𑌵𑌿𑌘𑍍𑌨𑍇𑌶 𑌵𑌿𑌘𑍍𑌨𑌚𑌯𑌖𑌂𑌡𑌨𑌨𑌾𑌮𑌧𑍇𑌯
𑌶𑍍𑌰𑍀𑌶𑌂𑌕𑌰𑌾𑌤𑍍𑌮𑌜 𑌸𑍁𑌰𑌾𑌧𑌿𑌪𑌵𑌂𑌦𑍍𑌯𑌪𑌾𑌦 ।
𑌦𑍁𑌰𑍍𑌗𑌾𑌮𑌹𑌾𑌵𑍍𑌰𑌤𑌫𑌲𑌾𑌖𑌿𑌲𑌮𑌂𑌗𑌳𑌾𑌤𑍍𑌮𑌨𑍍
𑌵𑌿𑌘𑍍𑌨𑌂 𑌮𑌮𑌾𑌪𑌹𑌰 𑌸𑌿𑌦𑍍𑌧𑌿𑌵𑌿𑌨𑌾𑌯𑌕 𑌤𑍍𑌵𑌮𑍍 ॥ 1 ॥
𑌸𑌤𑍍𑌪𑌦𑍍𑌮𑌰𑌾𑌗𑌮𑌣𑌿𑌵𑌰𑍍𑌣𑌶𑌰𑍀𑌰𑌕𑌾𑌂𑌤𑌿𑌃
𑌶𑍍𑌰𑍀𑌸𑌿𑌦𑍍𑌧𑌿𑌬𑍁𑌦𑍍𑌧𑌿𑌪𑌰𑌿𑌚𑌰𑍍𑌚𑌿𑌤𑌕𑍁𑌂𑌕𑍁𑌮𑌶𑍍𑌰𑍀𑌃 ।
𑌵𑌕𑍍𑌷𑌃𑌸𑍍𑌥𑌲𑍇 𑌵𑌲𑌯𑌿𑌤𑌾𑌤𑌿𑌮𑌨𑍋𑌜𑍍𑌞𑌶𑍁𑌂𑌡𑍋
𑌵𑌿𑌘𑍍𑌨𑌂 𑌮𑌮𑌾𑌪𑌹𑌰 𑌸𑌿𑌦𑍍𑌧𑌿𑌵𑌿𑌨𑌾𑌯𑌕 𑌤𑍍𑌵𑌮𑍍 ॥ 2 ॥
𑌪𑌾𑌶𑌾𑌂𑌕𑍁𑌶𑌾𑌬𑍍𑌜𑌪𑌰𑌶𑍂𑌂𑌶𑍍𑌚 𑌦𑌧𑌚𑍍𑌚𑌤𑍁𑌰𑍍𑌭𑌿-
-𑌰𑍍𑌦𑍋𑌰𑍍𑌭𑌿𑌶𑍍𑌚 𑌶𑍋𑌣𑌕𑍁𑌸𑍁𑌮𑌸𑍍𑌰𑌗𑍁𑌮𑌾𑌂𑌗𑌜𑌾𑌤𑌃 ।
𑌸𑌿𑌂𑌦𑍂𑌰𑌶𑍋𑌭𑌿𑌤𑌲𑌲𑌾𑌟𑌵𑌿𑌧𑍁𑌪𑍍𑌰𑌕𑌾𑌶𑍋
𑌵𑌿𑌘𑍍𑌨𑌂 𑌮𑌮𑌾𑌪𑌹𑌰 𑌸𑌿𑌦𑍍𑌧𑌿𑌵𑌿𑌨𑌾𑌯𑌕 𑌤𑍍𑌵𑌮𑍍 ॥ 3 ॥
𑌕𑌾𑌰𑍍𑌯𑍇𑌷𑍁 𑌵𑌿𑌘𑍍𑌨𑌚𑌯𑌭𑍀𑌤𑌵𑌿𑌰𑌿𑌂𑌚𑌮𑍁𑌖𑍍𑌯𑍈𑌃
𑌸𑌂𑌪𑍂𑌜𑌿𑌤𑌃 𑌸𑍁𑌰𑌵𑌰𑍈𑌰𑌪𑌿 𑌮𑍋𑌦𑌕𑌾𑌦𑍍𑌯𑍈𑌃 ।
𑌸𑌰𑍍𑌵𑍇𑌷𑍁 𑌚 𑌪𑍍𑌰𑌥𑌮𑌮𑍇𑌵 𑌸𑍁𑌰𑍇𑌷𑍁 𑌪𑍂𑌜𑍍𑌯𑍋
𑌵𑌿𑌘𑍍𑌨𑌂 𑌮𑌮𑌾𑌪𑌹𑌰 𑌸𑌿𑌦𑍍𑌧𑌿𑌵𑌿𑌨𑌾𑌯𑌕 𑌤𑍍𑌵𑌮𑍍 ॥ 4 ॥
𑌶𑍀𑌘𑍍𑌰𑌾𑌂𑌚𑌨𑌸𑍍𑌖𑌲𑌨𑌤𑍁𑌂𑌗𑌰𑌵𑍋𑌰𑍍𑌧𑍍𑌵𑌕𑌂𑌠-
-𑌸𑍍𑌥𑍂𑌲𑍇𑌂𑌦𑍁𑌰𑍁𑌦𑍍𑌰𑌗𑌣𑌹𑌾𑌸𑌿𑌤𑌦𑍇𑌵𑌸𑌂𑌘𑌃 ।
𑌶𑍂𑌰𑍍𑌪𑌶𑍍𑌰𑍁𑌤𑌿𑌶𑍍𑌚 𑌪𑍃𑌥𑍁𑌵𑌰𑍍𑌤𑍁𑌲𑌤𑍁𑌂𑌗𑌤𑍁𑌂𑌦𑍋
𑌵𑌿𑌘𑍍𑌨𑌂 𑌮𑌮𑌾𑌪𑌹𑌰 𑌸𑌿𑌦𑍍𑌧𑌿𑌵𑌿𑌨𑌾𑌯𑌕 𑌤𑍍𑌵𑌮𑍍 ॥ 5 ॥
𑌯𑌜𑍍𑌞𑍋𑌪𑌵𑍀𑌤𑌪𑌦𑌲𑌂𑌭𑌿𑌤𑌨𑌾𑌗𑌰𑌾𑌜
𑌮𑌾𑌸𑌾𑌦𑌿𑌪𑍁𑌣𑍍𑌯𑌦𑌦𑍃𑌶𑍀𑌕𑍃𑌤𑍃𑌕𑍍𑌷𑌰𑌾𑌜𑌃 ।
𑌭𑌕𑍍𑌤𑌾𑌭𑌯𑌪𑍍𑌰𑌦 𑌦𑌯𑌾𑌲𑌯 𑌵𑌿𑌘𑍍𑌨𑌰𑌾𑌜
𑌵𑌿𑌘𑍍𑌨𑌂 𑌮𑌮𑌾𑌪𑌹𑌰 𑌸𑌿𑌦𑍍𑌧𑌿𑌵𑌿𑌨𑌾𑌯𑌕 𑌤𑍍𑌵𑌮𑍍 ॥ 6 ॥
𑌸𑌦𑍍𑌰𑌤𑍍𑌨𑌸𑌾𑌰𑌤𑌤𑌿𑌰𑌾𑌜𑌿𑌤𑌸𑌤𑍍𑌕𑌿𑌰𑍀𑌟𑌃
𑌕𑍌𑌸𑍁𑌂𑌭𑌚𑌾𑌰𑍁𑌵𑌸𑌨𑌦𑍍𑌵𑌯 𑌊𑌰𑍍𑌜𑌿𑌤𑌶𑍍𑌰𑍀𑌃 ।
𑌸𑌰𑍍𑌵𑌤𑍍𑌰𑌮𑌂𑌗𑌳𑌕𑌰𑌸𑍍𑌮𑌰𑌣𑌪𑍍𑌰𑌤𑌾𑌪𑍋
𑌵𑌿𑌘𑍍𑌨𑌂 𑌮𑌮𑌾𑌪𑌹𑌰 𑌸𑌿𑌦𑍍𑌧𑌿𑌵𑌿𑌨𑌾𑌯𑌕 𑌤𑍍𑌵𑌮𑍍 ॥ ॥
𑌦𑍇𑌵𑌾𑌂𑌤𑌕𑌾𑌦𑍍𑌯𑌸𑍁𑌰𑌭𑍀𑌤𑌸𑍁𑌰𑌾𑌰𑍍𑌤𑌿𑌹𑌰𑍍𑌤𑌾
𑌵𑌿𑌜𑍍𑌞𑌾𑌨𑌬𑍋𑌧𑌨𑌵𑌰𑍇𑌣 𑌤𑌮𑍋𑌽𑌪𑌹𑌰𑍍𑌤𑌾 ।
𑌆𑌨𑌂𑌦𑌿𑌤𑌤𑍍𑌰𑌿𑌭𑍁𑌵𑌨𑍇𑌶 𑌕𑍁𑌮𑌾𑌰𑌬𑌂𑌧𑍋
𑌵𑌿𑌘𑍍𑌨𑌂 𑌮𑌮𑌾𑌪𑌹𑌰 𑌸𑌿𑌦𑍍𑌧𑌿𑌵𑌿𑌨𑌾𑌯𑌕 𑌤𑍍𑌵𑌮𑍍 ॥ ॥
𑌇𑌤𑌿 𑌶𑍍𑌰𑍀𑌮𑍁𑌦𑍍𑌗𑌲𑌪𑍁𑌰𑌾𑌣𑍇 𑌶𑍍𑌰𑍀𑌸𑌿𑌦𑍍𑌧𑌿𑌵𑌿𑌨𑌾𑌯𑌕 𑌸𑍍𑌤𑍋𑌤𑍍𑌰𑌂 𑌸𑌂𑌪𑍂𑌰𑍍𑌣𑌮𑍍 ।
