𑌨𑍀𑌲𑌾𑌂𑌬𑌰𑍋 𑌨𑍀𑌲𑌵𑌪𑍁𑌃 𑌕𑌿𑌰𑍀𑌟𑍀
𑌗𑍃𑌧𑍍𑌰𑌸𑍍𑌥𑌿𑌤𑌾𑌸𑍍𑌤𑍍𑌰𑌕𑌰𑍋 𑌧𑌨𑍁𑌷𑍍𑌮𑌾𑌨𑍍 ।
𑌚𑌤𑍁𑌰𑍍𑌭𑍁𑌜𑌃 𑌸𑍂𑌰𑍍𑌯𑌸𑍁𑌤𑌃 𑌪𑍍𑌰𑌸𑌨𑍍𑌨𑌃
𑌸𑌦𑌾 𑌮𑌮𑌸𑍍𑌯𑌾𑌦𑍍𑌵𑌰𑌦𑌃 𑌪𑍍𑌰𑌶𑌾𑌂𑌤𑌃 ॥

𑌬𑍍𑌰𑌹𑍍𑌮𑌾 𑌉𑌵𑌾𑌚 ।

𑌶𑍃𑌣𑍁𑌧𑍍𑌵𑌂 𑌋𑌷𑌯𑌃 𑌸𑌰𑍍𑌵𑍇 𑌶𑌨𑌿 𑌪𑍀𑌡𑌾𑌹𑌰𑌂 𑌮𑌹𑌤𑍍 ।
𑌕𑌵𑌚𑌂 𑌶𑌨𑌿𑌰𑌾𑌜𑌸𑍍𑌯 𑌸𑍌𑌰𑍈𑌰𑌿𑌦𑌮𑌨𑍁𑌤𑍍𑌤𑌮𑌮𑍍 ॥

𑌕𑌵𑌚𑌂 𑌦𑍇𑌵𑌤𑌾𑌵𑌾𑌸𑌂 𑌵𑌜𑍍𑌰 𑌪𑌂𑌜𑌰 𑌸𑌂𑌂𑌗𑌕𑌮𑍍 ।
𑌶𑌨𑍈𑌶𑍍𑌚𑌰 𑌪𑍍𑌰𑍀𑌤𑌿𑌕𑌰𑌂 𑌸𑌰𑍍𑌵𑌸𑍌𑌭𑌾𑌗𑍍𑌯𑌦𑌾𑌯𑌕𑌮𑍍 ॥

𑌅𑌥 𑌶𑍍𑌰𑍀 𑌶𑌨𑌿 𑌵𑌜𑍍𑌰 𑌪𑌂𑌜𑌰 𑌕𑌵𑌚𑌮𑍍 ।

𑌓𑌂 𑌶𑍍𑌰𑍀 𑌶𑌨𑍈𑌶𑍍𑌚𑌰𑌃 𑌪𑌾𑌤𑍁 𑌭𑌾𑌲𑌂 𑌮𑍇 𑌸𑍂𑌰𑍍𑌯𑌨𑌂𑌦𑌨𑌃 ।
𑌨𑍇𑌤𑍍𑌰𑍇 𑌛𑌾𑌯𑌾𑌤𑍍𑌮𑌜𑌃 𑌪𑌾𑌤𑍁 𑌪𑌾𑌤𑍁 𑌕𑌰𑍍𑌣𑍌 𑌯𑌮𑌾𑌨𑍁𑌜𑌃 ॥ 1 ॥

𑌨𑌾𑌸𑌾𑌂 𑌵𑍈𑌵𑌸𑍍𑌵𑌤𑌃 𑌪𑌾𑌤𑍁 𑌮𑍁𑌖𑌂 𑌮𑍇 𑌭𑌾𑌸𑍍𑌕𑌰𑌃 𑌸𑌦𑌾 ।
𑌸𑍍𑌨𑌿𑌗𑍍𑌧𑌕𑌂𑌠𑌶𑍍𑌚 𑌮𑍇 𑌕𑌂𑌠𑌂 𑌭𑍁𑌜𑍌 𑌪𑌾𑌤𑍁 𑌮𑌹𑌾𑌭𑍁𑌜𑌃 ॥ 2 ॥

𑌸𑍍𑌕𑌂𑌧𑍌 𑌪𑌾𑌤𑍁 𑌶𑌨𑌿𑌶𑍍𑌚𑍈𑌵 𑌕𑌰𑍌 𑌪𑌾𑌤𑍁 𑌶𑍁𑌭𑌪𑍍𑌰𑌦𑌃 ।
𑌵𑌕𑍍𑌷𑌃 𑌪𑌾𑌤𑍁 𑌯𑌮𑌭𑍍𑌰𑌾𑌤𑌾 𑌕𑍁𑌕𑍍𑌷𑌿𑌂 𑌪𑌾𑌤𑍍𑌵𑌸𑌿𑌤𑌸𑍍𑌤𑌥𑌾 ॥ 3 ॥

𑌨𑌾𑌭𑌿𑌂 𑌗𑍍𑌰𑌹𑌪𑌤𑌿𑌃 𑌪𑌾𑌤𑍁 𑌮𑌂𑌦𑌃 𑌪𑌾𑌤𑍁 𑌕𑌟𑌿𑌂 𑌤𑌥𑌾 ।
𑌊𑌰𑍂 𑌮𑌮𑌾𑌂𑌤𑌕𑌃 𑌪𑌾𑌤𑍁 𑌯𑌮𑍋 𑌜𑌾𑌨𑍁𑌯𑍁𑌗𑌂 𑌤𑌥𑌾 ॥ 4 ॥

𑌪𑌾𑌦𑍌 𑌮𑌂𑌦𑌗𑌤𑌿𑌃 𑌪𑌾𑌤𑍁 𑌸𑌰𑍍𑌵𑌾𑌂𑌗𑌂 𑌪𑌾𑌤𑍁 𑌪𑌿𑌪𑍍𑌪𑌲𑌃 ।
𑌅𑌂𑌗𑍋𑌪𑌾𑌂𑌗𑌾𑌨𑌿 𑌸𑌰𑍍𑌵𑌾𑌣𑌿 𑌰𑌕𑍍𑌷𑍇𑌨𑍍 𑌮𑍇 𑌸𑍂𑌰𑍍𑌯𑌨𑌂𑌦𑌨𑌃 ॥ 5 ॥

𑌫𑌲𑌶𑍍𑌰𑍁𑌤𑌿𑌃

𑌇𑌤𑍍𑌯𑍇𑌤𑌤𑍍𑌕𑌵𑌚𑌂 𑌦𑌿𑌵𑍍𑌯𑌂 𑌪𑌠𑍇𑌤𑍍𑌸𑍂𑌰𑍍𑌯𑌸𑍁𑌤𑌸𑍍𑌯 𑌯𑌃 ।
𑌨 𑌤𑌸𑍍𑌯 𑌜𑌾𑌯𑌤𑍇 𑌪𑍀𑌡𑌾 𑌪𑍍𑌰𑍀𑌤𑍋 𑌭𑌵𑌤𑌿 𑌸𑍂𑌰𑍍𑌯𑌜𑌃 ॥

𑌵𑍍𑌯𑌯𑌜𑌨𑍍𑌮𑌦𑍍𑌵𑌿𑌤𑍀𑌯𑌸𑍍𑌥𑍋 𑌮𑍃𑌤𑍍𑌯𑍁𑌸𑍍𑌥𑌾𑌨𑌗𑌤𑍋𑌪𑌿𑌵𑌾 ।
𑌕𑌲𑌤𑍍𑌰𑌸𑍍𑌥𑍋 𑌗𑌤𑍋𑌵𑌾𑌪𑌿 𑌸𑍁𑌪𑍍𑌰𑍀𑌤𑌸𑍍𑌤𑍁 𑌸𑌦𑌾 𑌶𑌨𑌿𑌃 ॥

𑌅𑌷𑍍𑌟𑌮𑌸𑍍𑌥𑍋 𑌸𑍂𑌰𑍍𑌯𑌸𑍁𑌤𑍇 𑌵𑍍𑌯𑌯𑍇 𑌜𑌨𑍍𑌮𑌦𑍍𑌵𑌿𑌤𑍀𑌯𑌗𑍇 ।
𑌕𑌵𑌚𑌂 𑌪𑌠𑌤𑍇 𑌨𑌿𑌤𑍍𑌯𑌂 𑌨 𑌪𑍀𑌡𑌾 𑌜𑌾𑌯𑌤𑍇 𑌕𑍍𑌵𑌚𑌿𑌤𑍍 ॥

𑌇𑌤𑍍𑌯𑍇𑌤𑌤𑍍𑌕𑌵𑌚𑌂 𑌦𑌿𑌵𑍍𑌯𑌂 𑌸𑍌𑌰𑍇𑌰𑍍𑌯𑌨𑍍𑌨𑌿𑌰𑍍𑌮𑌿𑌤𑌂 𑌪𑍁𑌰𑌾 ।
𑌦𑍍𑌵𑌾𑌦𑌶𑌾𑌷𑍍𑌟𑌮𑌜𑌨𑍍𑌮𑌸𑍍𑌥𑌦𑍋𑌷𑌾𑌨𑍍𑌨𑌾𑌶𑌯𑌤𑍇 𑌸𑌦𑌾 ।
𑌜𑌨𑍍𑌮𑌲𑌗𑍍𑌨𑌸𑍍𑌥𑌿𑌤𑌾𑌨𑍍 𑌦𑍋𑌷𑌾𑌨𑍍 𑌸𑌰𑍍𑌵𑌾𑌨𑍍𑌨𑌾𑌶𑌯𑌤𑍇 𑌪𑍍𑌰𑌭𑍁𑌃 ॥

𑌇𑌤𑌿 𑌶𑍍𑌰𑍀 𑌬𑍍𑌰𑌹𑍍𑌮𑌾𑌂𑌡𑌪𑍁𑌰𑌾𑌣𑍇 𑌬𑍍𑌰𑌹𑍍𑌮𑌨𑌾𑌰𑌦𑌸𑌂𑌵𑌾𑌦𑍇 𑌶𑌨𑌿𑌵𑌜𑍍𑌰𑌪𑌂𑌜𑌰 𑌕𑌵𑌚𑌂 𑌸𑌂𑌪𑍂𑌰𑍍𑌣𑌮𑍍 ॥