දේයාසුර්මූර්ධ්නි රාජත්සරසසුරසරිත්පාරපර්යංතනිර්ය-
-ත්ප්රාංශුස්තංබාඃ පිශංගාස්තුලිතපරිණතාරක්තශාලීලතා වඃ ।
දුර්වාරාපත්තිගර්තශ්රිතනිඛිලජනෝත්තාරණේ රජ්ජුභූතා
ඝෝරාඝෝර්වීරුහාලීදහනශිඛිශිඛාඃ ශර්ම ශාර්වාඃ කපර්දාඃ ॥ 1 ॥

කුර්වන්නිර්වාණමාර්ගප්රගමපරිලසද්රූප්යසෝපානශංකාං
ශක්රාරීණාං පුරාණාං ත්රයවිජයකෘතස්පෂ්ටරේඛායමාණම් ।
අව්යාදව්යාජමුච්චෛරලිකහිමධරාධිත්යකාංතස්ත්රිධෝද්ය-
-ජ්ජාහ්නව්යාභං මෘඩානීකමිතුරුඩුපරුක්පාංඩරං වස්ත්රිපුංඩ්රම් ॥ 2 ॥

ක්රුධ්යද්ගෞරීප්රසාදානතිසමයපදාංගුෂ්ඨසංක්රාංතලාක්ෂා-
-බිංදුස්පර්ධි ස්මරාරේඃ ස්ඵටිකමණිදෘෂන්මග්නමාණික්යශෝභම් ।
මූර්ධ්න්යුද්යද්දිව්යසිංධෝඃ පතිතශඵරිකාකාරි වෝ මස්තකං ස්තා-
-දස්තෝකාපත්තිකෘත්යෛ හුතවහකණිකාමෝක්ෂරූක්ෂං සදාක්ෂි ॥ 3 ॥

භූත්යෛ දෘග්භූතයෝඃ ස්යාද්යදහිමහිමරුග්බිංබයෝඃ ස්නිග්ධවර්ණෝ
දෛත්යෞඝධ්වංසශංසී ස්ඵුට ඉව පරිවේෂාවශේෂෝ විභාති ।
සර්ගස්ථිත්යංතවෘත්තිර්මයි සමුපගතේතීව නිර්වෘත්තගර්වං
ශර්වාණීභර්තුරුච්චෛර්යුගළමථ දධද්විභ්රමං තද්භ්රුවෝර්වඃ ॥ 4 ॥

යුග්මේ රුක්මාබ්ජපිංගේ ග්රහ ඉව පිහිතේ ද්රාග්යයෝඃ ප්රාග්දුහිත්රා
ශෛලස්ය ධ්වාංතනීලාංබරරචිතබෘහත්කංචුකෝऽභූත්ප්රපංචඃ ।
තේ ත්රෛනේත්රේ පවිත්රේ ත්රිදශවරඝටාමිත්රජෛත්රෝග්රශස්ත්රේ
නේත්රේ නේත්රේ භවේතාං ද්රුතමිහ භවතාමිංද්රියාශ්වාන්වියංතුම් ॥ 5 ॥

චංඩීවක්ත්රාර්පණේච්ඡෝස්තදනු භගවතඃ පාංඩුරුක්පාංඩුගංඩ-
-ප්රෝද්යත්කංඩූං විනේතුං විතනුත ඉව යේ රත්නකෝණෛර්විඝෘෂ්ටිම් ।
චංඩාර්චිර්මංඩලාභේ සතතනතජනධ්වාංතඛංඩාතිශෞංඩේ
චාංඩීශේ තේ ශ්රියේස්තාමධිකමවනතාඛංඩලේ කුංඩලේ වඃ ॥ 6 ॥

ඛට්වාංගෝදග්රපාණේඃ ස්ඵුටවිකටපුටෝ වක්ත්රරංධ්රප්රවේශ-
-ප්රේප්සූදංචත්ඵණෝරුශ්වසදතිධවළාහීංද්රශංකාං දධානඃ ।
යුෂ්මාකං ක්රමවක්ත්රාංබුරුහපරිලසත්කර්ණිකාකාරශෝභඃ
ශශ්වත්ත්රාණාය භූයාදලමතිවිමලෝත්තුංගකෝණඃ ස ඝෝණඃ ॥ 7 ॥

ක්රුධ්යත්යද්ධා යයෝඃ ස්වාං තනුමතිලසතෝර්බිංබිතාං ලක්ෂයංතී
භර්ත්රේ ස්පර්ධාතිනිඝ්නා මුහුරිතරවධූශංකයා ශෛලකන්යා ।
යුෂ්මාංස්තෞ ශශ්වදුච්චෛරබහුළදශමීශර්වරීශාතිශුභ්රා-
-වව්යාස්තාං දිව්යසිංධෝඃ කමිතුරවනමල්ලෝකපාලෞ කපෝලෞ ॥ 8 ॥

යෝ භාසා භාත්යුපාංතස්ථිත ඉව නිභෘතං කෞස්තුභෝ ද්රෂ්ටුමිච්ඡ-
-න්සෝත්ථස්නේහාන්නිතාංතං ගළගතගරළං පත්යුරුච්චෛඃ පශූනාම් ।
ප්රෝද්යත්ප්රේම්ණා යමාර්ද්රා පිබති ගිරිසුතා සංපදඃ සාතිරේකා
ලෝකාඃ ශෝණීකෘතාංතා යදධරමහසා සෝऽධරෝ වෝ විධත්තාම් ॥ 9 ॥

අත්යර්ථං රාජතේ යා වදනශශධරාදුද්ගලච්චාරුවාණී-
-පීයූෂාංභඃප්රවාහප්රසරපරිලසත්ඵේනබිංද්වාවළීව ।
දේයාත්සා දංතපංක්තිශ්චිරමිහ දනුදායාදදෞවාරිකස්ය
ද්යුත්යා දීප්තේංදුකුංදච්ඡවිරමලතරප්රෝන්නතාග්රා මුදං වඃ ॥ 10 ॥

න්යක්කුර්වන්නුර්වරාභෘන්නිභඝනසමයෝද්ධුෂ්ටමේඝෞඝඝෝෂං
ස්ඵූර්ජද්වාර්ධ්යුත්ථිතෝරුධ්වනිතමපි පරබ්රහ්මභූතෝ ගභීරඃ ।
සුව්යක්තෝ ව්යක්තමූර්තේඃ ප්රකටිතකරණඃ ප්රාණනාථස්ය සත්යාඃ
ප්රීත්යා වඃ සංවිදධ්යාත්ඵලවිකලමලං ජන්ම නාදඃ ස නාදඃ ॥ 11 ॥

භාසා යස්ය ත්රිලෝකී ලසති පරිලසත්ඵේනබිංද්වර්ණවාංත-
-ර්ව්යාමග්නේවාතිගෞරස්තුලිතසුරසරිද්වාරිපූරප්රසාරඃ ।
පීනාත්මා දංතභාභිර්භෘශමහහහකාරාතිභීමඃ සදේෂ්ටාං
පුෂ්ටාං තුෂ්ටිං කෘෂීෂ්ට ස්ඵුටමිහ භවතාමට්ටහාසෝऽෂ්ටමූර්තේඃ ॥ 12 ॥

සද්යෝජාතාඛ්යමාප්යං යදුවිමලමුදග්වර්ති යද්වාමදේවං
නාම්නා හේම්නා සදෘක්ෂං ජලදනිභමඝෝරාහ්වයං දක්ෂිණං යත් ।
යද්බාලාර්කප්රභං තත්පුරුෂනිගදිතං පූර්වමීශානසංජ්ඤං
යද්දිව්යං තානි ශංභෝර්භවදභිලෂිතං පංච දද්යුර්මුඛානි ॥ 13 ॥

ආත්මප්රේම්ණෝ භවාන්යා ස්වයමිව රචිතාඃ සාදරං සාංවනන්යා
මෂ්යා තිස්රඃසුනීලාංජනනිභගරරේඛාඃ සමාභාංති යස්යාම් ।
අකල්පානල්පභාසා භෘශරුචිරතරා කංබුකල්පාංබිකායාඃ
පත්යුඃ සාත්යංතමංතර්විලසතු සතතං මංථරා කංධරා වඃ ॥ 14 ॥

වක්ත්රේංදෝර්දංතලක්ෂ්ම්යාශ්චිරමධරමහාකෞස්තුභස්යාප්යුපාංතේ
සෝත්ථානාං ප්රාර්ථයන්යඃ ස්ථිතිමචලභුවේ වාරයංත්යෛ නිවේශම් ।
ප්රායුංක්තේවාශිෂෝ යඃ ප්රතිපදමමෘතත්වේ ස්ථිතඃ කාලශත්රෝඃ
කාලං කුර්වන්ගළං වෝ හෘදයමයමලං ක්ෂාළයේත්කාලකූටඃ ॥ 15 ॥

ප්රෞඪප්රේමාකුලායා දෘඪතරපරිරංභේෂු පර්වේංදුමුඛ්යාඃ
පාර්වත්යාශ්චාරුචාමීකරවලයපදෛරංකිතං කාංතිශාලි ।
රංගන්නාගාංගදාඪ්යං සතතමවිහිතං කර්ම නිර්මූලයේත්ත-
-ද්දෝර්මූලං නිර්මලං යද්ධෘදි දුරිතමපාස්යාර්ජිතං ධූර්ජටේර්වඃ ॥ 16 ॥

කංඨාශ්ලේෂාර්ථමාප්තා දිව ඉව කමිතුඃ ස්වර්ගසිංධෝඃ ප්රවාහාඃ
ක්රාංත්යෛ සංසාරසිංධෝඃ ස්ඵටිකමණිමහාසංක්රමාකාරදීර්ඝාඃ ।
තිර්යග්විෂ්කංභභූතාස්ත්රිභුවනවසතේර්භින්නදෛත්යේභදේහා
බාහා වස්තා හරස්ය ද්රුතමිහ නිවහානංහසාං සංහරංතු ॥ 17 ॥

වක්ෂෝ දක්ෂද්විෂෝऽලං ස්මරභරවිනමද්දක්ෂජාක්ෂීණවක්ෂෝ-
-ජාංතර්නික්ෂිප්තශුංභන්මලයජමිළිතෝද්භාසි භස්මෝක්ෂිතං යත් ।
ක්ෂිප්රං තද්රූක්ෂචක්ෂුඃ ශ්රුතිගණඵණරත්නෞඝභාභීක්ෂ්ණශෝභං
යුෂ්මාකං ශශ්වදේනඃ ස්ඵටිකමණිශිලාමංඩලාභං ක්ෂිණෝතු ॥ 18 ॥

මුක්තාමුක්තේ විචිත්රාකුලවලිලහරීජාලශාලින්යවාංච-
-න්නාභ්යාවර්තේ විලෝලද්භුජගවරයුතේ කාලශත්රෝර්විශාලේ ।
යුෂ්මච්චිත්තත්රිධාමා ප්රතිනවරුචිරේ මංදිරේ කාංතිලක්ෂ්ම්යාඃ
ශේතාං ශීතාංශුගෞරේ චිරතරමුදරක්ෂීරසිංධෞ සලීලම් ॥ 19 ॥

වෛයාඝ්රී යත්ර කෘත්තිඃ ස්ඵුරති හිමගිරේර්විස්තෘතෝපත්යකාංතඃ
සාංද්රාවශ්යායමිශ්රා පරිත ඉව වෘතා නීලජීමූතමාලා ।
ආබද්ධාහීංද්රකාංචීගුණමතිපෘථුලං ශෛලජාක්රීඩභූමි-
-ස්තද්වෝ නිඃශ්රේයසේ ස්යාජ්ජඝනමතිඝනං බාලශීතාංශුමෞළේඃ ॥ 20 ॥

පුෂ්ටාවෂ්ටංභභූතෞ පෘථුතරජඝනස්යාපි නිත්යං ත්රිලෝක්යාඃ
සම්යග්වෘත්තෞ සුරේංද්රද්විරදවරකරෝදාරකාංතිං දධානෞ ।
සාරාවූරූ පුරාරේඃ ප්රසභමරිඝටාඝස්මරෞ භස්මශුභ්රෞ
භක්තෛරත්යාර්ද්රචිත්තෛරධිකමවනතෞ වාංඡිතං වෝ විධත්තාම් ॥ 21 ॥

ආනංදායේංදුකාංතෝපලරචිතසමුද්ගායිතේ යේ මුනීනාං
චිත්තාදර්ශං නිධාතුං විදධති චරණේ තාංඩවාකුංචනානි ।
කාංචීභෝගීංද්රමූර්ධ්නාං ප්රතිමුහුරුපධානායමානේ ක්ෂණං තේ
කාංතේ ස්තාමංතකාරේර්ද්යුතිවිජිතසුධාභානුනී ජානුනී වඃ ॥ 22 ॥

මංජීරීභූතභෝගිප්රවරගණඵණාමංඩලාංතර්නිතාංත-
-ව්යාදීර්ඝානර්ඝරත්නද්යුතිකිසලයතේ ස්තූයමානේ ද්යුසද්භිඃ ।
බිභ්රත්යෞ විභ්රමං වඃ ස්ඵටිකමණිබෘහද්දංඩවද්භාසිතේ යේ
ජංඝේ ශංඛේංදුශුභ්රේ භෘශමිහ භවතාං මානසේ ශූලපාණේඃ ॥ 23 ॥

අස්තෝකස්තෝමශස්ත්රෛරපචිතිමමලාං භූරිභාවෝපහාරෛඃ
කුර්වද්භිඃ සර්වදෝච්චෛඃ සතතමභිවෘතෞ බ්රහ්මවිද්දේවලාද්යෛඃ ।
සම්යක්සංපූජ්යමානාවිහ හෘදි සරසීවානිශං යුෂ්මදීයේ
ශර්වස්ය ක්රීඩතාං තෞ ප්රපදවරබෘහත්කච්ඡපාවච්ඡභාසෞ ॥ 24 ॥

යාඃ ස්වස්යෛකාංශපාතාදතිබහලගලද්රක්තවක්ත්රං ප්රණුන්න-
-ප්රාණං ප්රාක්රෝශයන්ප්රාඞ්නිජමචලවරං චාලයංතං දශාස්යම් ।
පාදාංගුල්යෝ දිශංතු ද්රුතමයුගදෘශඃ කල්මෂප්ලෝෂකල්යාඃ
කළ්යාණං ඵුල්ලමාල්යප්රකරවිලසිතා වඃ ප්රණද්ධාහිවල්ල්යඃ ॥ 25 ॥

ප්රහ්වප්රාචීනබර්හිඃප්රමුඛසුරවරප්රස්ඵුරන්මෞළිසක්ත-
-ජ්යායෝරත්නෝත්කරෝස්රෛරවිරතමමලා භූරිනීරාජිතා යා ।
ප්රෝදග්රාග්රා ප්රදේයාත්තතිරිව රුචිරා තාරකාණාං නිතාංතං
නීලග්රීවස්ය පාදාංබුරුහවිලසිතා සා නඛාළී සුඛං වඃ ॥ 26 ॥

සත්යාඃ සත්යානනේංදාවපි සවිධගතේ යේ විකාසං දධාතේ
ස්වාංතේ ස්වාං තේ ලභංතේ ශ්රියමිහ සරසීවාමරා යේ දධානාඃ ।
ලෝලං ලෝලංබකානාං කුලමිව සුධියාං සේවතේ යේ සදා ස්තාං
භූත්යෛ භූත්යෛණපාණේර්විමලතරරුචස්තේ පදාංභෝරුහේ වඃ ॥ 27 ॥

යේෂාං රාගාදිදෝෂාක්ෂතමති යතයෝ යාංති මුක්තිං ප්රසාදා-
-ද්යේ වා නම්රාත්මමූර්තිද්යුසදෘෂිපරිෂන්මූර්ධ්නි ශේෂායමාණාඃ ।
ශ්රීකංඨස්යාරුණෝද්යච්චරණසරසිජප්රෝත්ථිතාස්තේ භාවාඛ්යා-
-ත්පාරාවාරාච්චිරං වෝ දුරිතහතිකෘතස්තාරයේයුඃ පරාගාඃ ॥ 28 ॥

භූම්නා යස්යාස්තසීම්නා භුවනමනුසෘතං යත්පරං ධාම ධාම්නාං
සාම්නාමාම්නායතත්ත්වං යදපි ච පරමං යද්ගුණාතීතමාද්යම් ।
යච්චාංහෝහන්නිරීහං ගහනමිති මුහුඃ ප්රාහුරුච්චෛර්මහාංතෝ
මාහේශං තන්මහෝ මේ මහිතමහරහර්මෝහරෝහං නිහංතු ॥ 29 ॥

ඉති ශ්රීමත්පරමහංසපරිව්රාජකාචාර්යස්ය ශ්රීගෝවිංදභගවත්පූජ්යපාදශිෂ්යස්ය ශ්රීමච්ඡංකරභගවතඃ කෘතෞ ශ්රී ශිව කේශාදිපාදාංතවර්ණන ස්තෝත්රම් ॥