ಓ-ಮ್ಭ॒ದ್ರ-ಙ್ಕರ್ಣೇ॑ಭಿ-ಶ್ಶೃಣು॒ಯಾಮ॑ ದೇವಾಃ । ಭ॒ದ್ರ-ಮ್ಪ॑ಶ್ಯೇಮಾ॒ಖ್ಷಭಿ॒-ರ್ಯಜ॑ತ್ರಾಃ । ಸ್ಥಿ॒ರೈರಙ್ಗೈ᳚ಸ್ತುಷ್ಟು॒ವಾಗ್ಂ ಸ॑ಸ್ತ॒ನೂಭಿಃ॑ । ವ್ಯಶೇ॑ಮ ದೇ॒ವಹಿ॑ತಂ॒-ಯಁದಾಯುಃ॑ । ಸ್ವ॒ಸ್ತಿ ನ॒ ಇನ್ದ್ರೋ॑ ವೃ॒ದ್ಧಶ್ರ॑ವಾಃ । ಸ್ವ॒ಸ್ತಿ ನಃ॑ ಪೂ॒ಷಾ ವಿ॒ಶ್ವವೇ॑ದಾಃ । ಸ್ವ॒ಸ್ತಿ ನ॒ಸ್ತಾರ್ಖ್ಷ್ಯೋ॒ ಅರಿ॑ಷ್ಟನೇಮಿಃ । ಸ್ವ॒ಸ್ತಿ ನೋ॒ ಬೃಹ॒ಸ್ಪತಿ॑-ರ್ದಧಾತು ॥
ಓಂ ಶಾನ್ತಿ॒-ಶ್ಶಾನ್ತಿ॒-ಶ್ಶಾನ್ತಿಃ॑ ॥

॥ ಓ-ಮ್ಬ್ರಹ್ಮಣೇ ನಮಃ ॥

॥ ಪ್ರಥಮಮುಣ್ಡಕೇ ಪ್ರಥಮಃ ಖಣ್ಡಃ ॥

ಓ-ಮ್ಬ್ರಹ್ಮಾ ದೇವಾನಾ-ಮ್ಪ್ರಥಮ-ಸ್ಸಮ್ಬಭೂವ ವಿಶ್ವಸ್ಯ ಕರ್ತಾ
ಭುವನಸ್ಯ ಗೋಪ್ತಾ । ಸ ಬ್ರಹ್ಮವಿದ್ಯಾಂ ಸರ್ವವಿದ್ಯಾಪ್ರತಿಷ್ಠಾಮಥರ್ವಾಯ
ಜ್ಯೇಷ್ಠಪುತ್ರಾಯ ಪ್ರಾಹ ॥ 1॥

ಅಥರ್ವಣೇ ಯಾ-ಮ್ಪ್ರವದೇತ ಬ್ರಹ್ಮಾ-ಽಥರ್ವಾ ತಂ
ಪುರೋವಾಚಾಙ್ಗಿರೇ ಬ್ರಹ್ಮವಿದ್ಯಾಮ್ ।
ಸ ಭಾರದ್ವಾಜಾಯ ಸತ್ಯವಾಹಾಯ ಪ್ರಾಹ
ಭಾರದ್ವಾಜೋ-ಽಙ್ಗಿರಸೇ ಪರಾವರಾಮ್ ॥ 2॥

ಶೌನಕೋ ಹ ವೈ ಮಹಾಶಾಲೋ-ಽಙ್ಗಿರಸಂ-ವಿಁಧಿವದುಪಸನ್ನಃ ಪಪ್ರಚ್ಛ ।
ಕಸ್ಮಿನ್ನು ಭಗವೋ ವಿಜ್ಞಾತೇ ಸರ್ವಮಿದಂ-ವಿಁಜ್ಞಾತ-ಮ್ಭವತೀತಿ ॥ 3॥

ತಸ್ಮೈ ಸ ಹೋವಾಚ ।
ದ್ವೇ ವಿದ್ಯೇ ವೇದಿತವ್ಯೇ ಇತಿ ಹ ಸ್ಮ
ಯದ್ಬ್ರಹ್ಮವಿದೋ ವದನ್ತಿ ಪರಾ ಚೈವಾಪರಾ ಚ ॥ 4॥

ತತ್ರಾಪರಾ ಋಗ್ವೇದೋ ಯಜುರ್ವೇದ-ಸ್ಸಾಮವೇದೋ-ಽಥರ್ವವೇದಃ
ಶಿಖ್ಷಾ ಕಲ್ಪೋ ವ್ಯಾಕರಣ-ನ್ನಿರುಕ್ತ-ಞ್ಛನ್ದೋ ಜ್ಯೋತಿಷಮಿತಿ ।
ಅಥ ಪರಾ ಯಯಾ ತದಖ್ಷರಮಧಿಗಮ್ಯತೇ ॥ 5॥

ಯತ್ತದದ್ರೇಶ್ಯಮಗ್ರಾಹ್ಯಮಗೋತ್ರಮವರ್ಣ-
ಮಚಖ್ಷುಸ್ಶ್ರೋತ್ರ-ನ್ತದಪಾಣಿಪಾದಮ್ ।
ನಿತ್ಯಂ-ವಿಁಭುಂ ಸರ್ವಗತಂ ಸುಸೂಖ್ಷ್ಮಂ
ತದವ್ಯಯಂ-ಯಁದ್ಭೂತಯೋನಿ-ಮ್ಪರಿಪಶ್ಯನ್ತಿ ಧೀರಾಃ ॥ 6॥

ಯಥೋರ್ಣನಾಭಿ-ಸ್ಸೃಜತೇ ಗೃಹ್ಣತೇ ಚ
ಯಥಾ ಪೃಥಿವ್ಯಾಮೋಷಧಯ-ಸ್ಸಮ್ಭವನ್ತಿ ।
ಯಥಾ ಸತಃ ಪುರುಷಾ-ತ್ಕೇಶಲೋಮಾನಿ
ತಥಾ-ಽಖ್ಷರಾ-ಥ್ಸಮ್ಭವತೀಹ ವಿಶ್ವಮ್ ॥ 7॥

ತಪಸಾ ಚೀಯತೇ ಬ್ರಹ್ಮ ತತೋ-ಽನ್ನಮಭಿಜಾಯತೇ ।
ಅನ್ನಾ-ತ್ಪ್ರಾಣೋ ಮನ-ಸ್ಸತ್ಯಂ-ಲೋಁಕಾಃ ಕರ್ಮಸು ಚಾಮೃತಮ್ ॥ 8॥

ಯ-ಸ್ಸರ್ವಜ್ಞ-ಸ್ಸರ್ವವಿದ್ಯಸ್ಯ ಜ್ಞಾನಮಯ-ನ್ತಪಃ ।
ತಸ್ಮಾದೇತದ್ಬ್ರಹ್ಮ ನಾಮ ರೂಪಮನ್ನ-ಞ್ಚ ಜಾಯತೇ ॥ 9॥

॥ ಇತಿ ಮುಣ್ಡಕೋಪನಿಷದಿ ಪ್ರಥಮಮುಣ್ಡಕೇ ಪ್ರಥಮಃ ಖಣ್ಡಃ ॥