ಓ-ಮ್ಭ॒ದ್ರ-ಙ್ಕರ್ಣೇ॑ಭಿ-ಶ್ಶೃಣು॒ಯಾಮ॑ ದೇವಾಃ । ಭ॒ದ್ರ-ಮ್ಪ॑ಶ್ಯೇಮಾ॒ಖ್ಷಭಿ॒-ರ್ಯಜ॑ತ್ರಾಃ । ಸ್ಥಿ॒ರೈರಙ್ಗೈ᳚ಸ್ತುಷ್ಟು॒ವಾಗ್ಂ ಸ॑ಸ್ತ॒ನೂಭಿಃ॑ । ವ್ಯಶೇ॑ಮ ದೇ॒ವಹಿ॑ತಂ॒-ಯಁದಾಯುಃ॑ । ಸ್ವ॒ಸ್ತಿ ನ॒ ಇನ್ದ್ರೋ॑ ವೃ॒ದ್ಧಶ್ರ॑ವಾಃ । ಸ್ವ॒ಸ್ತಿ ನಃ॑ ಪೂ॒ಷಾ ವಿ॒ಶ್ವವೇ॑ದಾಃ । ಸ್ವ॒ಸ್ತಿ ನ॒ಸ್ತಾರ್ಖ್ಷ್ಯೋ॒ ಅರಿ॑ಷ್ಟನೇಮಿಃ । ಸ್ವ॒ಸ್ತಿ ನೋ॒ ಬೃಹ॒ಸ್ಪತಿ॑-ರ್ದಧಾತು ॥
ಓಂ ಶಾನ್ತಿ॒-ಶ್ಶಾನ್ತಿ॒-ಶ್ಶಾನ್ತಿಃ॑ ॥

॥ ಅಥ ಮಾಣ್ಡೂಕ್ಯೋಪನಿಷತ್ ॥

ಹರಿಃ ಓಮ್ ।
ಓಮಿತ್ಯೇತದಖ್ಷರಮಿದಗ್ಂ ಸರ್ವ-ನ್ತಸ್ಯೋಪವ್ಯಾಖ್ಯಾನಂ
ಭೂತ-ಮ್ಭವದ್ ಭವಿಷ್ಯದಿತಿ ಸರ್ವಮೋಙ್ಕಾರ ಏವ
ಯಚ್ಚಾನ್ಯ-ತ್ತ್ರಿಕಾಲಾತೀತ-ನ್ತದಪ್ಯೋಙ್ಕಾರ ಏವ ॥ 1 ॥

ಸರ್ವಗ್ಂ ಹ್ಯೇತದ್ ಬ್ರಹ್ಮಾಯಮಾತ್ಮಾ ಬ್ರಹ್ಮ ಸೋ-ಽಯಮಾತ್ಮಾ ಚತುಷ್ಪಾತ್ ॥ 2 ॥

ಜಾಗರಿತಸ್ಥಾನೋ ಬಹಿಷ್ಪ್ರಜ್ಞ-ಸ್ಸಪ್ತಾಙ್ಗ ಏಕೋನವಿಂಶತಿಮುಖಃ
ಸ್ಥೂಲಭುಗ್ವೈಶ್ವಾನರಃ ಪ್ರಥಮಃ ಪಾದಃ ॥ 3 ॥

ಸ್ವಪ್ನಸ್ಥಾನೋ-ಽನ್ತಃಪ್ರಜ್ಞ-ಸ್ಸಪ್ತಾಙ್ಗ ಏಕೋನವಿಂಶತಿಮುಖಃ
ಪ್ರವಿವಿಕ್ತಭುಕ್ತೈಜಸೋ ದ್ವಿತೀಯಃ ಪಾದಃ ॥ 4 ॥

ಯತ್ರ ಸುಪ್ತೋ ನ ಕಞ್ಚನ ಕಾಮ-ಙ್ಕಾಮಯತೇ ನ ಕಞ್ಚನ ಸ್ವಪ್ನಂ
ಪಶ್ಯತಿ ತ-ಥ್ಸುಷುಪ್ತಮ್ । ಸುಷುಪ್ತಸ್ಥಾನ ಏಕೀಭೂತಃ ಪ್ರಜ್ಞಾನಘನ
ಏವಾನನ್ದಮಯೋ ಹ್ಯಾನನ್ದಭುಕ್ಚೇತೋಮುಖಃ ಪ್ರಾಜ್ಞಸ್ತೃತೀಯಃ ಪಾದಃ ॥ 5 ॥

ಏಷ ಸರ್ವೇಶ್ವರಃ ಏಷ ಸರ್ವಜ್ಞ ಏಷೋ-ಽನ್ತರ್ಯಾಮ್ಯೇಷ ಯೋನಿ-ಸ್ಸರ್ವಸ್ಯ
ಪ್ರಭವಾಪ್ಯಯೌ ಹಿ ಭೂತಾನಾಮ್ ॥ 6 ॥

ನಾನ್ತಃಪ್ರಜ್ಞ-ನ್ನ ಬಹಿಷ್ಪ್ರಜ್ಞ-ನ್ನೋಭಯತಃಪ್ರಜ್ಞ-ನ್ನ ಪ್ರಜ್ಞಾನಘನಂ
ನ ಪ್ರಜ್ಞ-ನ್ನಾಪ್ರಜ್ಞಮ್ । ಅದೃಷ್ಟಮವ್ಯವಹಾರ್ಯಮಗ್ರಾಹ್ಯಮಲಖ್ಷಣಂ
ಅಚಿನ್ತ್ಯಮವ್ಯಪದೇಶ್ಯಮೇಕಾತ್ಮಪ್ರತ್ಯಯಸಾರ-ಮ್ಪ್ರಪಞ್ಚೋಪಶಮಂ
ಶಾನ್ತಂ ಶಿವಮದ್ವೈತ-ಞ್ಚತುರ್ಥ-ಮ್ಮನ್ಯನ್ತೇ ಸ ಆತ್ಮಾ ಸ ವಿಜ್ಞೇಯಃ ॥ 7 ॥

ಸೋ-ಽಯಮಾತ್ಮಾಧ್ಯಖ್ಷರಮೋಙ್ಕಾರೋ-ಽಧಿಮಾತ್ರ-ಮ್ಪಾದಾ ಮಾತ್ರಾ ಮಾತ್ರಾಶ್ಚ ಪಾದಾ
ಅಕಾರ ಉಕಾರೋ ಮಕಾರ ಇತಿ ॥ 8 ॥

ಜಾಗರಿತಸ್ಥಾನೋ ವೈಶ್ವಾನರೋ-ಽಕಾರಃ ಪ್ರಥಮಾ ಮಾತ್ರಾ-ಽಽಪ್ತೇರಾದಿಮತ್ತ್ವಾದ್
ವಾ-ಽಽಪ್ನೋತಿ ಹ ವೈ ಸರ್ವಾನ್ ಕಾಮಾನಾದಿಶ್ಚ ಭವತಿ ಯ ಏವಂ-ವೇಁದ ॥ 9 ॥

ಸ್ವಪ್ನಸ್ಥಾನಸ್ತೈಜಸ ಉಕಾರೋ ದ್ವಿತೀಯಾ ಮಾತ್ರೋತ್ಕರ್​ಷಾತ್
ಉಭಯತ್ವಾದ್ವೋತ್ಕರ್​ಷತಿ ಹ ವೈ ಜ್ಞಾನಸನ್ತತಿಂ ಸಮಾನಶ್ಚ ಭವತಿ
ನಾಸ್ಯಾಬ್ರಹ್ಮವಿತ್ಕುಲೇ ಭವತಿ ಯ ಏವಂ-ವೇಁದ ॥ 10 ॥

ಸುಷುಪ್ತಸ್ಥಾನಃ ಪ್ರಾಜ್ಞೋ ಮಕಾರಸ್ತೃತೀಯಾ ಮಾತ್ರಾ ಮಿತೇರಪೀತೇರ್ವಾ
ಮಿನೋತಿ ಹ ವಾ ಇದಂ ಸರ್ವಮಪೀತಿಶ್ಚ ಭವತಿ ಯ ಏವಂ-ವೇಁದ ॥ 11 ॥

ಅಮಾತ್ರಶ್ಚತುರ್ಥೋ-ಽವ್ಯವಹಾರ್ಯಃ ಪ್ರಪಞ್ಚೋಪಶಮ-ಶ್ಶಿವೋ-ಽದ್ವೈತ
ಏವಮೋಙ್ಕಾರ ಆತ್ಮೈವ ಸಂ​ವಿಁಶತ್ಯಾತ್ಮನಾ-ಽಽತ್ಮಾನಂ-ಯಁ ಏವಂ-ವೇಁದ ॥ 12 ॥

॥ ಇತಿ ಮಾಣ್ಡೂಕ್ಯೋಪನಿಷ-ಥ್ಸಮಾಪ್ತಾ ॥