ಅರ್ಜುನ ಉವಾಚ ।
ನಮಸ್ತೇ ಸಿದ್ಧಸೇನಾನಿ ಆರ್ಯೇ ಮನ್ದರವಾಸಿನಿ ।
ಕುಮಾರಿ ಕಾಳಿ ಕಾಪಾಲಿ ಕಪಿಲೇ ಕೃಷ್ಣಪಿಙ್ಗಳೇ ॥ 1 ॥
ಭದ್ರಕಾಳಿ ನಮಸ್ತುಭ್ಯಂ ಮಹಾಕಾಳಿ ನಮೋಽಸ್ತು ತೇ ।
ಚಣ್ಡಿ ಚಣ್ಡೇ ನಮಸ್ತುಭ್ಯಂ ತಾರಿಣಿ ವರವರ್ಣಿನಿ ॥ 2 ॥
ಕಾತ್ಯಾಯನಿ ಮಹಾಭಾಗೇ ಕರಾಳಿ ವಿಜಯೇ ಜಯೇ ।
ಶಿಖಿಪಿಞ್ಛಧ್ವಜಧರೇ ನಾನಾಭರಣಭೂಷಿತೇ ॥ 3 ॥
ಅಟ್ಟಶೂಲಪ್ರಹರಣೇ ಖಡ್ಗಖೇಟಕಧಾರಿಣಿ ।
ಗೋಪೇನ್ದ್ರಸ್ಯಾನುಜೇ ಜ್ಯೇಷ್ಠೇ ನನ್ದಗೋಪಕುಲೋದ್ಭವೇ ॥ 4 ॥
ಮಹಿಷಾಸೃಕ್ಪ್ರಿಯೇ ನಿತ್ಯಂ ಕೌಶಿಕಿ ಪೀತವಾಸಿನಿ ।
ಅಟ್ಟಹಾಸೇ ಕೋಕಮುಖೇ ನಮಸ್ತೇಽಸ್ತು ರಣಪ್ರಿಯೇ ॥ 5 ॥
ಉಮೇ ಶಾಕಮ್ಭರಿ ಶ್ವೇತೇ ಕೃಷ್ಣೇ ಕೈಟಭನಾಶಿನಿ ।
ಹಿರಣ್ಯಾಕ್ಷಿ ವಿರೂಪಾಕ್ಷಿ ಸುಧೂಮ್ರಾಕ್ಷಿ ನಮೋಽಸ್ತು ತೇ ॥ 6 ॥
ವೇದಶ್ರುತಿಮಹಾಪುಣ್ಯೇ ಬ್ರಹ್ಮಣ್ಯೇ ಜಾತವೇದಸಿ ।
ಜಮ್ಬೂಕಟಕಚೈತ್ಯೇಷು ನಿತ್ಯಂ ಸನ್ನಿಹಿತಾಲಯೇ ॥ 7 ॥
ತ್ವಂ ಬ್ರಹ್ಮವಿದ್ಯಾ ವಿದ್ಯಾನಾಂ ಮಹಾನಿದ್ರಾ ಚ ದೇಹಿನಾಮ್ ।
ಸ್ಕನ್ದಮಾತರ್ಭಗವತಿ ದುರ್ಗೇ ಕಾನ್ತಾರವಾಸಿನಿ ॥ 8 ॥
ಸ್ವಾಹಾಕಾರಃ ಸ್ವಧಾ ಚೈವ ಕಲಾ ಕಾಷ್ಠಾ ಸರಸ್ವತೀ ।
ಸಾವಿತ್ರೀ ವೇದಮಾತಾ ಚ ತಥಾ ವೇದಾನ್ತ ಉಚ್ಯತೇ ॥ 9 ॥
ಸ್ತುತಾಸಿ ತ್ವಂ ಮಹಾದೇವಿ ವಿಶುದ್ಧೇನಾನ್ತರಾತ್ಮನಾ ।
ಜಯೋ ಭವತು ಮೇ ನಿತ್ಯಂ ತ್ವತ್ಪ್ರಸಾದಾದ್ರಣಾಜಿರೇ ॥ 10 ॥
ಕಾನ್ತಾರಭಯದುರ್ಗೇಷು ಭಕ್ತಾನಾಂ ಚಾಲಯೇಷು ಚ ।
ನಿತ್ಯಂ ವಸಸಿ ಪಾತಾಳೇ ಯುದ್ಧೇ ಜಯಸಿ ದಾನವಾನ್ ॥ 11 ॥
ತ್ವಂ ಜಮ್ಭನೀ ಮೋಹಿನೀ ಚ ಮಾಯಾ ಹ್ರೀಃ ಶ್ರೀಸ್ತಥೈವ ಚ ।
ಸನ್ಧ್ಯಾ ಪ್ರಭಾವತೀ ಚೈವ ಸಾವಿತ್ರೀ ಜನನೀ ತಥಾ ॥ 12 ॥
ತುಷ್ಟಿಃ ಪುಷ್ಟಿರ್ಧೃತಿರ್ದೀಪ್ತಿಶ್ಚನ್ದ್ರಾದಿತ್ಯವಿವರ್ಧಿನೀ ।
ಭೂತಿರ್ಭೂತಿಮತಾಂ ಸಙ್ಖ್ಯೇ ವೀಕ್ಷ್ಯಸೇ ಸಿದ್ಧಚಾರಣೈಃ ॥ 13 ॥
ಇತಿ ಶ್ರೀಮನ್ಮಹಾಭಾರತೇ ಭೀಷ್ಮಪರ್ವಣಿ ತ್ರಯೋವಿಂಶೋಽಧ್ಯಾಯೇ ಅರ್ಜುನ ಕೃತ ಶ್ರೀ ದುರ್ಗಾ ಸ್ತೋತ್ರಮ್ ।
