මුහූර්තමපි ජීවේච්ච නරඃ ශුක්ලේන කර්මණා ।
න කල්පමපි කෂ්ටේන ලෝකද්වයවිරෝධිනා ॥ 01 ॥

ගතේ ශෝකෝ න කර්තව්යෝ භවිෂ්යං නෛව චිංතයේත් ।
වර්තමානේන කාලේන වර්තයංති විචක්ෂණාඃ ॥ 02 ॥

ස්වභාවේන හි තුෂ්යංති දේවාඃ සත්පුරුෂාඃ පිතා ।
ජ්ඤාතයඃ ස්නානපානාභ්යාං වාක්යදානේන පංඩිතාඃ ॥ 03 ॥

ආයුඃ කර්ම ච විත්තං ච විද්යා නිධනමේව ච ।
පංචෛතානි හි සෘජ්යංතේ ගර්භස්ථස්යෛව දේහිනඃ ॥ 04 (4.1) ॥

අහෝ බත විචිත්රාණි චරිතානි මහාත්මනාම් ।
ලක්ෂ්මීං තෘණාය මන්යංතේ තද්භාරේණ නමංති ච ॥ 05 ॥

යස්ය ස්නේහෝ භයං තස්ය ස්නේහෝ දුඃඛස්ය භාජනම් ।
ස්නේහමූලානි දුඃඛානි තානි ත්යක්ත්වා වසේත් සුඛම් ॥ 06 ॥

අනාගතවිධාතා ච ප්රත්යුත්පන්නමතිස්තථා ।
ද්වාවේතෞ සුඛමේධේතේ යද්භවිෂ්යෝ විනශ්යති ॥ 07 ॥

රාජ්ඤි ධර්මිණි ධර්මිෂ්ඨාඃ පාපේ පාපාඃ සමේ සමාඃ ।
රාජානමනුවර්තංතේ යථා රාජා තථා ප්රජාඃ ॥ 08 ॥

ජීවංතං මෘතවන්මන්යේ දේහිනං ධර්මවර්ජිතම් ।
මෘතෝ ධර්මේණ සංයුක්තෝ දීර්ඝජීවී න සංශයඃ ॥ 09 ॥

ධර්මාර්ථකාමමෝක්ෂාණාං යස්යෛකෝऽපි න විද්යතේ ।
අජාගලස්තනස්යේව තස්ය ජන්ම නිරර්ථකම් ॥ 10 ॥

දහ්යමානාඃ සුතීව්රේණ නීචාඃ පරයශෝऽග්නිනා ।
අශක්තාස්තත්පදං ගංතුං තතෝ නිංඩාං ප්රකුර්වතේ ॥ 11 ॥

බංධාය විෂයාසංගෝ මුක්ත්යෛ නිර්විෂයං මනඃ ।
මන ඒව මනුෂ්යාණාං කාරණං බංධමෝක්ෂයෝඃ ॥ 12 ॥

දේහාභිමානේ ගලිතං ජ්ඤානේන පරමාත්මනි ।
යත්ර යත්ර මනෝ යාති තත්ර තත්ර සමාධයඃ ॥ 13 ॥

ඊප්සිතං මනසඃ සර්වං කස්ය සංපද්යතේ සුඛම් ।
දෛවායත්තං යතඃ සර්වං තස්මාත්සංතෝෂමාශ්රයේත් ॥ 14 ॥

යථා ධේනුසහස්රේෂු වත්සෝ ගච්ඡති මාතරම් ।
තථා යච්ච කෘතං කර්ම කර්තාරමනුගච්ඡති ॥ 15 ॥

අනවස්ථිතකාර්යස්ය න ජනේ න වනේ සුඛම් ।
ජනෝ දහති සංසර්ගාද්වනං සංගවිවර්ජනාත් ॥ 16 ॥

ඛනිත්වා හි ඛනිත්රේණ භූතලේ වාරි විංදති ।
තථා ගුරුගතාං විද්යාං ශුශ්රූෂුරධිගච්ඡති ॥ 17 ॥

කර්මායත්තං ඵලං පුංසාං බුද්ධිඃ කර්මානුසාරිණී ।
තථාපි සුධියශ්චාර්යා සුවිචාර්යෛව කුර්වතේ ॥ 18 ॥

ඒකාක්ෂරප්රදාතාරං යෝ ගුරුං නාභිවංදතේ ।
ශ්වානයෝනිශතං ගත්වා චාංඩාලේෂ්වභිජායතේ ॥ 19 ॥

යුගාංතේ ප්රචලේන්මේරුඃ කල්පාංතේ සප්ත සාගරාඃ ।
සාධවඃ ප්රතිපන්නාර්ථාන්න චලංති කදාචන ॥ 20 ॥

පෘථිව්යාං ත්රීණි රත්නානි ජලමන්නං සුභාෂිතම් ।
මූඪෛඃ පාෂාණඛංඩේෂු රත්නසංජ්ඤා විධීයතේ ॥ 21 ॥