𑌅𑌸𑍍𑌯 𑌶𑍍𑌰𑍀 𑌆𑌦𑌿𑌤𑍍𑌯𑌕𑌵𑌚𑌸𑍍𑌤𑍋𑌤𑍍𑌰𑌮𑌹𑌾𑌮𑌂𑌤𑍍𑌰𑌸𑍍𑌯 𑌅𑌗𑌸𑍍𑌤𑍍𑌯𑍋 𑌭𑌗𑌵𑌾𑌨𑍃𑌷𑌿𑌃 𑌅𑌨𑍁𑌷𑍍𑌟𑍁𑌪𑍍𑌛𑌂𑌦𑌃 𑌆𑌦𑌿𑌤𑍍𑌯𑍋 𑌦𑍇𑌵𑌤𑌾 𑌶𑍍𑌰𑍀𑌂 𑌬𑍀𑌜𑌂 𑌣𑍀𑌂 𑌶𑌕𑍍𑌤𑌿𑌃 𑌸𑍂𑌂 𑌕𑍀𑌲𑌕𑌂 𑌮𑌮 𑌆𑌦𑌿𑌤𑍍𑌯𑌪𑍍𑌰𑌸𑌾𑌦𑌸𑌿𑌦𑍍𑌧𑍍𑌯𑌰𑍍𑌥𑍇 𑌜𑌪𑍇 𑌵𑌿𑌨𑌿𑌯𑍋𑌗𑌃 ।
𑌧𑍍𑌯𑌾𑌨𑌂
𑌜𑌪𑌾𑌕𑍁𑌸𑍁𑌮𑌸𑌂𑌕𑌾𑌶𑌂 𑌦𑍍𑌵𑌿𑌭𑍁𑌜𑌂 𑌪𑌦𑍍𑌮𑌹𑌸𑍍𑌤𑌕𑌮𑍍
𑌸𑌿𑌂𑌦𑍂𑌰𑌾𑌂𑌬𑌰𑌮𑌾𑌲𑍍𑌯𑌂 𑌚 𑌰𑌕𑍍𑌤𑌗𑌂𑌧𑌾𑌨𑍁𑌲𑍇𑌪𑌨𑌮𑍍 ।
𑌮𑌾𑌣𑌿𑌕𑍍𑌯𑌰𑌤𑍍𑌨𑌖𑌚𑌿𑌤-𑌸𑌰𑍍𑌵𑌾𑌭𑌰𑌣𑌭𑍂𑌷𑌿𑌤𑌮𑍍
𑌸𑌪𑍍𑌤𑌾𑌶𑍍𑌵𑌰𑌥𑌵𑌾𑌹𑌂 𑌤𑍁 𑌮𑍇𑌰𑍁𑌂 𑌚𑍈𑌵 𑌪𑍍𑌰𑌦𑌕𑍍𑌷𑌿𑌣𑌮𑍍 ॥
𑌦𑍇𑌵𑌾𑌸𑍁𑌰𑌵𑌰𑍈𑌰𑍍𑌵𑌂𑌦𑍍𑌯𑌂 𑌘𑍃𑌣𑌿𑌭𑌿𑌃 𑌪𑌰𑌿𑌸𑍇𑌵𑌿𑌤𑌮𑍍 ।
𑌧𑍍𑌯𑌾𑌯𑍇𑌤𑍍𑌪𑌠𑍇𑌤𑍍𑌸𑍁𑌵𑌰𑍍𑌣𑌾𑌭𑌂 𑌸𑍂𑌰𑍍𑌯𑌸𑍍𑌯 𑌕𑌵𑌚𑌂 𑌮𑍁𑌦𑌾 ॥
𑌕𑌵𑌚𑌂
𑌘𑍃𑌣𑌿𑌃 𑌪𑌾𑌤𑍁 𑌶𑌿𑌰𑍋𑌦𑍇𑌶𑍇 𑌸𑍂𑌰𑍍𑌯𑌃 𑌪𑌾𑌤𑍁 𑌲𑌲𑌾𑌟𑌕𑌮𑍍 ।
𑌆𑌦𑌿𑌤𑍍𑌯𑍋 𑌲𑍋𑌚𑌨𑍇 𑌪𑌾𑌤𑍁 𑌶𑍍𑌰𑍁𑌤𑍀 𑌪𑌾𑌤𑍁 𑌦𑌿𑌵𑌾𑌕𑌰𑌃 ॥
𑌘𑍍𑌰𑌾𑌣𑌂 𑌪𑌾𑌤𑍁 𑌸𑌦𑌾 𑌭𑌾𑌨𑍁𑌃 𑌮𑍁𑌖𑌂 𑌪𑌾𑌤𑍁 𑌸𑌦𑌾𑌰𑌵𑌿𑌃 ।
𑌜𑌿𑌹𑍍𑌵𑌾𑌂 𑌪𑌾𑌤𑍁 𑌜𑌗𑌨𑍍𑌨𑍇𑌤𑍍𑌰𑌃 𑌕𑌂𑌠𑌂 𑌪𑌾𑌤𑍁 𑌵𑌿𑌭𑌾𑌵𑌸𑍁𑌃 ॥
𑌸𑍍𑌕𑌂𑌧𑍌 𑌗𑍍𑌰𑌹𑌪𑌤𑌿𑌃 𑌪𑌾𑌤𑍁 𑌭𑍁𑌜𑍌 𑌪𑌾𑌤𑍁 𑌪𑍍𑌰𑌭𑌾𑌕𑌰𑌃 ।
𑌕𑌰𑌾𑌵𑌬𑍍𑌜𑌕𑌰𑌃 𑌪𑌾𑌤𑍁 𑌹𑍃𑌦𑌯𑌂 𑌪𑌾𑌤𑍁 𑌨𑌭𑍋𑌮𑌣𑌿𑌃 ॥
𑌦𑍍𑌵𑌾𑌦𑌶𑌾𑌤𑍍𑌮𑌾 𑌕𑌟𑌿𑌂 𑌪𑌾𑌤𑍁 𑌸𑌵𑌿𑌤𑌾 𑌪𑌾𑌤𑍁 𑌸𑌕𑍍𑌥𑌿𑌨𑍀 ।
𑌊𑌰𑍂 𑌪𑌾𑌤𑍁 𑌸𑍁𑌰𑌶𑍍𑌰𑍇𑌷𑍍𑌟𑍋 𑌜𑌾𑌨𑍁𑌨𑍀 𑌪𑌾𑌤𑍁 𑌭𑌾𑌸𑍍𑌕𑌰𑌃 ॥
𑌜𑌂𑌘𑍇 𑌮𑍇 𑌪𑌾𑌤𑍁 𑌮𑌾𑌰𑍍𑌤𑌾𑌂𑌡𑍋 𑌗𑍁𑌲𑍍𑌫𑍌 𑌪𑌾𑌤𑍁 𑌤𑍍𑌵𑌿𑌷𑌾𑌂𑌪𑌤𑌿𑌃 ।
𑌪𑌾𑌦𑍌 𑌦𑌿𑌨𑌮𑌣𑌿𑌃 𑌪𑌾𑌤𑍁 𑌪𑌾𑌤𑍁 𑌮𑌿𑌤𑍍𑌰𑍋𑌽𑌖𑌿𑌲𑌂 𑌵𑌪𑍁𑌃 ॥
𑌆𑌦𑌿𑌤𑍍𑌯𑌕𑌵𑌚𑌂 𑌪𑍁𑌣𑍍𑌯𑌮𑌭𑍇𑌦𑍍𑌯𑌂 𑌵𑌜𑍍𑌰𑌸𑌨𑍍𑌨𑌿𑌭𑌮𑍍 ।
𑌸𑌰𑍍𑌵𑌰𑍋𑌗𑌭𑌯𑌾𑌦𑌿𑌭𑍍𑌯𑍋 𑌮𑍁𑌚𑍍𑌯𑌤𑍇 𑌨𑌾𑌤𑍍𑌰 𑌸𑌂𑌶𑌯𑌃 ॥
𑌸𑌂𑌵𑌤𑍍𑌸𑌰𑌮𑍁𑌪𑌾𑌸𑌿𑌤𑍍𑌵𑌾 𑌸𑌾𑌮𑍍𑌰𑌾𑌜𑍍𑌯𑌪𑌦𑌵𑍀𑌂 𑌲𑌭𑍇𑌤𑍍 ।
𑌅𑌶𑍇𑌷𑌰𑍋𑌗𑌶𑌾𑌂𑌤𑍍𑌯𑌰𑍍𑌥𑌂 𑌧𑍍𑌯𑌾𑌯𑍇𑌦𑌾𑌦𑌿𑌤𑍍𑌯𑌮𑌂𑌡𑌲𑌮𑍍 ।
𑌆𑌦𑌿𑌤𑍍𑌯 𑌮𑌂𑌡𑌲 𑌸𑍍𑌤𑍁𑌤𑌿𑌃 –
𑌅𑌨𑍇𑌕𑌰𑌤𑍍𑌨𑌸𑌂𑌯𑍁𑌕𑍍𑌤𑌂 𑌸𑍍𑌵𑌰𑍍𑌣𑌮𑌾𑌣𑌿𑌕𑍍𑌯𑌭𑍂𑌷𑌣𑌮𑍍 ।
𑌕𑌲𑍍𑌪𑌵𑍃𑌕𑍍𑌷𑌸𑌮𑌾𑌕𑍀𑌰𑍍𑌣𑌂 𑌕𑌦𑌂𑌬𑌕𑍁𑌸𑍁𑌮𑌪𑍍𑌰𑌿𑌯𑌮𑍍 ॥
𑌸𑌿𑌂𑌦𑍂𑌰𑌵𑌰𑍍𑌣𑌾𑌯 𑌸𑍁𑌮𑌂𑌡𑌲𑌾𑌯
𑌸𑍁𑌵𑌰𑍍𑌣𑌰𑌤𑍍𑌨𑌾𑌭𑌰𑌣𑌾𑌯 𑌤𑍁𑌭𑍍𑌯𑌮𑍍 ।
𑌪𑌦𑍍𑌮𑌾𑌦𑌿𑌨𑍇𑌤𑍍𑌰𑍇 𑌚 𑌸𑍁𑌪𑌂𑌕𑌜𑌾𑌯
𑌬𑍍𑌰𑌹𑍍𑌮𑍇𑌂𑌦𑍍𑌰-𑌨𑌾𑌰𑌾𑌯𑌣-𑌶𑌂𑌕𑌰𑌾𑌯 ॥
𑌸𑌂𑌰𑌕𑍍𑌤𑌚𑍂𑌰𑍍𑌣𑌂 𑌸𑌸𑍁𑌵𑌰𑍍𑌣𑌤𑍋𑌯𑌂
𑌸𑌕𑍁𑌂𑌕𑍁𑌮𑌾𑌭𑌂 𑌸𑌕𑍁𑌶𑌂 𑌸𑌪𑍁𑌷𑍍𑌪𑌮𑍍 ।
𑌪𑍍𑌰𑌦𑌤𑍍𑌤𑌮𑌾𑌦𑌾𑌯 𑌚 𑌹𑍇𑌮𑌪𑌾𑌤𑍍𑌰𑍇
𑌪𑍍𑌰𑌶𑌸𑍍𑌤𑌨𑌾𑌦𑌂 𑌭𑌗𑌵𑌨𑍍 𑌪𑍍𑌰𑌸𑍀𑌦 ॥
𑌇𑌤𑌿 𑌆𑌦𑌿𑌤𑍍𑌯𑌕𑌵𑌚𑌮𑍍 ।
