ಬ್ರಹ್ಮ ಹ ದೇವೇಭ್ಯೋ ವಿಜಿಗ್ಯೇ ತಸ್ಯ ಹ ಬ್ರಹ್ಮಣೋ ವಿಜಯೇ ದೇವಾ ಅಮಹೀಯನ್ತ ॥ 1॥

ತ ಐಖ್ಷನ್ತಾಸ್ಮಾಕಮೇವಾಯಂ-ವಿಁಜಯೋ-ಽಸ್ಮಾಕಮೇವಾಯ-ಮ್ಮಹಿಮೇತಿ । ತದ್ಧೈಷಾಂ-ವಿಁಜಜ್ಞೌ ತೇಭ್ಯೋ ಹ ಪ್ರಾದುರ್ಬಭೂವ ತನ್ನ ವ್ಯಜಾನತ ಕಿಮಿದಂ-ಯಁಖ್ಷಮಿತಿ ॥ 2॥

ತೇ-ಽಗ್ನಿಮಬ್ರುವಞ್ಜಾತವೇದ ಏತದ್ವಿಜಾನೀಹಿ ಕಿಮಿದಂ-ಯಁಖ್ಷಮಿತಿ ತಥೇತಿ ॥ 3॥

ತದಭ್ಯದ್ರವತ್ತಮಭ್ಯವದತ್ಕೋ-ಽಸೀತ್ಯಗ್ನಿರ್ವಾ ಅಹಮಸ್ಮೀತ್ಯಬ್ರವೀಜ್ಜಾತವೇದಾ ವಾ ಅಹಮಸ್ಮೀತಿ ॥ 4॥

ತಸ್ಮಿನ್ಸ್ತ್ವಯಿ ಕಿಂ-ವೀಁರ್ಯಮಿತ್ಯಪೀದꣳ ಸರ್ವ-ನ್ದಹೇಯಂ-ಯಁದಿದ-ಮ್ಪೃಥಿವ್ಯಾಮಿತಿ ॥ 5॥

ತಸ್ಮೈ ತೃಣ-ನ್ನಿದಧಾವೇತದ್ದಹೇತಿ । ತದುಪಪ್ರೇಯಾಯ ಸರ್ವಜವೇನ ತನ್ನ ಶಶಾಕ ದಗ್ಧುಂ ಸ ತತ ಏವ ನಿವವೃತೇ ನೈತದಶಕಂ-ವಿಁಜ್ಞಾತುಂ-ಯಁದೇತದ್ಯಖ್ಷಮಿತಿ ॥ 6॥

ಅಥ ವಾಯುಮಬ್ರುವನ್ವಾಯವೇತದ್ವಿಜಾನೀಹಿ ಕಿಮೇತದ್ಯಖ್ಷಮಿತಿ ತಥೇತಿ ॥ 7॥

ತದಭ್ಯದ್ರವತ್ತಮಭ್ಯವದತ್ಕೋ-ಽಸೀತಿ ವಾಯುರ್ವಾ ಅಹಮಸ್ಮೀತ್ಯಬ್ರವೀನ್ಮಾತರಿಶ್ವಾ ವಾ ಅಹಮಸ್ಮೀತಿ ॥ 8॥

ತಸ್ಮಿನ್ಸ್ತ್ವಯಿ ಕಿಂ-ವೀಁರ್ಯಮಿತ್ಯಪೀದಂ ಸರ್ವಮಾದದೀಯ ಯದಿದ-ಮ್ಪೃಥಿವ್ಯಾಮಿತಿ ॥ 9॥

ತಸ್ಮೈ ತೃಣ-ನ್ನಿದಧಾವೇತದಾದತ್ಸ್ವೇತಿ ತದುಪಪ್ರೇಯಾಯ ಸರ್ವಜವೇನ ತನ್ನ ಶಶಾಕಾದಾತುಂ ಸ ತತ ಏವ ನಿವವೃತೇ ನೈತದಶಕಂ-ವಿಁಜ್ಞಾತುಂ-ಯಁದೇತದ್ಯಖ್ಷಮಿತಿ ॥ 10॥

ಅಥೇನ್ದ್ರಮಬ್ರುವನ್ಮಘವನ್ನೇತದ್ವಿಜಾನೀಹಿ ಕಿಮೇತದ್ಯಖ್ಷಮಿತಿ ತಥೇತಿ ತದಭ್ಯದ್ರವತ್ತಸ್ಮಾತ್ತಿರೋದಧೇ ॥ 11॥

ಸ ತಸ್ಮಿನ್ನೇವಾಕಾಶೇ ಸ್ತ್ರಿಯಮಾಜಗಾಮ ಬಹುಶೋಭಮಾನಾಮುಮಾಂ ಹೈಮವತೀ-ನ್ತಾಗ್ಂಹೋವಾಚ ಕಿಮೇತದ್ಯಖ್ಷಮಿತಿ ॥ 12॥

॥ ಇತಿ ಕೇನೋಪನಿಷದಿ ತೃತೀಯಃ ಖಣ್ಡಃ ॥