ආයුඃ කර්ම ච විත්තං ච විද්යා නිධනමේව ච ।
පංචෛතානි හි සෘජ්යංතේ ගර්භස්ථස්යෛව දේහිනඃ ॥ 01 ॥

සාධුභ්යස්තේ නිවර්තංතේ පුත්රමිත්රාණි බාංධවාඃ ।
යේ ච තෛඃ සහ ගංතාරස්තද්ධර්මාත්සුකෘතං කුලම් ॥ 02 ॥

දර්ශනධ්යානසංස්පර්ශෛර්මත්සී කූර්මී ච පක්ෂිණී ।
ශිශුං පාලයතේ නිත්යං තථා සජ්ජන-සංගතිඃ ॥ 03 ॥

යාවත්ස්වස්ථෝ හ්යයං දේහෝ යාවන්මෘත්යුශ්ච දූරතඃ ।
තාවදාත්මහිතං කුර්යාත්ප්රාණාංතේ කිං කරිෂ්යති ॥ 04 ॥

කාමධේනුගුණා විද්යා හ්යකාලේ ඵලදායිනී ।
ප්රවාසේ මාතෘසදෘශී විද්යා ගුප්තං ධනං ස්මෘතම් ॥ 05 ॥

ඒකෝऽපි ගුණවාන්පුත්රෝ නිර්ගුණේන ශතේන කිම් ।
ඒකශ්චංද්රස්තමෝ හංති න ච තාරාඃ සහස්රශඃ ॥ 06 ॥

මූර්ඛශ්චිරායුර්ජාතෝऽපි තස්මාජ්ජාතමෘතෝ වරඃ ।
මෘතඃ ස චාල්පදුඃඛාය යාවජ්ජීවං ජඩෝ දහේත් ॥ 07 ॥

කුග්රාමවාසඃ කුලහීනසේවා
කුභෝජනං ක්රෝධමුඛී ච භාර්යා ।
පුත්රශ්ච මූර්ඛෝ විධවා ච කන්යා
විනාග්නිනා ෂට්ප්රදහංති කායම් ॥ 08 ॥

කිං තයා ක්රියතේ ධේන්වා යා න දෝග්ධ්රී න ගර්භිණී ।
කෝऽර්ථඃ පුත්රේණ ජාතේන යෝ න විද්වාන් න භක්තිමාන් ॥ 09 ॥

සංසාරතාපදග්ධානාං ත්රයෝ විශ්රාංතිහේතවඃ ।
අපත්යං ච කලත්රං ච සතාං සංගතිරේව ච ॥ 10 ॥

සකෘජ්ජල්පංති රාජානඃ සකෘජ්ජල්පංති පංඩිතාඃ ।
සකෘත්කන්යාඃ ප්රදීයංතේ ත්රීණ්යේතානි සකෘත්සකෘත් ॥ 11 ॥

ඒකාකිනා තපෝ ද්වාභ්යාං පඨනං ගායනං ත්රිභිඃ ।
චතුර්භිර්ගමනං ක්ෂේත්රං පංචභිර්බහුභී රණඃ ॥ 12 ॥

සා භාර්යා යා ශුචිර්දක්ෂා සා භාර්යා යා පතිව්රතා ।
සා භාර්යා යා පතිප්රීතා සා භාර්යා සත්යවාදිනී ॥ 13 ॥

අපුත්රස්ය ගෘහං ශූන්යං දිශඃ ශූන්යාස්ත්වබාංධවාඃ ।
මූර්ඛස්ය හෘදයං ශූන්යං සර්වශූන්යා දරිද්රතා ॥ 14 ॥

අනභ්යාසේ විෂං ශාස්ත්රමජීර්ණේ භෝජනං විෂම් ।
දරිද්රස්ය විෂං ගෝෂ්ඨී වෘද්ධස්ය තරුණී විෂම් ॥ 15 ॥

ත්යජේද්ධර්මං දයාහීනං විද්යාහීනං ගුරුං ත්යජේත් ।
ත්යජේත්ක්රෝධමුඛීං භාර්යාං නිඃස්නේහාන්බාංධවාංස්ත්යජේත් ॥ 16 ॥

අධ්වා ජරා දේහවතාං පර්වතානාං ජලං ජරා ।
අමෛථුනං ජරා ස්ත්රීණාං වස්ත්රාණාමාතපෝ ජරා ॥ 17 ॥

කඃ කාලඃ කානි මිත්රාණි කෝ දේශඃ කෞ ව්යයාගමෞ ।
කශ්චාහං කා ච මේ ශක්තිරිති චිංත්යං මුහුර්මුහුඃ ॥ 18 ॥

අග්නිර්දේවෝ ද්විජාතීනාං මුනීනාං හෘදි දෛවතම් ।
ප්රතිමා ස්වල්පබුද්ධීනාං සර්වත්ර සමදර්ශිනඃ ॥ 19 ॥