దేవ్యువాచ
దేవదేవ! మహాదేవ! త్రికాలజ్ఞ! మహేశ్వర!
కరుణాకర దేవేశ! భక్తానుగ్రహకారక! ॥
అష్టోత్తర శతం లక్ష్మ్యాః శ్రోతుమిచ్ఛామి తత్త్వతః ॥

ఈశ్వర ఉవాచ
దేవి! సాధు మహాభాగే మహాభాగ్య ప్రదాయకమ్ ।
సర్వైశ్వర్యకరం పుణ్యం సర్వపాప ప్రణాశనమ్ ॥
సర్వదారిద్ర్య శమనం శ్రవణాద్భుక్తి ముక్తిదమ్ ।
రాజవశ్యకరం దివ్యం గుహ్యాద్-గుహ్యతరం పరమ్ ॥
దుర్లభం సర్వదేవానాం చతుష్షష్టి కళాస్పదమ్ ।
పద్మాదీనాం వరాన్తానాం నిధీనాం నిత్యదాయకమ్ ॥
సమస్త దేవ సంసేవ్యం అణిమాద్యష్ట సిద్ధిదమ్ ।
కిమత్ర బహునోక్తేన దేవీ ప్రత్యక్షదాయకమ్ ॥
తవ ప్రీత్యాద్య వక్ష్యామి సమాహితమనాశ్శృణు ।
అష్టోత్తర శతస్యాస్య మహాలక్ష్మిస్తు దేవతా ॥
క్లీం బీజ పదమిత్యుక్తం శక్తిస్తు భువనేశ్వరీ ।
అఙ్గన్యాసః కరన్యాసః స ఇత్యాది ప్రకీర్తితః ॥

ధ్యానం
వన్దే పద్మకరాం ప్రసన్నవదనాం సౌభాగ్యదాం భాగ్యదాం
హస్తాభ్యామభయప్రదాం మణిగణైః నానావిధైః భూషితామ్ ।
భక్తాభీష్ట ఫలప్రదాం హరిహర బ్రహ్మాధిభిస్సేవితాం
పార్శ్వే పఙ్కజ శఙ్ఖపద్మ నిధిభిః యుక్తాం సదా శక్తిభిః ॥

సరసిజ నయనే సరోజహస్తే ధవళ తరాంశుక గన్ధమాల్య శోభే ।
భగవతి హరివల్లభే మనోజ్ఞే త్రిభువన భూతికరి ప్రసీదమహ్యమ్ ॥

ఓం
ప్రకృతిం వికృతిం విద్యాం సర్వభూత-హితప్రదామ్ ।
శ్రద్ధాం విభూతిం సురభిం నమామి పరమాత్మికామ్ ॥ 1 ॥

వాచం పద్మాలయాం పద్మాం శుచిం స్వాహాం స్వధాం సుధామ్ ।
ధన్యాం హిరణ్యయీం లక్ష్మీం నిత్యపుష్టాం విభావరీమ్ ॥ 2 ॥

అదితిం చ దితిం దీప్తాం వసుధాం వసుధారిణీమ్ ।
నమామి కమలాం కాన్తాం కామాక్షీం క్రోధసమ్భవామ్ [కామ్యాం క్షీరోదసమ్భవామ్] ॥ 3 ॥

అనుగ్రహప్రదాం బుద్ధి-మనఘాం హరివల్లభామ్ ।
అశోకా-మమృతాం దీప్తాం లోకశోకవినాశినీమ్ ॥ 4 ॥

నమామి ధర్మనిలయాం కరుణాం లోకమాతరమ్ ।
పద్మప్రియాం పద్మహస్తాం పద్మాక్షీం పద్మసున్దరీమ్ ॥ 5 ॥

పద్మోద్భవాం పద్మముఖీం పద్మనాభప్రియాం రమామ్ ।
పద్మమాలాధరాం దేవీం పద్మినీం పద్మగన్ధినీమ్ ॥ 6 ॥

పుణ్యగన్ధాం సుప్రసన్నాం ప్రసాదాభిముఖీం ప్రభామ్ ।
నమామి చన్ద్రవదనాం చన్ద్రాం చన్ద్రసహోదరీమ్ ॥ 7 ॥

చతుర్భుజాం చన్ద్రరూపా-మిన్దిరా-మిన్దుశీతలామ్ ।
ఆహ్లాద జననీం పుష్టిం శివాం శివకరీం సతీమ్ ॥ 8 ॥

విమలాం విశ్వజననీం తుష్టిం దారిద్ర్యనాశినీమ్ ।
ప్రీతిపుష్కరిణీం శాన్తాం శుక్లమాల్యామ్బరాం శ్రియమ్ ॥ 9 ॥

భాస్కరీం బిల్వనిలయాం వరారోహాం యశస్వినీమ్ ।
వసున్ధరా ముదారాఙ్గాం హరిణీం హేమమాలినీమ్ ॥ 10 ॥

ధనధాన్యకరీం సిద్ధిం స్త్రైణసౌమ్యాం [సదాసౌమ్యాం] శుభప్రదామ్ ।
నృపవేశ్మగతాం నన్దాం వరలక్ష్మీం వసుప్రదామ్ ॥ 11 ॥

శుభాం హిరణ్యప్రాకారాం సముద్రతనయాం జయామ్ ।
నమామి మఙ్గళాం దేవీం విష్ణువక్షఃస్థలస్థితామ్ ॥ 12 ॥

విష్ణుపత్నీం, ప్రసన్నాక్షీం నారాయణసమాశ్రితామ్ ।
దారిద్ర్యధ్వంసినీం దేవీం సర్వోపద్రవవారిణీమ్ ॥ 13 ॥

నవదుర్గాం మహాకాళీం బ్రహ్మవిష్ణుశివాత్మికామ్ ।
త్రికాలజ్ఞానసమ్పన్నాం నమామి భువనేశ్వరీమ్ ॥ 14 ॥

లక్ష్మీం క్షీరసముద్రరాజ తనయాం శ్రీరఙ్గధామేశ్వరీమ్ ।
దాసీభూత సమస్తదేవ వనితాం లోకైక దీపాఙ్కురామ్ ॥
శ్రీమన్మన్ద కటాక్ష లబ్ధ విభవద్-బ్రహ్మేన్ద్ర గఙ్గాధరామ్ ।
త్వాం త్రైలోక్య కుటుమ్బినీం సరసిజాం వన్దే ముకున్దప్రియామ్ ॥ 15 ॥

మాతర్నమామి! కమలే! కమలాయతాక్షి!
శ్రీ విష్ణు హృత్-కమలవాసిని! విశ్వమాతః!
క్షీరోదజే కమల కోమల గర్భగౌరి!
లక్ష్మీ! ప్రసీద సతతం సమతాం శరణ్యే ॥ 16 ॥

త్రికాలం యో జపేత్ విద్వాన్ షణ్మాసం విజితేన్ద్రియః ।
దారిద్ర్య ధ్వంసనం కృత్వా సర్వమాప్నోత్-యయత్నతః ।
దేవీనామ సహస్రేషు పుణ్యమష్టోత్తరం శతమ్ ।
యేన శ్రియ మవాప్నోతి కోటిజన్మ దరిద్రతః ॥ 17 ॥

భృగువారే శతం ధీమాన్ పఠేత్ వత్సరమాత్రకమ్ ।
అష్టైశ్వర్య మవాప్నోతి కుబేర ఇవ భూతలే ॥
దారిద్ర్య మోచనం నామ స్తోత్రమమ్బాపరం శతమ్ ।
యేన శ్రియ మవాప్నోతి కోటిజన్మ దరిద్రతః ॥ 18 ॥

భుక్త్వాతు విపులాన్ భోగాన్ అన్తే సాయుజ్యమాప్నుయాత్ ।
ప్రాతఃకాలే పఠేన్నిత్యం సర్వ దుఃఖోప శాన్తయే ।
పఠన్తు చిన్తయేద్దేవీం సర్వాభరణ భూషితామ్ ॥ 19 ॥

ఇతి శ్రీ లక్ష్మ్యష్టోత్తరశతనామస్తోత్రం సమ్పూర్ణం