮ್
ವಿಗತವಿಷಯತೃಷ್ಣಃ ಕೃಷ್ಣಮಾರಾಧಯಾಮಿ ।
ಸಕಲ ಕಲುಷಭಙ್ಗೇ ಸ್ವರ್ಗಸೋಪಾನಸಙ್ಗೇ
ತರಲತರತರಙ್ಗೇ ದೇವಿ ಗಙ್ಗೇ ಪ್ರಸೀದ ॥ 1 ॥

ಭಗವತಿ ಭವಲೀಲಾ ಮೌಳಿಮಾಲೇ ತವಾಮ್ಭಃ
ಕಣಮಣುಪರಿಮಾಣಂ ಪ್ರಾಣಿನೋ ಯೇ ಸ್ಪೃಶನ್ತಿ ।
ಅಮರನಗರನಾರೀ ಚಾಮರ ಗ್ರಾಹಿಣೀನಾಂ
ವಿಗತ ಕಲಿಕಲಙ್ಕಾತಙ್ಕಮಙ್ಕೇ ಲುಠನ್ತಿ ॥ 2 ॥

ಬ್ರಹ್ಮಾಣ್ಡಂ ಖಣ್ಡಯನ್ತೀ ಹರಶಿರಸಿ ಜಟಾವಲ್ಲಿಮುಲ್ಲಾಸಯನ್ತೀ
ಸ್ವರ್ಲೋಕಾದಾಪತನ್ತೀ ಕನಕಗಿರಿಗುಹಾಗಣ್ಡಶೈಲಾತ್ ಸ್ಖಲನ್ತೀ ।
ಕ್ಷೋಣೀಪೃಷ್ಠೇ ಲುಠನ್ತೀ ದುರಿತಚಯಚಮೂರ್ನಿರ್ಭರಂ ಭರ್ತ್ಸಯನ್ತೀ
ಪಾಥೋಧಿಂ ಪೂರಯನ್ತೀ ಸುರನಗರಸರಿತ್ಪಾವನೀ ನಃ ಪುನಾತು ॥ 3 ॥

ಮಜ್ಜನ್ಮಾತಙ್ಗ ಕುಮ್ಭಚ್ಯುತ ಮದಮದಿರಾಮೋದಮತ್ತಾಲಿಜಾಲಂ
ಸ್ನಾನೈಃ ಸಿದ್ಧಾಙ್ಗನಾನಾಂ ಕುಚಯುಗ ವಿಲಸತ್ಕುಙ್ಕುಮಾಸಙ್ಗಪಿಙ್ಗಮ್ ।
ಸಾಯಂ ಪ್ರಾತರ್ಮುನೀನಾಂ ಕುಶಕುಸುಮಚಯೈಶ್ಛಿನ್ನತೀರಸ್ಥನೀರಂ
ಪಾಯಾನ್ನೋ ಗಾಙ್ಗಮಮ್ಭಃ ಕರಿಕಲಭ ಕರಾಕ್ರಾನ್ತ ರಙ್ಗಸ್ತರಙ್ಗಮ್ ॥ 4 ॥

ಆದಾವಾದಿ ಪಿತಾಮಹಸ್ಯ ನಿಯಮ ವ್ಯಾಪಾರ ಪಾತ್ರೇ ಜಲಂ
ಪಶ್ಚಾತ್ಪನ್ನಗಶಾಯಿನೋ ಭಗವತಃ ಪಾದೋದಕಂ ಪಾವನಮ್ ।
ಭೂಯಃ ಶಮ್ಭುಜಟಾವಿಭೂಷಣ ಮಣಿರ್ಜಹ್ನೋರ್ಮಹರ್ಷೇರಿಯಂ
ಕನ್ಯಾ ಕಲ್ಮಷನಾಶಿನೀ ಭಗವತೀ ಭಾಗೀರಥೀ ದೃಶ್ಯತೇ ॥ 5 ॥

ಶೈಲೇನ್ದ್ರಾದವತಾರಿಣೀ ನಿಜಜಲೇ ಮಜ್ಜಜ್ಜನೋತ್ತಾರಿಣೀ
ಪಾರಾವಾರವಿಹಾರಿಣೀ ಭವಭಯಶ್ರೇಣೀ ಸಮುತ್ಸಾರಿಣೀ ।
ಶೇಷಾಙ್ಗೈರನುಕಾರಿಣೀ ಹರಶಿರೋವಲ್ಲೀದಳಾಕಾರಿಣೀ
ಕಾಶೀಪ್ರಾನ್ತವಿಹಾರಿಣೀ ವಿಜಯತೇ ಗಙ್ಗಾ ಮನೋಹಾರಿಣೀ ॥ 6 ॥

ಕುತೋ ವೀಚಿರ್ವೀಚಿಸ್ತವ ಯದಿ ಗತಾ ಲೋಚನಪಥಂ
ತ್ವಮಾಪೀತಾ ಪೀತಾಮ್ಬರಪುರವಾಸಂ ವಿತರಸಿ ।
ತ್ವದುತ್ಸಙ್ಗೇ ಗಙ್ಗೇ ಪತತಿ ಯದಿ ಕಾಯಸ್ತನುಭೃತಾಂ
ತದಾ ಮಾತಃ ಶಾನ್ತಕ್ರತವಪದಲಾಭೋಽಪ್ಯತಿಲಘುಃ ॥ 7 ॥

ಗಙ್ಗೇ ತ್ರೈಲೋಕ್ಯಸಾರೇ ಸಕಲಸುರವಧೂಧೌತವಿಸ್ತೀರ್ಣತೋಯೇ
ಪೂರ್ಣಬ್ರಹ್ಮಸ್ವರೂಪೇ ಹರಿಚರಣರಜೋಹಾರಿಣಿ ಸ್ವರ್ಗಮಾರ್ಗೇ ।
ಪ್ರಾಯಶ್ಚಿತಂ ಯದಿ ಸ್ಯಾತ್ತವ ಜಲಕಣಿಕಾ ಬ್ರಹ್ಮಹತ್ಯಾದಿ ಪಾಪೇ
ಕಸ್ತ್ವಾಂ ಸ್ತೋತುಂ ಸಮರ್ಥಃ ತ್ರಿಜಗದಘಹರೇ ದೇವಿ ಗಙ್ಗೇ ಪ್ರಸೀದ ॥ 8 ॥

ಮಾತರ್ಜಾಹ್ನವೀ ಶಮ್ಭುಸಙ್ಗಮಿಲಿತೇ ಮೌಳೌ ನಿಧಾಯಾಞ್ಜಲಿಂ
ತ್ವತ್ತೀರೇ ವಪುಷೋಽವಸಾನಸಮಯೇ ನಾರಾಯಣಾಙ್ಘ್ರಿದ್ವಯಮ್ ।
ಸಾನನ್ದಂ ಸ್ಮರತೋ ಭವಿಷ್ಯತಿ ಮಮ ಪ್ರಾಣಪ್ರಯಾಣೋತ್ಸವೇ
ಭೂಯಾದ್ಭಕ್ತಿರವಿಚ್ಯುತಾ ಹರಿಹರಾದ್ವೈತಾತ್ಮಿಕಾ ಶಾಶ್ವತೀ ॥ 9 ॥

ಗಙ್ಗಾಷ್ಟಕಮಿದಂ ಪುಣ್ಯಂ ಯಃ ಪಠೇತ್ಪ್ರಯತೋ ನರಃ ।
ಸರ್ವಪಾಪವಿನಿರ್ಮುಕ್ತೋ ವಿಷ್ಣುಲೋಕಂ ಸ ಗಚ್ಛತಿ ॥ 10 ॥