අර්ථනාශං මනස්තාපං ගෘහේ දුශ්චරිතානි ච ।
වංචනං චාපමානං ච මතිමාන්න ප්රකාශයේත් ॥ 01 ॥

ධනධාන්යප්රයෝගේෂු විද්යාසංග්රහණේ තථා ।
ආහාරේ ව්යවහාරේ ච ත්යක්තලජ්ජඃ සුඛී භවේත් ॥ 02 ॥

සංතෝෂාමෘතතෘප්තානාං යත්සුඛං ශාංතිරේව ච ।
න ච තද්ධනලුබ්ධානාමිතශ්චේතශ්ච ධාවතාම් ॥ 03 ॥

සංතෝෂස්ත්රිෂු කර්තව්යඃ ස්වදාරේ භෝජනේ ධනේ ।
ත්රිෂු චෛව න කර්තව්යෝऽධ්යයනේ ජපදානයෝඃ ॥ 04 ॥

විප්රයෝර්විප්රවහ්න්යෝශ්ච දංපත්යෝඃ ස්වාමිභෘත්යයෝඃ ।
අංතරේණ න ගංතව්යං හලස්ය වෘෂභස්ය ච ॥ 05 ॥

පාදාභ්යාං න ස්පෘශේදග්නිං ගුරුං බ්රාහ්මණමේව ච ।
නෛව ගාං න කුමාරීං ච න වෘද්ධං න ශිශුං තථා ॥ 06 ॥

ශකටං පංචහස්තේන දශහස්තේන වාජිනම් ।
ගජං හස්තසහස්රේණ දේශත්යාගේන දුර්ජනම් ॥ 07 ॥

හස්තී අංකුශමාත්රේණ වාජී හස්තේන තාඩ්යතේ ।
ශ‍ඍංගී ලගුඩහස්තේන ඛඩ්ගහස්තේන දුර්ජනඃ ॥ 08 ॥

තුෂ්යංති භෝජනේ විප්රා මයූරා ඝනගර්ජිතේ ।
සාධවඃ පරසංපත්තෞ ඛලාඃ පරවිපත්තිෂු ॥ 09 ॥

අනුලෝමේන බලිනං ප්රතිලෝමේන දුර්ජනම් ।
ආත්මතුල්යබලං ශත්රුං විනයේන බලේන වා ॥ 10 ॥

බාහුවීර්යං බලං රාජ්ඤාං බ්රහ්මණෝ බ්රහ්මවිද්බලී ।
රූපයෞවනමාධුර්යං ස්ත්රීණාං බලමනුත්තමම් ॥ 11 ॥

නාත්යංතං සරලෛර්භාව්යං ගත්වා පශ්ය වනස්ථලීම් ।
ඡිද්යංතේ සරලාස්තත්ර කුබ්ජාස්තිෂ්ඨංති පාදපාඃ ॥ 12 ॥

යත්රෝදකං තත්ර වසංති හංසා-
ස්තථෛව ශුෂ්කං පරිවර්ජයංති ।
න හංසතුල්යේන නරේණ භාව්යං
පුනස්ත්යජංතඃ පුනරාශ්රයංතේ ॥ 13 ॥

උපාර්ජිතානාං විත්තානාං ත්යාග ඒව හි රක්ෂණම් ।
තඩාගෝදරසංස්ථානාං පරීවාහ ඉවාංභසාම් ॥ 14 ॥

යස්යාර්ථාස්තස්ය මිත්රාණි යස්යාර්ථාස්තස්ය බාංධවාඃ ।
යස්යාර්ථාඃ ස පුමාංල්ලෝකේ යස්යාර්ථාඃ ස ච පංඩිතඃ ॥ 15 ॥

ස්වර්ගස්ථිතානාමිහ ජීවලෝකේ
චත්වාරි චිහ්නානි වසංති දේහේ ।
දානප්රසංගෝ මධුරා ච වාණී
දේවාර්චනං බ්රාහ්මණතර්පණං ච ॥ 16 ॥

අත්යංතකෝපඃ කටුකා ච වාණී
දරිද්රතා ච ස්වජනේෂු වෛරම් ।
නීචප්රසංගඃ කුලහීනසේවා
චිහ්නානි දේහේ නරකස්ථිතානාම් ॥ 17 ॥

ගම්යතේ යදි මෘගේංද්රමංදිරං
ලභ්යතේ කරිකපාලමෞක්තිකම් ।
ජංබුකාලයගතේ ච ප්රාප්යතේ
වත්සපුච්ඡඛරචර්මඛංඩනම් ॥ 18 ॥

ශුනඃ පුච්ඡමිව ව්යර්ථං ජීවිතං විද්යයා විනා ।
න ගුහ්යගෝපනේ ශක්තං න ච දංශනිවාරණේ ॥ 19 ॥

වාචාං ශෞචං ච මනසඃ ශෞචමිංද්රියනිග්රහඃ ।
සර්වභූතදයාශෞචමේතච්ඡෞචං පරාර්ථිනාම් ॥ 20 ॥

පුෂ්පේ ගංධං තිලේ තෛලං කාෂ්ඨේऽග්නිං පයසි ඝෘතම් ।
ඉක්ෂෞ ගුඩං තථා දේහේ පශ්යාත්මානං විවේකතඃ ॥ 21 ॥