ಶ್ರುತೀನಾಮುತ್ತರಂ ಭಾಗಂ ವೇಗವತ್ಯಾಶ್ಚ ದಕ್ಷಿಣಮ್ ।
ಕಾಮಾದಧಿವಸನ್ ಜೀಯಾತ್ ಕಶ್ಚಿದದ್ಭುತ ಕೇಸರೀ ॥ 1 ॥

ತಪನೇನ್ದ್ವಗ್ನಿನಯನಃ ತಾಪಾನಪಚಿನೋತು ನಃ ।
ತಾಪನೀಯರಹಸ್ಯಾನಾಂ ಸಾರಃ ಕಾಮಾಸಿಕಾ ಹರಿಃ ॥ 2 ॥

ಆಕಣ್ಠಮಾದಿಪುರುಷಂ
ಕಣ್ಠೀರವಮುಪರಿ ಕುಣ್ಠಿತಾರಾತಿಮ್ ।
ವೇಗೋಪಕಣ್ಠಸಙ್ಗಾತ್
ವಿಮುಕ್ತವೈಕುಣ್ಠಬಹುಮತಿಮುಪಾಸೇ ॥ 3 ॥

ಬನ್ಧುಮಖಿಲಸ್ಯ ಜನ್ತೋಃ
ಬನ್ಧುರಪರ್ಯಙ್ಕಬನ್ಧರಮಣೀಯಮ್ ।
ವಿಷಮವಿಲೋಚನಮೀಡೇ
ವೇಗವತೀಪುಳಿನಕೇಳಿನರಸಿಂಹಮ್ ॥ 4 ॥

ಸ್ವಸ್ಥಾನೇಷು ಮರುದ್ಗಣಾನ್ ನಿಯಮಯನ್ ಸ್ವಾಧೀನಸರ್ವೇನ್ದ್ರಿಯಃ
ಪರ್ಯಙ್ಕಸ್ಥಿರಧಾರಣಾ ಪ್ರಕಟಿತಪ್ರತ್ಯಙ್ಮುಖಾವಸ್ಥಿತಿಃ ।
ಪ್ರಾಯೇಣ ಪ್ರಣಿಪೇದುಷಃ ಪ್ರಭುರಸೌ ಯೋಗಂ ನಿಜಂ ಶಿಕ್ಷಯನ್
ಕಾಮಾನಾತನುತಾದಶೇಷಜಗತಾಂ ಕಾಮಾಸಿಕಾ ಕೇಸರೀ ॥ 5 ॥

ವಿಕಸ್ವರನಖಸ್ವರುಕ್ಷತಹಿರಣ್ಯವಕ್ಷಃಸ್ಥಲೀ-
-ನಿರರ್ಗಲವಿನಿರ್ಗಲದ್ರುಧಿರಸಿನ್ಧುಸನ್ಧ್ಯಾಯಿತಾಃ ।
ಅವನ್ತು ಮದನಾಸಿಕಾಮನುಜಪಞ್ಚವಕ್ತ್ರಸ್ಯ ಮಾಂ
ಅಹಮ್ಪ್ರಥಮಿಕಾಮಿಥಃ ಪ್ರಕಟಿತಾಹವಾ ಬಾಹವಃ ॥ 6 ॥

ಸಟಾಪಟಲಭೀಷಣೇ ಸರಭಸಾಟ್ಟಹಾಸೋದ್ಭಟೇ
ಸ್ಫುರತ್ ಕ್ರುಧಿಪರಿಸ್ಫುಟ ಭ್ರುಕುಟಿಕೇಽಪಿ ವಕ್ತ್ರೇ ಕೃತೇ ।
ಕೃಪಾಕಪಟಕೇಸರಿನ್ ದನುಜಡಿಮ್ಭದತ್ತಸ್ತನಾ
ಸರೋಜಸದೃಶಾ ದೃಶಾ ವ್ಯತಿವಿಷಜ್ಯ ತೇ ವ್ಯಜ್ಯತೇ ॥ 7 ॥

ತ್ವಯಿ ರಕ್ಷತಿ ರಕ್ಷಕೈಃ ಕಿಮನ್ಯೈ-
-ಸ್ತ್ವಯಿ ಚಾರಕ್ಷತಿ ರಕ್ಷಕೈಃ ಕಿಮನ್ಯೈಃ ।
ಇತಿ ನಿಶ್ಚಿತಧೀಃ ಶ್ರಯಾಮಿ ನಿತ್ಯಂ
ನೃಹರೇ ವೇಗವತೀತಟಾಶ್ರಯಂ ತ್ವಾಮ್ ॥ 8 ॥

ಇತ್ಥಂ ಸ್ತುತಃ ಸಕೃದಿಹಾಷ್ಟಭಿರೇಷ ಪದ್ಯೈಃ
ಶ್ರೀವೇಙ್ಕಟೇಶರಚಿತೈಸ್ತ್ರಿದಶೇನ್ದ್ರವನ್ದ್ಯಃ ।
ದುರ್ದಾನ್ತಘೋರದುರಿತದ್ವಿರದೇನ್ದ್ರಭೇದೀ
ಕಾಮಾಸಿಕಾನರಹರಿರ್ವಿತನೋತು ಕಾಮಾನ್ ॥ 9 ॥

ಇತಿ ಶ್ರೀವೇದಾನ್ತದೇಶಿಕಕೃತಂ ಕಾಮಾಸಿಕಾಷ್ಟಕಮ್ ।