ಓಮ್ ॥ ಹಿರ॑ಣ್ಯವರ್ಣಾಂ॒ ಹರಿ॑ಣೀಂ ಸು॒ವರ್ಣ॑ರಜ॒ತಸ್ರ॑ಜಾಮ್ ।
ಚ॒ನ್ದ್ರಾಂ ಹಿ॒ರಣ್ಮ॑ಯೀಂ-ಲಁ॒ಖ್ಷ್ಮೀ-ಞ್ಜಾತ॑ವೇದೋ ಮ॒ಮಾವ॑ಹ ॥
ತಾ-ಮ್ಮ॒ ಆವ॑ಹ॒ ಜಾತ॑ವೇದೋ ಲ॒ಖ್ಷ್ಮೀಮನ॑ಪಗಾ॒ಮಿನೀ᳚ಮ್ ।
ಯಸ್ಯಾಂ॒ ಹಿರ॑ಣ್ಯಂ-ವಿಁ॒ನ್ದೇಯ॒-ಙ್ಗಾಮಶ್ವ॒-ಮ್ಪುರು॑ಷಾನ॒ಹಮ್ ॥
ಅ॒ಶ್ವ॒ಪೂ॒ರ್ವಾಂ ರ॑ಥಮ॒ಧ್ಯಾಂ ಹ॒ಸ್ತಿನಾ॑ದ-ಪ್ರ॒ಬೋಧಿ॑ನೀಮ್ ।
ಶ್ರಿಯ॑-ನ್ದೇ॒ವೀಮುಪ॑ಹ್ವಯೇ॒ ಶ್ರೀರ್ಮಾ॑ ದೇ॒ವೀರ್ಜು॑ಷತಾಮ್ ॥
ಕಾಂ॒ಸೋ᳚ಸ್ಮಿ॒ ತಾಂ ಹಿರ॑ಣ್ಯಪ್ರಾ॒ಕಾರಾ॑ಮಾ॒ರ್ದ್ರಾ-ಞ್ಜ್ವಲ॑ನ್ತೀ-ನ್ತೃ॒ಪ್ತಾ-ನ್ತ॒ರ್ಪಯ॑ನ್ತೀಮ್ ।
ಪ॒ದ್ಮೇ॒ ಸ್ಥಿ॒ತಾ-ಮ್ಪ॒ದ್ಮವ॑ರ್ಣಾ॒-ನ್ತಾಮಿ॒ಹೋಪ॑ಹ್ವಯೇ॒ ಶ್ರಿಯಮ್ ॥
ಚ॒ನ್ದ್ರಾ-ಮ್ಪ್ರ॑ಭಾ॒ಸಾಂ-ಯಁ॒ಶಸಾ॒ ಜ್ವಲ॑ನ್ತೀಂ॒ ಶ್ರಿಯಂ॑-ಲೋಁ॒ಕೇ ದೇ॒ವಜು॑ಷ್ಟಾಮುದಾ॒ರಾಮ್ ।
ತಾ-ಮ್ಪ॒ದ್ಮಿನೀ॑ಮೀಂ॒ ಶರ॑ಣಮ॒ಹ-ಮ್ಪ್ರಪ॑ದ್ಯೇ-ಽಲ॒ಖ್ಷ್ಮೀರ್ಮೇ॑ ನಶ್ಯತಾ॒-ನ್ತ್ವಾಂ-ವೃಁ॑ಣೇ ॥
ಆ॒ದಿ॒ತ್ಯವ॑ರ್ಣೇ॒ ತಪ॒ಸೋ-ಽಧಿ॑ಜಾ॒ತೋ ವನ॒ಸ್ಪತಿ॒ಸ್ತವ॑ ವೃ॒ಖ್ಷೋ-ಽಥ॑ ಬಿ॒ಲ್ವಃ ।
ತಸ್ಯ॒ ಫಲಾ॑ನಿ॒ ತಪ॒ಸಾನು॑ದನ್ತು ಮಾ॒ಯಾನ್ತ॑ರಾ॒ಯಾಶ್ಚ॑ ಬಾ॒ಹ್ಯಾ ಅ॑ಲ॒ಖ್ಷ್ಮೀಃ ॥
ಉಪೈ॑ತು॒ ಮಾ-ನ್ದೇ॑ವಸ॒ಖಃ ಕೀ॒ರ್ತಿಶ್ಚ॒ ಮಣಿ॑ನಾ ಸ॒ಹ ।
ಪ್ರಾ॒ದು॒ರ್ಭೂ॒ತೋ-ಽಸ್ಮಿ॑ ರಾಷ್ಟ್ರೇ॒-ಽಸ್ಮಿನ್ ಕೀ॒ರ್ತಿ॒ಮೃ॑ದ್ಧಿ-ನ್ದ॒ದಾತು॑ ಮೇ ॥
ಖ್ಷು॒ತ್ಪಿ॒ಪಾ॒ಸಾಮ॑ಲಾ-ಞ್ಜ್ಯೇ॒ಷ್ಠಾಮ॒ಲ॒ಖ್ಷೀ-ರ್ನಾ॑ಶಯಾ॒ಮ್ಯಹಮ್ ।
ಅಭೂ॑ತಿ॒ಮಸ॑ಮೃದ್ಧಿ॒-ಞ್ಚ ಸ॒ರ್ವಾ॒-ನ್ನಿರ್ಣು॑ದ ಮೇ॒ ಗೃಹಾತ್ ॥
ಗ॒ನ್ಧ॒ದ್ವಾ॒ರಾ-ನ್ದು॑ರಾಧ॒ರ್ಷಾ॒-ನ್ನಿ॒ತ್ಯಪು॑ಷ್ಟಾ-ಙ್ಕರೀ॒ಷಿಣೀ᳚ಮ್ ।
ಈ॒ಶ್ವರೀಗ್ಂ॑ ಸರ್ವ॑ಭೂತಾ॒ನಾ॒-ನ್ತಾಮಿ॒ಹೋಪ॑ಹ್ವಯೇ॒ ಶ್ರಿಯಮ್ ॥
ಶ್ರೀ᳚ರ್ಮೇ ಭ॒ಜತು । ಅಲ॒ಖ್ಷೀ᳚ರ್ಮೇ ನ॒ಶ್ಯತು ।
ಮನ॑ಸಃ॒ ಕಾಮ॒ಮಾಕೂ॑ತಿಂ-ವಾಁ॒ಚ-ಸ್ಸ॒ತ್ಯಮ॑ಶೀಮಹಿ ।
ಪ॒ಶೂ॒ನಾಗ್ಂ ರೂ॒ಪಮನ್ಯ॑ಸ್ಯ॒ ಮಯಿ॒ ಶ್ರೀ-ಶ್ಶ್ರ॑ಯತಾಂ॒-ಯಁಶಃ॑ ॥
ಕ॒ರ್ದಮೇ॑ನ ಪ್ರ॑ಜಾಭೂ॒ತಾ॒ ಮ॒ಯಿ॒ ಸಮ್ಭ॑ವ ಕ॒ರ್ದಮ ।
ಶ್ರಿಯಂ॑-ವಾಁ॒ಸಯ॑ ಮೇ ಕು॒ಲೇ॒ ಮಾ॒ತರ॑-ಮ್ಪದ್ಮ॒ಮಾಲಿ॑ನೀಮ್ ॥
ಆಪ॑-ಸ್ಸೃ॒ಜನ್ತು॑ ಸ್ನಿ॒ಗ್ಧಾ॒ನಿ॒ ಚಿ॒ಕ್ಲೀ॒ತ ವ॑ಸ ಮೇ॒ ಗೃಹೇ ।
ನಿ ಚ॑ ದೇ॒ವೀ-ಮ್ಮಾ॒ತರಂ॒ ಶ್ರಿಯಂ॑-ವಾಁ॒ಸಯ॑ ಮೇ ಕು॒ಲೇ ॥
ಆ॒ರ್ದ್ರಾ-ಮ್ಪು॒ಷ್ಕರಿ॑ಣೀ-ಮ್ಪು॒ಷ್ಟಿಂ॒ ಪಿ॒ಙ್ಗ॒ಳಾ-ಮ್ಪ॑ದ್ಮಮಾ॒ಲಿನೀಮ್ ।
ಚ॒ನ್ದ್ರಾಂ ಹಿ॒ರಣ್ಮ॑ಯೀಂ-ಲಁ॒ಖ್ಷ್ಮೀ-ಞ್ಜಾತ॑ವೇದೋ ಮ॒ಮಾವ॑ಹ ॥
ಆ॒ರ್ದ್ರಾಂ-ಯಁಃ॒ ಕರಿ॑ಣೀಂ-ಯಁ॒ಷ್ಟಿಂ॒ ಸು॒ವ॒ರ್ಣಾಂ ಹೇ॑ಮಮಾ॒ಲಿನೀಮ್ ।
ಸೂ॒ರ್ಯಾಂ ಹಿ॒ರಣ್ಮ॑ಯೀಂ-ಲಁ॒ಖ್ಷ್ಮೀ॒-ಞ್ಜಾತ॑ವೇದೋ ಮ॒ಮಾವ॑ಹ ॥
ತಾ-ಮ್ಮ॒ ಆವ॑ಹ॒ ಜಾತ॑ವೇದೋ ಲ॒ಖ್ಷೀಮನ॑ಪಗಾ॒ಮಿನೀ᳚ಮ್ ।
ಯಸ್ಯಾಂ॒ ಹಿರ॑ಣ್ಯ॒-ಮ್ಪ್ರಭೂ॑ತ॒-ಙ್ಗಾವೋ॑ ದಾ॒ಸ್ಯೋ-ಽಶ್ವಾ᳚ನ್, ವಿ॒ನ್ದೇಯ॒-ಮ್ಪುರು॑ಷಾನ॒ಹಮ್ ॥
ಯಶ್ಶುಚಿಃ॑ ಪ್ರಯತೋ ಭೂ॒ತ್ವಾ॒ ಜು॒ಹುಯಾ॑-ದಾಜ್ಯ॒-ಮನ್ವ॑ಹಮ್ ।
ಶ್ರಿಯಃ॑ ಪ॒ಞ್ಚದ॑ಶರ್ಚ-ಞ್ಚ ಶ್ರೀ॒ಕಾಮ॑ಸ್ಸತ॒ತ॒-ಞ್ಜ॑ಪೇತ್ ॥
ಆನನ್ದಃ ಕರ್ದ॑ಮಶ್ಚೈ॒ವ ಚಿಕ್ಲೀ॒ತ ಇ॑ತಿ ವಿ॒ಶ್ರುತಾಃ ।
ಋಷ॑ಯ॒ಸ್ತೇ ತ್ರ॑ಯಃ ಪುತ್ರಾ-ಸ್ಸ್ವ॒ಯಂ॒ ಶ್ರೀರೇ॑ವ ದೇ॒ವತಾ ॥
ಪದ್ಮಾನನೇ ಪ॑ದ್ಮ ಊ॒ರೂ॒ ಪ॒ದ್ಮಾಖ್ಷೀ ಪ॑ದ್ಮಸ॒ಮ್ಭವೇ ।
ತ್ವ-ಮ್ಮಾ᳚-ಮ್ಭ॒ಜಸ್ವ॑ ಪದ್ಮಾ॒ಖ್ಷೀ ಯೇ॒ನ ಸೌಖ್ಯಂ॑-ಲಁಭಾ॒ಮ್ಯಹಮ್ ॥
ಅ॒ಶ್ವದಾ॑ಯೀ ಚ ಗೋದಾ॒ಯೀ॒ ಧ॒ನದಾ॑ಯೀ ಮ॒ಹಾಧ॑ನೇ ।
ಧನ॑-ಮ್ಮೇ॒ ಜುಷ॑ತಾ-ನ್ದೇ॒ವೀ ಸ॒ರ್ವಕಾ॑ಮಾರ್ಥ॒ ಸಿದ್ಧ॑ಯೇ ॥
ಪುತ್ರಪೌತ್ರ ಧನ-ನ್ಧಾನ್ಯಂ ಹಸ್ತ್ಯಶ್ವಾಜಾವಿಗೋ ರಥಮ್ ।
ಪ್ರಜಾನಾ-ಮ್ಭವಸಿ ಮಾತಾ ಆಯುಷ್ಮನ್ತ-ಙ್ಕರೋತು ಮಾಮ್ ॥
ಚನ್ದ್ರಾಭಾಂ-ಲಁಖ್ಷ್ಮೀಮೀಶಾನಾಂ ಸೂರ್ಯಾಭಾಂ᳚ ಶ್ರಿಯಮೀಶ್ವರೀಮ್ ।
ಚನ್ದ್ರ ಸೂರ್ಯಾಗ್ನಿ ಸರ್ವಾಭಾಂ ಶ್ರೀ ಮಹಾಲಖ್ಷ್ಮೀ-ಮುಪಾಸ್ಮಹೇ ॥
ಧನ-ಮಗ್ನಿ-ರ್ಧನಂ-ವಾಁಯು-ರ್ಧನಂ ಸೂರ್ಯೋ॑ ಧನಂ-ವಁಸುಃ ।
ಧನಮಿನ್ದ್ರೋ ಬೃಹಸ್ಪತಿ-ರ್ವರು॑ಣ-ನ್ಧನಮ॑ಶ್ನುತೇ ॥
ವೈನತೇಯ ಸೋಮ-ಮ್ಪಿಬ ಸೋಮ॑-ಮ್ಪಿಬತು ವೃತ್ರಹಾ ।
ಸೋಮ॒-ನ್ಧನಸ್ಯ ಸೋಮಿನೋ॒ ಮಹ್ಯ॑-ನ್ದದಾತು ಸೋಮಿನೀ॑ ॥
ನ ಕ್ರೋಧೋ ನ ಚ ಮಾತ್ಸ॒ರ್ಯ-ನ್ನ ಲೋಭೋ॑ ನಾಶುಭಾ ಮತಿಃ ।
ಭವನ್ತಿ ಕೃತ ಪುಣ್ಯಾನಾ-ಮ್ಭ॒ಕ್ತಾನಾಂ ಶ್ರೀ ಸೂ᳚ಕ್ತ-ಞ್ಜಪೇತ್ಸದಾ ॥
ವರ್ಷ᳚ನ್ತು॒ ತೇ ವಿ॑ಭಾವ॒ರಿ॒ ದಿ॒ವೋ ಅಭ್ರಸ್ಯ ವಿದ್ಯು॑ತಃ ।
ರೋಹ᳚ನ್ತು ಸರ್ವ॑ಬೀಜಾನ್ಯವ ಬ್ರಹ್ಮ ದ್ವಿ॒ಷೋ᳚ ಜ॑ಹಿ ॥
ಪದ್ಮಪ್ರಿಯೇ ಪದ್ಮಿನಿ ಪದ್ಮಹಸ್ತೇ ಪದ್ಮಾಲಯೇ ಪದ್ಮ-ದಳಾಯತಾಖ್ಷೀ ।
ವಿಶ್ವಪ್ರಿಯೇ ವಿಷ್ಣು ಮನೋನುಕೂಲೇ ತ್ವತ್ಪಾದಪದ್ಮ-ಮ್ಮಯಿ ಸನ್ನಿಧತ್ಸ್ವ ॥
ಯಾ ಸಾ ಪದ್ಮಾಸನಸ್ಥಾ ವಿಪುಲಕಟಿತಟೀ ಪದ್ಮಪತ್ರಾಯತಾಖ್ಷೀ ।
ಗಮ್ಭೀರಾ ವರ್ತನಾಭಿ-ಸ್ಸ್ತನಭರನಮಿತಾ ಶುಭ್ರ ವಸ್ತೋತ್ತರೀಯಾ ॥
ಲಖ್ಷ್ಮೀ-ರ್ದಿವ್ಯೈ-ರ್ಗಜೇನ್ದ್ರೈ-ರ್ಮಣಿಗಣ ಖಚಿತೈ-ಸ್ಸ್ನಾಪಿತಾ ಹೇಮಕುಮ್ಭೈಃ ।
ನಿತ್ಯಂ ಸಾ ಪದ್ಮಹಸ್ತಾ ಮಮ ವಸತು ಗೃಹೇ ಸರ್ವ ಮಾಙ್ಗಳ್ಯಯುಕ್ತಾ ॥
ಲಖ್ಷ್ಮೀ-ಙ್ಖ್ಷೀರ ಸಮುದ್ರ ರಾಜತನಯಾಂ ಶ್ರೀರಙ್ಗ ಧಾಮೇಶ್ವರೀಮ್ ।
ದಾಸೀಭೂತ ಸಮಸ್ತ ದೇವ ವನಿತಾಂ-ಲೋಁಕೈಕ ದೀಪಾಙ್ಕುರಾಮ್ ।
ಶ್ರೀಮನ್ಮನ್ದ ಕಟಾಖ್ಷ ಲಬ್ಧ ವಿಭವ ಬ್ರಹ್ಮೇನ್ದ್ರ ಗಙ್ಗಾಧರಾಮ್ ।
ತ್ವಾ-ನ್ತ್ರೈಲೋಕ್ಯ ಕುಟುಮ್ಬಿನೀಂ ಸರಸಿಜಾಂ-ವಁನ್ದೇ ಮುಕುನ್ದಪ್ರಿಯಾಮ್ ॥
ಸಿದ್ಧಲಖ್ಷ್ಮೀ-ರ್ಮೋಖ್ಷಲಖ್ಷ್ಮೀ-ರ್ಜಯಲಖ್ಷ್ಮೀ-ಸ್ಸರಸ್ವತೀ ।
ಶ್ರೀಲಖ್ಷ್ಮೀ-ರ್ವರಲಖ್ಷ್ಮೀಶ್ಚ ಪ್ರಸನ್ನಾ ಮಮ ಸರ್ವದಾ ॥
ವರಾಙ್ಕುಶೌ ಪಾಶಮಭೀತಿ ಮುದ್ರಾಮ್ ।
ಕರೈರ್ವಹನ್ತೀ-ಙ್ಕಮಲಾಸನಸ್ಥಾಮ್ ।
ಬಾಲಾರ್ಕಕೋಟಿ ಪ್ರತಿಭಾ-ನ್ತ್ರಿನೇತ್ರಾಮ್ ।
ಭಜೇ-ಽಹಮಮ್ಬಾ-ಞ್ಜಗದೀಶ್ವರೀ-ನ್ತಾಮ್ ॥
ಸರ್ವಮಙ್ಗಳ ಮಾಙ್ಗಳ್ಯೇ ಶಿವೇ ಸರ್ವಾರ್ಥ ಸಾಧಿಕೇ ।
ಶರಣ್ಯೇ ತ್ಯ್ರಮ್ಬಕೇ ದೇವೀ ನಾರಾಯಣಿ ನಮೋಸ್ತುತೇ ॥
ಓ-ಮ್ಮ॒ಹಾ॒ದೇ॒ವ್ಯೈ ಚ॑ ವಿ॒ದ್ಮಹೇ॑ ವಿಷ್ಣುಪ॒ತ್ನೀ ಚ॑ ಧೀಮಹಿ ।
ತನ್ನೋ॑ ಲಖ್ಷ್ಮೀಃ ಪ್ರಚೋ॒ದಯಾ᳚ತ್ ॥
ಶ್ರೀ-ರ್ವರ್ಚ॑ಸ್ವ॒-ಮಾಯು॑ಷ್ಯ॒-ಮಾರೋ᳚ಗ್ಯ॒-ಮಾವೀ॑ಧಾ॒ತ್-ಶೋಭ॑ಮಾನ-ಮ್ಮಹೀ॒ಯತೇ᳚ ।
ಧಾ॒ನ್ಯ-ನ್ಧ॒ನ-ಮ್ಪ॒ಶು-ಮ್ಬ॒ಹುಪು॑ತ್ರಲಾ॒ಭಂ ಶ॒ತಸಂ᳚ವಁತ್ಸ॒ರ-ನ್ದೀ॒ರ್ಘಮಾಯುಃ॑ ॥
ಓಂ ಶಾನ್ತಿ॒-ಶ್ಶಾನ್ತಿ॒-ಶ್ಶಾನ್ತಿಃ॑ ॥
