𑌨𑌮𑍋𑌽𑌸𑍍𑌤𑍁 𑌸𑍂𑌰𑍍𑌯𑌾𑌯 𑌸𑌹𑌸𑍍𑌰𑌰𑌶𑍍𑌮𑌯𑍇
𑌸𑌹𑌸𑍍𑌰𑌶𑌾𑌖𑌾𑌨𑍍𑌵𑌿𑌤 𑌸𑌂𑌭𑌵𑌾𑌤𑍍𑌮𑌨𑍇 ।
𑌸𑌹𑌸𑍍𑌰𑌯𑍋𑌗𑍋𑌦𑍍𑌭𑌵 𑌭𑌾𑌵𑌭𑌾𑌗𑌿𑌨𑍇
𑌸𑌹𑌸𑍍𑌰𑌸𑌂𑌖𑍍𑌯𑌾𑌯𑍁𑌧𑌧𑌾𑌰𑌿𑌣𑍇 𑌨𑌮𑌃 ॥ 1 ॥

𑌯𑌨𑍍𑌮𑌂𑌡𑌲𑌂 𑌦𑍀𑌪𑍍𑌤𑌿𑌕𑌰𑌂 𑌵𑌿𑌶𑌾𑌲𑌂
𑌰𑌤𑍍𑌨𑌪𑍍𑌰𑌭𑌂 𑌤𑍀𑌵𑍍𑌰𑌮𑌨𑌾𑌦𑌿𑌰𑍂𑌪𑌮𑍍 ।
𑌦𑌾𑌰𑌿𑌦𑍍𑌰𑍍𑌯𑌦𑍁𑌃𑌖𑌕𑍍𑌷𑌯𑌕𑌾𑌰𑌣𑌂 𑌚
𑌪𑍁𑌨𑌾𑌤𑍁 𑌮𑌾𑌂 𑌤𑌤𑍍𑌸𑌵𑌿𑌤𑍁𑌰𑍍𑌵𑌰𑍇𑌣𑍍𑌯𑌮𑍍 ॥ 2 ॥

𑌯𑌨𑍍𑌮𑌂𑌡𑌲𑌂 𑌦𑍇𑌵𑌗𑌣𑍈𑌃 𑌸𑍁𑌪𑍂𑌜𑌿𑌤𑌂
𑌵𑌿𑌪𑍍𑌰𑍈𑌃 𑌸𑍍𑌤𑍁𑌤𑌂 𑌭𑌾𑌵𑌨𑌮𑍁𑌕𑍍𑌤𑌿𑌕𑍋𑌵𑌿𑌦𑌮𑍍 ।
𑌤𑌂 𑌦𑍇𑌵𑌦𑍇𑌵𑌂 𑌪𑍍𑌰𑌣𑌮𑌾𑌮𑌿 𑌸𑍂𑌰𑍍𑌯𑌂
𑌪𑍁𑌨𑌾𑌤𑍁 𑌮𑌾𑌂 𑌤𑌤𑍍𑌸𑌵𑌿𑌤𑍁𑌰𑍍𑌵𑌰𑍇𑌣𑍍𑌯𑌮𑍍 ॥ 3 ॥

𑌯𑌨𑍍𑌮𑌂𑌡𑌲𑌂 𑌜𑍍𑌞𑌾𑌨𑌘𑌨𑌂𑌤𑍍𑌵𑌗𑌮𑍍𑌯𑌂
𑌤𑍍𑌰𑍈𑌲𑍋𑌕𑍍𑌯𑌪𑍂𑌜𑍍𑌯𑌂 𑌤𑍍𑌰𑌿𑌗𑍁𑌣𑌾𑌤𑍍𑌮𑌰𑍂𑌪𑌮𑍍 ।
𑌸𑌮𑌸𑍍𑌤𑌤𑍇𑌜𑍋𑌮𑌯𑌦𑌿𑌵𑍍𑌯𑌰𑍂𑌪𑌂
𑌪𑍁𑌨𑌾𑌤𑍁 𑌮𑌾𑌂 𑌤𑌤𑍍𑌸𑌵𑌿𑌤𑍁𑌰𑍍𑌵𑌰𑍇𑌣𑍍𑌯𑌮𑍍 ॥ 4 ॥

𑌯𑌨𑍍𑌮𑌂𑌡𑌲𑌂 𑌗𑍂𑌢𑌮𑌤𑌿𑌪𑍍𑌰𑌬𑍋𑌧𑌂
𑌧𑌰𑍍𑌮𑌸𑍍𑌯 𑌵𑍃𑌦𑍍𑌧𑌿𑌂 𑌕𑍁𑌰𑍁𑌤𑍇 𑌜𑌨𑌾𑌨𑌾𑌮𑍍 ।
𑌯𑌤𑍍𑌸𑌰𑍍𑌵𑌪𑌾𑌪𑌕𑍍𑌷𑌯𑌕𑌾𑌰𑌣𑌂 𑌚
𑌪𑍁𑌨𑌾𑌤𑍁 𑌮𑌾𑌂 𑌤𑌤𑍍𑌸𑌵𑌿𑌤𑍁𑌰𑍍𑌵𑌰𑍇𑌣𑍍𑌯𑌮𑍍 ॥ 5 ॥

𑌯𑌨𑍍𑌮𑌂𑌡𑌲𑌂 𑌵𑍍𑌯𑌾𑌧𑌿𑌵𑌿𑌨𑌾𑌶𑌦𑌕𑍍𑌷𑌂
𑌯𑌦𑍃𑌗𑍍𑌯𑌜𑍁𑌃 𑌸𑌾𑌮𑌸𑍁 𑌸𑌂𑌪𑍍𑌰𑌗𑍀𑌤𑌮𑍍 ।
𑌪𑍍𑌰𑌕𑌾𑌶𑌿𑌤𑌂 𑌯𑍇𑌨 𑌚 𑌭𑍂𑌰𑍍𑌭𑍁𑌵𑌃 𑌸𑍍𑌵𑌃
𑌪𑍁𑌨𑌾𑌤𑍁 𑌮𑌾𑌂 𑌤𑌤𑍍𑌸𑌵𑌿𑌤𑍁𑌰𑍍𑌵𑌰𑍇𑌣𑍍𑌯𑌮𑍍 ॥ 6 ॥

𑌯𑌨𑍍𑌮𑌂𑌡𑌲𑌂 𑌵𑍇𑌦𑌵𑌿𑌦𑍋 𑌵𑌦𑌂𑌤𑌿
𑌗𑌾𑌯𑌂𑌤𑌿 𑌯𑌚𑍍𑌚𑌾𑌰𑌣𑌸𑌿𑌦𑍍𑌧𑌸𑌂𑌘𑌾𑌃 ।
𑌯𑌦𑍍𑌯𑍋𑌗𑌿𑌨𑍋 𑌯𑍋𑌗𑌜𑍁𑌷𑌾𑌂 𑌚 𑌸𑌂𑌘𑌾𑌃
𑌪𑍁𑌨𑌾𑌤𑍁 𑌮𑌾𑌂 𑌤𑌤𑍍𑌸𑌵𑌿𑌤𑍁𑌰𑍍𑌵𑌰𑍇𑌣𑍍𑌯𑌮𑍍 ॥ 𑍭 ॥

𑌯𑌨𑍍𑌮𑌂𑌡𑌲𑌂 𑌸𑌰𑍍𑌵𑌜𑌨𑍈𑌶𑍍𑌚 𑌪𑍂𑌜𑌿𑌤𑌂
𑌜𑍍𑌯𑍋𑌤𑌿𑌶𑍍𑌚 𑌕𑍁𑌰𑍍𑌯𑌾𑌦𑌿𑌹 𑌮𑌰𑍍𑌤𑍍𑌯𑌲𑍋𑌕𑍇 ।
𑌯𑌤𑍍𑌕𑌾𑌲𑌕𑌾𑌲𑌾𑌦𑍍𑌯𑌮𑌨𑌾𑌦𑌿𑌰𑍂𑌪𑌂
𑌪𑍁𑌨𑌾𑌤𑍁 𑌮𑌾𑌂 𑌤𑌤𑍍𑌸𑌵𑌿𑌤𑍁𑌰𑍍𑌵𑌰𑍇𑌣𑍍𑌯𑌮𑍍 ॥ 𑍮 ॥

𑌯𑌨𑍍𑌮𑌂𑌡𑌲𑌂 𑌵𑌿𑌷𑍍𑌣𑍁𑌚𑌤𑍁𑌰𑍍𑌮𑍁𑌖𑌾𑌖𑍍𑌯𑌂
𑌯𑌦𑌕𑍍𑌷𑌰𑌂 𑌪𑌾𑌪𑌹𑌰𑌂 𑌜𑌨𑌾𑌨𑌾𑌮𑍍 ।
𑌯𑌤𑍍𑌕𑌾𑌲𑌕𑌲𑍍𑌪𑌕𑍍𑌷𑌯𑌕𑌾𑌰𑌣𑌂 𑌚
𑌪𑍁𑌨𑌾𑌤𑍁 𑌮𑌾𑌂 𑌤𑌤𑍍𑌸𑌵𑌿𑌤𑍁𑌰𑍍𑌵𑌰𑍇𑌣𑍍𑌯𑌮𑍍 ॥ 𑍯 ॥

𑌯𑌨𑍍𑌮𑌂𑌡𑌲𑌂 𑌵𑌿𑌶𑍍𑌵𑌸𑍃𑌜𑌂 𑌪𑍍𑌰𑌸𑌿𑌦𑍍𑌧𑌂
𑌉𑌤𑍍𑌪𑌤𑍍𑌤𑌿𑌰𑌕𑍍𑌷𑌪𑍍𑌰𑌳𑌯 𑌪𑍍𑌰𑌗𑌲𑍍𑌭𑌮𑍍 ।
𑌯𑌸𑍍𑌮𑌿𑌨𑍍 𑌜𑌗𑌤𑍍𑌸𑌂𑌹𑌰𑌤𑍇𑌽𑌖𑌿𑌲𑌂 𑌚
𑌪𑍁𑌨𑌾𑌤𑍁 𑌮𑌾𑌂 𑌤𑌤𑍍𑌸𑌵𑌿𑌤𑍁𑌰𑍍𑌵𑌰𑍇𑌣𑍍𑌯𑌮𑍍 ॥ 10 ॥

𑌯𑌨𑍍𑌮𑌂𑌡𑌲𑌂 𑌸𑌰𑍍𑌵𑌗𑌤𑌸𑍍𑌯 𑌵𑌿𑌷𑍍𑌣𑍋𑌃
𑌆𑌤𑍍𑌮𑌾 𑌪𑌰𑌂‍𑌧𑌾𑌮 𑌵𑌿𑌶𑍁𑌦𑍍𑌧𑌤𑌤𑍍𑌤𑍍𑌵𑌮𑍍 ।
𑌸𑍂𑌕𑍍𑌷𑍍𑌮𑌾𑌂𑌤𑌰𑍈𑌰𑍍𑌯𑍋𑌗𑌪𑌥𑌾𑌨𑍁𑌗𑌮𑍍𑌯𑌂
𑌪𑍁𑌨𑌾𑌤𑍁 𑌮𑌾𑌂 𑌤𑌤𑍍𑌸𑌵𑌿𑌤𑍁𑌰𑍍𑌵𑌰𑍇𑌣𑍍𑌯𑌮𑍍 ॥ 11 ॥

𑌯𑌨𑍍𑌮𑌂𑌡𑌲𑌂 𑌵𑍇𑌦𑌵𑌿𑌦𑍋𑌪𑌗𑍀𑌤𑌂
𑌯𑌦𑍍𑌯𑍋𑌗𑌿𑌨𑌾𑌂 𑌯𑍋𑌗 𑌪𑌥𑌾𑌨𑍁𑌗𑌮𑍍𑌯𑌮𑍍 ।
𑌤𑌤𑍍𑌸𑌰𑍍𑌵 𑌵𑍇𑌦𑍍𑌯𑌂 𑌪𑍍𑌰𑌣𑌮𑌾𑌮𑌿 𑌸𑍂𑌰𑍍𑌯𑌂
𑌪𑍁𑌨𑌾𑌤𑍁 𑌮𑌾𑌂 𑌤𑌤𑍍𑌸𑌵𑌿𑌤𑍁𑌰𑍍𑌵𑌰𑍇𑌣𑍍𑌯𑌮𑍍 ॥ 12 ॥

𑌸𑍂𑌰𑍍𑌯𑌮𑌂𑌡𑌲𑌸𑍁 𑌸𑍍𑌤𑍋𑌤𑍍𑌰𑌂 𑌯𑌃 𑌪𑌠𑍇𑌤𑍍𑌸𑌤𑌤𑌂 𑌨𑌰𑌃 ।
𑌸𑌰𑍍𑌵𑌪𑌾𑌪𑌵𑌿𑌶𑍁𑌦𑍍𑌧𑌾𑌤𑍍𑌮𑌾 𑌸𑍂𑌰𑍍𑌯𑌲𑍋𑌕𑍇 𑌮𑌹𑍀𑌯𑌤𑍇 ॥

𑌇𑌤𑌿 𑌶𑍍𑌰𑍀 𑌭𑌵𑌿𑌷𑍍𑌯𑍋𑌤𑍍𑌤𑌰𑌪𑍁𑌰𑌾𑌣𑍇 𑌶𑍍𑌰𑍀 𑌕𑍃𑌷𑍍𑌣𑌾𑌰𑍍𑌜𑍁𑌨 𑌸𑌂𑌵𑌾𑌦𑍇 𑌸𑍂𑌰𑍍𑌯𑌮𑌂𑌡𑌲 𑌸𑍍𑌤𑍋𑌤𑍍𑌰𑌮𑍍 ।