॥ ದ್ವಿತೀಯ ಮುಣ್ಡಕೇ ಪ್ರಥಮಃ ಖಣ್ಡಃ ॥

ತದೇತ-ಥ್ಸತ್ಯಂ
ಯಥಾ ಸುದೀಪ್ತಾ-ತ್ಪಾವಕಾದ್ವಿಸ್ಫುಲಿಙ್ಗಾಃ
ಸಹಸ್ರಶಃ ಪ್ರಭವನ್ತೇ ಸರೂಪಾಃ ।
ತಥಾ-ಽಖ್ಷರಾದ್ವಿವಿಧಾ-ಸ್ಸೋಮ್ಯ ಭಾವಾಃ
ಪ್ರಜಾಯನ್ತೇ ತತ್ರ ಚೈವಾಪಿ ಯನ್ತಿ ॥ 1॥

ದಿವ್ಯೋ ಹ್ಯಮೂರ್ತಃ ಪುರುಷ-ಸ್ಸ ಬಾಹ್ಯಾಭ್ಯನ್ತರೋ ಹ್ಯಜಃ ।
ಅಪ್ರಾಣೋ ಹ್ಯಮನಾ-ಶ್ಶುಭ್ರೋ ಹ್ಯಖ್ಷರಾ-ತ್ಪರತಃ ಪರಃ ॥ 2॥

ಏತಸ್ಮಾಜ್ಜಾಯತೇ ಪ್ರಾಣೋ ಮನ-ಸ್ಸರ್ವೇನ್ದ್ರಿಯಾಣಿ ಚ ।
ಖಂ-ವಾಁಯುರ್ಜ್ಯೋತಿರಾಪಃ ಪೃಥಿವೀ ವಿಶ್ವಸ್ಯ ಧಾರಿಣೀ ॥ 3॥

ಅಗ್ನೀರ್ಮೂರ್ಧಾ ಚಖ್ಷುಷೀ ಚನ್ದ್ರಸೂರ್ಯೌ
ದಿಶ-ಶ್ಶ್ರೋತ್ರೇ ವಾಗ್ ವಿವೃತಾಶ್ಚ ವೇದಾಃ ।
ವಾಯುಃ ಪ್ರಾಣೋ ಹೃದಯಂ-ವಿಁಶ್ವಮಸ್ಯ ಪದ್ಭ್ಯಾಂ
ಪೃಥಿವೀ ಹ್ಯೇಷ ಸರ್ವಭೂತಾನ್ತರಾತ್ಮಾ ॥ 4॥

ತಸ್ಮಾದಗ್ನಿ-ಸ್ಸಮಿಧೋ ಯಸ್ಯ ಸೂರ್ಯಃ
ಸೋಮಾ-ತ್ಪರ್ಜನ್ಯ ಓಷಧಯಃ ಪೃಥಿವ್ಯಾಮ್ ।
ಪುಮಾ-ನ್ರೇತ-ಸ್ಸಿಞ್ಚತಿ ಯೋಷಿತಾಯಾಂ
ಬಹ್ವೀಃ ಪ್ರಜಾಃ ಪುರುಷಾ-ಥ್ಸಮ್ಪ್ರಸೂತಾಃ ॥ 5॥

ತಸ್ಮಾದೃಚ-ಸ್ಸಾಮ ಯಜೂಂಷಿ ದೀಖ್ಷಾ
ಯಜ್ಞಾಶ್ಚ ಸರ್ವೇ ಕ್ರತವೋ ದಖ್ಷಿಣಾಶ್ಚ ।
ಸಂ​ವಁತ್ಸರಶ್ಚ ಯಜಮಾನಶ್ಚ ಲೋಕಾಃ
ಸೋಮೋ ಯತ್ರ ಪವತೇ ಯತ್ರ ಸೂರ್ಯಃ ॥ 6॥

ತಸ್ಮಾಚ್ಚ ದೇವಾ ಬಹುಧಾ ಸಮ್ಪ್ರಸೂತಾಃ
ಸಾಧ್ಯಾ ಮನುಷ್ಯಾಃ ಪಶವೋ ವಯಾಂಸಿ ।
ಪ್ರಾಣಾಪಾನೌ ವ್ರೀಹಿಯವೌ ತಪಶ್ಚ
ಶ್ರದ್ಧಾ ಸತ್ಯ-ಮ್ಬ್ರಹ್ಮಚರ್ಯಂ-ವಿಁಧಿಶ್ಚ ॥ 7॥

ಸಪ್ತ ಪ್ರಾಣಾಃ ಪ್ರಭವನ್ತಿ ತಸ್ಮಾತ್
ಸಪ್ತಾರ್ಚಿಷ-ಸ್ಸಮಿಧ-ಸ್ಸಪ್ತ ಹೋಮಾಃ ।
ಸಪ್ತ ಇಮೇ ಲೋಕಾ ಯೇಷು ಚರನ್ತಿ ಪ್ರಾಣಾ
ಗುಹಾಶಯಾ ನಿಹಿತಾ-ಸ್ಸಪ್ತ ಸಪ್ತ ॥ 8॥

ಅತ-ಸ್ಸಮುದ್ರಾ ಗಿರಯಶ್ಚ ಸರ್ವೇ-ಽಸ್ಮಾತ್
ಸ್ಯನ್ದನ್ತೇ ಸಿನ್ಧವ-ಸ್ಸರ್ವರೂಪಾಃ ।
ಅತಶ್ಚ ಸರ್ವಾ ಓಷಧಯೋ ರಸಶ್ಚ
ಯೇನೈಷ ಭೂತೈಸ್ತಿಷ್ಠತೇ ಹ್ಯನ್ತರಾತ್ಮಾ ॥ 9॥

ಪುರುಷ ಏವೇದಂ-ವಿಁಶ್ವ-ಙ್ಕರ್ಮ ತಪೋ ಬ್ರಹ್ಮ ಪರಾಮೃತಮ್ ।
ಏತದ್ಯೋ ವೇದ ನಿಹಿತ-ಙ್ಗುಹಾಯಾಂ
ಸೋ-ಽವಿದ್ಯಾಗ್ರನ್ಥಿಂ-ವಿಁಕಿರತೀಹ ಸೋಮ್ಯ ॥ 10॥

॥ ಇತಿ ಮುಣ್ಡಕೋಪನಿಷದಿ ದ್ವಿತೀಯಮುಣ್ಡಕೇ ಪ್ರಥಮಃ ಖಣ್ಡಃ ॥