ධ්යානං
මාධවෝමාධවාවීශෞ සර්වසිද්ධිවිහායිනෞ ।
වංදේ පරස්පරාත්මානෞ පරස්පරනුතිප්රියෞ ॥
ස්තෝත්රං
ගෝවිංද මාධව මුකුංද හරේ මුරාරේ
ශංභෝ ශිවේශ ශශිශේඛර ශූලපාණේ ।
දාමෝදරාऽච්යුත ජනාර්දන වාසුදේව
ත්යාජ්යාභටාය ඉති සංතතමාමනංති ॥ 1
ගංගාධරාංධකරිපෝ හර නීලකංඨ
වෛකුංඨකෛටභරිපෝ කමඨාබ්ජපාණේ ।
භූතේශ ඛංඩපරශෝ මෘඩ චංඩිකේශ
ත්යාජ්යාභටාය ඉති සංතතමාමනංති ॥ 2
විෂ්ණෝ නෘසිංහ මධුසූදන චක්රපාණේ
ගෞරීපතේ ගිරිශ ශංකර චංද්රචූඩ ।
නාරායණාऽසුරනිබර්හණ ශාර්ඞ්ගපාණේ
ත්යාජ්යාභටාය ඉති සංතතමාමනංති ॥ 3
මෘත්යුංජයෝග්ර විෂමේක්ෂණ කාමශත්රෝ
ශ්රීකංඨ පීතවසනාංබුදනීලශෞරේ ।
ඊශාන කෘත්තිවසන ත්රිදශෛකනාථ
ත්යාජ්යාභටාය ඉති සංතතමාමනංති ॥ 4
ලක්ෂ්මීපතේ මධුරිපෝ පුරුෂෝත්තමාද්ය
ශ්රීකංඨ දිග්වසන ශාංත පිනාකපාණේ ।
ආනංදකංද ධරණීධර පද්මනාභ
ත්යාජ්යාභටාය ඉති සංතතමාමනංති ॥ 5
සර්වේශ්වර ත්රිපුරසූදන දේවදේව
බ්රහ්මණ්යදේව ගරුඩධ්වජ ශංඛපාණේ ।
ත්ර්යක්ෂෝරගාභරණ බාලමෘගාංකමෞළේ
ත්යාජ්යාභටාය ඉති සංතතමාමනංති ॥ 6
ශ්රීරාම රාඝව රමේශ්වර රාවණාරේ
භූතේශ මන්මථරිපෝ ප්රමථාධිනාථ ।
චාණූරමර්දන හෘෂීකපතේ මුරාරේ
ත්යාජ්යාභටාය ඉති සංතතමාමනංති ॥ 7
ශූලින් ගිරීශ රජනීශකළාවතංස
කංසප්රණාශන සනාතන කේශිනාශ ।
භර්ග ත්රිනේත්ර භව භූතපතේ පුරාරේ
ත්යාජ්යාභටාය ඉති සංතතමාමනංති ॥ 8
ගෝපීපතේ යදුපතේ වසුදේවසූනෝ
කර්පූරගෞර වෘෂභධ්වජ ඵාලනේත්ර ।
ගෝවර්ධනෝද්ධරණ ධර්මධුරීණ ගෝප
ත්යාජ්යාභටාය ඉති සංතතමාමනංති ॥ 9
ස්ථාණෝ ත්රිලෝචන පිනාකධර ස්මරාරේ
කෘෂ්ණාऽනිරුද්ධ කමලාකර කල්මෂාරේ ।
විශ්වේශ්වර ත්රිපථගාර්ද්රජටාකලාප
ත්යාජ්යාභටාය ඉති සංතතමාමනංති ॥ 10
අෂ්ටෝත්තරාධිකශතේන සුචාරුනාම්නාං
සංධර්භිතාං ලලිතරත්නකදංබකේන ।
සන්නාමකාං දෘඪගුණාං ද්විජකංඨගාං යඃ
කුර්යාදිමාං ස්රජමහෝ ස යමං න පශ්යේත් ॥ 11
ඉති යමකෘත ශ්රී ශිවකේශව ස්තුතිඃ ।
