ಕಣ್ಠೇ ಯಸ್ಯ ಲಸತ್ಕರಾಲಗರಲಂ ಗಙ್ಗಾಜಲಂ ಮಸ್ತಕೇ
ವಾಮಾಙ್ಗೇ ಗಿರಿರಾಜರಾಜತನಯಾ ಜಾಯಾ ಭವಾನೀ ಸತೀ ।
ನನ್ದಿಸ್ಕನ್ದಗಣಾಧಿರಾಜಸಹಿತಾ ಶ್ರೀವಿಶ್ವನಾಥಪ್ರಭುಃ
ಕಾಶೀಮನ್ದಿರಸಂಸ್ಥಿತೋಽಖಿಲಗುರುರ್ದೇಯಾತ್ಸದಾ ಮಙ್ಗಲಮ್ ॥ 1॥

ಯೋ ದೇವೈರಸುರೈರ್ಮುನೀನ್ದ್ರತನಯೈರ್ಗನ್ಧರ್ವಯಕ್ಷೋರಗೈ-
ರ್ನಾಗೈರ್ಭೂತಲವಾಸಿಭಿರ್ದ್ವಿಜವರೈಃ ಸಂಸೇವಿತಃ ಸಿದ್ಧಯೇ ।
ಯಾ ಗಙ್ಗೋತ್ತರವಾಹಿನೀ ಪರಿಸರೇ ತೀರ್ಥೇರಸಙ್ಖ್ಯೈರ್ವೃತಾ
ಸಾ ಕಾಶೀ ತ್ರಿಪುರಾರಿರಾಜನಗರೀ ದೇಯಾತ್ಸದಾ ಮಙ್ಗಲಮ್ ॥ 2॥

ತೀರ್ಥಾನಾಂ ಪ್ರವರಾ ಮನೋರಥಕರೀ ಸಂಸಾರಪಾರಾಪರಾ-
ನನ್ದಾ ನನ್ದಿಗಣೇಶ್ವರೈರುಪಹಿತಾ ದೇವೈರಶೇಷೈಃ ಸ್ತುತಾ ।
ಯಾ ಶಮ್ಭೋರ್ಮಣಿಕುಣ್ಡಲೈಕಕಣಿಕಾ ವಿಷ್ಣೋಸ್ತಪೋದೀರ್ಘಿಕಾ
ಸೇಯಂ ಶ್ರೀಮಣಿಕರ್ಣಿಕಾ ಭಗವತೀ ದೇಯಾತ್ಸದಾ ಮಙ್ಗಲಮ್ ॥ 3॥

ಏಷಾ ಧರ್ಮಪತಾಕಿನೀ ತಟರುಹಾಸೇವಾವಸನ್ನಾಕಿನೀ
ಪಶ್ಯನ್ಪಾತಕಿನೀ ಭಗೀರಥತಪಃಸಾಫಲ್ಯದೇವಾಕಿನೀ ।
ಪ್ರೇಮಾರೂಢಪತಾಕಿನೀ ಗಿರಿಸುತಾ ಸಾ ಕೇಕರಾಸ್ವಾಕಿನೀ
ಕಾಶ್ಯಾಮುತ್ತರವಾಹಿನೀ ಸುರನದೀ ದೇಯಾತ್ಸದಾ ಮಙ್ಗಲಮ್ ॥ 4॥

ವಿಘ್ನಾವಾಸನಿವಾಸಕಾರಣಮಹಾಗಣ್ಡಸ್ಥಲಾಲಮ್ಬಿತಃ
ಸಿನ್ದೂರಾರುಣಪುಞ್ಜಚನ್ದ್ರಕಿರಣಪ್ರಚ್ಛಾದಿನಾಗಚ್ಛವಿಃ ।
ಶ್ರೀವಿಶ್ವೇಶ್ವರವಲ್ಲಭೋ ಗಿರಿಜಯಾ ಸಾನನ್ದಕಾನನ್ದಿತಃ
ಸ್ಮೇರಾಸ್ಯಸ್ತವ ಢುಣ್ಢಿರಾಜಮುದಿತೋ ದೇಯಾತ್ಸದಾ ಮಙ್ಗಲಮ್ ॥। 5॥ ।
ಕೇದಾರಃ ಕಲಶೇಶ್ವರಃ ಪಶುಪತಿರ್ಧರ್ಮೇಶ್ವರೋ ಮಧ್ಯಮೋ
ಜ್ಯೇಷ್ಠೇಶೋ ಪಶುಪಶ್ಚ ಕನ್ದುಕಶಿವೋ ವಿಘ್ನೇಶ್ವರೋ ಜಮ್ಬುಕಃ ।
ಚನ್ದ್ರೇಶೋ ಹ್ಯಮೃತೇಶ್ವರೋ ಭೃಗುಶಿವಃ ಶ್ರೀವೃದ್ಧಕಾಲೇಶ್ವರೋ
ಮಧ್ಯೇಶೋ ಮಣಿಕರ್ಣಿಕೇಶ್ವರಶಿವೋ ದೇಯಾತ್ಸದಾ ಮಙ್ಗಲಮ್ ॥ 6॥

ಗೋಕರ್ಣಸ್ತ್ವಥ ಭಾರಭೂತನುದನುಃ ಶ್ರೀಚಿತ್ರಗುಪ್ತೇಶ್ವರೋ
ಯಕ್ಷೇಶಸ್ತಿಲಪರ್ಣಸಙ್ಗಮಶಿವೋ ಶೈಲೇಶ್ವರಃ ಕಶ್ಯಪಃ ।
ನಾಗೇಶೋಽಗ್ನಿಶಿವೋ ನಿಧೀಶ್ವರಶಿವೋಽಗಸ್ತೀಶ್ವರಸ್ತಾರಕ-
ಜ್ಞಾನೇಶೋಽಪಿ ಪಿತಾಮಹೇಶ್ವರಶಿವೋ ದೇಯಾತ್ಸದಾ ಮಙ್ಗಲಮ್ ॥ 7॥

ಬ್ರಹ್ಮಾಣ್ಡಂ ಸಕಲಂ ಮನೋಷಿತರಸೈ ರತ್ನೈಃ ಪಯೋಭಿರ್ಹರಂ
ಖೇಲೈಃ ಪೂರಯತೇ ಕುಟುಮ್ಬನಿಲಯಾನ್ ಶಮ್ಭೋರ್ವಿಲಾಸಪ್ರದಾ ।
ನಾನಾದಿವ್ಯಲತಾವಿಭೂಷಿತವಪುಃ ಕಾಶೀಪುರಾಧೀಶ್ವರೀ
ಶ್ರೀವಿಶ್ವೇಶ್ವರಸುನ್ದರೀ ಭಗವತೀ ದೇಯಾತ್ಸದಾ ಮಙ್ಗಲಮ್ ॥ 8॥

ಯಾ ದೇವೀ ಮಹಿಷಾಸುರಪ್ರಮಥನೀ ಯಾ ಚಣ್ಡಮುಣ್ಡಾಪಹಾ
ಯಾ ಶುಮ್ಭಾಸುರರಕ್ತಬೀಜದಮನೀ ಶಕ್ರಾದಿಭಿಃ ಸಂಸ್ತುತಾ ।
ಯಾ ಶೂಲಾಸಿಧನುಃಶರಾಭಯಕರಾ ದುರ್ಗಾದಿಸನ್ದಕ್ಷಿಣಾ-
ಮಾಶ್ರಿತ್ಯಾಶ್ರಿತವಿಘ್ನಶಂಸಮಯತು ದೇಯಾತ್ಸದಾ ಮಙ್ಗಲಮ್ ॥ 9॥

ಆದ್ಯಾ ಶ್ರೀರ್ವಿಕಟಾ ತತಸ್ತು ವಿರಜಾ ಶ್ರೀಮಙ್ಗಲಾ ಪಾರ್ವತೀ
ವಿಖ್ಯಾತಾ ಕಮಲಾ ವಿಶಾಲನಯನಾ ಜ್ಯೇಷ್ಠಾ ವಿಶಿಷ್ಟಾನನಾ ।
ಕಾಮಾಕ್ಷೀ ಚ ಹರಿಪ್ರಿಯಾ ಭಗವತೀ ಶ್ರೀಘಣ್ಟಘಣ್ಟಾದಿಕಾ
ಮೌರ್ಯಾ ಷಷ್ಟಿಸಹಸ್ರಮಾತೃಸಹಿತಾ ದೇಯಾತ್ಸದಾ ಮಙ್ಗಲಮ್ ॥ 10॥

ಆದೌ ಪಞ್ಚನದಂ ಪ್ರಯಾಗಮಪರಂ ಕೇದಾರಕುಣ್ಡಂ ಕುರು-
ಕ್ಷೇತ್ರಂ ಮಾನಸಕಂ ಸರೋಽಮೃತಜಲಂ ಶಾವಸ್ಯ ತೀರ್ಥಂ ಪರಮ್ ।
ಮತ್ಸ್ಯೋದರ್ಯಥ ದಣ್ಡಖಾಣ್ಡಸಲಿಲಂ ಮನ್ದಾಕಿನೀ ಜಮ್ಬುಕಂ
ಘಣ್ಟಾಕರ್ಣಸಮುದ್ರಕೂಪಸಹಿತೋ ದೇಯಾತ್ಸದಾ ಮಙ್ಗಲಮ್ ॥ 11॥

ರೇವಾಕುಣ್ಡಜಲಂ ಸರಸ್ವತಿಜಲಂ ದುರ್ವಾಸಕುಣ್ಡಂ ತತೋ
ಲಕ್ಷ್ಮೀತೀರ್ಥಲವಾಙ್ಕುಶಸ್ಯ ಸಲಿಲಂ ಕನ್ದರ್ಪಕುಣ್ಡಂ ತಥಾ ।
ದುರ್ಗಾಕುಣ್ಡಮಸೀಜಲಂ ಹನುಮತಃ ಕುಣ್ಡಪ್ರತಾಪೋರ್ಜಿತಃ
ಪ್ರಜ್ಞಾನಪ್ರಮುಖಾನಿ ವಃ ಪ್ರತಿದಿನಂ ದೇಯಾತ್ಸದಾ ಮಙ್ಗಲಮ್ ॥ 12॥

ಆದ್ಯಃ ಕೂಪವರಸ್ತು ಕಾಲದಮನಃ ಶ್ರೀವೃದ್ಧಕೂಪೋಽಪರೋ
ವಿಖ್ಯಾತಸ್ತು ಪರಾಶರಸ್ತು ವಿದಿತಃ ಕೂಪಃ ಸರೋ ಮಾನಸಃ ।
ಜೈಗೀಷವ್ಯಮುನೇಃ ಶಶಾಙ್ಕನೃಪತೇಃ ಕೂಪಸ್ತು ಧರ್ಮೋದ್ಭವಃ
ಖ್ಯಾತಃ ಸಪ್ತಸಮುದ್ರಕೂಪಸಹಿತೋ ದೇಯಾತ್ಸದಾ ಮಙ್ಗಲಮ್ ॥ 13॥

ಲಕ್ಷ್ಯೀನಾಯಕಬಿನ್ದುಮಾಧವಹರಿರ್ಲಕ್ಷ್ಮೀನೃಸಿಂಹಸ್ತತೋ
ಗೋವಿನ್ದಸ್ತ್ವಥ ಗೋಪಿಕಾಪ್ರಿಯತಮಃ ಶ್ರೀನಾರದಃ ಕೇಶವಃ ।
ಗಙ್ಗಾಕೇಶವವಾಮನಾಖ್ಯತದನು ಶ್ವೇತೋ ಹರಿಃ ಕೇಶವಃ
ಪ್ರಹ್ಲಾದಾದಿಸಮಸ್ತಕೇಶವಗಣೋ ದೇಯಾತ್ಸದಾ ಮಙ್ಗಲಮ್ ॥ 14॥

ಲೋಲಾರ್ಕೋ ವಿಮಲಾರ್ಕಮಾಯುಖರವಿಃ ಸಂವರ್ತಸಞ್ಜ್ಞೋ ರವಿ-
ರ್ವಿಖ್ಯಾತೋ ದ್ರುಪದುಃಖಖೋಲ್ಕಮರುಣಃ ಪ್ರೋಕ್ತೋತ್ತರಾರ್ಕೋ ರವಿಃ ।
ಗಙ್ಗಾರ್ಕಸ್ತ್ವಥ ವೃದ್ಧವೃದ್ಧಿವಿಬುಧಾ ಕಾಶೀಪುರೀಸಂಸ್ಥಿತಾಃ
ಸೂರ್ಯಾ ದ್ವಾದಶಸಞ್ಜ್ಞಕಾಃ ಪ್ರತಿದಿನಂ ದೇಯಾತ್ಸದಾ ಮಙ್ಗಲಮ್ ॥ 15॥

ಆದ್ಯೋ ಢುಣ್ಢಿವಿನಾಯಕೋ ಗಣಪತಿಶ್ಚಿನ್ತಾಮಣಿಃ ಸಿದ್ಧಿದಃ
ಸೇನಾವಿಘ್ನಪತಿಸ್ತು ವಕ್ತ್ರವದನಃ ಶ್ರೀಪಾಶಪಾಣಿಃ ಪ್ರಭುಃ ।
ಆಶಾಪಕ್ಷವಿನಾಯಕಾಪ್ರಷಕರೋ ಮೋದಾದಿಕಃ ಷಡ್ಗುಣೋ
ಲೋಲಾರ್ಕಾದಿವಿನಾಯಕಾಃ ಪ್ರತಿದಿನಂ ದೇಯಾತ್ಸದಾ ಮಙ್ಗಲಮ್ ॥ 16॥।

ಹೇರಮ್ಬೋ ನಲಕೂಬರೋ ಗಣಪತಿಃ ಶ್ರೀಭೀಮಚಣ್ಡೀಗಣೋ
ವಿಖ್ಯಾತೋ ಮಣಿಕರ್ಣಿಕಾಗಣಪತಿಃ ಶ್ರೀಸಿದ್ಧಿದೋ ವಿಘ್ನಪಃ ।
ಮುಣ್ಡಶ್ಚಣ್ಡಮುಖಶ್ಚ ಕಷ್ಟಹರಣಃ ಶ್ರೀದಣ್ಡಹಸ್ತೋ ಗಣಃ
ಶ್ರೀದುರ್ಗಾಖ್ಯಗಣಾಧಿಪಃ ಪ್ರತಿದಿನಂ ದೇಯಾತ್ಸದಾ ಮಙ್ಗಲಮ್ ॥ 17॥

ಆದ್ಯೋ ಭೈರವಭೀಷಣಸ್ತದಪರಃ ಶ್ರೀಕಾಲರಾಜಃ ಕ್ರಮಾ-
ಚ್ಛ್ರೀಸಂಹಾರಕಭೈರವಸ್ತ್ವಥ ರುರುಶ್ಚೋನ್ಮತ್ತಕೋ ಭೈರವಃ ।
ಕ್ರೋಧಶ್ಚಣ್ಡಕಪಾಲಭೈರವವರಃ ಶ್ರೀಭೂತನಾಥಾದಯೋ
ಹ್ಯಷ್ಟೌ ಭೈರವಮೂರ್ತಯಃ ಪ್ರತಿದಿನಂ ದೇಯಾತ್ಸದಾ ಮಙ್ಗಲಮ್ ॥ 18॥

ಆಧಾತೋಽಮ್ಬಿಕಯಾ ಸಹ ತ್ರಿನಯನಃ ಸಾರ್ಧಂ ಗಣೈರ್ನನ್ದಿತಾಂ
ಕಾಶೀಮಾಶು ವಿಶನ್ ಹರಃ ಪ್ರಥಮತೋ ವಾರ್ಷಧ್ವಜೇಽವಸ್ಥಿತಃ ।
ಆಯಾತಾ ದಶ ಧೇನವಃ ಸುಕಪಿಲಾ ದಿವ್ಯೈಃ ಪಯೋಭಿರ್ಹರಂ
ಖ್ಯಾತಂ ತದ್ವೃಷಭಧ್ವಜೇನ ಕಪಿಲಂ ದೇಯಾತ್ಸದಾ ಮಙ್ಗಲಮ್ ॥ 19॥

ಆನನ್ದಾಖ್ಯವನಂ ಹಿ ಚಮ್ಪಕವನಂ ಶ್ರೀನೈಮಿಷಂ ಖಾಣ್ಡವಂ
ಪುಣ್ಯಂ ಚೈತ್ರರಥಂ ತ್ವಶಾಕವಿಪಿನಂ ರಮ್ಭಾವನಂ ಪಾವನಮ್ ।
ದುರ್ಗಾರಣ್ಯಮಥೋಽಪಿ ಕೈರವವನಂ ವೃನ್ದಾವನಂ ಪಾವನಂ
ವಿಖ್ಯಾತಾನಿ ವನಾನಿ ವಃ ಪ್ರತಿದಿನಂ ದೇಯಾತ್ಸದಾ ಮಙ್ಗಲಮ್ ॥ 20॥

ಅಲಿಕುಲದಲನೀಲಃ ಕಾಲದಂಷ್ಟ್ರಾಕರಾಲಃ
ಸಜಲಜಲದನೀಲೋ ವ್ಯಾಲಯಜ್ಞೋಪವೀತಃ ।
ಅಭಯವರದಹಸ್ತೋ ಡಾಮರೋದ್ದಾಮನಾದಃ
ಸಕಲದುರಿತಭಕ್ಷೋ ಮಙ್ಗಲಂ ವೋ ದದಾತು ॥ 21॥

ಅರ್ಧಾಙ್ಗೇ ವಿಕಟಾ ಗಿರೀನ್ದ್ರತನಯಾ ಗೌರೀ ಸತೀ ಸುನ್ದರೀ
ಸರ್ವಾಙ್ಗೇ ವಿಲಸದ್ವಿಭೂತಿಧವಲೋ ಕಾಲೋ ವಿಶಾಲೇಕ್ಷಣಃ ।
ವೀರೇಶಃ ಸಹನನ್ದಿಭೃಙ್ಗಿಸಹಿತಃ ಶ್ರೀವಿಶ್ವನಾಥಃ ಪ್ರಭುಃ
ಕಾಶೀಮನ್ದಿರಸಂಸ್ಥಿತೋಽಖಿಲಗುರುರ್ದೇಯಾತ್ಸದಾ ಮಙ್ಗಲಮ್ ॥ 22॥

ಯಃ ಪ್ರಾತಃ ಪ್ರಯತಃ ಪ್ರಸನ್ನಮನಸಾ ಪ್ರೇಮಪ್ರಮೋದಾಕುಲಃ
ಖ್ಯಾತಂ ತತ್ರ ವಿಶಿಷ್ಟಪಾದಭುವನೇಶೇನ್ದ್ರಾದಿಭಿರ್ಯತ್ಸ್ತುತಮ್ ।
ಪ್ರಾತಃ ಪ್ರಾಙ್ಮುಖಮಾಸನೋತ್ತಮಗತೋ ಬ್ರೂಯಾಚ್ಛೃಣೋತ್ಯಾದರಾತ್
ಕಾಶೀವಾಸಮುಖಾನ್ಯವಾಪ್ಯ ಸತತಂ ಪ್ರೀತೇ ಶಿವೇ ಧೂರ್ಜಟಿ ॥ 23॥

ಇತಿ ಶ್ರೀಮಚ್ಛಙ್ಕರಾಚಾರ್ಯವಿರಚಿತಂ ಕಾಶೀವಿಶ್ವನಾಥಸ್ತೋತ್ರಮ್ ॥