॥ ಪ್ರಥಮಮುಣ್ಡಕೇ ದ್ವಿತೀಯಃ ಖಣ್ಡಃ ॥

ತದೇತ-ಥ್ಸತ್ಯ-ಮ್ಮನ್ತ್ರೇಷು ಕರ್ಮಾಣಿ ಕವಯೋ
ಯಾನ್ಯಪಶ್ಯಂಸ್ತಾನಿ ತ್ರೇತಾಯಾ-ಮ್ಬಹುಧಾ ಸನ್ತತಾನಿ ।
ತಾನ್ಯಾಚರಥ ನಿಯತಂ ಸತ್ಯಕಾಮಾ ಏಷ ವಃ
ಪನ್ಥಾ-ಸ್ಸುಕೃತಸ್ಯ ಲೋಕೇ ॥ 1॥

ಯದಾ ಲೇಲಾಯತೇ ಹ್ಯರ್ಚಿ-ಸ್ಸಮಿದ್ಧೇ ಹವ್ಯವಾಹನೇ ।
ತದಾ-ಽಽಜ್ಯಭಾಗಾವನ್ತರೇಣಾ-ಽಽಹುತೀಃ ಪ್ರತಿಪಾದಯೇತ್ ॥ 2॥

ಯಸ್ಯಾಗ್ನಿಹೋತ್ರಮದರ್​ಶಮಪೌರ್ಣಮಾಸ-
ಮಚಾತುರ್ಮಾಸ್ಯಮನಾಗ್ರಯಣಮತಿಥಿವರ್ಜಿತ-ಞ್ಚ ।
ಅಹುತಮವೈಶ್ವದೇವಮವಿಧಿನಾ ಹುತ-
ಮಾಸಪ್ತಮಾಂಸ್ತಸ್ಯ ಲೋಕಾನ್ ಹಿನಸ್ತಿ ॥ 3॥

ಕಾಲೀ ಕರಾಲೀ ಚ ಮನೋಜವಾ ಚ
ಸುಲೋಹಿತಾ ಯಾ ಚ ಸುಧೂಮ್ರವರ್ಣಾ ।
ಸ್ಫುಲಿಙ್ಗಿನೀ ವಿಶ್ವರುಚೀ ಚ ದೇವೀ
ಲೇಲಾಯಮಾನಾ ಇತಿ ಸಪ್ತ ಜಿಹ್ವಾಃ ॥ 4॥

ಏತೇಷು ಯಶ್ಚರತೇ ಭ್ರಾಜಮಾನೇಷು ಯಥಾಕಾಲಂ
ಚಾಹುತಯೋ ಹ್ಯಾದದಾಯನ್ನ್ ।
ತ-ನ್ನಯನ್ತ್ಯೇತಾ-ಸ್ಸೂರ್ಯಸ್ಯ ರಶ್ಮಯೋ ಯತ್ರ
ದೇವಾನಾ-ಮ್ಪತಿರೇಕೋ-ಽಧಿವಾಸಃ ॥ 5॥

ಏಹ್ಯೇಹೀತಿ ತಮಾಹುತಯ-ಸ್ಸುವರ್ಚಸಃ
ಸೂರ್ಯಸ್ಯ ರಶ್ಮಿಭಿರ್ಯಜಮಾನಂ-ವಁಹನ್ತಿ ।
ಪ್ರಿಯಾಂ-ವಾಁಚಮಭಿವದನ್ತ್ಯೋ-ಽರ್ಚಯನ್ತ್ಯ
ಏಷ ವಃ ಪುಣ್ಯ-ಸ್ಸುಕೃತೋ ಬ್ರಹ್ಮಲೋಕಃ ॥ 6॥

ಪ್ಲವಾ ಹ್ಯೇತೇ ಅದೃಢಾ ಯಜ್ಞರೂಪಾ
ಅಷ್ಟಾದಶೋಕ್ತಮವರಂ-ಯೇಁಷು ಕರ್ಮ ।
ಏತಚ್ಛ್ರೇಯೋ ಯೇ-ಽಭಿನನ್ದನ್ತಿ ಮೂಢಾ
ಜರಾಮೃತ್ಯು-ನ್ತೇ ಪುನರೇವಾಪಿ ಯನ್ತಿ ॥ 7॥

ಅವಿದ್ಯಾಯಾಮನ್ತರೇ ವರ್ತಮಾನಾಃ
ಸ್ವಯ-ನ್ಧೀರಾಃ ಪಣ್ಡಿತ-ಮ್ಮನ್ಯಮಾನಾಃ ।
ಜಙ್ಘನ್ಯಮಾನಾಃ ಪರಿಯನ್ತಿ ಮೂಢಾ
ಅನ್ಧೇನೈವ ನೀಯಮಾನಾ ಯಥಾನ್ಧಾಃ ॥ 8॥

ಅವಿದ್ಯಾಯ-ಮ್ಬಹುಧಾ ವರ್ತಮಾನಾ ವಯಂ
ಕೃತಾರ್ಥಾ ಇತ್ಯಭಿಮನ್ಯನ್ತಿ ಬಾಲಾಃ ।
ಯ-ತ್ಕರ್ಮಿಣೋ ನ ಪ್ರವೇದಯನ್ತಿ ರಾಗಾತ್
ತೇನಾತುರಾಃ, ಖ್ಷೀಣಲೋಕಾಶ್ಚ್ಯವನ್ತೇ ॥ 9॥

ಇಷ್ಟಾಪೂರ್ತ-ಮ್ಮನ್ಯಮಾನಾ ವರಿಷ್ಠಂ
ನಾನ್ಯಚ್ಛ್ರೇಯೋ ವೇದಯನ್ತೇ ಪ್ರಮೂಢಾಃ ।
ನಾಕಸ್ಯ ಪೃಷ್ಠೇ ತೇ ಸುಕೃತೇ-ಽನುಭೂತ್ವೇಮಂ
ಲೋಕಂ ಹೀನತರಂ-ವಾಁ ವಿಶನ್ತಿ ॥ 10॥

ತಪಸ್ಶ್ರದ್ಧೇ ಯೇ ಹ್ಯುಪವಸನ್ತ್ಯರಣ್ಯೇ
ಶಾನ್ತಾ ವಿದ್ವಾಂಸೋ ಭೈಖ್ಷ್ಯಚರ್ಯಾ-ಞ್ಚರನ್ತಃ ।
ಸೂರ್ಯದ್ವಾರೇಣ ತೇ ವಿರಜಾಃ ಪ್ರಯಾನ್ತಿ
ಯತ್ರಾಮೃತ-ಸ್ಸ ಪುರುಷೋ ಹ್ಯವ್ಯಯಾತ್ಮಾ ॥ 11॥

ಪರೀಖ್ಷ್ಯ ಲೋಕಾನ್ ಕರ್ಮಚಿತಾ-ನ್ಬ್ರಾಹ್ಮಣೋ
ನಿರ್ವೇದಮಾಯಾನ್ನಾಸ್ತ್ಯಕೃತಃ ಕೃತೇನ ।
ತದ್ವಿಜ್ಞಾನಾರ್ಥಂ ಸ ಗುರುಮೇವಾಭಿಗಚ್ಛೇತ್
ಸಮಿತ್ಪಾಣಿ-ಶ್ಶ್ರೋತ್ರಿಯ-ಮ್ಬ್ರಹ್ಮನಿಷ್ಠಮ್ ॥ 12॥

ತಸ್ಮೈ ಸ ವಿದ್ವಾನುಪಸನ್ನಾಯ ಸಮ್ಯಕ್
ಪ್ರಶಾನ್ತಚಿತ್ತಾಯ ಶಮಾನ್ವಿತಾಯ ।
ಯೇನಾಖ್ಷರ-ಮ್ಪುರುಷಂ-ವೇಁದ ಸತ್ಯ-ಮ್ಪ್ರೋವಾಚ
ತಾ-ನ್ತತ್ತ್ವತೋ ಬ್ರಹ್ಮವಿದ್ಯಾಮ್ ॥ 13॥

॥ ಇತಿ ಮುಣ್ಡಕೋಪನಿಷದಿ ಪ್ರಥಮಮುಣ್ಡಕೇ ದ್ವಿತೀಯಃ ಖಣ್ಡಃ ॥