භජේऽහං කුමාරං භවානීකුමාරං
ගලෝල්ලාසිහාරං නමත්සද්විහාරම් ।
රිපුස්තෝමපාරං නෘසිංහාවතාරං
සදානිර්විකාරං ගුහං නිර්විචාරම් ॥ 1 ॥

නමාමීශපුත්රං ජපාශෝණගාත්රං
සුරාරාතිශත්රුං රවීංද්වග්නිනේත්රම් ।
මහාබර්හිපත්රං ශිවාස්යාබ්ජමිත්රං
ප්රභාස්වත්කළත්රං පුරාණං පවිත්රම් ॥ 2 ॥

අනේකාර්කකෝටි-ප්රභාවජ්ජ්වලං තං
මනෝහාරි මාණික්ය භූෂෝජ්ජ්වලං තම් ।
ශ්රිතානාමභීෂ්ටං නිශාංතං නිතාංතං
භජේ ෂණ්මුඛං තං ශරච්චංද්රකාංතම් ॥ 3 ॥

කෘපාවාරි කල්ලෝලභාස්වත්කටාක්ෂං
විරාජන්මනෝහාරි ශෝණාංබුජාක්ෂම් ।
ප්රයෝගප්රදානප්රවාහෛකදක්ෂං
භජේ කාංතිකාංතං පරස්තෝමරක්ෂම් ॥ 4 ॥

සුකස්තූරිසිංදූරභාස්වල්ලලාටං
දයාපූර්ණචිත්තං මහාදේවපුත්රම් ।
රවීංදූල්ලසද්රත්නරාජත්කිරීටං
භජේ ක්රීඩිතාකාශ ගංගාද්රිකූටම් ॥ 5 ॥

සුකුංදප්රසූනාවළීශෝභිතාංගං
ශරත්පූර්ණචංද්රප්රභාකාංතිකාංතම් ।
ශිරීෂප්රසූනාභිරාමං භවංතං
භජේ දේවසේනාපතිං වල්ලභං තම් ॥ 6 ॥

සුලාවණ්යසත්සූර්යකෝටිප්රතීකං
ප්රභුං තාරකාරිං ද්විෂඩ්බාහුමීශම් ।
නිජාංකප්රභාදිව්යමානාපදීශං
භජේ පාර්වතීප්රාණපුත්රං සුකේශම් ॥ 7 ॥

අජං සර්වලෝකප්රියං ලෝකනාථං
ගුහං ශූරපද්මාදිදංභෝළිධාරම් ।
සුචාරුං සුනාසාපුටං සච්චරිත්රං
භජේ කාර්තිකේයං සදා බාහුලේයම් ॥ 8 ॥

ශරාරණ්යසංභූතමිංද්රාදිවංද්යං
ද්විෂඩ්බාහුසංඛ්යායුධශ්රේණිරම්යම් ।
මරුත්සාරථිං කුක්කුටේශං සුකේතුං
භජේ යෝගිහෘත්පද්මමධ්යාධිවාසම් ॥ 9 ॥

විරිංචීංද්රවල්ලීශ දේවේශමුඛ්යං
ප්රශස්තාමරස්තෝමසංස්තූයමානම් ।
දිශ ත්වං දයාළෝ ශ්රියං නිශ්චලාං මේ
විනා ත්වාං ගතිඃ කා ප්රභෝ මේ ප්රසීද ॥ 10 ॥

පදාංභෝජසේවා සමායාතබෘංදා-
රකශ්රේණිකෝටීරභාස්වල්ලලාටම් ।
කළත්රෝල්ලසත්පාර්ශ්වයුග්මං වරේණ්යං
භජේ දේවමාද්යංතහීනප්රභාවම් ॥ 11 ॥

භවාංභෝධිමධ්යේ තරංගේ පතංතං
ප්රභෝ මාං සදා පූර්ණදෘෂ්ට්යා සමීක්ෂ්ය ।
භවද්භක්තිනාවෝද්ධර ත්වං දයාළෝ
සුගත්යංතරං නාස්ති දේව ප්රසීද ॥ 12 ॥

ගළේ රත්නභූෂං තනෞ මංජුවේෂං
කරේ ජ්ඤානශක්තිං දරස්මේරමාස්යේ ।
කටින්යස්තපාණිං ශිඛිස්ථං කුමාරං
භජේऽහං ගුහාදන්යදේවං න මන්යේ ॥ 13 ॥

දයාහීනචිත්තං පරද්රෝහපාත්රං
සදා පාපශීලං ගුරෝර්භක්තිහීනම් ।
අනන්යාවලංබං භවන්නේත්රපාත්රං
කෘපාශීල මාං භෝ පවිත්රං කුරු ත්වම් ॥ 14 ॥

මහාසේන ගාංගේය වල්ලීසහාය
ප්රභෝ තාරකාරේ ෂඩාස්යාමරේශ ।
සදා පායසාන්නප්රදාතර්ගුහේති
ස්මරිෂ්යාමි භක්ත්යා සදාහං විභෝ ත්වාම් ॥ 15 ॥

ප්රතාපස්ය බාහෝ නමද්වීරබාහෝ
ප්රභෝ කාර්තිකේයේෂ්ටකාමප්රදේති ।
යදා යේ පඨංතේ භවංතං තදේවං
ප්රසන්නස්තු තේෂාං බහුශ්රීං දදාසි ॥ 16 ॥

අපාරාතිදාරිද්ර්යවාරාශිමධ්යේ
භ්රමංතං ජනග්රාහපූර්ණේ නිතාංතම් ।
මහාසේන මාමුද්ධර ත්වං කටාක්ෂා-
වලෝකේන කිංචිත්ප්රසීද ප්රසීද ॥ 17 ॥

ස්ථිරාං දේහි භක්තිං භවත්පාදපද්මේ
ශ්රියං නිශ්චලාං දේහි මහ්යං කුමාර ।
ගුහං චංද්රතාරං සුවංශාභිවෘද්ධිං
කුරු ත්වං ප්රභෝ මේ මනඃ කල්පසාලඃ ॥ 18 ॥

නමස්තේ නමස්තේ මහාශක්තිපාණේ
නමස්තේ නමස්තේ ලසද්වජ්රපාණේ ।
නමස්තේ නමස්තේ කටින්යස්තපාණේ
නමස්තේ නමස්තේ සදාභීෂ්ටපාණේ ॥ 19 ॥

නමස්තේ නමස්තේ මහාශක්තිධාරින්
නමස්තේ සුරාණාං මහාසෞඛ්යදායින් ।
නමස්තේ සදා කුක්කුටේශාඛ්යක ත්වං
සමස්තාපරාධං විභෝ මේ ක්ෂමස්ව ॥ 20 ॥

කුමාරාත්පරං කර්මයෝගං න ජානේ
කුමාරාත්පරං කර්මශීලං න ජානේ ।
ය ඒකෝ මුනීනාං හෘදබ්ජාධිවාසඃ
ශිවාංකං සමාරුහ්ය සත්පීඨකල්පම් ॥ 21 ॥

විරිංචාය මංත්රෝපදේශං චකාර
ප්රමෝදේන සෝऽයං තනෝතු ශ්රියං මේ ।
යමාහුඃ පරං වේද ශූරේෂු මුඛ්යං
සදා යස්ය ශක්ත්යා ජගත්භීතභීතා ॥ 22 ॥

යමාශ්රිත්ය දේවාඃ ස්ථිරං ස්වර්ගපාලාඃ
සදෝංකාරරූපං චිදානංදමීඩේ ।
ගුහස්තෝත්රමේතත් කෘතං තාරකාරේ
භුජංගප්රයාතේන හෘද්යේන කාංතම් ॥ 23 ॥

ජනා යේ පඨංතේ මහාභක්තියුක්තාඃ
ප්රමෝදේන සායං ප්රභාතේ විශේෂඃ ।
න ජන්මර්ක්ෂයෝගේ යදා තේ රුදාංතා
මනෝවාංඡිතාන් සර්වකාමාන් ලභංතේ ॥ 23 ॥

ඉති ශ්රී සුබ්රහ්මණ්ය භුජංග ප්රයාත ස්තෝත්රම් ।