විරිංච්යාදිභිඃ පංචභිර්ලෝකපාලෛඃ
සමූඪේ මහානංදපීඨේ නිෂණ්ණම් ।
ධනුර්බාණපාශාංකුශප්රෝතහස්තං
මහස්ත්රෛපුරං ශංකරාද්වෛතමව්යාත් ॥ 1 ॥
යදන්නාදිභිඃ පංචභිඃ කෝශජාලෛඃ
ශිරඃපක්ෂපුච්ඡාත්මකෛරංතරංතඃ ।
නිගූඪේ මහායෝගපීඨේ නිෂණ්ණං
පුරාරේරථාංතඃපුරං නෞමි නිත්යම් ॥ 2 ॥
විරිංචාදිරූපෛඃ ප්රපංචේ විහෘත්ය
ස්වතංත්රා යදා ස්වාත්මවිශ්රාංතිරේෂා ।
තදා මානමාතෘප්රමේයාතිරික්තං
පරානංදමීඩේ භවානි ත්වදීයම් ॥ 3 ॥
විනෝදාය චෛතන්යමේකං විභජ්ය
ද්විධා දේවි ජීවඃ ශිවශ්චේති නාම්නා ।
ශිවස්යාපි ජීවත්වමාපාදයංතී
පුනර්ජීවමේනං ශිවං වා කරෝෂි ॥ 4 ॥
සමාකුංච්ය මූලං හෘදි න්යස්ය වායුං
මනෝ භ්රූබිලං ප්රාපයිත්වා නිවෘත්තාඃ ।
තතඃ සච්චිදානංදරූපේ පදේ තේ
භවංත්යංබ ජීවාඃ ශිවත්වේන කේචිත් ॥ 5 ॥
ශරීරේऽතිකෂ්ටේ රිපෞ පුත්රවර්ගේ
සදාභීතිමූලේ කලත්රේ ධනේ වා ।
න කශ්චිද්විරජ්යත්යහෝ දේවි චිත්රං
කථං ත්වත්කටාක්ෂං විනා තත්ත්වබෝධඃ ॥ 6 ॥
ශරීරේ ධනේऽපත්යවර්ගේ කලත්රේ
විරක්තස්ය සද්දේශිකාදිෂ්ටබුද්ධේඃ ।
යදාකස්මිකං ජ්යෝතිරානංදරූපං
සමාධෞ භවේත්තත්ත්වමස්යංබ සත්යම් ॥ 7 ॥
මෘෂාන්යෝ මෘෂාන්යඃ පරෝ මිශ්රමේනං
පරඃ ප්රාකෘතං චාපරෝ බුද්ධිමාත්රම් ।
ප්රපංචං මිමීතේ මුනීනාං ගණෝऽයං
තදේතත්ත්වමේවේති න ත්වාං ජහීමඃ ॥ 8 ॥
නිවෘත්තිඃ ප්රතිෂ්ඨා ච විද්යා ච ශාංති-
ස්තථා ශාංත්යතීතේති පංචීකෘතාභිඃ ।
කලාභිඃ පරේ පංචවිංශාත්මිකාභි-
ස්ත්වමේකෛව සේව්යා ශිවාභින්නරූපා ॥ 9 ॥
අගාධේऽත්ර සංසාරපංකේ නිමග්නං
කලත්රාදිභාරේණ ඛින්නං නිතාංතම් ।
මහාමෝහපාශෞඝබද්ධං චිරාන්මාං
සමුද්ධර්තුමංබ ත්වමේකෛව ශක්තා ॥ 10 ॥
සමාරභ්ය මූලං ගතෝ බ්රහ්මචක්රං
භවද්දිව්යචක්රේශ්වරීධාමභාජඃ ।
මහාසිද්ධිසංඝාතකල්පද්රුමාභා-
නවාප්යාංබ නාදානුපාස්තේ ච යෝගී ॥ 11 ॥
ගණේශෛර්ග්රහෛරංබ නක්ෂත්රපංක්ත්යා
තථා යෝගිනීරාශිපීඨෛරභින්නම් ।
මහාකාලමාත්මානමාමෘශ්ය ලෝකං
විධත්සේ කෘතිං වා ස්ථිතිං වා මහේශි ॥ 12 ॥
ලසත්තාරහාරාමතිස්වච්ඡචේලාං
වහංතීං කරේ පුස්තකං චාක්ෂමාලාම් ।
ශරච්චංද්රකෝටිප්රභාභාසුරාං ත්වාං
සකෘද්භාවයන්භාරතීවල්ලභඃ ස්යාත් ॥ 13 ॥
සමුද්යත්සහස්රාර්කබිංබාභවක්ත්රාං
ස්වභාසෛව සිංදූරිතාජාංඩකෝටිම් ।
ධනුර්බාණපාශාංකුශාංධාරයංතීං
ස්මරංතඃ ස්මරං වාපි සංමෝහයේයුඃ ॥ 14 ॥
මණිස්යූතතාටංකශෝණාස්යබිංබාං
හරිත්පට්ටවස්ත්රාං ත්වගුල්ලාසිභූෂාම් ।
හෘදා භාවයංස්තප්තහේමප්රභාං ත්වාං
ශ්රියෝ නාශයත්යංබ චාංචල්යභාවම් ॥ 15 ॥
මහාමංත්රරාජාංතබීජං පරාඛ්යං
ස්වතෝ න්යස්තබිංදු ස්වයං න්යස්තහාර්දම් ।
භවද්වක්ත්රවක්ෂෝජගුහ්යාභිධානං
ස්වරූපං සකෘද්භාවයේත්ස ත්වමේව ॥ 16 ॥
තථාන්යේ විකල්පේෂු නිර්විණ්ණචිත්තා-
ස්තදේකං සමාධාය බිංදුත්රයං තේ ।
පරානංදසංධානසිංධෞ නිමග්නාඃ
පුනර්ගර්භරංධ්රං න පශ්යංති ධීරාඃ ॥ 17 ॥
ත්වදුන්මේෂලීලානුබංධාධිකාරා-
න්විරිංච්යාදිකාංස්ත්වද්ගුණාංභෝධිබිංදූන් ।
භජංතස්තිතීර්ෂංති සංසාරසිංධුං
ශිවේ තාවකීනා සුසංභාවනේයම් ॥ 18 ॥
කදා වා භවත්පාදපෝතේන තූර්ණං
භවාංභෝධිමුත්තීර්ය පූර්ණාංතරංගඃ ।
නිමජ්ජංතමේනං දුරාශාවිෂාබ්ධෞ
සමාලෝක්ය ලෝකං කථං පර්යුදාස්සේ ॥ 19 ॥
කදාවා හෘෂීකාණි සාම්යං භජේයුඃ
කදා වා න ශත්රුර්න මිත්රං භවානි ।
කදා වා දුරාශාවිෂූචීවිලෝපඃ
කදා වා මනෝ මේ සමූලං විනශ්යේත් ॥ 20 ॥
නමෝවාකමාශාස්මහේ දේවි යුෂ්ම-
ත්පදාංභෝජයුග්මාය තිග්මාය ගෞරි ।
විරිංච්යාදිභාස්වත්කිරීටප්රතෝලී-
ප්රදීපායමානප්රභාභාස්වරාය ॥ 21 ॥
කචේ චංද්රරේඛං කුචේ තාරහාරං
කරේ ස්වාදුචාපං ශරේ ෂට්පදෞඝම් ।
ස්මරාමි ස්මරාරේරභිප්රායමේකං
මදාඝූර්ණනේත්රං මදීයං නිධානම් ॥ 22 ॥
ශරේෂ්වේව නාසා ධනුෂ්වේව ජිහ්වා
ජපාපාටලේ ලෝචනේ තේ ස්වරූපේ ।
ත්වගේෂා භවච්චංද්රඛංඩේ ශ්රවෝ මේ
ගුණේ තේ මනෝවෘත්තිරංබ ත්වයි ස්යාත් ॥ 23 ॥
ජගත්කර්මධීරාන්වචෝධූතකීරාන්
කුචන්යස්තහාරාංකෘපාසිංධුපූරාන් ।
භවාංභෝධිපාරාන්මහාපාපදූරාන්
භජේ වේදසාරාංශිවප්රේමදාරාන් ॥ 24 ॥
සුධාසිංධුසාරේ චිදානංදනීරේ
සමුත්ඵුල්ලනීපේ සුරත්රාංතරීපේ ।
මණිව්යූහසාලේ ස්ථිතේ හෛමශාලේ
මනෝජාරිවාමේ නිෂණ්ණං මනෝ මේ ॥ 25 ॥
දෘගංතේ විලෝලා සුගංධීෂුමාලා
ප්රපංචේංද්රජාලා විපත්සිංධුකූලා ।
මුනිස්වාංතශාලා නමල්ලෝකපාලා
හෘදි ප්රේමලෝලාමෘතස්වාදුලීලා ॥ 26 ॥
ජගජ්ජාලමේතත්ත්වයෛවාංබ සෘෂ්ටං
ත්වමේවාද්ය යාසීංද්රියෛරර්ථජාලම් ।
ත්වමේකෛව කර්ත්රී ත්වමේකෛව භෝක්ත්රී
න මේ පුණ්යපාපේ න මේ බංධමෝක්ෂෞ ॥ 27 ॥
ඉති ප්රේමභාරේණ කිංචින්මයෝක්තං
න බුධ්වෛව තත්ත්වං මදීයං ත්වදීයම් ।
විනෝදාය බාලස්ය මෞර්ඛ්යං හි මාතස්-
තදේතත්ප්රලාපස්තුතිං මේ ගෘහාණ ॥ 28 ॥
॥ ඉති ශ්රීමච්ඡංකරාචාර්යවිරචිතා දේවීභුජංගං සංපූර්ණම් ॥
