ಓಂ ಸ॒ಹ ನಾ॑ವವತು । ಸ॒ಹ ನೌ॑ ಭುನಕ್ತು । ಸ॒ಹ ವೀ॒ರ್ಯ॑-ಙ್ಕರವಾವಹೈ ।
ತೇ॒ಜ॒ಸ್ವಿನಾ॒ವಧೀ॑ತಮಸ್ತು॒ ಮಾ ವಿ॑ದ್ವಿಷಾ॒ವಹೈ᳚ ॥
ಓಂ ಶಾನ್ತಿ॒-ಶ್ಶಾನ್ತಿ॒-ಶ್ಶಾನ್ತಿಃ॑ ॥
ಓಂ ಅಥ ಪುರುಷೋ ಹ ವೈ ನಾರಾಯಣೋ-ಽಕಾಮಯತ ಪ್ರಜಾ-ಸ್ಸೃ॑ಜೇಯೇ॒ತಿ ।
ನಾ॒ರಾ॒ಯ॒ಣಾತ್ಪ್ರಾ॑ಣೋ ಜಾ॒ಯತೇ । ಮನ-ಸ್ಸರ್ವೇನ್ದ್ರಿ॑ಯಾಣಿ॒ ಚ ।
ಖಂ-ವಾಁಯುರ್ಜ್ಯೋತಿರಾಪಃ ಪೃಥಿವೀ ವಿಶ್ವ॑ಸ್ಯ ಧಾ॒ರಿಣೀ ।
ನಾ॒ರಾ॒ಯ॒ಣಾದ್ಬ್ರ॑ಹ್ಮಾ ಜಾ॒ಯತೇ ।
ನಾ॒ರಾ॒ಯ॒ಣಾದ್ರು॑ದ್ರೋ ಜಾ॒ಯತೇ ।
ನಾ॒ರಾ॒ಯ॒ಣಾದಿ॑ನ್ದ್ರೋ ಜಾ॒ಯತೇ ।
ನಾ॒ರಾ॒ಯ॒ಣಾತ್ಪ್ರಜಾಪತಯಃ ಪ್ರ॑ಜಾಯ॒ನ್ತೇ ।
ನಾ॒ರಾ॒ಯ॒ಣಾದ್ದ್ವಾದಶಾದಿತ್ಯಾ ರುದ್ರಾ ವಸವಸ್ಸರ್ವಾಣಿ ಚ ಛ॑ನ್ದಾಗ್ಂ॒ಸಿ ।
ನಾ॒ರಾ॒ಯ॒ಣಾದೇವ ಸಮು॑ತ್ಪದ್ಯ॒ನ್ತೇ ।
ನಾ॒ರಾ॒ಯ॒ಣೇ ಪ್ರ॑ವರ್ತ॒ನ್ತೇ ।
ನಾ॒ರಾ॒ಯ॒ಣೇ ಪ್ರ॑ಲೀಯ॒ನ್ತೇ ॥
ಓಮ್ । ಅಥ ನಿತ್ಯೋ ನಾ॑ರಾಯ॒ಣಃ । ಬ್ರ॒ಹ್ಮಾ ನಾ॑ರಾಯ॒ಣಃ ।
ಶಿ॒ವಶ್ಚ॑ ನಾರಾಯ॒ಣಃ । ಶ॒ಕ್ರಶ್ಚ॑ ನಾರಾಯ॒ಣಃ ।
ದ್ಯಾ॒ವಾ॒ಪೃ॒ಥಿ॒ವ್ಯೌ ಚ॑ ನಾರಾಯ॒ಣಃ । ಕಾ॒ಲಶ್ಚ॑ ನಾರಾಯ॒ಣಃ ।
ದಿ॒ಶಶ್ಚ॑ ನಾರಾಯ॒ಣಃ । ಊ॒ರ್ಧ್ವಶ್ಚ॑ ನಾರಾಯ॒ಣಃ ।
ಅ॒ಧಶ್ಚ॑ ನಾರಾಯ॒ಣಃ । ಅ॒ನ್ತ॒ರ್ಬ॒ಹಿಶ್ಚ॑ ನಾರಾಯ॒ಣಃ ।
ನಾರಾಯಣ ಏವೇ॑ದಗ್ಂ ಸ॒ರ್ವಮ್ ।
ಯದ್ಭೂ॒ತಂ-ಯಁಚ್ಚ॒ ಭವ್ಯಮ್᳚ ।
ನಿಷ್ಕಲೋ ನಿರಞ್ಜನೋ ನಿರ್ವಿಕಲ್ಪೋ ನಿರಾಖ್ಯಾತ-ಶ್ಶುದ್ಧೋ ದೇವ
ಏಕೋ॑ ನಾರಾಯ॒ಣಃ । ನ ದ್ವಿ॒ತೀಯೋ᳚ಸ್ತಿ॒ ಕಶ್ಚಿ॑ತ್ ।
ಯ ಏ॑ವಂ-ವೇಁ॒ದ ।
ಸ ವಿಷ್ಣುರೇವ ಭವತಿ ಸ ವಿಷ್ಣುರೇ॑ವ ಭ॒ವತಿ ॥
ಓಮಿತ್ಯ॑ಗ್ರೇ ವ್ಯಾ॒ಹರೇತ್ । ನಮ ಇ॑ತಿ ಪ॒ಶ್ಚಾತ್ ।
ನಾ॒ರಾ॒ಯ॒ಣಾಯೇತ್ಯು॑ಪರಿ॒ಷ್ಟಾತ್ ।
ಓಮಿ॑ತ್ಯೇಕಾ॒ಖ್ಷರಮ್ । ನಮ ಇತಿ॑ ದ್ವೇ ಅ॒ಖ್ಷರೇ ।
ನಾ॒ರಾ॒ಯ॒ಣಾಯೇತಿ ಪಞ್ಚಾ᳚ಖ್ಷರಾ॒ಣಿ ।
ಏತದ್ವೈ ನಾರಾಯಣಸ್ಯಾಷ್ಟಾಖ್ಷ॑ರ-ಮ್ಪ॒ದಮ್ ।
ಯೋ ಹ ವೈ ನಾರಾಯಣಸ್ಯಾಷ್ಟಾಖ್ಷರ-ಮ್ಪದ॑ಮಧ್ಯೇ॒ತಿ ।
ಅನಪಬ್ರವಸ್ಸರ್ವಮಾ॑ಯುರೇ॒ತಿ ।
ವಿನ್ದತೇ ಪ್ರಾ॑ಜಾಪ॒ತ್ಯಗ್ಂ ರಾಯಸ್ಪೋಷ॑-ಙ್ಗೌಪ॒ತ್ಯಮ್ ।
ತತೋ-ಽಮೃತತ್ವಮಶ್ನುತೇ ತತೋ-ಽಮೃತತ್ವಮಶ್ನು॑ತ ಇ॒ತಿ ।
ಯ ಏ॑ವಂ-ವೇಁ॒ದ ॥
ಪ್ರತ್ಯಗಾನನ್ದ-ಮ್ಬ್ರಹ್ಮ ಪುರುಷ-ಮ್ಪ್ರಣವ॑ಸ್ವರೂ॒ಪಮ್ ।
ಅಕಾರ ಉಕಾರ ಮಕಾ॑ರ ಇ॒ತಿ ।
ತಾನೇಕಧಾ ಸಮಭರತ್ತದೇತ॑ದೋಮಿ॒ತಿ ।
ಯಮುಕ್ತ್ವಾ॑ ಮುಚ್ಯ॑ತೇ ಯೋ॒ಗೀ॒ ಜ॒ನ್ಮ॒ಸಂಸಾ॑ರಬ॒ನ್ಧನಾತ್ ।
ಓ-ನ್ನಮೋ ನಾರಾಯಣಾಯೇತಿ ಮ॑ನ್ತ್ರೋಪಾ॒ಸಕಃ ।
ವೈಕುಣ್ಠಭುವನಲೋಕ॑-ಙ್ಗಮಿ॒ಷ್ಯತಿ ।
ತದಿದ-ಮ್ಪರ-ಮ್ಪುಣ್ಡರೀಕಂ-ವಿಁ॑ಜ್ಞಾನ॒ಘನಮ್ ।
ತಸ್ಮಾತ್ತದಿದಾ॑ವನ್ಮಾ॒ತ್ರಮ್ ।
ಬ್ರಹ್ಮಣ್ಯೋ ದೇವ॑ಕೀಪು॒ತ್ರೋ॒ ಬ್ರಹ್ಮಣ್ಯೋ ಮ॑ಧುಸೂ॒ದನೋಮ್ ।
ಸರ್ವಭೂತಸ್ಥಮೇಕ॑-ನ್ನಾರಾ॒ಯಣಮ್ ।
ಕಾರಣರೂಪಮಕಾರ ಪ॑ರಬ್ರ॒ಹ್ಮೋಮ್ ।
ಏತದಥರ್ವ ಶಿರೋ॑ಯೋ-ಽಧೀ॒ತೇ ಪ್ರಾ॒ತರ॑ಧೀಯಾ॒ನೋ॒ ರಾತ್ರಿಕೃತ-ಮ್ಪಾಪ॑-ನ್ನಾಶ॒ಯತಿ ।
ಸಾ॒ಯಮ॑ಧೀಯಾ॒ನೋ॒ ದಿವಸಕೃತ-ಮ್ಪಾಪ॑-ನ್ನಾಶ॒ಯತಿ ।
ಮಾಧ್ಯನ್ದಿನಮಾದಿತ್ಯಾಭಿಮುಖೋ॑-ಽಧೀಯಾ॒ನಃ॒ ಪಞ್ಚಪಾತಕೋಪಪಾತಕಾ᳚ತ್ಪ್ರಮು॒ಚ್ಯತೇ ।
ಸರ್ವ ವೇದ ಪಾರಾಯಣ ಪು॑ಣ್ಯಂ-ಲಁ॒ಭತೇ ।
ನಾರಾಯಣಸಾಯುಜ್ಯಮ॑ವಾಪ್ನೋ॒ತಿ॒ ನಾರಾಯಣ ಸಾಯುಜ್ಯಮ॑ವಾಪ್ನೋ॒ತಿ ।
ಯ ಏ॑ವಂ-ವೇಁ॒ದ । ಇತ್ಯು॑ಪ॒ನಿಷ॑ತ್ ॥
ಓಂ ಸ॒ಹ ನಾ॑ವವತು । ಸ॒ಹ ನೌ॑ ಭುನಕ್ತು । ಸ॒ಹ ವೀ॒ರ್ಯ॑-ಙ್ಕರವಾವಹೈ ।
ತೇ॒ಜ॒ಸ್ವಿನಾ॒ವಧೀ॑ತಮಸ್ತು॒ ಮಾ ವಿ॑ದ್ವಿಷಾ॒ವಹೈ᳚ ॥
ಓಂ ಶಾನ್ತಿ॒-ಶ್ಶಾನ್ತಿ॒-ಶ್ಶಾನ್ತಿಃ॑ ॥
