శ్రీరామో రామభద్రశ్చ రామచన్ద్రశ్చ శాశ్వతః ।
రాజీవలోచనః శ్రీమాన్రాజేన్ద్రో రఘుపుఙ్గవః ॥ 1 ॥

జానకీవల్లభో జైత్రో జితామిత్రో జనార్దనః ।
విశ్వామిత్రప్రియో దాన్తః శరణత్రాణతత్పరః ॥ 2 ॥

వాలిప్రమథనో వాగ్మీ సత్యవాక్సత్యవిక్రమః ।
సత్యవ్రతో వ్రతధరః సదాహనుమదాశ్రితః ॥ 3 ॥

కౌసలేయః ఖరధ్వంసీ విరాధవధపణ్డితః ।
విభీషణపరిత్రాతా హరకోదణ్డఖణ్డనః ॥ 4 ॥

సప్తతాలప్రభేత్తా చ దశగ్రీవశిరోహరః ।
జామదగ్న్యమహాదర్పదలనస్తాటకాన్తకః ॥ 5 ॥

వేదాన్తసారో వేదాత్మా భవరోగస్య భేషజమ్ ।
దూషణత్రిశిరోహన్తా త్రిమూర్తిస్త్రిగుణాత్మకః ॥ 6 ॥

త్రివిక్రమస్త్రిలోకాత్మా పుణ్యచారిత్రకీర్తనః ।
త్రిలోకరక్షకో ధన్వీ దణ్డకారణ్యకర్తనః ॥ 7 ॥

అహల్యాశాపశమనః పితృభక్తో వరప్రదః ।
జితేన్ద్రియో జితక్రోధో జితామిత్రో జగద్గురుః ॥ 8 ॥

ఋక్షవానరసఙ్ఘాతీ చిత్రకూటసమాశ్రయః ।
జయన్తత్రాణవరదః సుమిత్రాపుత్రసేవితః ॥ 9 ॥

సర్వదేవాదిదేవశ్చ మృతవానరజీవనః ।
మాయామారీచహన్తా చ మహాదేవో మహాభుజః ॥ 10 ॥

సర్వదేవస్తుతః సౌమ్యో బ్రహ్మణ్యో మునిసంస్తుతః ।
మహాయోగీ మహోదారః సుగ్రీవేప్సితరాజ్యదః ॥ 11 ॥

సర్వపుణ్యాధికఫలః స్మృతసర్వాఘనాశనః ।
ఆదిపురుషః పరమపురుషో మహాపూరుష ఏవ చ ॥ 12 ॥

పుణ్యోదయో దయాసారః పురాణపురుషోత్తమః ।
స్మితవక్త్రో మితాభాషీ పూర్వభాషీ చ రాఘవః ॥ 13 ॥

అనన్తగుణగమ్భీరో ధీరోదాత్తగుణోత్తమః ।
మాయామానుషచారిత్రో మహాదేవాదిపూజితః ॥ 14 ॥

సేతుకృజ్జితవారాశిః సర్వతీర్థమయో హరిః ।
శ్యామాఙ్గః సున్దరః శూరః పీతవాసా ధనుర్ధరః ॥ 15 ॥

సర్వయజ్ఞాధిపో యజ్వా జరామరణవర్జితః ।
శివలిఙ్గప్రతిష్ఠాతా సర్వావగుణవర్జితః ॥ 16 ॥

పరమాత్మా పరం బ్రహ్మ సచ్చిదానన్దవిగ్రహః ।
పరఞ్జ్యోతిః పరన్ధామ పరాకాశః పరాత్పరః ॥ 17 ॥

పరేశః పారగః పారః సర్వదేవాత్మకః పరః ॥

ఏవం శ్రీరామచన్ద్రస్య నామ్నామష్టోత్తరం శతమ్

ఇతి శ్రీ రామాష్టోత్తర శతనామస్తోత్రం సమ్పూర్ణమ్