𑌕𑌂𑌠𑍇 𑌯𑌸𑍍𑌯 𑌲𑌸𑌤𑍍𑌕𑌰𑌾𑌲𑌗𑌰𑌲𑌂 𑌗𑌂𑌗𑌾𑌜𑌲𑌂 𑌮𑌸𑍍𑌤𑌕𑍇
𑌵𑌾𑌮𑌾𑌂𑌗𑍇 𑌗𑌿𑌰𑌿𑌰𑌾𑌜𑌰𑌾𑌜𑌤𑌨𑌯𑌾 𑌜𑌾𑌯𑌾 𑌭𑌵𑌾𑌨𑍀 𑌸𑌤𑍀 ।
𑌨𑌂𑌦𑌿𑌸𑍍𑌕𑌂𑌦𑌗𑌣𑌾𑌧𑌿𑌰𑌾𑌜𑌸𑌹𑌿𑌤𑌾 𑌶𑍍𑌰𑍀𑌵𑌿𑌶𑍍𑌵𑌨𑌾𑌥𑌪𑍍𑌰𑌭𑍁𑌃
𑌕𑌾𑌶𑍀𑌮𑌂𑌦𑌿𑌰𑌸𑌂𑌸𑍍𑌥𑌿𑌤𑍋𑌽𑌖𑌿𑌲𑌗𑍁𑌰𑍁𑌰𑍍𑌦𑍇𑌯𑌾𑌤𑍍𑌸𑌦𑌾 𑌮𑌂𑌗𑌲𑌮𑍍 ॥ 1॥

𑌯𑍋 𑌦𑍇𑌵𑍈𑌰𑌸𑍁𑌰𑍈𑌰𑍍𑌮𑍁𑌨𑍀𑌂𑌦𑍍𑌰𑌤𑌨𑌯𑍈𑌰𑍍𑌗𑌂𑌧𑌰𑍍𑌵𑌯𑌕𑍍𑌷𑍋𑌰𑌗𑍈-
𑌰𑍍𑌨𑌾𑌗𑍈𑌰𑍍𑌭𑍂𑌤𑌲𑌵𑌾𑌸𑌿𑌭𑌿𑌰𑍍𑌦𑍍𑌵𑌿𑌜𑌵𑌰𑍈𑌃 𑌸𑌂𑌸𑍇𑌵𑌿𑌤𑌃 𑌸𑌿𑌦𑍍𑌧𑌯𑍇 ।
𑌯𑌾 𑌗𑌂𑌗𑍋𑌤𑍍𑌤𑌰𑌵𑌾𑌹𑌿𑌨𑍀 𑌪𑌰𑌿𑌸𑌰𑍇 𑌤𑍀𑌰𑍍𑌥𑍇𑌰𑌸𑌂𑌖𑍍𑌯𑍈𑌰𑍍𑌵𑍃𑌤𑌾
𑌸𑌾 𑌕𑌾𑌶𑍀 𑌤𑍍𑌰𑌿𑌪𑍁𑌰𑌾𑌰𑌿𑌰𑌾𑌜𑌨𑌗𑌰𑍀 𑌦𑍇𑌯𑌾𑌤𑍍𑌸𑌦𑌾 𑌮𑌂𑌗𑌲𑌮𑍍 ॥ 2॥

𑌤𑍀𑌰𑍍𑌥𑌾𑌨𑌾𑌂 𑌪𑍍𑌰𑌵𑌰𑌾 𑌮𑌨𑍋𑌰𑌥𑌕𑌰𑍀 𑌸𑌂𑌸𑌾𑌰𑌪𑌾𑌰𑌾𑌪𑌰𑌾-
𑌨𑌂𑌦𑌾 𑌨𑌂𑌦𑌿𑌗𑌣𑍇𑌶𑍍𑌵𑌰𑍈𑌰𑍁𑌪𑌹𑌿𑌤𑌾 𑌦𑍇𑌵𑍈𑌰𑌶𑍇𑌷𑍈𑌃 𑌸𑍍𑌤𑍁𑌤𑌾 ।
𑌯𑌾 𑌶𑌂𑌭𑍋𑌰𑍍𑌮𑌣𑌿𑌕𑍁𑌂𑌡𑌲𑍈𑌕𑌕𑌣𑌿𑌕𑌾 𑌵𑌿𑌷𑍍𑌣𑍋𑌸𑍍𑌤𑌪𑍋𑌦𑍀𑌰𑍍𑌘𑌿𑌕𑌾
𑌸𑍇𑌯𑌂 𑌶𑍍𑌰𑍀𑌮𑌣𑌿𑌕𑌰𑍍𑌣𑌿𑌕𑌾 𑌭𑌗𑌵𑌤𑍀 𑌦𑍇𑌯𑌾𑌤𑍍𑌸𑌦𑌾 𑌮𑌂𑌗𑌲𑌮𑍍 ॥ 3॥

𑌏𑌷𑌾 𑌧𑌰𑍍𑌮𑌪𑌤𑌾𑌕𑌿𑌨𑍀 𑌤𑌟𑌰𑍁𑌹𑌾𑌸𑍇𑌵𑌾𑌵𑌸𑌨𑍍𑌨𑌾𑌕𑌿𑌨𑍀
𑌪𑌶𑍍𑌯𑌨𑍍𑌪𑌾𑌤𑌕𑌿𑌨𑍀 𑌭𑌗𑍀𑌰𑌥𑌤𑌪𑌃𑌸𑌾𑌫𑌲𑍍𑌯𑌦𑍇𑌵𑌾𑌕𑌿𑌨𑍀 ।
𑌪𑍍𑌰𑍇𑌮𑌾𑌰𑍂𑌢𑌪𑌤𑌾𑌕𑌿𑌨𑍀 𑌗𑌿𑌰𑌿𑌸𑍁𑌤𑌾 𑌸𑌾 𑌕𑍇𑌕𑌰𑌾𑌸𑍍𑌵𑌾𑌕𑌿𑌨𑍀
𑌕𑌾𑌶𑍍𑌯𑌾𑌮𑍁𑌤𑍍𑌤𑌰𑌵𑌾𑌹𑌿𑌨𑍀 𑌸𑍁𑌰𑌨𑌦𑍀 𑌦𑍇𑌯𑌾𑌤𑍍𑌸𑌦𑌾 𑌮𑌂𑌗𑌲𑌮𑍍 ॥ 4॥

𑌵𑌿𑌘𑍍𑌨𑌾𑌵𑌾𑌸𑌨𑌿𑌵𑌾𑌸𑌕𑌾𑌰𑌣𑌮𑌹𑌾𑌗𑌂𑌡𑌸𑍍𑌥𑌲𑌾𑌲𑌂𑌬𑌿𑌤𑌃
𑌸𑌿𑌂𑌦𑍂𑌰𑌾𑌰𑍁𑌣𑌪𑍁𑌂𑌜𑌚𑌂𑌦𑍍𑌰𑌕𑌿𑌰𑌣𑌪𑍍𑌰𑌚𑍍𑌛𑌾𑌦𑌿𑌨𑌾𑌗𑌚𑍍𑌛𑌵𑌿𑌃 ।
𑌶𑍍𑌰𑍀𑌵𑌿𑌶𑍍𑌵𑍇𑌶𑍍𑌵𑌰𑌵𑌲𑍍𑌲𑌭𑍋 𑌗𑌿𑌰𑌿𑌜𑌯𑌾 𑌸𑌾𑌨𑌂𑌦𑌕𑌾𑌨𑌂𑌦𑌿𑌤𑌃
𑌸𑍍𑌮𑍇𑌰𑌾𑌸𑍍𑌯𑌸𑍍𑌤𑌵 𑌢𑍁𑌂𑌢𑌿𑌰𑌾𑌜𑌮𑍁𑌦𑌿𑌤𑍋 𑌦𑍇𑌯𑌾𑌤𑍍𑌸𑌦𑌾 𑌮𑌂𑌗𑌲𑌮𑍍 ॥। 5॥ ।
𑌕𑍇𑌦𑌾𑌰𑌃 𑌕𑌲𑌶𑍇𑌶𑍍𑌵𑌰𑌃 𑌪𑌶𑍁𑌪𑌤𑌿𑌰𑍍𑌧𑌰𑍍𑌮𑍇𑌶𑍍𑌵𑌰𑍋 𑌮𑌧𑍍𑌯𑌮𑍋
𑌜𑍍𑌯𑍇𑌷𑍍𑌠𑍇𑌶𑍋 𑌪𑌶𑍁𑌪𑌶𑍍𑌚 𑌕𑌂𑌦𑍁𑌕𑌶𑌿𑌵𑍋 𑌵𑌿𑌘𑍍𑌨𑍇𑌶𑍍𑌵𑌰𑍋 𑌜𑌂𑌬𑍁𑌕𑌃 ।
𑌚𑌂𑌦𑍍𑌰𑍇𑌶𑍋 𑌹𑍍𑌯𑌮𑍃𑌤𑍇𑌶𑍍𑌵𑌰𑍋 𑌭𑍃𑌗𑍁𑌶𑌿𑌵𑌃 𑌶𑍍𑌰𑍀𑌵𑍃𑌦𑍍𑌧𑌕𑌾𑌲𑍇𑌶𑍍𑌵𑌰𑍋
𑌮𑌧𑍍𑌯𑍇𑌶𑍋 𑌮𑌣𑌿𑌕𑌰𑍍𑌣𑌿𑌕𑍇𑌶𑍍𑌵𑌰𑌶𑌿𑌵𑍋 𑌦𑍇𑌯𑌾𑌤𑍍𑌸𑌦𑌾 𑌮𑌂𑌗𑌲𑌮𑍍 ॥ 6॥

𑌗𑍋𑌕𑌰𑍍𑌣𑌸𑍍𑌤𑍍𑌵𑌥 𑌭𑌾𑌰𑌭𑍂𑌤𑌨𑍁𑌦𑌨𑍁𑌃 𑌶𑍍𑌰𑍀𑌚𑌿𑌤𑍍𑌰𑌗𑍁𑌪𑍍𑌤𑍇𑌶𑍍𑌵𑌰𑍋
𑌯𑌕𑍍𑌷𑍇𑌶𑌸𑍍𑌤𑌿𑌲𑌪𑌰𑍍𑌣𑌸𑌂𑌗𑌮𑌶𑌿𑌵𑍋 𑌶𑍈𑌲𑍇𑌶𑍍𑌵𑌰𑌃 𑌕𑌶𑍍𑌯𑌪𑌃 ।
𑌨𑌾𑌗𑍇𑌶𑍋𑌽𑌗𑍍𑌨𑌿𑌶𑌿𑌵𑍋 𑌨𑌿𑌧𑍀𑌶𑍍𑌵𑌰𑌶𑌿𑌵𑍋𑌽𑌗𑌸𑍍𑌤𑍀𑌶𑍍𑌵𑌰𑌸𑍍𑌤𑌾𑌰𑌕-
𑌜𑍍𑌞𑌾𑌨𑍇𑌶𑍋𑌽𑌪𑌿 𑌪𑌿𑌤𑌾𑌮𑌹𑍇𑌶𑍍𑌵𑌰𑌶𑌿𑌵𑍋 𑌦𑍇𑌯𑌾𑌤𑍍𑌸𑌦𑌾 𑌮𑌂𑌗𑌲𑌮𑍍 ॥ 𑍭॥

𑌬𑍍𑌰𑌹𑍍𑌮𑌾𑌂𑌡𑌂 𑌸𑌕𑌲𑌂 𑌮𑌨𑍋𑌷𑌿𑌤𑌰𑌸𑍈 𑌰𑌤𑍍𑌨𑍈𑌃 𑌪𑌯𑍋𑌭𑌿𑌰𑍍𑌹𑌰𑌂
𑌖𑍇𑌲𑍈𑌃 𑌪𑍂𑌰𑌯𑌤𑍇 𑌕𑍁𑌟𑍁𑌂𑌬𑌨𑌿𑌲𑌯𑌾𑌨𑍍 𑌶𑌂𑌭𑍋𑌰𑍍𑌵𑌿𑌲𑌾𑌸𑌪𑍍𑌰𑌦𑌾 ।
𑌨𑌾𑌨𑌾𑌦𑌿𑌵𑍍𑌯𑌲𑌤𑌾𑌵𑌿𑌭𑍂𑌷𑌿𑌤𑌵𑌪𑍁𑌃 𑌕𑌾𑌶𑍀𑌪𑍁𑌰𑌾𑌧𑍀𑌶𑍍𑌵𑌰𑍀
𑌶𑍍𑌰𑍀𑌵𑌿𑌶𑍍𑌵𑍇𑌶𑍍𑌵𑌰𑌸𑍁𑌂𑌦𑌰𑍀 𑌭𑌗𑌵𑌤𑍀 𑌦𑍇𑌯𑌾𑌤𑍍𑌸𑌦𑌾 𑌮𑌂𑌗𑌲𑌮𑍍 ॥ 𑍮॥

𑌯𑌾 𑌦𑍇𑌵𑍀 𑌮𑌹𑌿𑌷𑌾𑌸𑍁𑌰𑌪𑍍𑌰𑌮𑌥𑌨𑍀 𑌯𑌾 𑌚𑌂𑌡𑌮𑍁𑌂𑌡𑌾𑌪𑌹𑌾
𑌯𑌾 𑌶𑍁𑌂𑌭𑌾𑌸𑍁𑌰𑌰𑌕𑍍𑌤𑌬𑍀𑌜𑌦𑌮𑌨𑍀 𑌶𑌕𑍍𑌰𑌾𑌦𑌿𑌭𑌿𑌃 𑌸𑌂𑌸𑍍𑌤𑍁𑌤𑌾 ।
𑌯𑌾 𑌶𑍂𑌲𑌾𑌸𑌿𑌧𑌨𑍁𑌃𑌶𑌰𑌾𑌭𑌯𑌕𑌰𑌾 𑌦𑍁𑌰𑍍𑌗𑌾𑌦𑌿𑌸𑌂𑌦𑌕𑍍𑌷𑌿𑌣𑌾-
𑌮𑌾𑌶𑍍𑌰𑌿𑌤𑍍𑌯𑌾𑌶𑍍𑌰𑌿𑌤𑌵𑌿𑌘𑍍𑌨𑌶𑌂𑌸𑌮𑌯𑌤𑍁 𑌦𑍇𑌯𑌾𑌤𑍍𑌸𑌦𑌾 𑌮𑌂𑌗𑌲𑌮𑍍 ॥ 𑍯॥

𑌆𑌦𑍍𑌯𑌾 𑌶𑍍𑌰𑍀𑌰𑍍𑌵𑌿𑌕𑌟𑌾 𑌤𑌤𑌸𑍍𑌤𑍁 𑌵𑌿𑌰𑌜𑌾 𑌶𑍍𑌰𑍀𑌮𑌂𑌗𑌲𑌾 𑌪𑌾𑌰𑍍𑌵𑌤𑍀
𑌵𑌿𑌖𑍍𑌯𑌾𑌤𑌾 𑌕𑌮𑌲𑌾 𑌵𑌿𑌶𑌾𑌲𑌨𑌯𑌨𑌾 𑌜𑍍𑌯𑍇𑌷𑍍𑌠𑌾 𑌵𑌿𑌶𑌿𑌷𑍍𑌟𑌾𑌨𑌨𑌾 ।
𑌕𑌾𑌮𑌾𑌕𑍍𑌷𑍀 𑌚 𑌹𑌰𑌿𑌪𑍍𑌰𑌿𑌯𑌾 𑌭𑌗𑌵𑌤𑍀 𑌶𑍍𑌰𑍀𑌘𑌂𑌟𑌘𑌂𑌟𑌾𑌦𑌿𑌕𑌾
𑌮𑍌𑌰𑍍𑌯𑌾 𑌷𑌷𑍍𑌟𑌿𑌸𑌹𑌸𑍍𑌰𑌮𑌾𑌤𑍃𑌸𑌹𑌿𑌤𑌾 𑌦𑍇𑌯𑌾𑌤𑍍𑌸𑌦𑌾 𑌮𑌂𑌗𑌲𑌮𑍍 ॥ 10॥

𑌆𑌦𑍌 𑌪𑌂𑌚𑌨𑌦𑌂 𑌪𑍍𑌰𑌯𑌾𑌗𑌮𑌪𑌰𑌂 𑌕𑍇𑌦𑌾𑌰𑌕𑍁𑌂𑌡𑌂 𑌕𑍁𑌰𑍁-
𑌕𑍍𑌷𑍇𑌤𑍍𑌰𑌂 𑌮𑌾𑌨𑌸𑌕𑌂 𑌸𑌰𑍋𑌽𑌮𑍃𑌤𑌜𑌲𑌂 𑌶𑌾𑌵𑌸𑍍𑌯 𑌤𑍀𑌰𑍍𑌥𑌂 𑌪𑌰𑌮𑍍 ।
𑌮𑌤𑍍𑌸𑍍𑌯𑍋𑌦𑌰𑍍𑌯𑌥 𑌦𑌂𑌡𑌖𑌾𑌂𑌡𑌸𑌲𑌿𑌲𑌂 𑌮𑌂𑌦𑌾𑌕𑌿𑌨𑍀 𑌜𑌂𑌬𑍁𑌕𑌂
𑌘𑌂𑌟𑌾𑌕𑌰𑍍𑌣𑌸𑌮𑍁𑌦𑍍𑌰𑌕𑍂𑌪𑌸𑌹𑌿𑌤𑍋 𑌦𑍇𑌯𑌾𑌤𑍍𑌸𑌦𑌾 𑌮𑌂𑌗𑌲𑌮𑍍 ॥ 11॥

𑌰𑍇𑌵𑌾𑌕𑍁𑌂𑌡𑌜𑌲𑌂 𑌸𑌰𑌸𑍍𑌵𑌤𑌿𑌜𑌲𑌂 𑌦𑍁𑌰𑍍𑌵𑌾𑌸𑌕𑍁𑌂𑌡𑌂 𑌤𑌤𑍋
𑌲𑌕𑍍𑌷𑍍𑌮𑍀𑌤𑍀𑌰𑍍𑌥𑌲𑌵𑌾𑌂𑌕𑍁𑌶𑌸𑍍𑌯 𑌸𑌲𑌿𑌲𑌂 𑌕𑌂𑌦𑌰𑍍𑌪𑌕𑍁𑌂𑌡𑌂 𑌤𑌥𑌾 ।
𑌦𑍁𑌰𑍍𑌗𑌾𑌕𑍁𑌂𑌡𑌮𑌸𑍀𑌜𑌲𑌂 𑌹𑌨𑍁𑌮𑌤𑌃 𑌕𑍁𑌂𑌡𑌪𑍍𑌰𑌤𑌾𑌪𑍋𑌰𑍍𑌜𑌿𑌤𑌃
𑌪𑍍𑌰𑌜𑍍𑌞𑌾𑌨𑌪𑍍𑌰𑌮𑍁𑌖𑌾𑌨𑌿 𑌵𑌃 𑌪𑍍𑌰𑌤𑌿𑌦𑌿𑌨𑌂 𑌦𑍇𑌯𑌾𑌤𑍍𑌸𑌦𑌾 𑌮𑌂𑌗𑌲𑌮𑍍 ॥ 12॥

𑌆𑌦𑍍𑌯𑌃 𑌕𑍂𑌪𑌵𑌰𑌸𑍍𑌤𑍁 𑌕𑌾𑌲𑌦𑌮𑌨𑌃 𑌶𑍍𑌰𑍀𑌵𑍃𑌦𑍍𑌧𑌕𑍂𑌪𑍋𑌽𑌪𑌰𑍋
𑌵𑌿𑌖𑍍𑌯𑌾𑌤𑌸𑍍𑌤𑍁 𑌪𑌰𑌾𑌶𑌰𑌸𑍍𑌤𑍁 𑌵𑌿𑌦𑌿𑌤𑌃 𑌕𑍂𑌪𑌃 𑌸𑌰𑍋 𑌮𑌾𑌨𑌸𑌃 ।
𑌜𑍈𑌗𑍀𑌷𑌵𑍍𑌯𑌮𑍁𑌨𑍇𑌃 𑌶𑌶𑌾𑌂𑌕𑌨𑍃𑌪𑌤𑍇𑌃 𑌕𑍂𑌪𑌸𑍍𑌤𑍁 𑌧𑌰𑍍𑌮𑍋𑌦𑍍𑌭𑌵𑌃
𑌖𑍍𑌯𑌾𑌤𑌃 𑌸𑌪𑍍𑌤𑌸𑌮𑍁𑌦𑍍𑌰𑌕𑍂𑌪𑌸𑌹𑌿𑌤𑍋 𑌦𑍇𑌯𑌾𑌤𑍍𑌸𑌦𑌾 𑌮𑌂𑌗𑌲𑌮𑍍 ॥ 13॥

𑌲𑌕𑍍𑌷𑍍𑌯𑍀𑌨𑌾𑌯𑌕𑌬𑌿𑌂𑌦𑍁𑌮𑌾𑌧𑌵𑌹𑌰𑌿𑌰𑍍𑌲𑌕𑍍𑌷𑍍𑌮𑍀𑌨𑍃𑌸𑌿𑌂𑌹𑌸𑍍𑌤𑌤𑍋
𑌗𑍋𑌵𑌿𑌂𑌦𑌸𑍍𑌤𑍍𑌵𑌥 𑌗𑍋𑌪𑌿𑌕𑌾𑌪𑍍𑌰𑌿𑌯𑌤𑌮𑌃 𑌶𑍍𑌰𑍀𑌨𑌾𑌰𑌦𑌃 𑌕𑍇𑌶𑌵𑌃 ।
𑌗𑌂𑌗𑌾𑌕𑍇𑌶𑌵𑌵𑌾𑌮𑌨𑌾𑌖𑍍𑌯𑌤𑌦𑌨𑍁 𑌶𑍍𑌵𑍇𑌤𑍋 𑌹𑌰𑌿𑌃 𑌕𑍇𑌶𑌵𑌃
𑌪𑍍𑌰𑌹𑍍𑌲𑌾𑌦𑌾𑌦𑌿𑌸𑌮𑌸𑍍𑌤𑌕𑍇𑌶𑌵𑌗𑌣𑍋 𑌦𑍇𑌯𑌾𑌤𑍍𑌸𑌦𑌾 𑌮𑌂𑌗𑌲𑌮𑍍 ॥ 14॥

𑌲𑍋𑌲𑌾𑌰𑍍𑌕𑍋 𑌵𑌿𑌮𑌲𑌾𑌰𑍍𑌕𑌮𑌾𑌯𑍁𑌖𑌰𑌵𑌿𑌃 𑌸𑌂𑌵𑌰𑍍𑌤𑌸𑌂𑌜𑍍𑌞𑍋 𑌰𑌵𑌿-
𑌰𑍍𑌵𑌿𑌖𑍍𑌯𑌾𑌤𑍋 𑌦𑍍𑌰𑍁𑌪𑌦𑍁𑌃𑌖𑌖𑍋𑌲𑍍𑌕𑌮𑌰𑍁𑌣𑌃 𑌪𑍍𑌰𑍋𑌕𑍍𑌤𑍋𑌤𑍍𑌤𑌰𑌾𑌰𑍍𑌕𑍋 𑌰𑌵𑌿𑌃 ।
𑌗𑌂𑌗𑌾𑌰𑍍𑌕𑌸𑍍𑌤𑍍𑌵𑌥 𑌵𑍃𑌦𑍍𑌧𑌵𑍃𑌦𑍍𑌧𑌿𑌵𑌿𑌬𑍁𑌧𑌾 𑌕𑌾𑌶𑍀𑌪𑍁𑌰𑍀𑌸𑌂𑌸𑍍𑌥𑌿𑌤𑌾𑌃
𑌸𑍂𑌰𑍍𑌯𑌾 𑌦𑍍𑌵𑌾𑌦𑌶𑌸𑌂𑌜𑍍𑌞𑌕𑌾𑌃 𑌪𑍍𑌰𑌤𑌿𑌦𑌿𑌨𑌂 𑌦𑍇𑌯𑌾𑌤𑍍𑌸𑌦𑌾 𑌮𑌂𑌗𑌲𑌮𑍍 ॥ 15॥

𑌆𑌦𑍍𑌯𑍋 𑌢𑍁𑌂𑌢𑌿𑌵𑌿𑌨𑌾𑌯𑌕𑍋 𑌗𑌣𑌪𑌤𑌿𑌶𑍍𑌚𑌿𑌂𑌤𑌾𑌮𑌣𑌿𑌃 𑌸𑌿𑌦𑍍𑌧𑌿𑌦𑌃
𑌸𑍇𑌨𑌾𑌵𑌿𑌘𑍍𑌨𑌪𑌤𑌿𑌸𑍍𑌤𑍁 𑌵𑌕𑍍𑌤𑍍𑌰𑌵𑌦𑌨𑌃 𑌶𑍍𑌰𑍀𑌪𑌾𑌶𑌪𑌾𑌣𑌿𑌃 𑌪𑍍𑌰𑌭𑍁𑌃 ।
𑌆𑌶𑌾𑌪𑌕𑍍𑌷𑌵𑌿𑌨𑌾𑌯𑌕𑌾𑌪𑍍𑌰𑌷𑌕𑌰𑍋 𑌮𑍋𑌦𑌾𑌦𑌿𑌕𑌃 𑌷𑌡𑍍𑌗𑍁𑌣𑍋
𑌲𑍋𑌲𑌾𑌰𑍍𑌕𑌾𑌦𑌿𑌵𑌿𑌨𑌾𑌯𑌕𑌾𑌃 𑌪𑍍𑌰𑌤𑌿𑌦𑌿𑌨𑌂 𑌦𑍇𑌯𑌾𑌤𑍍𑌸𑌦𑌾 𑌮𑌂𑌗𑌲𑌮𑍍 ॥ 16॥।

𑌹𑍇𑌰𑌂𑌬𑍋 𑌨𑌲𑌕𑍂𑌬𑌰𑍋 𑌗𑌣𑌪𑌤𑌿𑌃 𑌶𑍍𑌰𑍀𑌭𑍀𑌮𑌚𑌂𑌡𑍀𑌗𑌣𑍋
𑌵𑌿𑌖𑍍𑌯𑌾𑌤𑍋 𑌮𑌣𑌿𑌕𑌰𑍍𑌣𑌿𑌕𑌾𑌗𑌣𑌪𑌤𑌿𑌃 𑌶𑍍𑌰𑍀𑌸𑌿𑌦𑍍𑌧𑌿𑌦𑍋 𑌵𑌿𑌘𑍍𑌨𑌪𑌃 ।
𑌮𑍁𑌂𑌡𑌶𑍍𑌚𑌂𑌡𑌮𑍁𑌖𑌶𑍍𑌚 𑌕𑌷𑍍𑌟𑌹𑌰𑌣𑌃 𑌶𑍍𑌰𑍀𑌦𑌂𑌡𑌹𑌸𑍍𑌤𑍋 𑌗𑌣𑌃
𑌶𑍍𑌰𑍀𑌦𑍁𑌰𑍍𑌗𑌾𑌖𑍍𑌯𑌗𑌣𑌾𑌧𑌿𑌪𑌃 𑌪𑍍𑌰𑌤𑌿𑌦𑌿𑌨𑌂 𑌦𑍇𑌯𑌾𑌤𑍍𑌸𑌦𑌾 𑌮𑌂𑌗𑌲𑌮𑍍 ॥ 1𑍭॥

𑌆𑌦𑍍𑌯𑍋 𑌭𑍈𑌰𑌵𑌭𑍀𑌷𑌣𑌸𑍍𑌤𑌦𑌪𑌰𑌃 𑌶𑍍𑌰𑍀𑌕𑌾𑌲𑌰𑌾𑌜𑌃 𑌕𑍍𑌰𑌮𑌾-
𑌚𑍍𑌛𑍍𑌰𑍀𑌸𑌂𑌹𑌾𑌰𑌕𑌭𑍈𑌰𑌵𑌸𑍍𑌤𑍍𑌵𑌥 𑌰𑍁𑌰𑍁𑌶𑍍𑌚𑍋𑌨𑍍𑌮𑌤𑍍𑌤𑌕𑍋 𑌭𑍈𑌰𑌵𑌃 ।
𑌕𑍍𑌰𑍋𑌧𑌶𑍍𑌚𑌂𑌡𑌕𑌪𑌾𑌲𑌭𑍈𑌰𑌵𑌵𑌰𑌃 𑌶𑍍𑌰𑍀𑌭𑍂𑌤𑌨𑌾𑌥𑌾𑌦𑌯𑍋
𑌹𑍍𑌯𑌷𑍍𑌟𑍌 𑌭𑍈𑌰𑌵𑌮𑍂𑌰𑍍𑌤𑌯𑌃 𑌪𑍍𑌰𑌤𑌿𑌦𑌿𑌨𑌂 𑌦𑍇𑌯𑌾𑌤𑍍𑌸𑌦𑌾 𑌮𑌂𑌗𑌲𑌮𑍍 ॥ 1𑍮॥

𑌆𑌧𑌾𑌤𑍋𑌽𑌂𑌬𑌿𑌕𑌯𑌾 𑌸𑌹 𑌤𑍍𑌰𑌿𑌨𑌯𑌨𑌃 𑌸𑌾𑌰𑍍𑌧𑌂 𑌗𑌣𑍈𑌰𑍍𑌨𑌂𑌦𑌿𑌤𑌾𑌂
𑌕𑌾𑌶𑍀𑌮𑌾𑌶𑍁 𑌵𑌿𑌶𑌨𑍍 𑌹𑌰𑌃 𑌪𑍍𑌰𑌥𑌮𑌤𑍋 𑌵𑌾𑌰𑍍𑌷𑌧𑍍𑌵𑌜𑍇𑌽𑌵𑌸𑍍𑌥𑌿𑌤𑌃 ।
𑌆𑌯𑌾𑌤𑌾 𑌦𑌶 𑌧𑍇𑌨𑌵𑌃 𑌸𑍁𑌕𑌪𑌿𑌲𑌾 𑌦𑌿𑌵𑍍𑌯𑍈𑌃 𑌪𑌯𑍋𑌭𑌿𑌰𑍍𑌹𑌰𑌂
𑌖𑍍𑌯𑌾𑌤𑌂 𑌤𑌦𑍍𑌵𑍃𑌷𑌭𑌧𑍍𑌵𑌜𑍇𑌨 𑌕𑌪𑌿𑌲𑌂 𑌦𑍇𑌯𑌾𑌤𑍍𑌸𑌦𑌾 𑌮𑌂𑌗𑌲𑌮𑍍 ॥ 1𑍯॥

𑌆𑌨𑌂𑌦𑌾𑌖𑍍𑌯𑌵𑌨𑌂 𑌹𑌿 𑌚𑌂𑌪𑌕𑌵𑌨𑌂 𑌶𑍍𑌰𑍀𑌨𑍈𑌮𑌿𑌷𑌂 𑌖𑌾𑌂𑌡𑌵𑌂
𑌪𑍁𑌣𑍍𑌯𑌂 𑌚𑍈𑌤𑍍𑌰𑌰𑌥𑌂 𑌤𑍍𑌵𑌶𑌾𑌕𑌵𑌿𑌪𑌿𑌨𑌂 𑌰𑌂𑌭𑌾𑌵𑌨𑌂 𑌪𑌾𑌵𑌨𑌮𑍍 ।
𑌦𑍁𑌰𑍍𑌗𑌾𑌰𑌣𑍍𑌯𑌮𑌥𑍋𑌽𑌪𑌿 𑌕𑍈𑌰𑌵𑌵𑌨𑌂 𑌵𑍃𑌂𑌦𑌾𑌵𑌨𑌂 𑌪𑌾𑌵𑌨𑌂
𑌵𑌿𑌖𑍍𑌯𑌾𑌤𑌾𑌨𑌿 𑌵𑌨𑌾𑌨𑌿 𑌵𑌃 𑌪𑍍𑌰𑌤𑌿𑌦𑌿𑌨𑌂 𑌦𑍇𑌯𑌾𑌤𑍍𑌸𑌦𑌾 𑌮𑌂𑌗𑌲𑌮𑍍 ॥ 20॥

𑌅𑌲𑌿𑌕𑍁𑌲𑌦𑌲𑌨𑍀𑌲𑌃 𑌕𑌾𑌲𑌦𑌂𑌷𑍍𑌟𑍍𑌰𑌾𑌕𑌰𑌾𑌲𑌃
𑌸𑌜𑌲𑌜𑌲𑌦𑌨𑍀𑌲𑍋 𑌵𑍍𑌯𑌾𑌲𑌯𑌜𑍍𑌞𑍋𑌪𑌵𑍀𑌤𑌃 ।
𑌅𑌭𑌯𑌵𑌰𑌦𑌹𑌸𑍍𑌤𑍋 𑌡𑌾𑌮𑌰𑍋𑌦𑍍𑌦𑌾𑌮𑌨𑌾𑌦𑌃
𑌸𑌕𑌲𑌦𑍁𑌰𑌿𑌤𑌭𑌕𑍍𑌷𑍋 𑌮𑌂𑌗𑌲𑌂 𑌵𑍋 𑌦𑌦𑌾𑌤𑍁 ॥ 21॥

𑌅𑌰𑍍𑌧𑌾𑌂𑌗𑍇 𑌵𑌿𑌕𑌟𑌾 𑌗𑌿𑌰𑍀𑌂𑌦𑍍𑌰𑌤𑌨𑌯𑌾 𑌗𑍌𑌰𑍀 𑌸𑌤𑍀 𑌸𑍁𑌂𑌦𑌰𑍀
𑌸𑌰𑍍𑌵𑌾𑌂𑌗𑍇 𑌵𑌿𑌲𑌸𑌦𑍍𑌵𑌿𑌭𑍂𑌤𑌿𑌧𑌵𑌲𑍋 𑌕𑌾𑌲𑍋 𑌵𑌿𑌶𑌾𑌲𑍇𑌕𑍍𑌷𑌣𑌃 ।
𑌵𑍀𑌰𑍇𑌶𑌃 𑌸𑌹𑌨𑌂𑌦𑌿𑌭𑍃𑌂𑌗𑌿𑌸𑌹𑌿𑌤𑌃 𑌶𑍍𑌰𑍀𑌵𑌿𑌶𑍍𑌵𑌨𑌾𑌥𑌃 𑌪𑍍𑌰𑌭𑍁𑌃
𑌕𑌾𑌶𑍀𑌮𑌂𑌦𑌿𑌰𑌸𑌂𑌸𑍍𑌥𑌿𑌤𑍋𑌽𑌖𑌿𑌲𑌗𑍁𑌰𑍁𑌰𑍍𑌦𑍇𑌯𑌾𑌤𑍍𑌸𑌦𑌾 𑌮𑌂𑌗𑌲𑌮𑍍 ॥ 22॥

𑌯𑌃 𑌪𑍍𑌰𑌾𑌤𑌃 𑌪𑍍𑌰𑌯𑌤𑌃 𑌪𑍍𑌰𑌸𑌨𑍍𑌨𑌮𑌨𑌸𑌾 𑌪𑍍𑌰𑍇𑌮𑌪𑍍𑌰𑌮𑍋𑌦𑌾𑌕𑍁𑌲𑌃
𑌖𑍍𑌯𑌾𑌤𑌂 𑌤𑌤𑍍𑌰 𑌵𑌿𑌶𑌿𑌷𑍍𑌟𑌪𑌾𑌦𑌭𑍁𑌵𑌨𑍇𑌶𑍇𑌂𑌦𑍍𑌰𑌾𑌦𑌿𑌭𑌿𑌰𑍍𑌯𑌤𑍍𑌸𑍍𑌤𑍁𑌤𑌮𑍍 ।
𑌪𑍍𑌰𑌾𑌤𑌃 𑌪𑍍𑌰𑌾𑌙𑍍𑌮𑍁𑌖𑌮𑌾𑌸𑌨𑍋𑌤𑍍𑌤𑌮𑌗𑌤𑍋 𑌬𑍍𑌰𑍂𑌯𑌾𑌚𑍍𑌛𑍃𑌣𑍋𑌤𑍍𑌯𑌾𑌦𑌰𑌾𑌤𑍍
𑌕𑌾𑌶𑍀𑌵𑌾𑌸𑌮𑍁𑌖𑌾𑌨𑍍𑌯𑌵𑌾𑌪𑍍𑌯 𑌸𑌤𑌤𑌂 𑌪𑍍𑌰𑍀𑌤𑍇 𑌶𑌿𑌵𑍇 𑌧𑍂𑌰𑍍𑌜𑌟𑌿 ॥ 23॥

𑌇𑌤𑌿 𑌶𑍍𑌰𑍀𑌮𑌚𑍍𑌛𑌂𑌕𑌰𑌾𑌚𑌾𑌰𑍍𑌯𑌵𑌿𑌰𑌚𑌿𑌤𑌂 𑌕𑌾𑌶𑍀𑌵𑌿𑌶𑍍𑌵𑌨𑌾𑌥𑌸𑍍𑌤𑍋𑌤𑍍𑌰𑌮𑍍 ॥