ಕಲಿತಕನಕಚೇಲಂ ಖಣ್ಡಿತಾಪತ್ಕುಚೇಲಂ
ಗಳಧೃತವನಮಾಲಂ ಗರ್ವಿತಾರಾತಿಕಾಲಮ್ ।
ಕಲಿಮಲಹರಶೀಲಂ ಕಾನ್ತಿಧೂತೇನ್ದ್ರನೀಲಂ
ವಿನಮದವನಶೀಲಂ ವೇಣುಗೋಪಾಲಮೀಡೇ ॥ 1 ॥
ವ್ರಜಯುವತಿವಿಲೋಲಂ ವನ್ದನಾನನ್ದಲೋಲಂ
ಕರಧೃತಗುರುಶೈಲಂ ಕಞ್ಜಗರ್ಭಾದಿಪಾಲಮ್ ।
ಅಭಿಮತಫಲದಾನಂ ಶ್ರೀಜಿತಾಮರ್ತ್ಯಸಾಲಂ
ವಿನಮದವನಶೀಲಂ ವೇಣುಗೋಪಾಲಮೀಡೇ ॥ 2 ॥
ಘನತರಕರುಣಾಶ್ರೀಕಲ್ಪವಲ್ಲ್ಯಾಲವಾಲಂ
ಕಲಶಜಲಧಿಕನ್ಯಾಮೋದಕಶ್ರೀಕಪೋಲಮ್ ।
ಪ್ಲುಷಿತವಿನತಲೋಕಾನನ್ತದುಷ್ಕರ್ಮತೂಲಂ
ವಿನಮದವನಶೀಲಂ ವೇಣುಗೋಪಾಲಮೀಡೇ ॥ 3 ॥
ಶುಭದಸುಗುಣಜಾಲಂ ಸೂರಿಲೋಕಾನುಕೂಲಂ
ದಿತಿಜತತಿಕರಾಲಂ ದಿವ್ಯದಾರಾಯಿತೇಲಮ್ ।
ಮೃದುಮಧುರವಚಃಶ್ರೀ ದೂರಿತಶ್ರೀರಸಾಲಂ
ವಿನಮದವನಶೀಲಂ ವೇಣುಗೋಪಾಲಮೀಡೇ ॥ 4 ॥
ಮೃಗಮದತಿಲಕಶ್ರೀಮೇದುರಸ್ವೀಯಫಾಲಂ
ಜಗದುದಯಲಯಸ್ಥಿತ್ಯಾತ್ಮಕಾತ್ಮೀಯಖೇಲಮ್ ।
ಸಕಲಮುನಿಜನಾಳೀಮಾನಸಾನ್ತರ್ಮರಾಳಂ
ವಿನಮದವನಶೀಲಂ ವೇಣುಗೋಪಾಲಮೀಡೇ ॥ 5 ॥
ಅಸುರಹರಣಖೇಲನಂ ನನ್ದಕೋತ್ಕ್ಷೇಪಲೀಲಂ
ವಿಲಸಿತಶರಕಾಲಂ ವಿಶ್ವಪೂರ್ಣಾನ್ತರಾಳಮ್ ।
ಶುಚಿರುಚಿರಯಶಶ್ಶ್ರೀಧಿಕ್ಕೃತ ಶ್ರೀಮೃಣಾಲಂ
ವಿನಮದವನಶೀಲಂ ವೇಣುಗೋಪಾಲಮೀಡೇ ॥ 6 ॥
ಸ್ವಪರಿಚರಣಲಬ್ಧ ಶ್ರೀಧರಾಶಾಧಿಪಾಲಂ
ಸ್ವಮಹಿಮಲವಲೀಲಾಜಾತವಿಧ್ಯಣ್ಡಗೋಳಮ್ ।
ಗುರುತರಭವದುಃಖಾನೀಕ ವಾಃಪೂರಕೂಲಂ
ವಿನಮದವನಶೀಲಂ ವೇಣುಗೋಪಾಲಮೀಡೇ ॥ 7 ॥
ಚರಣಕಮಲಶೋಭಾಪಾಲಿತ ಶ್ರೀಪ್ರವಾಳಂ
ಸಕಲಸುಕೃತಿರಕ್ಷಾದಕ್ಷಕಾರುಣ್ಯ ಹೇಲಮ್ ।
ರುಚಿವಿಜಿತತಮಾಲಂ ರುಕ್ಮಿಣೀಪುಣ್ಯಮೂಲಂ
ವಿನಮದವನಶೀಲಂ ವೇಣುಗೋಪಾಲಮೀಡೇ ॥ 8 ॥
ಶ್ರೀವೇಣುಗೋಪಾಲ ಕೃಪಾಲವಾಲಾಂ
ಶ್ರೀರುಕ್ಮಿಣೀಲೋಲಸುವರ್ಣಚೇಲಾಮ್ ।
ಕೃತಿಂ ಮಮ ತ್ವಂ ಕೃಪಯಾ ಗೃಹೀತ್ವಾ
ಸ್ರಜಂ ಯಥಾ ಮಾಂ ಕುರು ದುಃಖದೂರಮ್ ॥ 9 ॥
ಇತಿ ಶ್ರೀ ವೇಣುಗೋಪಾಲಾಷ್ಟಕಮ್ ।
